ዮሃኒሳ ቆንጬ 7 - ኦራ ጫቁዋ ጎፋ

144፥000 ኣሳታ ቦላ ማታሜይ ዎሴቲስ

¹ ሄሳፌ ጉዬ፥ ኦይዱ ኪታንቾቲ ኦይዱ ሳዓ ጋፃን ኤቂዳይሳታ ቤዓስ። ሄ ኪታንቾቲ ሳዓ ቦላ ዎይኮ ኣባ ቦላ ዎይኮ ኣይ ሚ ቦላ ጫርኮይ ኦይዱ ሳዓ ጋፃፔ ጫርኮና ሜላ ቴቂዶሶና።

² ቃሲ ዴዖ ፆሳ ማታሚያ ኦይኪዳ ሃራ ኪታንቾይ ዶሎሃ ባጋፌ ኬዬይሳ ቤዓስ። ሄ ኪታንቾይ ባ ቃላ ቁ ኦዲ፥ ሳዓኔ ኣባ ቆሃናው ዎልቂ ኢሜቲዳ ኦይዱ ኪታንቾታ፥

³ ፄጊዲ፥ «ኑኒ ፆሳ ኣይሌታ ሶምዖን ማታሚያ ዎና ጋካናው ቢታ ዎይኮ ኣባ ዎይኮ ሚ ቆሆፒቴ» ያጊስ።

⁴ ያቲን፥ ታኒ ፆሳ ማታሜይ ሶምዖን ዎሴቲዳይሳታ ፓይዱዋ ሲዓስ። ኢስራዔሌ ማይዛታ ኡባፌ ፄታኔ ኦይታማኔ ኦይዱ ሙኩሉ ኣሳስ ሶምዖን ማታሜ ዎስ።

⁵ ዪሁዳ ዜሬፌ ታማኔ ናምዑ ሙኩሉ፥ ሮቤላ ዜሬፌ ታማኔ ናምዑ ሙኩሉ፥ ጋዴ ዜሬፌ ታማኔ ናምዑ ሙኩሉ፥

⁶ ኣሴሬ ዜሬፌ ታማኔ ናምዑ ሙኩሉ፥ ኒፍታሌሜ ዜሬፌ ታማኔ ናምዑ ሙኩሉ፥ ሚናሴ ዜሬፌ ታማኔ ናምዑ ሙኩሉ፥

⁷ ሲሞና ዜሬፌ ታማኔ ናምዑ ሙኩሉ፤ ሌዌ ዜሬፌ ታማኔ ናምዑ ሙኩሉ፥ ዪሳኮሬ ዜሬፌ ታማኔ ናምዑ ሙኩሉ፥

⁸ ዛቢሎኔ ዜሬፌ ታማኔ ናምዑ ሙኩሉ፥ ዮሴፋ ዜሬፌ ታማኔ ናምዑ ሙኩሉ፥ ቢኒያሜ ዜሬፌ ታማኔ ናምዑ ሙኩሉ፥ ኣሳ ሶምዖን ማታሜ ዎስ።

ቦ ማዖ ማዒዳ ዳሮ ኣሳታ

⁹ ሄሳፌ ጉዬ፥ ዜሬ ኡባፌ፥ ካዎቴ ኡባፌ፥ ያራ ኡባፌኔ ዱማ ዱማ ዶናፔ ዛዊ ባይና ዳሮ ኣሳ ቤዓስ። ሄ ኣሳይ ቦ ማዖ ማዒዲ፥ ዛምባ ሃይ ባንታ ኩሼን ኦይኪዲ፥ ኣራታ ሲንኒኔ ዶርሳ ሲንን ኤቂዶሶና።

¹⁰ ኤንቲ ባንታ ቃላ ቁ ኦዲ፥ «ኣቶቴይ ኣራታን ኡቲዳ ኑ ፆሳፌኔ ዶርሳፌ ዬስ» ያጊዶሶና።

¹¹ ኪታንቾቲ ኡባይ፥ ኣራታ፥ ጪማታኔ ኦይዱ ሜቴታ ዩሹዋን ኤቂዶሶና። ኤንቲ ኣራታ ሲንን ጉፋኒዲ ፆሳ ጎይኒዶሶና።

¹² «ኣሚንዒ! ኣንጆይ፥ ቦንቾይ፥ ጪንጫቴይ፥ ጋላታይ፥ ሳባይ ዎልቃይ፥ ሚኖቴይ ሜሪ ሜሪናው ኑ ፆሳስ ጊዶ። ኣሚንዒ!» ያጊዶሶና።

¹³ ጪማታፔ ኢሶይ ታኮ፥ «ሃ ቦ ማዑዋ ማዒዳ ኣሳቲ ኦናንቴ? ኤንቲ ኣዉፔ ዪዶና?» ያጊዲ ኦይቺስ።

¹⁴ ታኒ ዛራዳ፥ «ጎዳው፥ ኔ ኤራሳ» ያጋስ። ኢካ ታኮ፥ «ሃይሳቲ ዳሮ ዋዬ ዋዪዲ ኣዳይሳታ። ኤንቲ ባንታ ማዑዋ ዶርሳ ሱን ሜጪዲ ጌሺዶሶና።

¹⁵ ሄሳ ጊሾ፥ ኤንቲ ፆሳ ኣራታ ሲንን ጊዲዲ ቃማኔ ጋላስ ኢያ ኬን ኦሶና። ቃሲ ኣራታ ቦላ ኡቲዳይሲ ኤንታው ኩያ ጊዳና።

¹⁶ ሂዛፔ ጉዬ፥ ኤንቲ ኮሻቶኮና፥ ሳሞቶኮና። ኣዊ ዎይኮ ሚሺ ኤንታ ሜና።

¹⁷ ኣራታ ጊዶን ኡቲዳ ዶርሳይ ኤንታ ሄማና። ዴዖ ፑልቶ ሃኮ ኤንታ ካሌና። ፆሳይ ኤንታ ኣይፊያፔ ኣፉ ኡባ ቁቻና» ያጊስ።