Ibraawe 8 - ኦራ ጫቁዋ ጎፋዬሱሲ ኑ ካሂኔ ሃላቃ 1 ኑኒ ሃሳያ ጊታባይ ሄሳ። ሳሉዋን ኡባፌ ቦላ ፆሳ ኣራታፔ ኡሻቻ ባጋን ኡቲዳ ሃይሳ ሜላ ካሂኔ ሃላቃይ ኑስ ዴዔስ። 2 ኢ ኣሳን ጊዶናሺን ጎዳን ኤቂዳ ቱማ ዱንካኒያን ፆሳ ኬን ኦስ። 3 ካሂኔ ሃላቃ ኡባይ ኢሞኔ ያርሾ ያርሻናው ሹሜቴስ። ሄሳ ጊሾ፥ ሃ ካሂኔይ ያርሻናው ኢሲባይ ዳናው ኮሼስ። 4 ሂጌይ ኪቴይሳዳ ያርሺያ ካሂኔቲ ዴዒያ ጊሾ ኪሪስቶሲ ሳዓን ዴዒያባ ጊዲያኮ ካሂኔ ጊዴና። 5 ኤንቲ ካሂኔቴን ኦያ ዱንካኔይ ሳሎን ዴዔይሳስ ሌሚሶኔ ኩያ። ሙሴይ ዱንካኒያ ኤሲያ ዎዴ ፆሳይ ኢያኮ፥ «ታኒ ኔና ዴሪያ ቦላ ቤሲዳ ሌሚሱዋ ካላዳ ኦ» ያጊስ። 6 ሺን ዬሱሲ ጊዶ ጊዲዲ ሲጌያ ጫቆይ፥ ኮይሮ ጫቁዋፔ ኣይሳዳ ኢ ኤኪዳ ኦሶይ ኤንታይሳፌ ኣስ። ሄሲ ኤቂዳይ ኣያ ጫቆ ቃላና። 7 ኮይሮ ጫቁዋን ባሊ ባይናባ ጊዲያኮ ናምዓን ጫቆ ኮሼና። 8 ሺን ጎዳይ ኢያ ቦሪዲ፥ ሃይሳዳ ያጊስ፡ «ታኒ ኢስራዔሌ ኣሳራኔ ዪሁዳ ኣሳራ ኦራ ጫቆ ጫቂያ ዎዴይ ያና። 9 ሄ ጫቆይ ታ ኤንታ ኣዋታ ጊብፄ ቢታፌ ኩሺያ ኦይካዳ፥ ጎቻ ኬሲዳ ዎዴ ኤንታራ ጫቂዳ ጫቁዋ ሜላ ጊዴና። ኤንቲ ታ ጫቁዋን ኣማኔቲቦና ጊሾ ታኒ ኤንታ ዬጋ ኣጋስ ያጌስ ጎዳይ። 10 ሺን ሂዛፔ ጉዬ ኢስራዔሌ ኣሳራ ታ ጫቃና ጫቆይ ሃይሳ ያጌስ ጎዳይ። ታኒ ታ ሂጊያ ኤንታ ጉጊያን ዎና፤ ኤንታ ዎዛናን ፃፋና። ታኒ ኤንታ ፆሳ ጊዳና፤ ኤንቲካ ታ ኣሴ ጊዳና። 11 ኤንታፌ ኦኒካ ባ ሾሩዋ ዎይኮ ባ ኢሻ፥ ‹ጎዳ ኤራ› ያጊዲ ታማርሴና። ኤንቲ ጉፌ ጊታ ጋካናው ኡባይ ታና ኤራና። 12 ታኒ ኤንታ ናቁዋ ኣቶ ጋና፤ ኤንታ ናጋራ ዛራ ቆፒኬ» ያጌስ። 13 ፆሳይ ሃ ጫቁዋ «ኦራ» ጊዲ ፄጊሼ ኮይሮይሳ ጋልዒሲስ። ሂዛ፥ ጋልዓይኔ ጬጋይ ያ ዎዴይ ጋኪስ። |