ሃዋሬታ ኦሱዋ 26 - ኦራ ጫቁዋ ጎፋጳዉሎሲ ኣጊርጳ ሲንን ዛሪዳ ዛሩዋ 1 ኣጊርጲ ጳዉሎሳኮ፥ «ኔኒ ኔባ ኦዳናው ዳንዳዓሳ» ያጊስ። ሄ ዎዴ ጳዉሎሲ ባ ኩሺያ ዴንዲ ሃይሳዳ ያጊስ፡ 2 «ካዋው፥ ኣጊርጳ፥ ኣይሁዴቲ ታና ሞቲዳባስ ዛሮ ኢማናው ሃቺ ኔ ሲንን ኤቃሼ ታ ቃዳይ ሎዖ ጋዳ ቆፓይስ። 3 ኔኒ ኣይሁዴ ዎጋኔ ፓላማ ሎይዳ ኤሪያ ጊሾ ታና ሳሌቶና ሲዓና ሜላ ዎሳይስ። 4 «ታኒ ናዓቴፌ ዶማዳ ታ ኣሳ ጊዶኒኔ ዬሩሳላሜን ዴዒዳ ታ ዴዑዋ ኣይሁዴ ኡባይ ኤሮሶና። 5 ታኒ ኮይሮፔ ዶማዳ፥ ኑ ኣማኖ ሂጊያ ሚንዲ ናጊያ ፋሪሳዌታ ያራፔ ጊዴይሳ ኤንቲ ማርካታናው ኮይኮ ኤሮሶና። 6 ሃዒካ ታኒ ፆሳይ ኑ ኣዋታስ ኢማና ጊዳ ኡፋይሳ ናጊያ ጊሾ ሞቴታዳ ሃይሳን ኤቃስ። 7 ቃሲ ታማኔ ናምዑ ኑ ኣዋታ ሼሻይ ፆሳ ቃማኔ ጋላስ ሚንዲ ጎይኒሼ ፆሳይ ኢማና ጊዳይሳ ኤካናው ኡፋይሳን ናጎሶና። ካዋው ኣጊርጳ፥ ኣይሁዴቲ ታና ሞቴይ ታኒ ኡፋይሳን ሄሳ ናጊያ ጊሾሳ። 8 ኣይሁዴቶ፥ ፆሳይ ሃይቂዳይሳታ ዴንይሳ ኣይስ ኣማኔኬቲ? 9 «ካሴ ታኒ ታ ሁዔንካ ናዚሬቴ ዬሱሳ ሱን ቴቃናው ዳንዳዔቲዳባ ኡባ ኦናው ቤሴስ ጋዳ ቆፓስ። 10 ታኒ ዬሩሳላሜን ኦዳይ ሃይሳ። ካሂኔ ሃላቃታፔ ማታ ኤካዳ ፆሳ ኣሳታፔ ዳሮታ ቃሺሳስ። ኤንታ ዎያ ዎዴካ ኤንታ ሃይቁዋ ዶሳስ። 11 ዳሮ ዎዴ ኣይሁዴ ዎሳ ኬ ኡባን ኤንቲ ሴሬታና ሜላኔ ዬሱሳ ጫዪዲ ካዳና ሜላ ኡንዔስ። ታኒ ዎጊ ባይና ኤንታ ሃንቄታዳ ሃሪ ኣቶሺን፥ ሃራ ቢታ ካታማታ ጋካናው ኤንታ ጎዳስ። 12 «ታኒ ሃ ኦዳስ ካሂኔ ሃላቃታፔ ማታኔ ኪታ ኤካዳ ዳማስቆ ባይስ። 13 ካዋው፥ ታኒ ሴታ ጋላስ ኦጊያን ዴዒሺን ኣዋ ፖዖፔ ዳሮ ኣያ ፖዖይ ታ ዩሹዋኒኔ ታራ ቤይሳታ ዩሹዋን ሳሎፔ ፖዒስ። 14 ኑኒ ኡባይካ ሳዓን ኩንዲዳ ዎዴ ኢብራይስፄ ዶናን፥ ‹ሳዖላ፥ ሳዖላ፥ ታና ኣይስ ጎዳይ? ኔኒ ኔና ጫዲያ ፃምዓ ቃኪኮ ኔና ቆሃሳ› ያጊዲ ታው ኦዲሺን ሲዓስ። 15 «ታኒ፥ ‹ጎዳው፥ ኔኒ ኦኔ?› ያጋስ። «ጎዳይ፥ ‹ታኒ፥ ኔኒ ጎዲያ ዬሱሳ፤ 16 ሺን ዴንዳ ኤቃ። ሃቺ ኔኒ ታና ቤዒዳይሳኒኔ ሲንፌ ታ ኔና ቤሳኝሳ ሃራታስ ማርካታና ሜላ ታ ኦሳንቾ ኦዳ ኔና ሹማናው ኔው ቤንታስ። 