1 Timoteyo 3 - I CILAGANE CIPYA 1991

I walongola mwi kanisa

¹ Uwulonje awu, nha wo we mbeka: vyono kolo munhu yakusaka kuwa mulongola mwi kanisa, ale, yuyo yakwilowa mulimo muswanu.

² Ninga u mulongola we likanisa, yimunojeye yeze munhu mono yasina yilema, na kanyhi yimunojeye yeze mono yena mugolece yumonga du, kanyhi yeze mwiyimizi, mulula, we cisindo, kanyhi yimunojeye yeze mucemezi na mono yasumile kwijiza,

³ yalece kuwa mukolwa, hamba munhu we ciwuma wuma, langa yeze mupolo, mono yendile mulamu, kanyhi yalece kuwa munhu mwenda pesa,

⁴ kanyhi yimunojeye yeze munhu mono yasumile kuyitonga viswanu mhuga yakwe, no kuwanoza i wanagwe wawe ne cihuliko ne cogopo cose.

⁵ Hambi hono munhu yawe si yakusuma kuyitonga viswanu i mhuga yakwe, mweneco, alu ho kosuma wule kulidima likanisa lyo Mulungu?

⁶ Kanyhi u munhu mono yakali sinakangala mu wihuwilo, yalece kunozwa kuwa mulongola mwi kanisa, ho yalece kumema wiwoni, no kulingʼanizwa na vyono setani yakalingʼanizwa.

⁷ Yimunojeye yawe munhu mono yena lilumbo yiswanu muli wanhu wono wali kunze ye likanisa, ho yalece kuhoswa no kugwita mu mutego wa Setani.

I wetumami mwi kanisa

⁸ Ne wetumami nawo mwi kanisa iwanojeye wawe wanhu wono wena mikalile miswanu, kanyhi walonga mbeka, walece kuwa wangʼwela muno we divayi, hamba kuwa ne masulumizi ga pesa,

⁹ hambi nha yiwanojeye kwibata ko mutima muswanu imbeka ya mugati yo wihuwilo.

¹⁰ Ku soko yiyo yiwanojeye wamule wajelwe, na kolo wakwijela vyono wosuma, ale, ho wawe wetumami mu witumami wawo.

¹¹ Ne wagolece zawo nawo, iwanojeye wawe ne mikalile miswanu, si waheha wanhu, wono si wakolwa, kanyhi wehuwilwa muli zose.

¹² Nayo mwitumami mwi kanisa yimunojeye yeze no mugolece yumonga du, kanyhi yeze mono kasumaga kutonga viswanu iwanagwe ne mhuga yakwe.

¹³ Hambi i wetumami wono wetumaga mulimo wawo muswanu, nha wetujliaga musambo muswanu, no kusuma kulonga kuno wasina woga zo wihuwilo wawo wono wuli muli Kilisito Yesu.

I nghani mbaha ye cinyele

¹⁴ Nghukwandicila ibaluwa yiyi, akuno ninga nitumbiye vyono nokuza kwako mu vilo vivi baha.

¹⁵ Ninga hono nyhezwe muno, ale, ibaluwa yiyi yokumanyiza imikalile yono yicinojeye ciwe nayo mu mhuga yo Mulungu, lyono lyo likanisa lyo Mulungu mumi, lyono lye ʼsumbili no musinji we mbeka.

¹⁶ Hambi nha hasina mahwele go gose kuli zo wuwaha wa ze cinyele ze dini yetu, vyono: Yejela mu hwani yo munhu yahomelelwa no Muhe vyono yali lingʼani, yawonwa ne wamalayika. Yaganulwa mu zinghungugo, yehuwilwa kononze kose, yakabocelwa kucanyha ku wulanga mu lukumyo.