1 Timoteyo 2 - I CILAGANE CIPYA 1991

U wuhembi wa mu kanisa

¹ Ale, yinongozi muli zose, nghukongʼonheza vyono wilombela ziswanu, wolombe, wulombezi, no wulumbe, vilaywe kuli Mulungu so wanhu wose,

² so watemi na kuli wose wono wena u wulajilize, ho cikale mu mikalile yo wutuvu no mulamu, hamonga no wogopo Mulungu ne mijendele miswanu.

³ Ne nghani yiyi nha swanu kanyhi yikumwendezo Mulungu u Mukombozi wetu,

⁴ mono yakuhila i wanhu wose waponywe, kanyhi wafice ku wumanye mbeka.

⁵ Hambi nha hoyuli Mulungu yumonga du, na kanyhi hoyuli yumonga mono kawalamulaga iwanhu no Mulungu, yo munhu, Kilisito Yesu,

⁶ mono yelavya mweneco ho yawakomboze iwanhu wose. Wuwo wali wo wuhomelezi we cipango cono u Mulungu yakuhila kuwaponya wanhu wose.

⁷ Na ku soko yiyo, ane nghatumwa niwe mutumwa na mwijizi we wanhu we makungugo, ho niyiganule i nghani yo wihuwilo ne mbeka. Nghulonga mbeka, hamba singhulonga wulambi yaye!

⁸ Ale, ho hose mu kanisa, kolo mukwitangʼanila mu wuhembi, nghusaka iwalume weze kulomba akuno welavizye lukulu kuli Mulungu, na kanyhi wono wosuma kunyasula imiwoko yawo, kuno wakulomba wasina ikuwo hamba wuwanji.

⁹ Nha vivyo, nghusaka iwacekulu nawo, weze wali cisindo, no kuvwala myenda yono yikuleta lilumbo liswanu muli wene, wavwale viswanu, ninga si ko wihambo wo wutawa zimvili, no wihambo we zizahabu, zilulu, hamba ku wuvwala ivivwalo vyo wuguzi wukamu muno muno,

¹⁰ langa wehambaje kwe metumo maswanu nha vyono yiwanojeye i wacekulu wono wamogopilo Mulungu.

¹¹ Hambi iwacekulu nha yiwanojeye weyijize watulile, kanyhi wawe wenenenyhezi.

¹² Ninga singhuwakombola iwacekulu wejize hamba kuwatema i walume langa yiwanojeye weze wekaye watulile du.

¹³ Hambi Adamu nha yo yalongola kuwumbwa, na hanyuma yayo, ho Hawa.

¹⁴ Na kanyhi, Adamu yo si yakongwa ngʼo, langa u mucekulu yo yakongwa, no kuwubena u Wulajilize wo Mulungu.

¹⁵ Ninga hamba nhavivyo umucekulu koloponywa so wulela wana, hono yekale mu wihuwilo, wendo, wele, no winenenyhezi.