1 ዮሃንሳ 1 - ኦራ ጫቁዋ ጎፋ

ዴዖ ኢሚያ ቃላ

¹ ኑኒ ኮይሮፔ ዶሚዲ ዴዒያ፥ ኑ ሃይን ሲዒዳ፥ ኑ ፄሊዳ፥ ኣይፊያን ቤዒዳ፥ ኑ ኩሺያን ቦቺዳ ዴዖ ቃላባ ሂንቴው ፃፎስ።

² ሄ ዴዖይ ቆንጪን፥ ኑኒ ኢያ ቤዒዲ፥ ኢያባ ማርካቶስ። ኣዋ ማታን ዴዒያ ኑስ ቆንጪዳ፥ ሜሪና ዴዑዋባ ሂንቴው ኣዋጆስ።

³ ኑራ ሂንቴው ኢሲፌቴ ዳና ሜላ ኑኒ ቤዒዳይሳኔ ሲዒዳይሳ ሂንቴው ኦዶስ። ሂንቴው ኑራ ኢሲፌቴ ዴዒያ ጊሾ ኣዋራኔ ኢያ ናዓ ዬሱስ ኪሪስቶሳራ ኢሲፌቴ ዴዔስ።

⁴ ኑ ኡፋይሳይ ፖሎ ጊዳና ሜላ ሄሳ ሂንቴው ፃፎስ።

ፆሳይ ፖዖ

⁵ ኑኒ ዴዖ ጊዲዳ ኢያፔ ሲዒዲ፥ ሂንቴው ኦዲያ ኪታይ ሃይሳ፡ «ፆሳይ ፖዖ፤ ኢያን ሚ ባዋ» ያጌይሳ።

⁶ ኑስ ኢያራ ኢሲፌቴ ዴዔስ ያጊሼ ማን ዴዒኮ፥ ኑ ኦዳኒኔ ኑ ኦሱዋን ዎርዶቶስ።

⁷ ሺን ፖዖን ኢ ዴዔይሳዳ፥ ኑካ ፖዖን ዴዒኮ፥ ኑስ ዎሊ ጊዶን ኢሲፌቴ ዴዔስ። ኢያ ናዓ፥ ዬሱሳ ሱይ ናጋራ ኡባፌ ኑና ጌሼስ።

⁸ ኑኒ፥ ኑናን ናጋሪ ባዋ ጊኮ ኑ ኑና ጪሞስ፤ ኑናን ቱሚ ባዋ።

⁹ ሺን ፆሳስ ኑ ናጋራ ፓፂኮ፥ ኢ ኑ ናጋራ ኣቶ ጋናዉኔ ኑ ቆሆ ኦሶ ኡባፌ ኑና ጌሻናው፥ ኣማኔቲዳይሳኔ ቱማ።

¹⁰ ኑኒ ናጋራ ኦቦኮ ጊኮ ፆሳ ዎርዳንቾ ኬሶስ፤ ኢያ ቃላይካ ኑናን ዴና።