2 Petelo 1 - I CILAGANE CIPYA 1991

¹ Ane yo nene Simoni Petelo, u mwitumami no mutumwa wa Yesu Kilisito. Nghumwandicilenyi nyenye mono so wuswanu wo Mulungu wetu, hamonga no Mukombozi Yesu Kilisito, mwapegwa u wihuwilo wuwulya wo wuguzi wukamu wono capegwa na sese.

² Ilihewa no Mulamu vyeze kuliʼnye mu wumumanya Mulungu na Yesu Kilisito Mutwa wetu.

Mwacemwa no kuhagulwa no Mulungu

³ Mu vilungo vyakwe vyo wulungu, u Mulungu yacipela vyose vyono cisakaga, ho cisume kwikala mu mikalile yo kumogopo Mulungu, no kumumanya mwene mono yacicema ho ciwuhanje ulukumyo no wuswanu wakwe mweneco.

⁴ Hambi muli zizo nha yakondya kucipela vipegwa viwaha vyo wuguzi wukamu vyono yacihuwiziza, na ku so vipegwa vivyo, ho musume kuhanga u wuwe wakwe wo wulungu.

⁵ Holeka mupiligale muno konjelela wuswanu wo wihuwilo wenyu, kanyhi monjeleze no wizuce mu wuswanu wenyu,

⁶ mu wizuce namo monjeleze wiyimile, na mu wiyimile namo monjeleze ngola, mu ngola namo monjeleze wogopo Mulungu.

⁷ Mu wogopo Mulungu namo, monjeleze wenda ndugu, na mu wenda ndugu namo monjeleze wendo.

⁸ Na kolo mukuwa no winji wa zizi zose, zomunozenyi muwe muli wetumi, no kutuga chambuzi mu wumumanya Mutwa wetu Yesu Kilisito.

⁹ Ninga munhu mono yazisina zizi zose, yaweza mubofu hambi nha si yakusuma kuwona, kanyhi yasemwa vyono yakondya kukwemwa u wubi wakwe we katali.

¹⁰ Ale, holeka, wandugu zangu, piligalenyi muno muno kulunoza lulo ulucemo lwenyu lono mwacemelwa no Mulungu, luwe nghani ye cibitilila mu mikalile yenyu, na hono mwikale nha vivyo, simosuma kuwulecela lukulu uwihuwilo wenyu.

¹¹ Na yiyo yo yoleka mosuma kupegwa wilingʼano wono wukwilaniciye wo kwinjliila mu wutemi wo Mutwa wetu no Mukombozi wetu Yesu Kilisito.

¹² Holeka nane nojendelela kumukumbucizenyi nhondo zose zinghani zizi, hamba muwe mwakondya kuzimanya, kanyhi mukamile mu mbeka yono mwayibocela.

¹³ Nghwihwesa yowa nghani swanu kuliʼne mu mapango gose gono nowa nghali nili mumi kononze, njendelele kumusikamyenyi no kumukumbucizenyi ze zinghani zizi.

¹⁴ Hambi nha manyile vyono naza behi kuwuwika mu citenjelo umuwili wangu wuwu wono wufwizaga, nha vyono u Muwaha yanonjela calinze.

¹⁵ Holeka nopiligala kumupelenyi nzila yo kuzikumbucilila zinghani zizi nhondo zose, hamba lono niwe nakondya kufwa.

Cikawuwona ulukumyo lwa Kilisito

¹⁶ Mu vilo vyono cawejizenyi ze nyiza yakwe mbaha u Mutwa wetu Yesu Kilisito, sicatyatya zisimo ze cibwete bwete zono zisina nhunizo yo yose. Ase cikawuwona ulukumyo lwakwe na meso getu co weneco.

¹⁷ Ase cali baho mu cipango cono yapelelwa icogopo no kukumywa no Mulungu Sogo yo munhu, lono lizi likamuziza kulawa kuli mwene, mono yo Lukumyo Luwaha, likutya, “Ayu yo Mwanangu mwendece mono nyendezwe nayo.”

¹⁸ Kanyhi, sese co weneco cikalihulika lizi lilyo kulawa ku wulanga lono cali cili hamonga nayo kucanyha ye litunda lililya lyono lyelile.

¹⁹ Kanyhi sunga ne zinghani ze wawizi zikuyihomelela nghani yiyi nanye mukunoza viswanu hono mukuyibata, hambi nha yinha tala yono yikumulika hanhu hatitu sunga lizuwa lililya kolo likusomoza, no wuzelu we nyelezi yimwacinghunghu kolo wukubulila mu zinhumbula zenyu.

²⁰ Ninga hamonga na zizo, mukumbucile vyono, hasina munhu wo wose mono kosuma kulolosa mweneco zo wuwizi wono wuli mu Mandiko Gono Gelile.

²¹ Hambi nha hasina nghani yo wuwile yono yina ndawililo ye cimunhumunhu, langa iwanhu wayilonga inghani yo Mulungu nha vyono watongagwa no Muhe Mono Yelile.