Roome 16 - ኦራ ጫቁዋ ጎፋሳሮ 1 ኪንኪሪያ ካታማን ዴዒያ ዎሳ ኬን ኦያ ኑ ሚቺያ ፌባ ሎዖ ማጫስ ጊዴይሳ ሂንቴ ኤራና ሜላ ኮያይስ። 2 ሂንቴ ኢዮ ኣማኒያ ኣሳቲ ጎዳ ሱንን ሞካናው ቤሲያ ኣማኒያ ኣሳታፔ ኢሱዋዳ ሞኪቴ። ኢያ ሂንቴፌ ኮያባ ኡባ ኢዮ ማዲቴ። ኢያ ባ ሁዔን ዳሮ ኣሳ ማዳሱ፤ ቃሲ ታና ታ ሁዔንካ ዳሮ ማዳሱ። 3 ኪሪስቶስ ዬሱሳ ኦሱዋ ታራ ኢሲፌ ኦያ ጲሪስቂላኔ ኣቂላ ሳሮ ጊቴ። 4 ኤንቲ ታ ጊሾ ባንታ ሼምፑዋ ኣ ኢሚዶሶና። ታ ፃላላ ጊዶናሺን ኣይሁዴ ጊዶና ኣሳ ዎሳ ኬ ኡባይ ኤንታ ጋላቴስ። 5 ኤንታ ሶን ሺቂያ ኣማኒያ ኣሳ ሳሮ ጊቴ። ኢሲያ ቢታን ኪሪስቶሳ ኮይሮ ኣማኒዳ፥ ታ ዶሲያ ኤጳኔፆሳስ ታ ሳሮዋ ኦዲቴ። 6 ሂንቴ ጊሾ ኦሶን ዳሮ ዳቡሪዳ ማይራሞ ሳሮ ጊቴ። 7 ታራ ቃሾ ኬን ኣዳ ታ ኣይሁዴ ላጌታ ኣንዲሮኒቆሳኔ ዩኒያሳ ሳሮ ጊቴ። ኤንቲ ዬሱሳ ሃዋሬታ ጊዶን ኤሬቲዳይሳታ። ቃሲ ኤንቲ ኪሪስቶሳ ታፔ ሲን ኣማኒዶሶና። 8 ጎዳን ኣማኒያ ታ ሲቆ ላጊያ፥ ኣምጲሊያፆሳ ሳሮ ጊቴ። 9 ኪሪስቶሳ ኦሱዋ ኑራ ኢሲፌ ኦያ ኡርባኖሴኔ ታ ዶሲያ ኢስታኩሳ ሳሮ ጊቴ። 10 ኪሪስቶሳን ኣማንያ ኣይሊያ ኣጴሊሳስ ታ ሳሮዋ ኦዲቴ። ኣርስፆቡሎሳ ሶ ኣሳስ ታ ሳሮዋ ኦዲቴ። 11 ታ ኣይሁዴ ላጊያ ሄሮዲዮና ሳሮ ጊቴ። ናርሲሳኔ ኢያ ሶ ኣሳፔ ኪሪስቶሳ ኣማኒዳይሳታ ሳሮ ጊቴ። 12 ጎዳ ኦሱዋን ዳቡሪያ ቲሩፋይናኔ ቲሩፎሳ ሳሮ ጊቴ። ቃሲ ጎዳስ ዳሮ ዳቡራዳ ኦያ፥ ታ ዶሲያ ጴርሲሶ ሳሮ ጊቴ። 13 ጎዳ ኦሱዋን ዳሮ ኤሬቲዳ ሩፎሳሲኔ ታና ባ ናዓዳ ቤዒያ ኢያ ኣዬስ ታ ሳሮዋ ኦዲቴ። 14 ኣሲኒኪርቶሳስ፥ ፊሌጎናስ፥ ሄርሜሳስ፥ ፓቲሮባሳሲኔ ኤንታራ ዴዒያ ኣማኒያ ኢሻታ ኡባስ ታ ሳሮዋ ኦዲቴ። 