2 Timoteyo 4 - I CILAGANE CIPYA 1991

¹ Nane nghukukongʼonheza hali Mulungu na hali Kilisito Yesu, mono kowalingʼaniza wanhu i womi ne wafu, na ku soko vyono yakuza kutema nha Mutemi,

² holeka wuyiganulaje nghani yiyo, wiyohaje du kuyiganula (mu cipango cono cinojeye, hamba yiwe mu cipango cono si cinojeye), kalipile no kulanjiza, kanyhi wuwaswaswanizaje wanhu wose, akuno wukuwejiza ko wukangalizi wose.

³ I lipango lyokuza lyono wanhu si wolokwenda kugahuliciza i mejizo ge mbeka, langa wene wokwenda kutyatya masulumizi gawo weneco, no kwilundila wejizi wenji wono wowalonjela zinghani zizo du zono i makutu gawo gowa gewikanize kuwuhulicize.

⁴ Hamba si wokwendela lukulu kuyihulika imbeka, langa wokwenda kuzihulicila zisimo zo wulambi.

⁵ Agwe, ninga wikalaje meso muli zose, wukangalile magazo, witumaje u mulimo wo muganula Luganuzi Luswanu, uwufisilizizaje lukulu u witumami wako.

⁶ Ninga ane ku lubavu lwangu, niwikanize du, ku wulavywa niwe ikumbiko, ne lidaha lyo wufwe wangu nha lyasejelela.

⁷ Hidimbala muno mu wisumanize, muhinzo niwumala viswanu, sunga no wihuwilo nawo niwukamisa.

⁸ Alu yisigaye yo wubocela i cipegwa co wisumanize wangu, ku soko ye mikalile yo wilingʼano, i cipegwa cono Muwaha Mulingʼanizi we lingʼani, kolomhela Mwizuwa lilya, kanyhi hamba si nene du nili wene, langa na wose wono wakulanjilila ko wendo i mazizo gakwe.

I malajilizo

⁹ Wuhidimbale kuza kuliʼne mbela.

¹⁰ Hambi Dema nha yandeka, mwene yenda ze yinze ya lulu, yakabita ku Tesalonike. Kileseke nayo yabita ku Galatiya, na Tito yabita ku Dalumatiya.

¹¹ Alu yo Luka yali wene du mono yali hamonga nane bahano. Wumusolaje Maluko muzane nayo, hambi nha kosuma kumheloʼtazi mu mulimo wangu.

¹² Tukiko nayo, namutuma akulya ku Efeso.

¹³ Nagwe kolo wukuza, wundetelezezaje ne likoti lyangu lyono nalileka kwa Kalupo ku Tulowa, undetelaje ne vitabu vivilya, ko muno avilya vyono vinozezwe nyhingo.

¹⁴ Ayulya u mutyani we vyuma vidunghu mono kacemagwa Alekizanda, yanhendela vibi muno muno, ningo Muwaha komulipa nha vyono genhe metumo gakwe.

¹⁵ Ale, wilanjililaje kuli mwene, hambi nha yayibezaga inghani yetu ko wukali muno.

¹⁶ Ha witetele wangu wulongozi, hasina hamba munhu monga mono yema ku lubavu lwangu, langa wose wandeka. Ninga Mulungu yalece kuwawalila wubi wawo!

¹⁷ Ningo Muwaha yali yali hamonga nane, yamhela vilungo, sunga nghasuma kuyiganula inghani nha vyono yinha, i wanhu we makungugo ho wayihulice, kanyhi nghaponywa mu walingʼanizwe wo kuwulagwa.

¹⁸ Holeka u Muwaha si koleka kumhonya muli makani gose i mabi, kanyhi konghamisa sunga ko ku wutemi wakwe wa ku wulanga. Ale, kuli Mwene, lweze lukumyo cibitilila ne cibitilila! Heya.

U mulamu we ndumilizo

¹⁹ Ale, wuwalamusaje wa Pilisika na Akila, hamonga ne mhuga ya Onesifolo.

²⁰ Elasito yasigala ku Kolinto, nayo Tulofimo namuleka ku Mileto, vyono yali yatamigwe.

²¹ Ale wusimbilile kuzo kwangu lono lipango lye cinyuli likali sinafika. Ewubulo, Pude, Lino, na Kilawudiya wose wakukulamusa, sunga na we zindugu wanji, wose wakukulamusa.

²² Ale, du, u Muwaha yawezane nagwe mu nhumbula yako. Ne lihewa liwezane nanye wose.