ዮሃኒሳ ቆንጬ 15 - ኦራ ጫቁዋ ጎፋ

ዉርሴ ቦሻታ

¹ ታኒ ሳሎን ሃራ ጊታኔ ማላሊሲያ ማላታ ቤዓስ። ፆሳ ዉርሴ ሃንቁዋ ቆንጪሲያ ላፑን ቦሻታ ኦይኪዳ ላፑን ኪታንቾቲ ዴዖሶና።

² ቃሲ ታማራ ዋላኬቲዳ ቡርጩኮ ኣባ ዳኔይሳ ቤዓስ። ሄ ኣባ ጋፃን ዶዓ፥ ኢያ ሚሲሊያኔ ኢያ ሱን ታይቡዋ ፆኒዳይሳታ ቤዓስ። ፆሳይ ኤንታው ኢሚዳ ዲ ኦይኪዲ ኤቂዶሶና።

³ ኤንቲ ፆሳ ኣይሊያ ሙሴ ማዝሙሪያኔ ዶርሳ ማዝሙሪያ ሃይሳዳ ያጊድ ዬፆሶና። «ጎዳው፥ ኡባፌ ዎልቃማ ፆሳው፥ ኔ ኦሶይ ጊታኔ ማላሊሲያባ። ዴሬ ኡባ ካዋው፥ ኔ ኦጌይ ፂሎኔ ቱማ።

⁴ ጌሺ ኔ ፃላላ ጊዲያ ጊሾ ጎዳው፥ ኔው ያዮናይኔ ኔ ሱን ቦንቾናይ ኦኔ? ኔ ፂሎ ኦሶይ ኣሳ ኡባስ ቆንጬ ጊዲያ ጊሾ ካዎቴ ኡባይ ኔ ሲን ዪዲ ጎይናና» ያጊዲ ዬፆሶና።

⁵ ሄሳፌ ጉዬ፥ ሳሎን ዶዬቲዲ ዴዒያ ፆሳ ኬ፥ ኢካ ማርካቴ ዱንካኒያ ቤዓስ።

⁶ ላፑን ቦሻታ ኦይኪዳ ላፑን ኪታንቾቲ ፆሳ ኬፌ ኬዪዶሶና። ኤንቲ ጌሺኔ ጶሊያ ሊኖ ማዖ ማዒዶሶና፤ ባንታ ቲራን ዎርቃ ዳንጮ ዳንጪዶሶና።

⁷ ኦይዱ ሜቴታፔ ኢሶይ፥ ሜሪናው ዴዒያ ፆሳ ሃንቆይ ኩሚዳ ላፑን ዎርቃ ፁዓታ ላፑን ኪታንቾታስ ኢሚስ።

⁸ ፆሳ ቦንቹዋፌኔ ኢያ ዎልቃፌ ዴንዶይሳን ፆሳ ኬይ ጩያን ኩሚስ። ላፑን ኪታንቾቲ ኦይኪዳ ላፑን ቦሻቲ ፖሌታና ጋካናው ፆሳ ኬ ኦኒካ ጌላናው ዳንዳዒቤና።