2 Wakolinto 1 - I CILAGANE CIPYA 1991

¹ Kulawa kuli nene Pawulo no mutumwa wa Kilisito Yesu so wuhile wo Mulungu no ndugu yetu Timoteyo. Cikumwandicilenyi anye mono muli we likanisa lyo Mulungu lyono lili kuko ku Kolinto, hamonga ne wanhu wose wo Mulungu we hanhu hose mu Akaya.

² Ilihewa no mulamu vyono vikulawa kuli Mulungu u Sogo Yetu na kuli u Muwaha wetu Yesu Kilisito, viweze muli nyenye.

Pawulo yakumupela lilumbo u Mulungu

³ Yalumbwe u Mulungu u Sogo yo Mutwa wetu Yesu Kilisito, Baba mono yena lusungu, kanyhi yo Mulungu mono kaletaga u lutuzo lose.

⁴ Mwene yo kacitazaga ase mu wugazice wetu wose, nase ho cisume kuwatuza wanji mu wugazice wose mu nzila yo lutuzo lulo lono cikulubocela kulawa kuli Mulungu.

⁵ Heya, mu nghango ye magayo ga Kilisito vyono gakucila muliʼse, ale mu nghango yiyo nase mo cikucilila kusindamikwa nayo.

⁶ Holeka hono ciwe cikutuga wugazice, ale cikugazika ku soko yo wusindamikwe ne mhonelo yenyu. Na kanyhi lono cikusindamikwa, cikusindamikwa ho nanye mutuje wusindamikwe, ne vilungo vyo wukangalila, magazo gaga gono sunga na sese cikagakangalila.

⁷ Holeka uwitumbilo wetu wa mulinye, wusikame muno muno, kanyhi cimanyile vyono, hono muhanje nase i magazo getu, ale vyo mohanga no wusindamice wetu nha vivyo.

⁸ Nye nyo wandugu zetu, ase cikusaka kumumanyizenyi ze, magazo gono gacagana ku yisi ya Asiya, i magayo gago gali mawaha muno, sunga gakaciwusiza no witumbilo wose wo kwikala cili womi.

⁹ Heya, cikawa nha wanhu mono ciwiciywe kuwulagwa. Ninga zizi zose zejela ho cisume kwiyijiza vyono yicinojeye cilece kwiyitumbila co weneco langa cimwitumbilo Mulungu, mono kawazukulaga i wafu.

¹⁰ U Mwene yaciponya mu mbali mbaha ye lifwa, kanyhi yakali yakujendelela kuciponya, nase cimuwiciye u witumbilo wetu du, nha vyono kajendelelaga kanyhi kuciponya,

¹¹ nha vyono mukucitaza so wulombe wenyu. Holeka u wulombe wenyu wono mukucilombela muno, wopitulwa, no Mulungu kocilugutiza, na wanhu wenji wokwinula i mazi gawo wawe kumulumbo Mulungu kusoko yetu.

U wukawanice wo muhinzo wa Pawulo

¹² Ase cikwilumbila cinhu cimonga du, vyono viselinji vyetu vikucihomelela vyono muwikale wetu wa mono yinze yiyino na komuno muliʼnye, cekala ko winenenyhezi wose hamonga no wele wa mu nhumbula wono wukulawa kuli Mulungu, hamba si catongwa ne lihala lye cimunhumunhu, langa catongwa ne lihewa lyo Mulungu.

¹³ Holeka cikumwandicilenyi nanye izinghani zono mosuma kuzisoma no kuzizuka.

¹⁴ Ninga hamba yiwe aluno mukucizuka hadodo du, nitumbiye vyono hanyuma mocizucila lukulu, Mwizuwa alilya lyo Muwaha wetu Yesu, ho muze musume kwilumbila muli sese, nha vyono nase colokwilumbila muli nyenye.

¹⁵ Holeka kuso witumbilo wuwo, nahilaga kwamula kuza kwenyu ho mutuje ihewa lye kejete.

¹⁶ Nahilaga ngholele kwenyu lono nghubita ku Makedoniya, na lono nghuwuya nha vivyo, ho nhuje u wutazi wenyu so muhinzo wangu wo kubita ku Wuyahudi.

¹⁷ Wulenyi! mukwihwesa lono nahimaga zizo, nahimaga nha munhu mono yasina wusimyo? Mukwihwesa ane nghunozeza u wulamuzi wangu mu mahweso ge cimunhumunhu nha cinji nghutya “Heya” ne “Ngʼo” ho baho hose?

¹⁸ Ninga u Mulungu yo we mbeka yose, holeka azilya zono camulonjelenyi anye, si zali nghani za “Heya” ne “Ngʼo.”

¹⁹ Vyono Kilisito Yesu, u Mwana wo Mulungu, mono ane na Silivano na Timoteyo camuganulilenyi anye, si yali munhu wa “Heya” na “Ngʼo,” langa u mwene yo “Heya” yo Mulungu nhondo zose.

²⁰ Ku soko vyono muli mwene u wihuwizo wose wo Mulungu waweza “Heya,” holeka ku soko yo kumukumyo Mulungu.

²¹ U Mulungu mweneco yo kacisikamyaga ase hamonga na nyenye mu wilunza na Kilisito, kanyhi yo kacisiwanulaga,

²² kanyhi yo yaciwicila mutozo wo kuwela cili sawo yakwe mweneco, kanyhi yakacipela no Muhe Mono Yelile mu zinhumbula zetu, ho ciwe co cipingo ca zose zono yaciwiciye.

²³ No Mulungu yo muhomelezi wangu, mwene yo yayimanyile i nhumbula yangu! Ane, sinawuyajila kanyhi kuza ku Kolinto, ku soko du yo kumuwonelenyi lusungu.

²⁴ Ase si cikusaka cimutemenyi mu wihuwilo wenyu, anye mono mwakondya kuwa mukamile mu wihuwilo wenyu. Langa yicinojeye, ciwitume u mulimo hamonga nanye, ku soko ye nyemo yenyu.