ዮሃኒሳ ቆንጬ 18 - ኦራ ጫቁዋ ጎፋባቢሎኔ ኩንዴ 1 ያቲዲ፥ ጊታ ማቲ ዴዒያ ሃራ ኪታንቾይ ሳሎፔ ዎሺን ታ ቤዓስ። ሄ ኪታንቹዋ ቦንቾይ ሳዓ ፖዒሲስ። 2 ሄ ኪታንቾይ ባ ቃላ ቁ ኦዲ፥ «ኢያ ኩንዳሱ! ጊታ ባቢሎኔይ ኩንዳሱ! ባቢሎኔይ ቱና ኣያናቲ ኣቂያ ቤሲ ጊዳሱ። ዱማ ዱማ ኢታባታስ ኬ ጊዳሱ፤ ቱና ካፎቲኔ ዶዓቲ ሼምፒያ ቤሲ ጊዳሱ። 3 ኣሳ ዜሬ ኡባ ባ ላይማቴ ዎይኒያ ኡሻሱ። ሳዓ ካዎቲ ኢራ ላይማቲዶሶና። ኢ ሚኮቴፌ ዴንዶይሳን ቢታን ዴዒያ ዛልዓንቾቲ ዱሬቲዶሶና» ያጊስ። 4 ሄሳፌ ጉዬ፥ ታ ሳሎፔ ሃይሳዳ ያጊያ ሃራ ቃላ ሲዓስ። «ኢ ናጋራ ኢራ ኮፆና ሜላኔ፥ ኢያ ኤካናው ዴዒያ ሴራ ሂንቴ ኤኮና ሜላ፥ ታ ዴሪያው ኢፔ ኬዪቴ። 5 ሂዛ፥ ኢ ናጋራይ ሳሎ ጋካናው ዶሬቲስ። ፆሳይ ኢ ናቁዋ ኣኬኪስ። 6 ኢያ ኢሚዳይሳ ሜላ ዛሪዲ ኢው ኢሚቴ። ኢያ ኦዳ ኦሱዋስ ናምዑ ኩሼ ኢው ዛሪቴ። ኢያ ጊጊሲዳ ኡሻ ቦላ ሂንቴ ናምዑ ኩሼ ማያ ኡሻ ኢ ፁዓን ኩንቴ። 7 ኢያ ቦንቼቲዳይሳዳኔ ኢው ኢንጄቲዳይሳ ሜላ፥ ኢዮ ሜቶቴኔ ካዮዪቴ። ኢያ ባ ዎዛናን፥ ‹ታኒ ካዌዳ ኡታስ፤ ታ ኣዚኒ ባይና ማጫስ ጊዲኬ፤ ታኒ ኡባካ ካዮቲኬ› ያጋሱ። 8 ሄሳ ጊሾ፥ ቦሻ ኡባይ፥ ሃርጌይ፥ ካዮይኔ ኮሺ ኢዮ ኢሲ ጋላስ ኦይካና። ቃሲ ኢያ ታማን ፁጌታና፤ ኣይስ ጊኮ፥ ኢ ቦላ ፒርዲያ ፆሳይ ዎልቃማ» ያጊስ። 9 «ኢራ ላይማቲዳይሳቲኔ ኢ ሚኮቴን ዴዒዳ፥ ኣላሚያ ካዎቲ ሄ ካታሚያ ፁጌቲን ኬያ ጩያ ቤዒዳ ዎዴ ኢው ዋሲዲ ዬካና። 10 ኤንቲ ሄ ካታሜ ዋያ ቤዒዲ ያዪዳ ጊሾ ሃኪ ኤቂዲ፥ ‹ሃ ጊታ ካታሜ! ዎልቃማ ካታሜ! ባቢሎኔ፥ ኔና ኣዬ! ኔኒ ኢሲ ሳቴ ጊዶን ኔ ፒርዳ ኤካዳሳ› ያጋና። 11 «ኤንታ ማርካቢያ ጫና ሂዛፔ ሻሚያ ኣሲ ባይና ጊሾ ሳዓን ዴዒያ ዛልዓንቾቲ ሄ ካታሜስ ዋሳናኔ ካዮታና። 12 ኤንታ ዎርቃ፥ ቢራ፥ ቦንቾ ሹቻ፥ ኢንቆ ጊያ ኣልዖ ሹቻ፥ ካሎሴ ማዖ፥ ሊኖ ማዖ፥ ሃሬ ማዖ፥ ዞዖ ማዖ፥ ዱማ ዱማ ሳዎ ሚ፥ ዛሌ፥ ኣልዖ ሚ፥ ናሴ ቢራታ፥ ጎሌ ሹቹ፥ 13 ቃራፋ፥ ቂማሜ፥ ኢፃኔ፥ ካርቤ፥ ሺቶ፥ ዎይኔ፥ ዛይቴ፥ ሊቆ ሌ፥ ጊስቴ፥ ሜሄ፥ ዶርሴ፥ ፓራ፥ ፓራ ጋሬ፥ ኣይሌታኔ ሃራ ኣሳታ ሻሚያ ኦኒካ ባዋ። 