Ibraawe 3 - ኦራ ጫቁዋ ጎፋዬሱሲ ሙሴፔ ቦላ 1 ሄሳ ጊሾ፥ ፆሳይ ፄጊዳ ጌሻ ኢሻቶ፥ ኑ ኣማኖን ጎዳ ጊዲ ፄጊያ ሃዋሪያኔ ካሂኔ ሃላቃ ዬሱሳ ቤዒቴ። 2 ሙሴይ ፆሳ ኬ ኡባን ኣማኔቲዳይሳዳ ዬሱሲካ ባና ዶሪዳ ፆሳስ ኣማኔቲዳይሳ። 3 ኬ ኬፄይሲ ኬፌ ኣዲ ቦንቼቴይሳዳ ዬሱሲ ሙሴፔ ኣያ ቦንቾ ኤካናው ቤሴስ። 4 ኢሲ ኢሲ ኬ ኬፂዳ ኣሲ ዴዔስ፥ ሺን ኡባ ጊጊሲዳይ ፆሳ። 5 ሙሴይ ፆሳ ኬ ኡባን ኣማኔቲዳ ኣይሌ ጊዲዲ፥ ፆሳይ ሲንፌ ጋናባስ ማርካ ጊዲስ። 6 ሺን ኪሪስቶሲ ፆሳ ኬን ናዓዳ ኣማኔቲዳይሳ። ኑኒ ኤካና ጊዲ ናጊያ ኡፋይሳ ሚንዲ ናጊኮ ፆሳ ኬ ጊዶስ። ፆሳ ኣሳስ ዴዒያ ሼምፑዋ 7 ሄሳ ጊሾ፥ ጌሻ ኣያናይ ጌይሳዳ፥ «ሃቺ ሂንቴ ፆሳይ ጌይሳ ሲዒያ ዎዴ 8 ባዞ ቢታን ፓጪያ ጋላስ፥ ሂንቴ ኣዋቲ ማካሊዳይሳዳ፥ ሂንቴ ዎዛና ሚንፊቴ። 9 ሂንቴ ኣዋቲ ታና ፓጪዶሶና፤ ኦይታሙ ላይ ታ ኦሱዋ ቤዒዶሶና። 10 ሄሳ ጊሾ፥ ታ ሄ ዬሌቴ ሃንቄታዳ፥ ‹ኤንቲ ኡባ ዎዴ ባንታ ዎዛናን ባሎሶና፤ ታ ኦጊያ ኤሪቦኮና› ያጋስ። 11 ሄሳ ጊሾ፥ ታኒ ታ ሃንቁዋን ጫቃዳ፥ ‹ታ ሼምፖ ቤሳ ኡባካ ጌሎኮና› ያጋስ» ያጌስ። 12 ታ ኢሻቶ፥ ሂንቴፌ ኦዴንካ፥ ዴዖ ፆሳፌ ሂንቴና ሻኪያ ኢታኔ ኣማኖና ዎዛኒ ዶና ሜላ ናጌቲቴ። 13 ሂንቴፌ ኦናካ ናጋሪ ባሌን፥ ባ ዎዛና ሚንና ሜላ «ሃቺ» ያጌቲዲ ፄጌቲሺን ጋላስ ጋላስ ኢሶይ ኢሱዋራ ዞሬቲቴ። 14 ኑ ኮይሮ ኣማኑዋ ኑኒ ዉርሴ ጋካናው ሚንዲ ናጊኮ፥ ኪሪስቶሳራ ኢሲፌ ላታና። 15 ጌሻ ማፃፋን፥ «ሃቺ ፆሳይ ጌይሳ ሂንቴ ሲዒያ ዎዴ ሄ ዎዴ ኤንቲ ማካላቴን ሃኒዳይሳዳ፥ ሂንቴ ዎዛና ሚንፊቴ» ያጊስ። 16 ፆሳይ ጊያባ ሲዒዲ ማካሊዳይ ኦኔ? ሙሴይ ጊብፄፌ ካሌ ኬሲዳ ኡባ ጊዶኮናዬ? 17 ፆሳይ ኦይታሙ ላይ ኦና ሃንቄቲዴ? ናጋራ ኦዳይሳታኔ ኤንታ ኣሃይ ባዞ ቢታን ዎ ኣቲዳ ኣሳታ ጊዶኮናዬ? 18 ቃሲ ፆሳይ፥ «ታ ሼምፖ ቤሳ ጌሌኬታ» ያጊዲ ጫቂዳይ፥ ኢያው ኪቴቶና ኢፂዳ ኣሳፔ ኣቲን ኦዴሴ? 19 ሂዛ፥ ኤንቲ ሄ ሼምፖ ቤሳ ጌሎና ኣቲዳይ ኣማኒቦና ጊሾ ጊዴይሳ ኑ ቤዖስ። |