1 Wakolinto 15 - I CILAGANE CIPYA 1991

U wuzuce wa Kilisito

¹ Alu wandugu zangu ane nyendile nimukumbucizenyi du, za kuli u Luganuzi Luswanu lono namuganulilenyi, anye mukalubocela, kanyhi mwimile mukamile muli lulo.

² Na vyono na mu nzila ya lulo Luganuzi Luswanu, mo mukuponyezwa, hono muzibate zinghani zono namuganulilenyi, na kanyhi hono yiwe si mwehuwila bwete.

³ Nane nghamupelenyi anye zinghani zi mbaha muno muno zono nazibocela nene no mweneco, nha vyono, Kilisito yafwa so wubi wetu, nha vyono gakutya i Mandiko Gono Gelile,

⁴ na vyono yakazikwa, na kanyhi na vyono yakazuka mwizuwa lye kadatu, nha vyono yandikwa,

⁵ na vyono kanyhi yejela kuli Kefa, na hanyuma yayo yakejela kuli awalya we likumi na wejete.

⁶ Na hanyuma yakejela lwa kamonga kuli awalya wezindugu wono wali wacizize liwalo lya wanhu magana mahano, ne wanji wenji wa muli wawo, wakali womi, ninga wanji wayawo wakondya kufwa.

⁷ Na hanyuma yayo yakejela kuli Yakobo, na hanyuma yakejela kuli watumwa wose.

⁸ Ne ndumilizo ya wose, ho yakejela sunga na kuliʼne, ane mono ninha u munhu mono yalelwa lono cipango co kulelelwa cali cikali.

⁹ Hambi ane nha nili mudodo muno muno muli watumwa wose, mono singhwiliye hamba kucemwa mutumwa, kusoko vyono naligaza muno i likanisa lyo Mulungu.

¹⁰ Ninga ku so lihewa lyakwe Mulungu, naweza nha vyono ninha lulu, ne lihewa lyakwe si lyali lya bwete. Nane netuma u mulimo si nha wose, kanyhi hamba si nene yaye langa, lihewa lyo Mulungu lyono likwitumana hamonga na nene.

¹¹ Ninga hamba nha vivyo, hono yiwe weneco wo wakuganula, hamba nene mono nghuganula, si nghani yaye, hambi nha co cico cono ciganulaga, na co cico cono mwihuwiye.

Uwuzuce wetu

¹² Ninga nha vyono yikuganulwa, vyono Kilisito yazukulwa kuwulawa mu wafu, alu wanji wa muli nyenye, wosuma kutya nhawule vyono ati hasina wuzuce we wafu?

¹³ Holeka hono hawe hasina u wuzuce we wafu, ale na Kilisito nayo si yazuka,

¹⁴ na hono Kilisito yawe si yazuka, hodu kumbe no wuganule wetu wa bwete, sunga no wihuwilo wenyu wa bwete.

¹⁵ Hamonga na zizo zose, ase cali ciwe cili wahomelezi wo wulambi hali Mulungu, hambi nha calonga cikatya vyono u Mulungu yamuzukula Kilisito muli wafu, ho kumbe mwene ho si yamuzukula yaye, hono yiwe i wafu mbeka si wazukulagwa.

¹⁶ Na hono yiwe yili mbeka i wafu si wazukulagwa, ale na Kilisito nayo si yazuka yaye.

¹⁷ Na hono yiwe Kilisito si yazukulwa, ale no wihuwilo wenyu weza nghani ya bwete, vyo mukali du mu wubi wenyu.

¹⁸ Hamonga na zizo na wawalya wono wafwa akuno ho vilunzize na Kilisito kumbe nawo wajilila.

¹⁹ Holeka hono u witumbilo wetu muli Kilisito, hono wuwe wuli so mikalile yiyi du ya lulu, ale baho ase cowa cili wanhu mono cinojeye cikalalilwe muno si nhe wanji wose wa mono yinze yiyi.

²⁰ Ninga i mbeka yoyi, vyono Kilisito yakondya kuzukulwa muli wafu, na yo yikulajila vyono, wawalya wono wagonile mu wufwe, wolozukulwa.

²¹ Nha vyono u wufwe waletwa mononze na munhu monga, ale nha vivyo no wuzuce wa muli wafu, waletwa na munhu monga.

²² Nha vyono wanhu wose wafwizaga so wilunza na Adamu, yo nha vivyo kanyhi, wose wolozukulwa so wilunza na Kilisito.

