1 Timoteyo 1 - I CILAGANE CIPYA 1991

¹ Nene Pawulo umutumwa wa Yesu Kilisito ku soko ye lilajilizo lyo Mulungu u Mukombozi wetu na Yesu Kilisito u witumbilo wetu,

² nghukwandicila gwegwe Timoteyo umwanangu tuti mu wihuwilo. Ilihewa liweze kuligwe, hamonga no lusungu no mulamu vyono vikulawa kuli Mulungu u Sogo yetu na kuli Kilisito Yesu Mutwa wetu.

U wusugulwe kuli imejizo go wulambi

³ Nyendile gwe wikale kuko ku Efeso, nha vyono nakunena lono nabitaga ku Makedoniya. Iwanhu wanji wali kuko wono wakwijiza imejizo go wulambi. Wuwagomezaje wanhu wawo wapelele lukulu.

⁴ Kanyhi wuwalonjelaje walecele lukulu zisimo zizilya zono zisina nhunizo yo yose hamba hadodo, hamonga ne zinghomo zinhali ze zindelwa ze wasetu, zono ziletaga wiwanganile wa bwete, hamba siziwazengaga wanhu mu wuhile wo Mulungu wono wumanyice mu nzila yo wihuwilo.

⁵ Ale u wulunji we lilajilizo lili nha wukukongʼonheza uwendo wono wukulawa mu nhumbula nzelu no mutima muswanu, na mu wihuwilo we mbeka.

⁶ Hambi iwanhu wanji nha wajilila no kupitucila ku wulonga zinghani zo wulele zono zisina cambuzi co cose.

⁷ Wendile kuwa wejizi wo Wulajilize, ninga akuno ho si wakuzizuka ne zinghani zawo weneco, hamba kuzimanya bwete na zizo zono wakuzikongʼonheza muno muno.

⁸ Cimanyile vyono u wulajilize wuswanu, hono witumamilwe vyono yinojeye.

⁹ Ninga yicinojeye cikumbucile vyono u Wulajilize si wukuwa kuwikwa so wanhu waswanu, langa wuwikagwa ku soko ye wahodanji na wono wasina cihuliko, wono siwamogopilo u Mulungu na wanyo wubi, iwanhu wono wasina dini kanyhi we ciyinze yinze. Kanyhi wuwikagwa ku soko ye wanhu wono wawulagaga i wasogo zawo ne wanyina zawo, wawulaga wanhu,

¹⁰ kanyhi wulajilize nha wuwicigwe ku soko ye wanhu wasenyha, i wamelopezi, i wahiza wanhu, walambi, na wono welahaga ko wulambi, hamba na wono wetumaga zono zili suta ne mejizo ge mbeka.

¹¹ Hambi imejizo gaga nha gali mu Luganuzi Luswanu lo Mulungu wo lukumyo kanyhi u mulugutwe.

Ililumbo ku soko yo lusungu lo Mulungu

¹² Nghumulumba u Mutwa wetu Yesu Kilisito mono yamhela i vilungo ku soko yo mulimo wangu. Kanyhi nghomulumba vyono yambona ane nili mwihuwilwa, yakahagula nimwitumamile,

¹³ hambe bahalya halulongozi nene no mweneco nghamuliga no kumugaza no kumugalila. Ninga mwene Mulungu yakambonela lusungu, ku soko nali nghali sina wihuwilo, na holeka si nali manyile cono netumaga.

¹⁴ Ninga u Mutwa wetu yakamhela i lihewa lyakwe ko winji, kanyhi yakamhela wihuwilo no wendo mu wilunza na Kilisito Yesu.

¹⁵ No wulonje wuwu nha we mbeka, na kanyhi wunojeye wuvumilwe muno muno, vyono Kilisito Yesu yaza kononze kuwaponya wanyo wubi. Nane nha nili mubi kuciza wawo wose.

¹⁶ Ninga mwene Mulungu yakambonela lusungu, ho Kilisito yawulajile wukangalizi wakwe wose kuliʼne, wuwe nha musambo kuli awalya wono hanyuma yayo wolomwihuwila no kubocela wumi we cibitilila.

¹⁷ Ale, kuli mwene Mutemi we cibitilila na we sakalakale, mono sikawonagwa, umwene Mulungu we ciwene, lyeze lilumbo no lukumyo cibitilila na cibitilila! Heya.

¹⁸ Go mwanangu Timoteyo, nghukupela ilajilizo lili nha vyono zinha i zinghani zo wuwizi zono zawilwa katali muli gwegwe. Ale uzitumamilaje i zinghani zizo ziwe nha citwalo cako, ho wusume kulewa milewo miswanu,

¹⁹ kanyhi uwukamisaje u wihuwilo wako ne ciselinji ciswanu. Hambi iwanhu wanji vyono si wasaka kuvihuliciza i viselinji vyawo, ale, holeka wakawu-hodanga u wihuwilo wawo.

²⁰ Na muli wawo, wo wa Himenayo na Alekizanda, wono nawakombola kuli Setani, ho wejizwe wapele kumutovula u Mulungu.