1 Timoteyo 6 - I CILAGANE CIPYA 1991

¹ Iwawanda wose yiwanojeye wawapele lilumbo iwatwa zawo ho wanhu wawe wasina soko yinji yo kulitovulila i litagwa lyo Mulungu ne mafundo getu.

² Ne wawanda wono wena watwa zawo Wakilisito, walece kuwabedegala, hambi nha wandugu zawo. Langa yiwanojeye wawetumamile mu wuswanu muno wose, hambi wawo wono watugaga cambuzi mu mulimo wawo, nha wo wawo wono wehuwiye kanyhi wendece kuli Mulungu. Yikunojeye kwijiza no kuziganula izinghani azi:

I mafundo go wulambi no wugoli we mbeka

³ U munhu wo wose mono yakwijiza suta ne zinghani zizi, kanyhi mono si yakuzivumila i zinghani ze mbeka zo Mutwa wetu Yesu Kilisito ne mafundo ge dini yetu,

⁴ yuyo yamemile widunhumuzi, kanyhi hamba siyamanyile cinji co cose. Yo munhu mono yendile wiwanganile no wisonji we zinghani ze bwete, ne zinghani ze liwala lilyo, ziletaga wivu, wisonji, maligo, maganicizo mabi,

⁵ no wiwanganile wono wusina ndumo, wono wukulawa kuli wanhu we mahala gono gavizice, kanyhi wono wayisina imbeka. Wono wehwesaga vyono dini, ʼmba yo nzila yo kutujila wugoli.

⁶ Yene mbeka dini, yimunozaga munhu kawa mugoli muno, u munhu yuyo hono yawe yaceye ne vinhu vyono yena navyo.

⁷ Hambi nha sicaleteleza cinji co cose kononze, kanyhi hamba sicolosoleleza cinji co cose.

⁸ Ale holeka, hono ciwe cina ndigwa ne vivwalo, yicinojeye cituzwe mutima navyo.

⁹ Ninga wawalya wono wasakaga wagolipe, wagwilaga mu wujelwe, no kugwila mu mutego we masulumizi menji mabi go wulele, gono gawakwegaga sunga ko ku wuhodanjice.

¹⁰ Hambi u wenda muno we zipesa nha wo mwamulizo wo wubi wose. Iwanhu wanji wasulumilaga muno kutuga mapesa, sunga wawuleka no wihuwilo wawo, no kudumanjila dumanjila ako na ako, kutali no wihuwilo wawo no kutukuwika i mitima yawo ko wusungu wuwaha muno.

U wutonji kuli Timoteyo

¹¹ Ninga ʼgwe, go munhu wo Mulungu, wilegaje mu zinghani zizo. Ukamise wilingʼano, no wogopo Mulungu, no wihuwilo, no wendo, ne ngola, no winenenyhezi.

¹² Umanyhe kwe vilungo vyako vyose wicize lumangho lo wihuwilo, ho witujile cihumbilizwa co wumi we cibitilila, wono wacemelwa lono wawuvumila u wihuwilo wako hali wahomelezi wenji.

¹³ Hali Mulungu mono kavipelaga i vinhu vyose wumi, na hali Yesu Kilisito mono yayihomelela no kuyivumila imbeka hali Pontiyo Pilato,

¹⁴ nghukulajiliza, ugebataje muno i Malajilizo gako no kugakamisa muno muno, sunga lizuwa lililya kolo yakwijela Mutwa wetu Yesu Kilisito.

¹⁵ No wijele wakwe, wolokuziza mwipango lyono linojeye lyono lyawikwa no Mulungu umulugutwe kanyhi mono yo Mutemi yali wene, u Mutemi we watemi no Muwaha we wawaha.

¹⁶ Umwene yali wene du yo kekalaga mumi cibitilila, kanyhi kekalaga mu wuzelu wono hasina munhu wo wose mono yadahile kuwusejelela. Hasina munhu mono yasuma kumuwona, hamba mono kosuma kumuwona. Kuli mwene lyeze yilumbo ne vilungo vye cibitilila! Heya.

¹⁷ Uwalonjelaje iwanhu wagoli we vinhu vye mikalile ya lulu, walece kwidunhumula, hamba kuwika u witumbilo wawo mu sawo yono siyidahile kwitumbilwa, langa wamwitumbilaje Mulungu, mono ko wuswanu wakwe, kacipela i vinhu vyose civisangalalile.

¹⁸ Uwalonjelaje wetume viswanu, wawe wagoli mu metumo maswanu, kanyhi wawe wacemezi, wono wewikanize mu wuhanga ne wanji zisawo zawo.

¹⁹ Na muwunoza nhavivyo wakwiyiwutila ciwutwa cono cowa kuli wene musinji wono wukamile kuli cipango cono cikuza. Ho wasume kwiyitujlia u wumi wono wo wumi we mbeka.

²⁰ Gwe, Timoteyo ukamise viswanu zose zono wakozwa. Wilegaje mu miduwo ye ciyinzeyinze, hamonga no wiwanganile wo wulele, muli cico cono wanhu wanji wacemaga: “Wumanye” ninga vyo si vinha.

²¹ Hambi wanji nha watezaga vyono wene wakondya kuwa no “Wumanye” wuwo, na ku soko yiyo holeka wakondya kuyajiliza i nzila yo wihuwilo. Lihewa lyo Mulungu, liweze muli nyenye wose!