Maatosa 24 - ኦራ ጫቁዋ ጎፋ

ዬሱሲ ፆሳ ኬይ ላሌታናይሳ ካሴቲዲ ኦዲስ

¹ ዬሱሲ ፆሳ ኬፌ ኬዪዲ ቢሺን፥ ኢያ ታማሬቲ ኢያኮ ዪዲ፥ ማላሌቲዲ ፆሳ ኬ ጊምቢያ ቤሲዶሶና።

² ዬሱሲ ኤንታኮ ዛሪዲ፥ «ኤ! ሃይሳ ኡባ ቤዔቲ? ታኒ ሂንቴው ቱማ ኦዳይስ፤ ሹቺ ሹቻ ቦላ ጊምቤቲዳ ሜላ ላሌቶና ኣቴና» ያጊስ።

ሲንፌ ሃናናባታ

³ ዬሱሲ ሻማሆ ዴሪያ ቦላ ኡቲዳሺን፥ ኢያ ታማሬቲ ባንታርካ ኢያኮ ዪዲ፥ «ሄሲ ኣዉዴ ሃናኔኮ ኑስ ኦዳ። ቃሲ ኔ ዩሳሲኔ ዎዲያ ዉርሴስ ማላታይ ኣይቤ?» ያጊዲ ኦይቺዶሶና።

⁴ ዬሱሲ ዛሪዲ፥ «ሂንቴና ኦኒካ ባሌና ሜላ ናጌቲቴ!

⁵ ኣይስ ጊኮ፥ ዳሮ ኣሳቲ ታ ሱንን፥ ‹ታኒ ኪሪስቶሳ፥ ፆሳይ ኣሳ ኣሻናው ኪቲዳይሳ› ያጊሼ ዪዲ ዳሮ ኣሳ ባሌና።

⁶ ማታን ዴዒያ ኦላ ጊርሳ፥ ሃሆን ዴዒያ ኦላ ዎሬ ሲዓናው ዴዔታ። ሄሳ ሜላባይ ሃናናው ቤሲያ ጊሾ ሂርጎፊቴ። ሺን ዉርሴይ ቡሮና።

⁷ ዴሬይ ዴሪያራ፥ ኢሲ ካዎቴይ ሃራ ካዎቴራ ኦሌታና። ኮሻይኔ ቢታ ቃፆይ ኡባ ቤሳን ሃናና።

⁸ ሄሲ ኡባይ ዬሎ ኢቄስ ዞኬ ሜላ።

⁹ «ሄ ዎዴ ኣሳይ ሂንቴና ዋዬስ ኣ ኢማና፥ ቃቻናኔ ዎና። ታ ሱን ጊሾ ኣሳ ኡባይ ሂንቴና ኢፃና።

¹⁰ ሄ ዎዴ ዳሮቲ ኣማኖ ኣጋና። ባንታ ጊዶን ኢሶይ ኢሱዋ ኣዲ ኢማና፥ ኢሶይ ኢሱዋ ኢፃና።

¹¹ ቃሲ ዳሮ ዎርዶ ናቤቲ ዴንዲዲ ዳሮታ ባሌና።

¹² ጌላቴ ዳሪያ ጊሾ ዳሮ ኣሳ ሲቆይ ኢርፃና።

¹³ ሺን ዉርሴ ጋካናው ጌንጪያ ኡራይ ኣታና።

¹⁴ ኣሳ ኡባስ ማርካ ጊዳና ሜላ ፆሳ ካዎቴ ዎንጌላይ ቢታ ኡባን ኦዴታና። ሄሳፌ ጉዬ፥ ዉርሴይ ያና።

ቱና ባሻ

¹⁵ «ሄሳ ጊሾ፥ ናቢያ ዳኔሊ ኦዲዳ ባሻ ቱናቴይ ጌሻ ቤሳን ኤቂዳይሳ ሂንቴ ቤዓና። (ኣኬኪሶ፡ ሄሲ ዎይ ጉሴኮ ናባቤይሲ ኣኬኮ!)

