1 Timoteyo 4 - I CILAGANE CIPYA 1991

I wejizi wo wulambi

¹ Ningo Muhe yakulonga ciwonelela vyono mu vilo vyono vikuza, iwanhu wanji wolowulecela lukulu u wihuwilo, nawo woloyihulicila i myuhe yo wukoci, no kwibata mafundo ge masetani.

² Imafundo ge liwala lilyo, gatandazagwa ne wanhu walambi kanyhi wakonji, wono i viselinji vyawo vinha kotya nha vinyanywe ne cuma cono cili moto.

³ Iwanhu we liwala lilyo, wejizaga vyono gowa masutya kwitola, sunga no kulya zindigwa zinji zinji. Ninga u Mulungu nha yaziwumba i zindigwa zizo, ho wawalya wono wehuwiye na wono watuga kuyimanya imbaka, wazitumamile kwe lilumbo.

⁴ Hambi vyose vyono yaviwumbo Mulungu nha viswanu, hamba hasina cono cinojeye kusemunwa, langa yinojeye vyose vibocelwe kwe ʼmalombo no wulumbe,

⁵ ku soko inghani yo Mulungu hamonga no wulombe, vicinozaga i cinhu cico ciwa celile hali Mulungu.

U mwitumami muswanu wa Yesu Kilisito

⁶ Hono uwapele i wandugu wose imalajilizo gaga, ale kowa mwitumami muswanu wa Yesu Kilisito, akuno wukwijendeleza mu cimuhe mu zinghani zo wihuwilo ne mejizo ge mbeka, gono go mweneco kugatyatyaga.

⁷ Ninga ulecele lukulu zisimo zono zisina dini na zono zisina hamba nhunizo yo yose. Wizowelezaje kwikala mu mikalile yo wogopa Mulungu.

⁸ Hambi wizoweleze wo muwili nha wina cambuzi cayo, ninga wizoweleze we cimuhe, wina cambuzi ce mawala gose, hambi nha wukucihuwiza zo wumi we vilo vivi na wuwo kanyhi we vilo vyono vikuza.

⁹ Hambi wulonje awu nha wa mbeka, kanyhi wunojeye wubocelwe kanyhi wihuwilwe.

¹⁰ Ase cikupiligala no kwituma cihidimbaye, hambi nha cimuwiciye witumbilo wetu u Mulungu mumi, mono yo Mukombozi wetu co wanhu wose, na ko muno wa walya wono wehuwiye.

¹¹ Ale uwapelaje malajliizo gaga ne mejizo gaga.

¹² Ulecele lukulu kulumba munhu wo wose ho yakubedegale ku soko yo wudodo wako, langa weze wuli musambo kuli wono wehuwiye: mu wulonje wako mu mijendele yako, mu wendo, wihuwilo, na mu mikalile miswanu.

¹³ Witumamilaje madaha gako hamonga ne vilungo vyako, mu wusoma calinze Imandiko Gono Gelile, mu wuganule na mu wijize, sunga kolo nghuza.

¹⁴ Ulece kuleka kucitumamila i cipegwa cicilya ce cimuhe cono cili muliʼgwe, cono wapejelwa mu zinghani ze wawizi, na mu wuwicilwe miwoko ne wanyamhala.

¹⁵ Wuzihwesaje zizo zose muno muno, hamonga no kuzitumama, u wujendelele wako ho wusume kwijela hali wose.

¹⁶ Wiyikamisaje muno muno go mweneco hamonga ne mejizo gako. Wuhidimbale muno muno mu wituma zizo, hambi nha kokwiponya go mweneco, hamonga na wawo wono wakukuhuliciza.