²³ Ninga munhu na hakwe mweneco nha vyono yawajigwe, na Kilisito, yo mulongozi muli wose, hanyuma ho awalya i wakwe Kilisito kolo yeza kuza.

²⁴ Na hanyuma ya zizi, ale u mudumo ho wolokuza, mwidaha lono Kilisito komupelela u wutemi u Sogwe Mulungu, lono kowa yakondya kuwusiza lukulu, u wutemi wose, no wuwaha wose, sunga ne vilungo vyayo.

²⁵ Hambi Kilisito nha si koleka kutema, sunga u Mulungu kolo yakondya kuwasuma i walugu wakwe, no kuwawika hasi ye magulu gakwe.

²⁶ No mulugu we ndumilizo mono kolokongomezwa, lyo lifwa.

²⁷ Hambi imandiko nha gakutya, “U Mulungu koviwika i vinhu vyose hasi ye magulu gakwe.” Ninga, Mandiko lono gakutya “Vinhu vyose vyolowikwa hasi ye magulu gakwe ho yaviteme, yili calinze vyono u Mulungu si kosuma kwinjila mwipuga lilyo lye vinhu, vyono u mwene yo yakuviwika vinhu vivyo hasi ya Kilisito.”

²⁸ Ninga i vinhu vyose, lono viwe vyakondya kuwikwa hasi yo wutemi wa Kilisito, baho nayo u Mwana, ho kosuma kwiwika hasi yo Mulungu, mono yaviwika vyose hasi yo wutemi wakwe, u Mulungu ho yateme muli vyose.

²⁹ Alu hono hawe hasina wuzuce, i wanhu wawalya wono wabaputizagwa ku soko ye wafu, alu wetumbiye kutuga cici? Hono wafu wawe si wazukulagwa, so cici lu yunji yabaputizwe ku soko yawo.

³⁰ Hamba nase ma, so cici lo cikwitajila mu mbali mu madaha gose?

³¹ Nye wandugu zangu ane no muyenyu cidomile ne lifwa nhondo zose! U lukumyo lono nina nalo ku soko yo wilunza wenyu na Kilisito Yesu u Muwaha wetu, yiyo yo yikuleka nghuyanza nghani yiyi.

³² Na hono u wuhile wangu wali wuwe we cimunhumunhu du, alu u wihome wangu wo kwihoma ne malimu makali baha ha Efeso, kwali kunghwile cici? Hono wafu siwazukaga, ale, “Cilye no kungʼwa du, hambi i mitondo nha cofwa.”

³³ Nye, mbeka mulece kukongwa bwete! U wiyendi wono si wuswanu, mbeka wuhodangaga i mikalile miswanu.

³⁴ Ale, mwinukaje! Mwamulaje kanyhi kwikala mu mikalile miswanu, mulece kwituma wubi. Hambi wanji wa muli nyenye nha si wamumanyiye lukulu u Mulungu. Nane nghumulonjelenyi mbeka, vyono co cevu ciwaha kulinye!

U muwili wo wuzuce

³⁵ Ninga u munhu kosuma kuwuza yatye, “Mwene i wafu wolozukulwa nhawule? Kanyhi wowa wena muwili we liwalaci walazakuwa wazuka kanyhi?”

³⁶ Ago mawuzo ga wulele! Hono wuhadice mbeyu, nayo hono yilece kwamula kufwa, hamba si yocindika.

³⁷ Ninga cono kuhadikaga gwe, si kuhadikaga u muwili wono wowa hanyuma, langa agwe kuhadikaga i mbeyu du, lunji ya wuhemba, hamba mbeyu ye liwala linji.

³⁸ Ninga Mulungu kayipelaga yiyo yi mbeyu, u muwili wono yakwenda mweneco, ne mbeyu yo yose, yitugaga u muwili wayo yili wene wono wisimajiye ne mbeyu yinji.

³⁹ Ne miwili ye viwumbwa vyose si yili sawa sawa yose. I miwili ye wanhu yose yihwanile, nayo ye vilimu yisimile, na ye zindeje nayo yisimile, sunga ne miwili ye zisomba nayo nhavivilya yisimile.

⁴⁰ Koyili i miwili ya ku wulanga, na kanyhi koyili ne miwili ya mononze, u wuswanu we miwili ya ku wulanga wisimajiye, no wuswanu we miwili ya mononze, nawo wisimajiye.

