1 Wakolinto 13 - I CILAGANE CIPYA 1991

Uwendo

¹ Hamba nonje i milonjele ye wanhu hamba na ye Wamalayika, ninga hono niwe sina wendo, ane nowa nihwanile nhe lizozo du lye lidebe lyono lisina cinji, hamba lunji nha kotya cenjele.

² Na kanyhi yisumice niwe ne cipegwa ciswanu co kuyiganula nghani yo Mulungu, no kuzimanya ze cinyele zose, sunga no kusuma kuzimanya zose, kanyhi ndahile kuwa no wihuwilo wono wukwilaniciye, sunga sume kugahamye matunda, ninga hamba nha vivyo hono niwe sina wendo, ane si nili cinji yaye.

³ Na hono ndavye i sawo yangu yose no kuwapela waciwa, na hamba niwulavye muwili wangu wunyanywe mu moto, ninga hono niwe sina wendo, azo zose si zonghwila cinji yaye.

⁴ Wendo wukangalilaga, wutazaga wenji, wendo wusina wivu, hamba si wikumyaga yaye, hamba siwuwezaga no wiwoni.

⁵ Wendo wukuwa wina cogopo, kanyhi si wukuwa kwilondolela weneco cambuzi, kanyhi wendo si wukolagwa neʼkuwo mbela, hamba si wukumbucilaga zimbi, hamba si wuwalaga wubi wono wapuluta yaye,

⁶ kanyhi wendo si wukuwa kusecelela wubi ngʼo, langa wusecelelaga i mbeka.

⁷ Wendo wihuwilaga zose, witumbilaga zose, kanyhi wukangalilaga zose.

⁸ Wendo si wudumaga hamba hadodo. Na hone Kovili i vipegwa vyo kuyiganula nghani yo Mulungu, avyo langa mwizuwa linji vilawuka, na hone vipegwa vyo wulonga zinonga zinjenzi, avyo vyoloduma, na hone kowuli wusomi, nawo nha vivyo du wolopuluta.

⁹ Hambi nha vyono yinha u wumanye wetu si wukwilaniciye, sunga ne cipegwa cetu co wuganula nghani yo Mulungu naco si cikwilaniciye.

¹⁰ Ninga cilaza kuwa caza cono cikwilaniciye, ale vyose vyono si vikwilaniciye vyolowuka.

¹¹ Ane lono nali nghali nili mwana mudodo nalongaga cidodododo, natangaga cidodododo, nehwesaga cidodododo. Ninga aluno vyono neza nili munhu mututu, hodu nakondya kuzileka i zinghani zose ze cidodododo.

¹² Cono cikuciwona alu cinha futa du mwilole, yono si yikwijela viswanu, ninga baho hanyuma langa, ho colowona viswanu ciwonelela. Aluno manyile hadodo vivi du, ninga baho hanyuma langa, ho nolomanyila zose lukulu, nha vyono u Mulungu nayo yamanyile ane.

¹³ Holeka zikusigala zizino zidatu, nha cinji, u Wihuwilo, u Witumbilo no wendo, ninga kanyhi yono yicizize muli zizino zose, wo wendo.