14 «ዛልዓንቾቲ ማጫሴኮ፥ ‹ኔኒ ኣሞቲዳ ሎዖባ ኡባይ ኔፔ ይስ። ኔ ኣቆይኔ ኣሌቄቲዳባ ኡባይ ኔፔ ሃኪስ። ኔኒ ዛራዳ ኤንታ ኡባ ዴማካ› ያጊዶሶና። 15 ሄ ካታማን ዛልዒዲ ዱሬቲዳ ዛልዓንቾቲ ኢ ሜቱዋ ባቢዲ ኢፔ ሃኪዲ ኤቃና። ኤንቲ ዬካናኔ ካዮታና። 16 ቃሲ፥ ‹ሊኖ ማዖ፥ ካሎሴ ማዖኔ ዞዖ ማዖ ማዓዳ፥ ዎርቃን፥ ቦንቾ ሹቻኒኔ ኢንቆ ጊያ ኣልዖ ሹቻን ኣሌቄቲዳ፥ ሄ ጊታ ካታሜስ ኣዬ! 17 ሃይሳ ሜላ ጊታ ሻሎ ኡባይ ኢሲ ሳቴ ጊዶን ይስ› ያጊዶሶና። «ማርካቢያ ላጊያ ኡባይ፥ ማርካቢያን ቢያ ኡባይ፥ ማርካቢያ ቦላ ኦያ ኡባይኔ ኣባን ዛልዒያ ኡባይ ሃኪ ኤቂዶሶና። 18 ሄ ካታሚያ ፁጌቲን ኬያ ጩያ ቤዒዳ ዎዴ ‹ሃ ጊታ ካታሚው ዳኒያ ሃራ ካታሚ ዴዒሻ?› ያጊዶሶና። 19 ኤንቲ ባንታ ሁዔን ባና ቆሊዲ፥ ዋሲዶሶናኔ ካዮቲዶሶና። ‹ኣባ ቦላ ማርካቤቲ ዴዒያ ኡባይ፥ ኢ ሻሉዋን ዱሬቲዳ ኡባይ፥ ሄ ካታሚያ ኢሲ ሳቴን ዪዳ ጊሾ ኣዬ! ኣዬ! 20 ሳሉዋው፥ ኢ ዩዋን ኡፋይታ! ጌሻቶ፥ ሃዋሬቶ፥ ናቤቶ፥ ፆሳይ ሂንቴ ጊሾ ኢ ቦላ ፒርዲዳ ጊሾ ኡፋይቲቴ።› ያጊዶሶና።» 21 ያቲን፥ ሚኖ ኪታንቾይ ዎፃ ዳኒያ ጊታ ሹቹ ዴንዲ ኣባን ሆሊሼ፥ «ጊታ ካታሚያ ባቢሎኔይ ዎልቃን ሆሌታዳ ሃይሳዳ ኩንዳና፤ ኢያ ሃቺፌ ጉዬ ኡባካ ቤንቱኩ። 22 ዲ ዲፄይሳቲኔ ዬፄይሳቲ፥ ሱሱልዔኔ ሞይዜ ፑኔይሳቲ፥ ሂዛፔ ጉዬ ኔ ጊዶን ኡባካ ሲዔቶኮና። ኣይ ኮቻ ዛልዔ ዛልዒያ ኣሲካ ኔ ጊዶን ቤንቴና። ዎፃ ጊርሲ ሂዛፔ ጉዬ ኔ ጊዶን ሲዔቴና። 23 ፆምፔ ፖዖይ ዛሪዲ ኔ ጊዶን ፖዔና። ማቾ ኤኬይሳኔ ኣዚና ጌሊያሪ ቃሊ ሂዛፔ ጉዬ ኔ ጊዶን ሲዔቴና። ኔ ዛልዓንቾቲ ቢታ ኡባን ኤሬቲዳ ዎልቃማታ። ኔ ቢታን ካዎቴታ ኡባ ጪማዳሳ» ያጊስ። 24 ናቤታ ሱይ፥ ጌሻታ ሱይኔ ቢታ ቦላ ሃይቂዳ ኣሳ ኡባ ሱይ ኢ ጊዶን ቤንቲዳ ጊሾ ባቢሎኔይ ፒርዴታሱ። |