⁴¹ Howuli u wuswanu we lizuwa, na wo mwezi, na we zinyelezi, sunga ne zinyelezi nazo ziwezaga zisimajiye mu wuswanu wazo.

⁴² Ale no wuzuce we wafu vyo winha nha vivyo. Nha vyono yinha mbeyu, u muwili wukuwa kuzikwa mu kabuli, wukuzicilwa mu wuhodanjice, ninga wuzukulilagwa mu wusakalakale.

⁴³ Wukuwa kuzicilwa mu wuwe we cevu, ninga wukuzukulilwa mu wuwe wo lukumyo, wuzicilagwa mu wuwe wo wusocele, ninga wukuwa kuzukulilwa mu wuwe we vilungo.

⁴⁴ Nawo lono wukuzikwa, wuwezaga muwili wa mononze yiyi du, ninga lono wukuzukulwa wukuwa muwili we cimuhe. Kowuli muwili wa mononze, na kolowa no muwili we cimuhe.

⁴⁵ Hambi i Mandiko nha gakutya, “Umunhu mulongozi Adamu yali ciwumbwa cono cina nhumbula nyumi.” Ninga Adamu we ndumilizo, Muhe wono wuwumifyaga.

⁴⁶ Ninga u muwili we cimuhe wo si wulongoleye kuwa, langa u muwili we yinze yiyi, wo wulongoleye, hanyuma yayo, ho muwili we cimuhe.

⁴⁷ Nayo Adamu u mulongozi, nha yawumbwa ko muhangha, holeka u mwene wa muhangha, ninga u munhu we kejete, ayo yalawa ku wulanga.

⁴⁸ Holeka i wanhu wose vyono walawa mu muhangha, ale, wehwanile nha vyono yenha yuyo mono yawumbwa ko muhangha, awalya wa ku wulanga nawo, wehwanile nha vyono yenha yulya mono yalawa ku wulanga.

⁴⁹ Alu nase, nha vyono cihwanile na ayulya mono yawumbwa ko muhangha, ale vyo nha vivyo kanyhi, vyo cokwihwana na yuyo mono yalawa ku wulanga.

⁵⁰ Holeka wandugu zangu, nghutya nhavi, acilya cono canozwa ko muwili ne sakami, si cosuma kwinjila mu wutemi wo Mulungu, naco cono cihodanjikaga, hamba si cosuma kuwa no wuwe wono si wuhodanjikaga.

⁵¹ Ale, muhulicize ta, nimulonjelenyi nghani ye cinyele yili nhavi, ase hamba si cilafwa wose, langa wose colohunduswa,

⁵² kwa nhinicizo, du lwa kamonga, mu cipango ce ndulele ye ndumilizo, hambi yindulele nha yololila, ne wafu wolozukulilwa mu wuwe wono si wolofwa kanyhi, baho nase ho colohundusiswa.

⁵³ Hambi nha yinojeye cono cihodanjikaga, civwale u wuwe wono si wuhodanjikaga, no muwili wuwuno wono wukusuma kufwa, wuvwale u wuwe wono si wufwizaga kanyhi.

⁵⁴ Holeka u muwili wuwuno wono wuhodanjikaga wula weza kuwa wavwala u wuwe wono si wuhodanjikaga, naco cono cifwizaga cila ceza kuwa cavwala u wuwe wono si wufwizaga, ale baho nhondo ho yoloficilila i nghani yono yandikwa, yono yikutya, “U wufwe wawusizwa lukulu, ne cisumisumi cakondya lu kukwilanicila!”

⁵⁵ “Alu gwe go wufwe, i cisumisumi cako cili hayi? I vilungo vyako vyo wusungu, vili hayi?”

⁵⁶ U wufwe wutugaga wusungu wayo kuwulawa mu wubi, nawo u wubi wutugaga i vilungo vyayo kuwulawa mu wulajilize.

⁵⁷ Ninga yicinojeye cimulumbo Mulungu mono kacipelaga u wusume mu nzila yo Muwaha wetu Yesu Kilisito.

⁵⁸ Holeka wandugu zangu wendece, mwime mukamile. Kanyhi mujendelele kuwituma u mulimo wo Muwaha kwe vilungo, nhondo zose, akuno mukumanya, u mulimo wuwo wo kumwitumamila u Muwaha wono mukwituma vyono si wolokwajilila bwete.