1 Wakolinto 9 - I CILAGANE CIPYA 1991

I lingʼani no mulimo we watumwa

¹ Alu ane si nili mwelecele? Hamba lunji si nili mutumwa? Hamba lunji si namuwona Yesu u Muwaha wetu? Alu anye nanye ma, si yo nyenye mono muli mana go mulimo wangu ku soko yo Muwaha?

² Hamba niwe si nili mutumwa kuli wanhu wanji, ninga ane nili mutumwa kulinye. Anye nyenye, wo wuhomelezi wo wutumwa wangu, ku soko yo wilunze wenyu no Muwaha.

³ Ninga i nghani yangu kuli awalya wono wakumbeza nha yoyi,

⁴ Wulenyi, alu ase cisina i lingʼani yo kupegwa ndigwa ne malenga ku soko yo mulimo wetu wono cikwituma?

⁵ Hamba ase cisina lingʼani yo kujendana mu muhinzo, hamonga no munhu wo wose we cicekulu nha vyono wanozaga i watumwa wanji ne wanduguze wo Muwaha sunga na Petelo?

⁶ Hamba yo nene du hamonga na Balanaba, mono yicinojeye camule citume milimo, ho cisume kwiyitujlia visakwa vyetu lo?

⁷ Hamba alo musilikaleci mono kelipilaga mweneco sowitume wakwe? Hamba nani mwene mono kalimaga u mugunda wakwe we mizabibu kanyhi ho yalece kulya i mikalo yayo? Hamba yo nani mono kadimaga mitugo, kanyhi ho yalece kungʼwa i mele gazo?

⁸ Wulenyi, anye mukwihwesa ane nghuzilonjela zizi mu nzila ye cimunhumunhu du? Hamba wulenyi, no Wulajilize nawo, si wukulonga nha vivyo?

⁹ Hambi mu Wulajilize wa Musa nha yikutya nhavi, “Wulece kuyiwopa ngʼombe ku mulomo wayo, mwipango lono yikukutaza kutwanga wuhemba mucuga.” Alu baho wo wutya u Mulungu yakulonga mbi i zingʼombe?

¹⁰ Hamba yalongaga ku soko yetu, lono yalonjela nha vivyo? Na mbeka azi zandikwa ku soko yetu sese, ku soko vyono ayulya mono yakulima, na ayulya mono yakududula, wose vyono wejete nha wanojeye lingʼani yo kuwa no witumbilo, vyono wotuga.

¹¹ Alu hono ase cahadika mbeyu ye cimuhe muli nyenye, hambi yowa nghani ya wizine, hono cidudule muli nyenye cambuzi ca ze ciyinzeyinze?

¹² Alu hono wawe wanji wena lingʼani yo kuzilanjilila zizo ku wulawa muli nyenye, wulenyi, ase ma, cisina lingʼani kuciza wene wawo? Ninga hamba nha vivyo, ase si cayitumamila lingʼani yiyo. Langa ase cakangalila du muli vyose, ho cilece kuluwicila cikobazo co cose cilya, u Luganuzi Luswanu lwa Kilisito.

¹³ Alo si mumanyile vyono, wono wetumamaga mu Nyumba yo Mulungu, watugaga ndigwa yawo mu wulawa mu Nyumba yo Mulungu, na vyono kanyhi, nawo wono walavizyaga vilavya vyawo mu cikumbicilo watugaga nawo lifungu lye vilavya vivyo?

¹⁴ Nayo u Muwaha yalajiliza nha vivyo du, vyono nawo i waganula u Luganuzi Luswanu, yiwanojeye nawo watuje indigwa yawo kuwulawa mu Luganuzi Luswanu.

¹⁵ Ninga alu ane si netumamila hamba monga ya muli zizo. Hamba si nghwandika ho niyituje lingʼani hamba monga ya muli zizo, ninga kuliʼne, yali yiwe yili ciba hono nali nifwe, si nho kumunoza munhu wo wose yawone nha vyono nghwilumba bwete.

¹⁶ Na hono yiwe ane nghuluganula u Luganuzi Luswanu, ayo yo si nghani yo kwilumbila, langa wo mulimo wangu du, wono napegwa. Holeka, woyi he kuli ne, hono ndece kuluganula Luganuzi Luswanu!

¹⁷ Na hono nali niwe neyihagulila nene no mweneco u mulimo wuwu, haco nali niwe nanjiliye ho ndipwe musahala, ninga alu vyono nghuwituma u mulimo wuwu nha munhu mono nojeye niwitume, alu baho wo wutya, wo mulimo wangu du wono napegwa niwitume.

¹⁸ Alu u musahala wangu ma, co cici? U musahala wanguʼne, co cicino cilejeho cono napegwa co kuluganula bwete u Luganuzi Luswanu, hamba kudaya lingʼani yo yose yono yinojeye so kuluganula u Luganuzi Luswanu.

¹⁹ Holeka hamba ane niwe si nili muwanda wa munhu wo wose, ninga nenoza ho niwe muwanda wa wanhu wose, ho sume kumutujila Kilisito wanhu wenji nha vyono yosumika.

²⁰ Ku Wayahudi, nghawa nha Muyahudi ho niwatuje i Wayahudi, hamba yiwe ane no mweneco si nili hasi yo Wulajilize, ninga nghawa nha munhu mono yali hasi yo Wulajilize kuli wene, ho niwatuje wene wono wali hasi yo Wulajilize.

²¹ Na kuli awalya nawo wono wali kunze yo Wulajilize, nako nane nghuwa nhe weneco, kunze yo Wulajilize, ho sume kuwatuga wawo nawo wono wali kunze yo Wulajilize. Ninga si vyono ane no mweneco si niwutyatyaga u Wulajilize wo Mulungu, hambi nha mbopigwene lilajilizo lya Kilisito.

²² Kuli awalya wono wasoceye, ane nane nghawa nha mono yasoceye, ho niwatuje wawo wene wono wasoceye. Nghuwega wanhu wose vyono wenha, ho sume kuwaponezya mu nzila yoyose wanji wa muli wene.

²³ Nane nghuzinoza zizi zose ku soko yo Luganuzi Luswanu, ho sume kuhanga u wulugutwe wayo.

²⁴ Alu si mumanyile vyono mu ciwanza ce midawalo, hamba wawe wawalya wono wakwisumaniza u lumangho, wose wakumangha, ninga hakuwezaga ho yuli yumonga du mono yakupegwa zawadi?

²⁵ I wedawazi wose, wewikanizizaga mu nzila yo wizoweleze, hamonga ne cogopo cose, ninga hamba nha vivyo, wene wanozaga nha vivyo, ho watuje u mukumbo wono wuhodanjikaga! Ninga ase cikunoza nha vivyo, ho cituje u mukumbo wono wikalaga cibitilila.

²⁶ Ale, nane nha vivyo vyo manghaga, akuno nina no wuhile wo wusume, holeka nane nihwanile nho mutowa zingumi, mono si katowaga zingumi mu mbeho caka du.

²⁷ Nane nghuwuzowelezeza u muwili wangu mu nzila ye magayo, no kuwunoza ho wuwe wuceye, nene no mweneco ho nize ndece kulemwa, lono kumbe nakondya kuwaganulila wanji.