1 Petelo 5 - I CILAGANE CIPYA 1991

I mhuga yo Mulungu

¹ Nyo wanyamhala! Ane no munyamhala muyenyu, nghumulombenyi nghani yi monga du, nyo wanyamhala wayangu. Hambi nene no mweneco nha newonelela ne meso gangu, imagazo ga Kilisito kanyhi nitumbiye kuhanga lululya u lukumyo wono wologubulwa. Ale, ane nghumunenenyi,

² muyidimaje yiyilya imhuga yo Mulungu yono mwapegwa, muyitunzaje, si ne dindimiza langa kwe nhumbula, nha vyono kasakaga Mulungu. Muwitumaje u mulimo wuwo si kwe masulumizi ge zipesa, langa kwe nhumbula zenyu zose.

³ Mulece kuwatema kwe vilungo wawo wono wawicigwe mu wulanjliizi wenyu, langa mweze nha musambo kuli mhuga yiyo.

⁴ Na mu cidaha kolo u Mudimi Muwaha yakwijela, nanye molobocela u mukumbo wo lukumyo wono siwunyalaga.

⁵ Nanye nhavivyo mo wadodo, munojeye mwiwice mu wulajilize we wanyamhala. Nanye wose munojeye muwe no winenenyhezi ho musume kwiyitumila nyenye wose, hambi i Mandiko Gono Gelile nha gakutya “U Mulungu sikawasakaga wono wena widunhumuzi, langa kawapelaga lihewa iwenenenyhezi.”

⁶ Holeka mwinenenyheze mu muwoko wo Mulungu wono wuli vilungo, ho yamunyasulenyi mu cidaha cono cinojeye.

⁷ Mumulecelaje u Mulungu zose zono zikumugazenyi mu zinhumbula zenyu. Hambi mwene nha yo yakumudimenyi.

⁸ Mwikalaje meso, kanyhi mweze musujile. Hambi umulugu wenyu Setani, yakupilima pilima nha simba yikukoloma, yikulondola yunji yimuhawanje.

⁹ Holeka mumwimilaje, kanyhi mweze mukamile mu wihuwilo wenyu, kuno mumanyile vyono i wandugu zenyu wono wali kononze, nawo wakugatuga i magazo gono genha gaga.

¹⁰ Ninga kolo mukugazika cidaha cidodo vivi, Mulungu mono yo ndawililo ye lihewa lyose na mono yakumucemenyi muwuhanje ulukumyo lwakwe we cibitilila muwilunza na Kilisito, umweneco komukwilanicizenyi no kumukangazenyi, kanyhi komupelenyi vilungo no musinji wono wukamile.

¹¹ Kuli mwene wuwe wuwaha cibitilila! Heya.

I milamu ye ndumilizo

¹² Nimwandicilenyi i baluwa yiyi fupi, ko wutazi wa Silivano u ndugu yetu mono nimumanyile kanyhi mono nimwitumbiye. Nghusaka kumusikamyenyi no kuhomelela vyono ali lyeʼhewa lyo Mulungu lye mbeka. Holeka mwikalaje mukamile mwihewa lilyo.

¹³ Ne mhuga ye wayenyu i wahagulwa wo Mulungu wono wali mwikanisa lya ku Babiloni wakumulamusenyi. No mwanangu Maluko nha vivyo nayo yakumulamusenyi.

¹⁴ Mwiyilamusaje mu citanjilo co wendo wa Kilisito. U mulamu kuliʼnye wose mono muli wakwe Kilisito.