1 Timoteyo 5 - I CILAGANE CIPYA 1991

Zono zinojeye kuli wono wehuwiye

¹ Ulece kumutacilo u munhu muwaha, langa wumunenaje kotya nha Sogo mono yakulelile. Uwatendele Iwadodo we cilume nawo, kotya nha wanduguzo,

² nawo iwacekulu wadala, kotya nha wanyina zako, ne wahinza nawo, wuwatendelaje nha kotya walumbuzo mu wele wose.

³ Uwapelaje cogopo iwacekulu wafwile wono wafwile mbeka.

⁴ Ninga u mufwile mono yena wana hamba wezukulu, awo wawo yiwanojeye wamule weyijize kuwanozeza viswanu we mhuga zawo weneco, na mu nzila yiyo, ho wosuma kuwanemya i walezi wawo hamonga ne wakuku zawo nha vivyo, hambi yiyo nha yo nghani yono yimwendezago Mulungu.

⁵ Ale, umucekulu mono mufwile mbeka, mono yasina munhu wo kumutaza, yakondya kumuwicilo Mulungu witumbilo wakwe, kanyhi yakujendelela kumulomba Mulungu no kuneneleza u wutazi wakwe cilo ne misi.

⁶ Ninga mucekulu mono yakwikala mu mikalile yo wiyendezi mweneco, yuyo yakondya kufwa akuno ho yakali mumi.

⁷ Uwapelaje malajilizo gaga, ho walece kuwa na yilema.

⁸ Ninga munhu mono si kalulaga wanhu we mhuga yakwe, ko muno wawalya wa mu kaya yakwe, ale, umunhu yuyo yakondya kuwukana wihuwilo, kanyhi mubi kuciza no munhu yuyo mono siyehuwiye.

⁹ Ale, ulece kumwandika mu wityatye we matagwa ge wafwile, u mufwile wo wose mono yakali sinafisa myaka makumi mutandatu. Nayo kanyhi yeze mono yakatolwa kali kamonga du,

¹⁰ yeze mono yena lilumbo yiswanu, umucekulu mono yawawiluse wanagwe viswanu, mono yawabocela wajenzi mukaya yakwe, mono yawazuguza magulu iwanhu wo Mulungu, yawataza wanhu mu wugaye wawo, kanyhi yelavya ku wituma metumo maswanu.

¹¹ Ninga wulece kuwandika i wafwile we lizika lidodo, hambi nha kolo i masulumizi gawo ge mumbwa yawo gakucila kuwa ne vilungo muno, si nho wilavye wawo wa kuli Kilisito, ale, baho nha wosaka kutolwa kanyhi,

¹² holeka wokwijela wasutyi, vyono weza si wehuwilwa mu cilagane cawo i cilongozi.

¹³ Ne wafwile wono wenha wawo wajilizaga i vilejeho vyawo ko wupilima pilima mu kaya na kaya. Ne nghani ʼmbi muno muno, wendaga maheho muno mu wupilime wawo, wenjizaga wuhesi kuli wayawo wanji, kanyhi no kwitajila mu zinghani ze wanhu wanji, akuno kanyhi wakulonga sunga ne zinghani zono siziwanojeye kulonga.

¹⁴ Holeka nali nyende wawo i wafwile we lizika lidodo watolwe, walele wana no kuzikamisa zikaya zawo, iwalugu wetu ho walece kutuga cilejeho co kucitovulila.

¹⁵ Hambi iwafwile wanji nha wakondya kwajilila no kumutyatya Setani.

¹⁶ Ninga hono mucekulu Mukilisito yawe yena wafwile mu mhuga yakwe, umwene yimunojeye yawatunze, ninga yalece kulilecela likanisa u mutegulo wuwo, i likanisa ho lisume kuwatunza iwafwile wawalya wono wasigaye wali wene du.

¹⁷ Iwanyamhala wono watongaga wanhu viswanu yiwanojeye watuje musahala kali kejete, ko muno wawalya wono wahidimbalaga mu wuganule na mu wijize.

¹⁸ Hambi i Mandiko Gono Gelile nha gatezaga: “Ulece kuyidindo mulomo i ngʼombe yono wukuyitumamila, lono yikukanyaga wuhemba mu cuga,” na kanyhi “Umwitumami yimunojeye yatuje musahala wakwe.

¹⁹ Ulece kuvumila wusonjezwe kuli munyamhala lono i nghani yiyo yisina wuhomelezi wa wanhu wejete hamba wadatu.

²⁰ Awalya nawo wono wakwituma wubi, wuwatacilaje calinze, ho iwanji nawo wogope.

²¹ Nghukukongʼonheza hali Mulungu, na hali Kilisito Yesu, na hali wamalayika wono welile, wukamise imalajilizo gaga wulece kuleka hamba limonga, kanyhi, pogola, wulece kumwendeza munhu wo wose muli zose zono kokwituma.

²² Kanyhi wulece kumuwicila miwoko munhu wo wose musunho, ku soko yo kumwitumamilo Muwaha. Ulece kuhanga u wubi we wanji, langa wikamisaje welile mu nhumbula yako.

²³ Ulece kuwa kungʼwa malenga galiwene du, langa ungʼweze ne divayi ndodo soʼnda yako, hambi nha kutamwaga kali kenji na kenji.

²⁴ Uwubi we wanhu wanji wijelaga calinze, nawo wukuwa kuwalongolela ku wulingʼanizwe, ninga wubi we wanji, wijelaga du lwa hanyuma yayo.

²⁵ Nha vivyo, ne metumo maswanu gejelaga calinze, hamba na gagalya gono si gali calinze, sigosuma kuhundikwa.