ዮሃኒሳ ቆንጬ 5 - ኦራ ጫቁዋ ጎፋዶርሳይ ፃ ማፃፋ ዶዪስ 1 ሄሳፌ ጉዬ፥ ኣራታ ቦላ ኡቲዳይሳ ኡሻቻ ኩሼን ጊዶራኔ ካሬራ ፃፌቲዳ ላፑን ማታሜን ጎርዴቲዳ ፃ ማፃፋ ቤዓስ። 2 ኢሲ ሚኖ ኪታንቾይ ባ ቃላ ቁ ኦዲ፥ «ማታሚያ ቢላናዉኔ ማፃፋ ዶያናው ቤሴይ ኦኔ?» ያጊዲ ኣዋጂሺን ቤዓስ። 3 ሺን ሳሎን ጊዲን ሳዓን ዎይኮ ሳዓፔ ጋርሳን ጊዲን ሄ ፃ ማፃፋ ቢላናዉኔ ጊዱዋ ቤዓናው ዳንዳዔይ ኦኒካ ቤንቲቤና። 4 ፃ ማፃፋ ቢላናዉኔ ኢያ ጊዱዋ ቤዓናው ቤሲያ ኣሲ ዪዳ ጊሾ ታ ዳሮ ዬካስ። 5 ያቲን፥ ጪማታፔ ኢሶይ ታኮ፥ «ዬኮፋ! ሄኮ፥ ዪሁዳ ዜሬ ጊዲያ ጋሞይ፥ ዳዊቴ ሼሻይ፥ ላፑን ማታሜታ ቢላናዉኔ ማፃፋ ዶያናው ዳንዳዒስ» ያጊስ። 6 ሄሳፌ ጉዬ፥ ሹኬቲዳ ዶርሳይ ኣራታስ፥ ኦይዱ ዴዖን ዴዒያ ሜቴታሲኔ ጪማታስ ጊዶን፥ ኤቂዳይሳ ቤዓስ። ኢያው ላፑን ካጬቲኔ ላፑን ኣይፌቲ ዴዖሶና። ሄሳቲ ሳዓ ኡባ ኪቴቲዳ ፆሳ ላፑን ኣያናታ። 7 ሄ ዶርሳይ ቢዲ፥ ኣራታ ቦላ ኡቲዳይሳ ኡሻቻ ኩሼፔ ፃ ማፃፋ ኤኪስ። 8 ኢ ሄ ፃ ማፃፋ ኤኪዳ ዎዴ ዴዖን ዴዒያ ኦይዱ ሜቴቲኔ ላታማኔ ኦይዱ ጪማቲ ዶርሳ ሲንን ኩንዲዶሶና። ኤንቲ ኢሶይ ኢሶይ ዲኔ ጌሻታ ዎሳ ጊዲዳ ኢፃኔይ ኩሚዳ ዎርቃ ሻቴ ኦይኪዶሶና። 9 ኤንቲ፥ «ፃ ማፃፋ ኤካናው፥ ማታሚያ ቢላናው ኔው ቤሴስ። ኣይስ ጊኮ፥ ኔኒ ሹኬታዳሳ፤ ዜሬ ኡባፌ፥ ዱማ ዱማ ዶናፔ፥ ያራታፔኔ ካዎቴታ ኡባፌ ኔ ሱን ፆሳስ ዎዛዳሳ። 10 ኤንቲ ኢያ ፆሳ ኣዋስ ኦና ሜላ ኤንታና ካሂኔ ካዎቴ ኦዳሳ። ኤንቲካ ቢታ ኡባ ሃራና» ያጊዲ ኦራ ማዝሙሬ ዬፂዶሶና። 11 ታ ቤዒያ ዎዴ ሙኩሉ ቶሆ ሙኩሉኔ ታሙ ሙኩሉ ቶሆ ታሙ ሙኩሉ ጊዲያ ኪታንቾታ ጊርሳ ሲዓስ። ኤንቲካ ኣራታ፥ ኦይዱ ዴዖን ዴዒያ ሜቴታኔ፥ ጪማታ ዩሹዋን ኤቂዶሶና። 12 ሄ ኪታንቾቲ ቁ ጊዳ ቃላን፥ «ሹኬቲዳ ዶርሳይ ዎልቃ፥ ዱሬቴ፥ ጪንጫቴኔ ሚኖቴ፥ ቦንቾ፥ ሳባኔ ጋላታ ኤካናው ቤሴስ» ያጊዶሶና። 13 ሄሳፌ ጉዬ፥ ሳዓን፥ ሳሎን፥ ሳዓፔ ጋርሳኒኔ ኣባ ጊዶን ዴዒያ ሜቴ ኡባይ፥ «ኣራታ ቦላ ኡቲዳይሳሲኔ ዶርሳስ፥ ጋላታይ፥ ቦንቾይ፥ ሳባይኔ ዎልቃይ ሜሪ ሜሪናው ጊዶ» ያጊዲ ዬፂሺን ሲዓስ። 14 ኦይዱ ዴዖን ዴዒያ ሜቴቲ፥ «ኣሚንዒ» ያጊዶሶና፤ ቃሲ ጪማቲ ጉፋኒዲ ጎይኒዶሶና። |