2 Wakolinto 11 - I CILAGANE CIPYA 1991

Pawulo ne watumwa wo wulambi

¹ Mwali munghangalilile hadodo du, hamba niwe nha nili mulele ku lubavu lunji! Heya, ale munghangalilile ta hadodo.

² Ane nha nghumuwonelenyi wivu, ninga wivu wa kuli Mulungu, hambi anye nha mwihwanile u muhinza musindile mono nimubanyiye u mulume monga du, nayo yo Kilisito.

³ Ninga nghogopa yilece kuwa nhe lizoka lyono ko wusugu walyo wo wulambi, likamukoca Hawa, i mahweso genyu gadahile kwajilizwa no kuwuleka u wihuwilwa wenyu we mbeka kuli Kilisito.

⁴ Hambi nye nha mukumukangalila u munhu wo wose mono kokuza no kumuganula Yesu mono yesimajiye na yulya mono camuganula, kanyhi mukubocela muhe no luganuzi vyono visimajiliye lukulu no Muhe no Luganuzi vyono mwayibocela kulawa kuliʼse.

⁵ Si nghwihwesa vyono ane nili mudodo si nha wawo “I Watumwa wenyu wono wakumucile!”

⁶ Lunji nowa sina wunghula wo wulolosa milonjele, ninga u wumanye awo langa nina nawo, nenghani yiyi cayilajila calinze kuliʼnye hanhu ho hose, na mu vipango vyose.

⁷ Hamba si namudayenyi musahala wo wose lono namuganulilenyi u Luganuzi Luswanu lo Mulungu, langa nenenenyheza ho sume kumwinulenyi anye. Alo nanoza vibi?

⁸ Lono netumaga mulimo muliʼnye, i visakwa vyangu nha vyalawaga mu makanisa ganji. Nha cinji wo wutya nawasolela sawo yawo, ho sume kumwitumamilenyi anye.

⁹ Na lono nali nanye, hamba si namugaza munhu wo wose so wusaka pesa, langa i wandugu zetu wono wakalawa Makedoniya, wo wandetela vyose vyono nasakaga. Kanyhi nelanjilila muno muno ho ndece kuwa mutegulo kuliʼnye, mu nzila yo yose yilya, na nojendelela du kunoza nha vivyo.

¹⁰ Nane nghwihuwiziza mu mbeka ya Kilisito yono yili muliʼne, nha vyono hasina cono cosuma kunyimila mu wilumbe wangu so nghani yiyi hanhu ho hose mu Akaya.

¹¹ Alo nhawule nghulonga nha vivi? Vyono si nimwendilenyi nyenye? Ninga Mulungu yamanyile vyono nimwendilenyi nyenye muno!

¹² Nojendelela kwituma du nha vyono nghwituma alu, ho ndece kuwapela cilejeho awalya wono wakusaka kutuga icilejeho co kwilumbila nha vyono ati wakwituma mulimo nha sese.

¹³ Hambi wawo nha wo watumwa wo wulambi, wetumami wo wukonji, wono wakwinoza nha watumwa wa Kilisito.

¹⁴ Kanyhi hamba si nghani ya wizine, hamba na Setani mweneco nha kenozaga kawa nha malayika wo wuzelu!

¹⁵ Holeka si nghani mbaha yaye, hono wawo i wetumami wakwe wenoze nha wetumami wo wilingʼano. Ninga mudumo wawo, wocituga cico cono ciwanojeye vyono genhe metumo gawo.

U wugazwe wa Pawulo nha mutumwa

¹⁶ Kanyhi nghutya, Munhu yalece kumbona ane nha nili mulele. Ninga hono munyihweseze nha vivyo, ale munozaje nha nili mulele nha vivyo du, nane ho nicituje co kwilumbila hadodo vivi.

¹⁷ Naco cono nghucilonga aluno, si nghulonga cono yandajiliza Muwaha, hambi mu nghani yiyi yo wilumbe, ane nghuyilonga du nha nili mulele.

¹⁸ Alu vyono kowali wenji wono wakwilumbila za mononze, ale nane nhavivyo nokwilumba.

¹⁹ Anye muli we mahala, na holeka mukuwakangalila i walele!

²⁰ Mukusuma kumukangalilila sunga no munhu mono yakumunozenyi muwe wawanda, u munhu mono ya kumusolelenyi vinhu vyenyu, mono yakumwiwonelenyi, mono yakumubedegalenyi no kumutowenyi ku wusu!

²¹ Nane nghuvumilila cevu, vyono ase cali cisoceye mu wituma zizi zose. Ale du kanyhi, na yiwe vyono yowa, ninga hono hawe hoyuli yunji wo wose mono yakwijelela kwilumbila muli cinji co cose, alu nghulonga nha munhu mulele, nane nokwijelela nha vivyo.

²² Wule, alo wene Wahebelaniya? Ale nanene nha vivyo. Hamba wene Wayisilayeli Io? Nane nha vivyo. Wene mbeyu ya Abulahamu? Hamba na nene.

²³ Alo iwene wetumami wa Kilisito? Na nene ye, alu nhondo neza kulonga cimanghalukwale, ane nili mwitumami wa Kilisito kuciza wene. Ane netuma mulimo muzito muno muno, nadindilwa mu jela kali kenji muno, nghatowangwa kali kenji, sunga nghawa nili behi no kufwa kali kenji.

²⁴ Kali kahano nghakunwa viboko vivilya makumi madatu ne cenda ne Wayahudi.

²⁵ Nakunangwa ne viboko kadatu, nghabogolangwa ne mabwe kamonga, kanyhi nghabenecelwa ne nghalawa mwilenga kali kadatu, na kamonga nekala mumo mu malenga cilo cose sunga wukela, kanyhi nghaswa muno misi yose.

²⁶ Kenji na kenji mu mihinzo yangu netangʼanilaga na mbali nyinji, zimbali zo wulapuce we malenga mu makolongo, zimbali ze malimu makali, zimbali ze wahizi, zimbali zono zalawaga kuli wanyawusi wayangu Wayahudi, na zono zalawaga kuli wanhu we makungugo ganji, ne zimbali za mu makaya mawaha, zimbali za mu mbago, zimbali za mwilenga, ne zimbali zono zikulawa kuli wandugu wo wulambi!

²⁷ Netuma mulimo hamonga ne magayo, nekala meso hamba kugona cilo cose kali kenji, nghadabuka no kuwona nyhilu. Nghaleka kulya, nghekala mu mbeho nghali, akuno sina myenda.

²⁸ Ninga hamonga na zinji nyinji, kocili cono cikumvuna nhondo zose, nha cinji u mulimo we makanisa gose.

²⁹ Hono hoyuli yunji musocele, ale nane nhi musocele nha vivyo, na munhu wo wose hono yakwejelwe mu wubi, nane nghutuga wukalale muno.

³⁰ Holeka hono yiwe yinojeye nilumbe, ale nokwilumbila wusocele wangu.

³¹ U Mulungu Sogo yo Muwaha Yesu, ilitagwa lyakwe lilugutwe cibitilila! U Mwene yamanyile vyono si nghulonga wulambi.

³² Lono nali Damesiki, u muwaha we yisi, mono yali yali hasi yo mutemi Aleta, yalidimaga likaya lya Damesiki, ho yasume kunyibata.

³³ Ninga nghatimizizwa mu nhoto mbaha, nghakozwa mwidilisha sunga ko kunze, holeka nghatiga mu miwoko yakwe.