¹⁶ ሄ ዎዴ ዪሁዳ ቢታን ዴዔይሳቲ ዴሪያኮ ባቃቶ።

¹⁷ ኬ ሁዔን ዴዒያ ኡራይ ባ ሶን ዴዒያባ ኤካናው ሶ ጌሎና ባቃቶ።

¹⁸ ጋዴን ዴዔይሲ ባ ማዑዋ ኤካናው ጉዬ ሲሞፎ።

¹⁹ ሄ ዎዴ ቃን ማጫሳታሲኔ ንያ ማጫሳታስ ዳሮ ኡንዓ ጊዳና።

²⁰ ባልጎን ዎይኮ ሳምባታን ሂንቴ ባቃቶይ ጊዶና ሜላ ፆሳ ዎሲቴ።

²¹ ኣይስ ጊኮ፥ ሳዒ ሜቶሳፔ ሃቺ ጋካናው ሃኖናባይ፥ ቃሲ ሲንፌካ ኡባራካ ሃኖና ዋዬይ ሄ ዎዴ ሃናና።

²² ፆሳይ ሄ ጋላሳታ ታይቡዋ ጉናኮ ኣሴ ጊዲዳ ኦኒካ ኣቴና። ሺን ኢ ባ ዶሪዳ ኣሳታ ጊሾ ሄ ጋላሳታ ታይቡዋ ጉና።

²³ «ሄ ዎዴ ኦኒካ ሂንቴና፥ ‹ሄኮ፥ ኪሪስቶሲ ሃይሳን› ዎይኮ ‹ሂኒን ዴዔስ› ያጊኮ ኣማኖፒቴ።

²⁴ ኣይስ ጊኮ፥ ዎርዶ ኪሪስቶሳቲኔ ዎርዶ ናቤቲ ዴንዳና። ኤንታው ዳንዳዔቲኮ፥ ሃሪ ኣቶሺን ፆሳይ ዶሪዳይሳታካ ባሌናው ጊታ ማላታታኔ ማላሊሲያባታ ኦና።

²⁵ ኣኬኪቴ፥ ታኒ ሂንቴው ሃይሳ ካሴታዳ ኦዳስ።

²⁶ «ሄሳ ጊሾ፥ ኣሳይ ሂንቴኮ፥ ‹ሄኮ፥ ኪሪስቶሲ ባዞን ዴዔስ› ጊኮ፥ ያ ቦፒቴ። ዎይኮ ሂንቴኮ፥ ‹ሄኮ፥ ቆልዓን ዴዔስ› ጊኮ፥ ኤንታባ ኣማኖፒቴ።

²⁷ ኣይስ ጊኮ፥ ዎልዓን ሳሎን ዎልዓሚዲ፥ ዶሎሃፔ ዉሎሃ ጋካናው ቤንቴይሳዳ፥ ኣሳ ናዓ ዩሳይ ሄሳዳ ሃናና።

²⁸ «ባዉቲ ዴዒይሶን ኣንኮቲ ሺቃና።

ኪሪስቶሲ ናምዓን ያና

²⁹ «ሄ ዎዴ ሄ ዋዬ ጋላሳታፔ ጉዬ፥ ሶሁዋራ ኣዋይ ማና፥ ኣጌናይ ባ ፖዑዋ ዲጋና። ፆሊንቶቲ ሳሎፔ ዎና፥ ቃሲ ሳሎን ዴዒያ ዎልቃቲ ቡቄታና።

³⁰ ሄ ዎዴ ኣሳ ናዓ ዩሳ ማላይ ሳሉዋ ቦላ ቤንታና። ሳዓን ዴዒያ ኣሲ ኡባይ ዬካና። ቃሲ ኣሳ ናዓይ፥ ዎልቃራኔ ጊታ ቦንቹዋራ ሳሉዋ ሻራ ጊዶራ ዪሺን ኤንቲ ቤዓና።

³¹ ኢ ባ ኪታንቾታ ጊታ ፑኒያ ሞይዜራ ኪታና። ኤንቲ ሳዓ ኦይዱ ባጋ ቢዲ፥ ሃ ጋፃፔ ያ ጋፃ ጋካናው ዴዒያ ኢያው ዶሬቲዳይሳታ ሺሻና።

