1 Wakolinto 5 - I CILAGANE CIPYA 1991

U wula wilingʼono mu Kanisa

¹ Ko zili nghani za mbeka, vyono, mowuli wusenyha muli nyenye, kanyhi no wusenyha wuwo wono mwina nawo, wo wusenyha wubi muno muno, wono wukali hamba si wunawa muli wanhu wono wakali si namumanya Mulungu. Nonjelwa vyono u muyenyu yunji, ati yekaye no mugolece wo sogwe!

² Alu mosuma nhawule kwilumba? Mbeka, yali yinojeye kuliʼnye kulila, na yuyo mono yetumile zizo, yinojeye yawuswe mulinye.

³ Nane kulubavu lwangu, hamba niwe nili kutali nanye mu muwili, ninga hamba nha vivyo, mu muhe nili baho hamonga nanye, na vyono kotya nha nili baho, holeka nakondya kumulingʼaniza u munhu yuyo, mono yetumile zinghani zizo ze cevu.

⁴ Holeka lono mweza kwihanguliziza hamonga mwitagwa lyo Muwaha Yesu, nane lono kotya nili hamonga nanye mu Muhe, kwe vilungo vyo Muwaha wetu Yesu,

⁵ ale, mumupelaje Setani u munhu yuyo, u muwili wakwe ho wuhodangwe, ninga nhumbula yakwe, ho yisume kuponywa, Mwizuwa alilya lyo Muwaha.

⁶ Nye wayangu, u wilumbe wenyu wuwo, si wuswanu hamba hadodo! Alu si mumanyile vyono cisase cidodo du, cikuwa kutajila cisase mwibumundwa lyose lyo wusaje?

⁷ Holeka mwiyezaje no kutajila lukulu cisase ce katali, ho muwe ibumundwa yipya lyono lisina cisase, nha vyono yinojeye kulinye muwe. Hambi Kilisito, i Pasaka yetu, nha yakondya kulavywa ikumbiko.

⁸ Holeka cinoze sikukuu mbaha, ninga yilece kuwa mu cisase acilya ce katali, i cisase co wubi no wavu, langa ku ndigwa yono si yisasize, i ndigwa yo wuswanu ne mbeka.

⁹ Namwandicilenyi mu baluwa yangu, vyono mulece kuhanga ne wanhu wasenyha.

¹⁰ Ninga mbeka, si vyono nalongaga i wanhu wose wasenyha wono wali mononze, i wabuguci, ne walambilambi na wono wahembaga vihwani. Ku soko vyono hono musace kuwelega wawo wose, yowa yimunojelenyi anye, muyihamile lukulu yinze yiyi!

¹¹ Ninga ane cono natunilizaga mu wandice wangu nha coci, mulecele lukulu kuhanga na we ndugu Mukilisito, u musenyha, mubuguci, mono yakuhemba vihwani, musonjeza wayagwe, mugaloʼjimbi, kanyhi mulambilambi. U munhu we liwala lilyo, hamba kulya du, mulece kulya hamonga nayo.

^12-13 Wulenyi, hambi yo nghani yangu nene niwalingʼanize wanhu wono wali kunze? Aa, ngʼo, awo u Mulungu yo kowalingʼaniza. Hamba alu ma, anye nyo weneco si munojeye muwalingʼanize i Wakilisito wayenyu? Ale mumuwinjilaje kutali muliʼnye yuyo u munhu mubi!