17 ኢስራዔሌ ኣሳታፔኔ ታኒ ኔና ኤንታኮ ኪቲያ ኣይሁዴ ጊዶናይሳታፔ ኔና ኣሻና። 18 ኔኒ ኤንታ ኣይፊያ ዶያና፥ ማፔ ፖዖኮ፥ ፃላሄ ኩሼፔ ፆሳኮ ኤንታ ዛራና። ኤንቲ ታናን ኣማኒዲ ናጋራ ኣቶቴ ኤካና። ፆሳይ ዶሪዳ ኣሳ ጊዶን ባንታ ላታ ዴማና› ያጊስ። 19 «ካዋው ኣጊርጳ፥ ሄሳ ጊሾ፥ ታው ሳሎፔ ቤንቲዳ ቆንጬስ ኪቴታናይሳ ኢፃቢኬ። 20 ሺን ታኒ ኮይሮታዳ ዳማስቆን ሄሳፌ ጉዬ ዬሩሳላሜኒኔ ዪሁዳ ቢታ ኡባን ዴዔይሳቲኔ ኣይሁዴ ጊዶናይሳቲ ባንታ ናጋራፔ ፆሳኮ ሲማና ሜላኔ ናጋራፔ ሲሙዋ ቤሲያ ኦሶ ኦና ሜላ ቃላ ኦዳስ። 21 ሄሳ ጊሾ፥ ኣይሁዴቲ ታና ፆሳ ኬን ኦይኪዲ ዎናው ኮዪዶሶና። 22 ሃቺ ጋካናው ፆሳ ማዴይ ታፔ ሻኬቲቤና፤ ያኒያ ጊሾ፥ ጉሲኔ ጊታስ ማርካታሼ ሃይሳን ኤቃስ። ናቤቲኔ ሙሴይ ሃናና ጊዲ ኦዲዳይሳፌ ሃራ ኢሲባካ ታኒ ኦዲዳባይ ባዋ። 23 ሄሲካ፥ ‹ኪሪስቶሲ ዋዬ ኤካናው ቤሴስ፤ ቃሲ ሃይቆፔ ኮይሮ ዴንዲዲ ኣይሁዴታሲኔ ኣይሁዴ ጊዶናይሳታስ ኣቶቴ ፖዖ ኦዳናው ቤሴስ› ጊዳይሳ» ያጊስ። 24 ጳዉሎሲ ሄሳ ያጊዲ ዛሪሺን፥ ፊስፆሲ ባ ቃላ ቁ ኦዲ፥ «ጳውሎሳ፥ ኔ ጎያዳሳ፤ ኔ ዳሮ ቲሚርቴይ ኔና ጎሻስ ጋስ» ያጊስ። 25 ሺን ጳዉሎሲ፥ «ቦንቾ ፊስፆሳ፥ ታኒ ቱማባኔ ቤሲያባ ኦዳይሲፔ ኣቲን ጎያቢኬ። 26 ታኒ ቆንጬን ኦዲያ ኦዳ ካዎይ ኤሬስ። ሃ ኦዳይ ጌማን ኦሴቲቦና ጊሾ ኢሶይካ ኢያፔ ጌሞናይሳ ታኒ ጌሻዳ ኤራይስ። 27 «ካዋው ኣጊርጳ፥ ኔኒ ናቤታ ኣማናሳ ጊዲኪ? ኔኒ ኣማኔይሳ ታኒ ኤራይስ» ያጊስ። 28 ካዎይ ኣጊርጲ፥ ጳዉሎሳኮ፥ «ሃ ጉ ሳቴን ታና ኣማንናው ኮያይ?» ያጊስ። 29 ጳዉሎሲ፥ «ዳሮ ዎዴ ጊዲን ጉ ዎዴ ኔ ፃላላ ጊዶናሺን ሃቺ ታና ሲዒያ ኡባይ ሃ ቃሹዋፔ ኣቲን ታ ሜላ ጊዳና ሜላ ፆሳ ዎሳይስ» ያጊስ። 30 ሄሳፌ ጉዬ፥ ካዎይ ፊስፆሲ፥ ባርኒቄይኔ ኤንታራ ኡቲዳ ኡባይካ ዴንዲዶሶና። 31 ያፔ ኬዪዲ ቢሼ ኢሶይ ኢሱዋራ፥ «ሃ ኡራይ ሃይቆስ ዎይኮ ቃሾስ ጋያባ ኣይኮካ ኦቤና» ያጊዲ ኦዴቲዶሶና። 32 ኣጊርጲ ፊስፆሳኮ፥ «ሃ ኡራይ ‹ቄሳሬይ ታባ ፒርዶ› ጎናኮ ቢሌታናው ዳንዳዔስ፥ ሺን ኣቲስ» ያጊስ። |