15 ፊሎሎጉሳ፥ ዩሊያ፥ ኔሪያ፥ ኢያ ሚቺው፥ ኦሉምፖሳኔ ኤንታራ ዴዒያ ኣማኒያ ኣሳ ኡባ ሳሮ ጊቴ። 16 ጌሻ ዬሬቴ ዬሬቲሼ፥ ኢሶይ ኢሱዋ ሳሮቴ። ኪሪስቶሳ ዎሳ ኬ ኡባይ ሂንቴና ሳሮ ያጎሶና። ዉርሴ ዞሬ 17 ታ ኢሻቶ፥ ሂንቴ ታማሪዳ ቲሚርቲያ ኢፂዲ፥ ሂንቴ ጊዶን ሻኬቴኔ ሜቶ ሜያ ኣሳታፔ ናጌቲቴ። ኤንታፌ ሃኪቴ። 18 ሄሳ ሜላ ኣሳቲ ባንታው ኦሶናፔ ኣቲን ኑ ጎዳ ኪሪስቶሳስ ኦኮና። ባንታ ማልዒያ ዶናኒኔ ሳጶያ ቃላን ኣይኮ ኤሮና ኣሳ ዎዛና ባሌሶና። 19 ዎንጌላስ ሂንቴ ኪቴቲዳይሳ ኣሳ ኡባይ ሲዒዳይሲ ታና ኡፋይሴስ። ሺን ሂንቴ ሎዖባ ኤራና ሜላኔ ኢታባፔ ሃካና ሜላ ታ ኮያይስ። 20 ሳሮቴ ፆሳይ ፃላሂያ ሂንቴ ቶሁዋፔ ጋርሳን ጋጪ ዬጋና። ኑ ጎዳ ዬሱስ ኪሪስቶሳ ኣ ኬሃቴይ ሂንቴራ ጊዶ። 21 ታራ ኦያ ፂሞቲዮሲ ሂንቴና ሳሮ ያጌስ። ሄሳዳካ፥ ታ ዳቦቲ ሉቂዮሲ፥ ያሶኒኔ ሶስጳፂሮሲ ሂንቴና ሳሮ ያጎሶና። 22 ሃ ዳብዳቢያ ጳዉሎሳስ ፃፊዳ ታኒ፥ ፃርፂዮሲ፥ ሂንቴና ጎዳ ሱንን ሳሮ ያጋይስ። 23 ታና ሞኪዳይኔ ዎሳ ኬ ኡባይ ኢያ ሶን ሺቂያ ጋዮሲ፥ ሂንቴና ሳሮ ያጌስ። ካታማ ሚሺያ ኦይኪያ ኤራስፆሲኔ ኑ ኢሻ ቃርፆሲ ሂንቴና ሳሮ ያጎሶና። [ 24 ኑ ጎዳ ዬሱስ ኪሪስቶሳ ኣ ኬሃቴይ ሂንቴ ኡባራ ጊዶ። ኣሚንዒ።] 25 ፆሳስ ጋላቲ ጊዶ። ታኒ፥ ዬሱስ ኪሪስቶሳባ ኦዲያ ዎንጌላ ቃላኒኔ ዳሮ ዎዴፔ ቆሴቲዲ ጋምዒዳ ቱማቴን፥ ፆሳይ ሂንቴና ኣማኖን ሚንዲ ኤሳናው ዳንዳዔስ። 26 ሺን ሃዒ ሄ ቱማይ ቆንጪስ። ካዎቴ ኡባይ ኣማኒዲ ኪቴታና ሜላ ሜሪና ፆሳ ኪታን ናቤቲ ሄ ቱማባ ፃፊዶሶና። 27 ዬሱስ ኪሪስቶሳ ባጋራ ጪንጫቴ ኢያ ፃላላስ ዴዒያ፥ ኢሲ ፆሳስ ሜሪናው ቦንቾይ ጊዶ። ኣሚንዒ። |