1 Wakolinto 4 - I CILAGANE CIPYA 1991

U witumami we Watumwa

¹ Ale, u munhu yaciwonaje ase nha cili wetumami wa Kilisito mono cakozwa i zinghani ze cinyele zo Mulungu.

² Na hoyili nghani monga du yono yimunojeye u munhu wo wose mono yapegwa u mulimo wuwu, nayo yoyi, yawe mwihuwilwa.

³ Kuliʼne, nene no mweneco, si nghani yaye hono ningʼanizwe nanye, hamba ne ningʼaniza ye cimunhumunhu, ninga ane no mweneco, hamba si nghwilingʼaniza cinji co cose yaye.

⁴ I ciselinji cangu, si cikundajila isutya lyolyose lyono lili muli nene, ninga hamba nha vivyo, si notya ane sina wusutye ku soko yiyo, aa, ngʼo. Ninga u Muwaha yo yakuningʼaniza.

⁵ Holeka mulece kulingʼaniza lono vilo vikali si nafika, muzilekaje ziwe nha vivyo sunga u Muwaha kono kolo kuziza. U Mwene kolozigubula zose ze citi zono hundice, nayo kolowanzalika u wuhile wa mu zinhumbula ze wanhu. No munhu wo wose, baho ho kolotujila ililumbo lyono limunojeye, kuwulawa kuli Mulungu.

⁶ Nye, wandugu zangu, zizo zose zono nizilonjile za kuli Apolo, na za kuli nene no mweneco, nha colecezo kuli nyenye. Na mu colecezo cetu ane na Apolo, anye ho musume kuyimanya nhunizo ye nghani ayi yono yikutya nhavi, “Muzikamisaje zono zandikwe.” Halece kuwa na munhu yunji wa muli nyenye, mono kosuma kwilumbila kuli u munhu yumonga, no kumubedegala umuyagwe.

⁷ Hambi nani mbi mono yakukuwona agwe nha wuli cinji hamwande ye wanji? Hamba alu wina ci cici kanyhi cono siwapegwa, alu nhawule kanyhi wukwilumbilila mu cinhu cico, kotya nha munhu mono wukali si napegwa?

⁸ Heya, aluno nhondo mwakondya kwiguta! Alu nhondo mwagolipa! Kanyhi mwaweza watemi lono ase si cinawa! Heya mbeka, yali yiwe viswanu muwe mutemile, nase nha vivyo ho cisume kutemana hamonga nanye.

⁹ Hambi nha yikwijela kuliʼne vyono u Mulungu yacipela ase co watumwa cilejeho ce ndumilizo, ho ciwe nhe wanhu wono watemezwe wawulagwe, hambi nha canozwa kotya nha cili cinhu ca kwilolelwa ne yinze yose, hali wamalayika, sunga na hali wanhu.

¹⁰ Ase cili walele ku soko ya Kilisito, ninga anye muli we mahala ku soko yo wilunze na Kilisito! Ase cisoceye, ninga anye muli vilungo. Anye mukupegwa lilumbo, ninga ase cikubedegalwa.

¹¹ Sunga mu cipango cici du, ase cili ne nzala, kanyhi cikaluce, cisina vivwalo, cikubagwa makofi, cisina ihanhu ho kugona.

¹² Kanyhi cikugazika, no kwituma imilimo kwe miwoko yetu co weneco. Na lono cikuligwa, ase cikuwalombela wumoteswe du, na lono cikuwingwa wingwa, ase cikukangalila du,

¹³ na hono wakucivila ko wulambi, ase cikuwapitula kwe cogopo du. Sunga na lulu baha du, ase cikutendelwa nha cili makwe ge yinze du, sunga na kuli wanhu wose, ase cikwijela kotya nha cili cugulu ca takataka du!

¹⁴ Ane si nghuzandika zizi, ho nimukozenyi cevu, aa, ngʼo, langa nizandika zizi, ho nimwijizenyi du, anye mo wanangu wendece.

¹⁵ Ku soko, hamba muwe mwina walezi maelufu mu mikalile yenyu ye Cikilisito, ninga mwina u sogo yenyu yumonga du, hambi mu mikalile ye Cikilisito, nha yo nene mono namulelenyi, mu nzila yo kumuganulilenyi u Luganuzi Luswanu.

¹⁶ Ku soko yiyi, holeka nghumunenenyi, munyigaje nene.

¹⁷ Si holeka nimutuma Timoteyo kuli nyenye. U mwene, yo mwanangu u mwendece wangu, kanyhi yo munhu mwihuwilwa muli Muwaha. U mwene, komukumbucizenyi nyenye, nzila yono ane no Pawulo nghuyityatya mu mikalile yangu ye Cikilisito, i nzila yono nghuyijiza ihanhu hose mu makanisa gose.

¹⁸ Ale, alu wanji wa muli nyenye, wanza kwidunhumula, wakwihwesa mba vyono ane sinokuza kanyhi kuko kwenyu.

¹⁹ Ninga mumanye vyono, hono u Muwaha yende, ale, nokuza kwenyu lulu, na kolo nghuza, ale baho langa ho nolokwiwonelela no mweneco, kanyhi hamba si nokwiwonelela cico du ca vyono, wakulonga wawo wono wakwidunhumula, langa nosuma kuyiwona sunga ne vilungo vyono wena.

²⁰ Hambi u Wutemi wo Mulungu, nha si wuli mu nghani du za bwete, langa mu vilungo.

²¹ Alu mokwenda ya hayi? nimuzizenyi nina ne nghome, hamba nimuzizenyi ne nhumbula yo wendo no wupolo?