2 ፅሞትዮሳ 3 - ኦራ ጫቁዋ ጎፋዉርሴ ጋላሳ ማላታታ 1 ዉርሴ ጋላሳን ኡንዔያ ዎዴይ ያናይሳ ኤራ። 2 ኣሳይ ባንታና ዶሴይሳታ፥ ሚሼ ሲቄይሳታ፥ ጬቄቴይሳታ፥ ኦቶሬይሳታ፥ ጫዬይሳታ፥ ባንታና ዬሊዳይሳታስ ኪቴቶናይስታ፥ ጋላቶናይስታ፥ ጌሻቴ ባይናይሳታ፥ 3 ሲቆይ ባይናይሳታ፥ ማሮቴ ኤሮናይሳታ፥ ዚጊሬይሳታ፥ ባንታና ሃሮናይሳታ፥ ቃይ ባይናይሳታ፥ ሎዖ ዶሶናይሳታ፥ 4 ሞርኬስ ኣ ኢሜይሳታ፥ ቆፊ ባይናይሳታ፥ ኦቶሮን ሱጌቴይሳታ፥ ፆሳፌ ኣዲ ኣሾ ኡፋይሳናው ዶሴይሳታ ጊዳና። 5 ኤንቲ ኣማኒያ ዳኖሶናፔ ኣቲን ኣማኖ ዎልቃ ካዶሶና፤ ኔኒ ሄሳ ሜላ ኣሳታፔ ባቃታ። 6 ኤንታፌ ኢሶቲ ኢሶቲ ኣሳ ኬ ጌሊዲ ናጋራን ኦይኬቲዳይሳታኔ ዱማ ዱማ ኣሞን ሱጌቲያ ዳቡራንቾ ማጫሳታ ቦላ ጎዳቶሶና። 7 ሄ ማጫሳቲ ኡባ ዎዴ ታማሮሶና፥ ሺን ቱማ ኤራናው ዳንዳዖኮና። 8 ያኔሲኔ ያምባሬሲ ሙሴራ ኤቄቲዳይሳዳ ሃ ኣሳቲ ጉጌይ ኦናይሳታኔ ኣማኖን ኩንዲዳ ኣሳታ ጊዲያ ጊሾ ቱማራ ኤቄቶሶና። 9 ሺን ያኔሳኔ ያምባሬሳ ኤያቴይ ቆንጪዳይሳዳ ኤንታ ኤያቴይካ ኣሳ ኡባ ሲንን ቆንጫና ጊሾ ኤንታው ሃኔና። ዉርሴ ዞሬ 10 ሺን ኔኒ ታ ቲሚርቲያ፥ ታ ዱሳ፥ ታ ቆፋ፥ ታ ኣማኑዋ፥ ታ ዳንዳዓ፥ ታ ሲቁዋ፥ ታ ጌንጫ፥ 11 ታ ዬዴቴኔ ታ ሜቱዋ ኤራሳ። ኣንፆኪያን፥ ኢቆኒዮኔን፥ ሊስፂራ ካታማታን ታና ጋኪዳባኔ ታኒ ዳንዳዒዳ ሜቱዋ ኤራሳ፤ ጎዳይ ታና ሄ ኡባፌ ኣሺስ። 12 ኪሪስቶስ ዬሱሳን ፆሳ ኡፋይሲያ ዴዖ ዳናው ኮያ ኡባይ ጎዴታና። 13 ኢታ ኣሳቲኔ ባሌይሳቲ ባንታው ባሌቲሼኔ ሃራታ ባሌሼ ካሴፔ ኢቲ ኢቲ ባና። 14 ሺን ኔ ታማሪዳ ቱማኒኔ ኔ ኣማኒዳ ኣማኑዋን ኤቃ። ኔ ኦዴፌ ታማሪዳኮ ኤራሳ። 15 ኔኒ ኔ ናዓቴፌ ዶማዳ ኪሪስቶስ ዬሱሳ ኣማናዳ ኣቶቴ ዴሚያ ጪንጫቴ ኢማናው ዳንዳዒያ ጌሻ ማፃፋታ ኤራዳሳ። 16 ጌሻ ማፃፋ ኡባይ ፆሳፌ ኢሜቲዳ ቃላ። ሄ ማፃፋይ ቱማ ታማርሳናው፥ ባሊዳይሳታ ሴራናው፥ ሱሪሳናዉኔ ፂሎቴ ዱሳስ ኮሺያ ዞሬ ኢማናው ማዴስ። 17 ፆሳ ኣሲ ፖሎኔ ሎዖ ኦሶ ኡባ ኦናው ጊጊዳይሳ ጊዳና ሜላ ማዴስ። |