ጎዳይ ያና ጋላሳ ማላታ

³² «ባላሴ ሚፌ ታማሪቴ። ኢ ኣጪዲ ሃይፂያ ዎዴ ቶርቼይ ማታቲዳይሳ ሂንቴ ኤሬታ።

³³ ሄሳዳካ፥ ሂንቴ ሃ ኡባባ ቤዒያ ዎዴ ዬሱሲ ማቲዲ ፔንጌን ዴዔይሳ ኤሪቴ።

³⁴ ታኒ ሂንቴው ቱማ ኦዳይስ፤ ሃ ኡባባይ ፖሌታና ጋካናው፥ ሃ ዬሌቴይ ኣና።

³⁵ ሳሎይኔ ሳዓይ ኣና፥ ሺን ታ ቃላይ ኡባካ ኣና።

ጎዳይ ያና ጋላሳ ኦኒካ ኤሬና

³⁶ «ሄ ጋላሳኔ ሄ ሳቲያ ሳሎን ዴዒያ ታ ኣዋፔ ኣቲን ሃሪ ሳሎ ኪታንቾታ ጊዲን ዎይኮ ናዓ ጊዲን ኦኒካ ኤሬና።

³⁷ ኣሳ ናዓ ዩሳይ፥ ኖሄ ዎዴ ሃኒዳይሳ ሜላ ጊዳና።

³⁸ ሄ ዎዴ ዮ ሃይ ያናፔ ሲን ኖሄይ ማርካቢያን ጌሊዳ ጋላሳ ጋካናው፥ ኣሳይ ሚሼኔ ኡዪሼ፥ ኤኪሼኔ ጌሊሼ ጋምዒስ።

³⁹ ባሻ ሃይ ዪዲ፥ ኤንታ ኡባ ይሳና ጋካናው ኣኬኪቦኮና። ኣሳ ናዓ ዩሳይካ ሄሳዳ ሃናና።

⁴⁰ «ሄ ዎዴ ናምዑ ኣሳቲ ጋዴን ኦና። ኤንታፌ ኢሶይ ኤኬታና፥ ሃንኮይ ኣታና።

⁴¹ ናምዑ ማጫሳቲ ኢሲፌ ጋጫና። ኤንታፌ ኢሲኒያ ኤኬታና ሃንኪያ ኣታና።

⁴² «ሂዛ፥ ሂንቴ ጎዳይ ኣይ ጋላስ ያኔኮ ሂንቴ ኤሮና ጊሾ ሚኒዲ ናጊቴ።

⁴³ ሺን ካይሶይ ቃማፌ ኣይ ሳቴን ያኔኮ ኬዋይ ኤሪያኮ፥ ባ ኬይ ቦኬቶና ሜላ ባርኪዲ ናጋናሺን።

⁴⁴ ሄሳዳካ፥ ኣሳ ናዓይ ሂንቴ ቆፖና ሳቴን ያና ጊሾ ሂንቴካ ጊጊዲ ዴዒቴ።

ኢታኔ ሎዖ ኣይሌታ ሌሚሶ

⁴⁵ «ያቲን፥ ባ ሶ ኣሳስ ካ ኮሺያ ዎዲያን ኢማና ሜላ ኢያ ጎዳይ ዶሪዳ ኣማንይሲኔ ዎዛናማ ኣይሌይ ኦኔ?

⁴⁶ ኢ ባ ጎዳይ ኪቲዳይሳ ኦሺን ኢያ ጎዳይ ዪዲ ዴሚያ ኣይሌይ ኣንጄቲዳይሳ።

⁴⁷ ታኒ ሂንቴው ቱማ ኦዳይስ፤ ጎዳይ ሄ ኣይሊያ ባባ ኡባ ቦላ ሹማና።

⁴⁸ ሺን ሄ ኣይሌይ ኢታ ጊዲኮ፥ ‹ታ ጎዳይ ጋምዒዲ ያና› ያጊዲ ባ ዎዛናን ቆፒዲ፥

⁴⁹ ባ ላጌ ኦሳንቾታ ዋ ዶሚኮ፥ ማቴይሳታራ ሚኮኔ ኡዪኮ፥

⁵⁰ ሄ ኣይሊያ ጎዳይ ኢ ቆፖና ጋላሲኔ ኢ ኤሮና ሳቴን፥

⁵¹ ዪዲ ኢያ ቃንፄሬና። ኢያ ቃዳ ጩቦታራ ኦና። ሄ ቤሳን ኢያው ዬሆኔ ኣቼ ጋርጬ ጊዳና።