1 Petelo 2 - I CILAGANE CIPYA 1991

I libwe lyumi ne nghungugo yono yelile

¹ Holeka, lecenyi wubi wose: no wulambi, no wukoci, ne zinghani zose ze nhovu, vivyo vyose viwucile lukulu muli nyenye.

² Nha vyono iwana wadodo wasulumilaga mele, na nyenye nha vivyo munojeye muwe no wusulumizi we mele geneco ge cimuhe, na mu vilungo vyago, ho musume kuwiluka no kukombozwa.

³ Hambi i Mandiko Gono Gelile, nha gakutya “Mwezuka vyono Muwaha yali lusungu.”

⁴ Ale, mubitilenyi Muwaha! Umwene lyo libwe lyumi lyono lyalemwa ne wanhu, ninga hali Mulungu, lyo libwe lyono lihaguywe, lyono lina wuguzi wukamu.

⁵ Ale mubitilenyi mwene nha mabwe momi, mukazenjece, no kuwa nyumba ye cimuhe, mono mosuma kwitumama nhe wakohani wono welile, ku wulavya i makumbiko ge cimuhe gono gakumwendezo Mulungu mu nzila ya Yesu Kilisito.

⁶ Hambi i Mandiko Gono Gelile nha gakutya, “Langa ta! Nghuwika kuko ku Siyoni libwe liwaha lyo musinji. Ilibwe lyo wuguzi wukamu, lyono nilihaguye. Umunhu mono komwihuwila umwene mono yo lilyo libwe, sikolokozwa soni ngʼo.”

⁷ Ale kuliʼnye mono mwihuwiye, ilibwe lilyo lyo lyo wuguzi wukamu, ninga kuli walya wono si wehuwiye, “I libwe lyono walilema iwazenji, ninga alu lyo lyeza libwe liwaha lyo musinji.”

⁸ Kanyhi i Mandiko gakutya, “Libwe lilyo lyo libwe lyo wikobale, italawe lyo kuwagwisa wanhu.” Ne wanhu wekobalaga vyono siwehuwila inghani yiyilya. Ku soko vyo watemezezwa kuwulawa mwamulizo.

⁹ Ninga anye muli ndelwa hagulwa, iwakohani wo Mutemi, inghungugo yono yelile, i wanhu wo Mulungu mweneco, mono muhaguywe ho mwanze ze metumo mawaha go Mulungu mono yamucemenyi kulawa ku wutitu, yakamwinjizenyi mu wuzelu wakwe wo kwizina.

¹⁰ Mu mapango ganji, anye mwali si muli wanhu wo Mulungu, ningaʼlu anye mweza muli wanhu wakwe, kanyhi mwali si muwoneywe lusungu lo Mulungu, alu ninga mwawonelwa lusungu.

I wetumami wo Mulungu

¹¹ Nye nyo wendece wangu, nghumunenenyi nyenye nha wajenzi kanyhi wakola nzila mononze! Mwiyilegaje mu masulumizi go muwili gono vikulewana ne nhumbula.

¹² I mijendele yenyu muli wanhu wono siwamumanyile Mulungu, yinojeye yiwe miswanu muno muno, na kolo wakumuvilenyi nha muli wetuma vibi, wasume kugawona i metumo genyu maswanu, ho wamulumbile Mulungu mwizuwa lyo wuze wakwe.

¹³ Ale, mweze muli cihuliko kuli zose zono zikutemywa ne wanhu ku soko yo Muwaha. Cihuliko kuli mutemi u munya wutemi,

¹⁴ cihuliko kuli wawaha weʼzisi wono wahaguywe nayo, ho wawalipicize i wahodanji no kuwalumba i wetuma viswanu.

¹⁵ Hambi u Mulungu nha vyo yakuhila, ho musume kuzinyamaziza i zinghani zo wulele, ze wanhu wono wasina mahala mu metumo genyu maswanu gono mukwituma.

¹⁶ Mwikalaje nhe wanhu welecele, ninga mulece kuwitumamila u welecele wenyu wuwe nha cigubicizo co wubi, langa i mikalile yenyu yeze nhe wetumami wo Mulungu.

¹⁷ Mweze na cogopo kuli wanhu wose, mu wendaje i wandugu zenyu wono wehuwiye, mumogopaje Mulungu, mumupelaje lilumbo mutemi.

I cihwani ce magazo ga Kilisito

¹⁸ Nye nyo wetumami wa mu zikaya, mweze na cihuliko kuli wawaha wenyu hamonga ne cogopo cose, kuli i waswanu ne wapolo, hamba na kuli wono wali caka.

¹⁹ Hambi hono muwe mukukangalila mawine ge magazo gono simuganojeye gamutujenyi, akuno mumanyile vyono u Mulungu yakusaka muwe nha vivyo, ale Mulungu kumutazenyi.

²⁰ Hambi, motuga cambuzici kolo mukukangalila so wutowe wono mukutowa ku soko ye masutya genyu? Ninga hono muwe mukukangalila i magazo, hamba muwe nha mwetuma ziswanu, ale, nayo Mulungu komulugutenyi ku soko yiyo.

²¹ Na zizo zo mwacemelwa, hambi Kilisito mweneco nha yagazwa ku soko yenyu, yakamulecelenyi musambo, ho muyityatye i mikalile yakwe.

²² Umwene siyetuma wubi, hamba nghani yo wulambi, siyahulikwa mu mulomo wakwe.

²³ Na lono wamuligaga, yaza kuligwa mwene siyawapitula neʼligo, nha lono yagazizwa, mwene siyapinjicila langa yamuwicila u Mulungu u witumbilo wakwe wose, u mulingʼanizi we lingʼani.

²⁴ U mwene yawudinghulila u wubi wetu mu muwili wakwe mu musalaba, ho cisume kufwa ku lubavu lo wubi, no kuwumipila ku wilingʼano. Na muzinghomele zakwe, anye mo mwaponyezwa.

²⁵ Nanye mwali mwinha zingholo zono zali zajiliye, ninga lu mumuwuyila Mudimi no mulanjilizi we zinhumbula zenyu.