Bìoball air-loidhne

Zudö 1 - GOD - u2

Bhäälɩ

¹ ‑Amʋ Zudö, Zozi Klisöö' ‑gänʋnyɔɔ, ‑amʋ Zakö ɔ bheli, anyɩmɔ Laagɔ laa‑ lä nä, 'nɩ ʋ ‑wamä lä 'nɩ ʋ wloo lä 'kʋ Klisö 'mnö nä, anyɩ‑ n jɩjlä lä 'bɔɔgʋnʋ.

² Laagɔɔ' yibhënö'anyɩ ŋäzö, ɩyä ʋ nyɩ'anyɩ 'kʋ wɔtɔlɩɩ ‑bhutukpä ‑yä ‑wawʋ!

‑Kpläkplö cɩanyʋaa' nʋnʋgbɩɩ
( 2 Pɩɛ 2.1‑22 ; 3.1‑3 )

³ 'Naa ‑wawanyʋänyɩ‑, n ‑waa bhä sää 'titi nynä ‑mä n 'kanyɩ bhä jɩjlä ‑yä sa ‑a yä lä däbhloo' ‑lɔɔ nëë' ‑bha nä, ‑lɔɔ wälɩɩ, n kanyɩmɩ bhä soo. N ‑bhobho nynä ‑mä ɩ ‑ŋwa 'kʋ nynä n sonö'anyɩ ‑yä a 'kä 'tɛtɩ kään ‑yä pɔlötɛtɛɛ Laagɔ nyɛ lä 'fɩɔ 'fɩɔ nä, a 'kä ɛɛ' ‑za 'kʋ bhlää.

⁴ Sä nyɩkpaa' ‑lɛɛ nyonyuë zizio'anyɩ nëëdë nä, ɩɩ' ‑zä n jɩjla'anyɩ lä. ‑Anyɩa Laagɔɔ' plɛkʋmɛnɔɔ' 'döö, wa sɩɩ dä 'kʋ 'nɩ, sa wa ‑waa lä nä, wa nää sɔɔ. 'Nɩ Zozi Klisö ‑anyɩa Cɩanyɔɔ ‑yä ‑anyɩa Kwlienyɔɔ ‑bhlo ‑a kä lä nä, wa cɛnöɔ. ‑Mä Laagɔ‑bɔɔgʋʋ yä wɛzä ‑mɔɔ ‑gɔgɔbhlää' ci nynä ‑mä, ‑lɩɩ wa nʋ lä nä, wa yi ɩɩ' 'wlu 'kwlɩkabhɩä 'ni.

⁵ Wälɩɩ 'fɩɩn n 'kanyɩ lä soo nä, a yii wɛzä. Nä, ‑kä n 'kanyɩ lä luë. Kwlienyɔ Laagɔ nä, ɔ ‑sä 'Yizlɛnyʋä Ejipitii' geylüü' ‑mä waa' nëëdëë' ‑lʋa ‑wa 'tɛ bhlä 'nyukwli nä, kɔ ‑gbä 'nɩ wa kuu‑.

⁶ N 'kanyɩ 'sɩɩ wälɩklünö 'kʋ luë. ‑Laagɔɔ' ‑zizii' ‑nɩnɩ ‑kʋ ‑lɔɔ 'nɩ ɩ ‑të ɩɩ' 'kpobhuu. Ɩ ‑bha ‑gbäsɩɩ ɩ ‑kʋ bhlä ‑bhɔɔdää nä, 'nɩ ɩ ‑mʋ 'yigädadä kʋ ‑kää. Ɩ ‑kä 'ŋnö nä, kä Laagɔ ‑fɩɩ gluu' 'cucukpaa 'mnö 'nɩ ʋ ŋʋɩ‑ ‑säklöö' 'kɔɔkɔɔ' ‑za. Ɩ yi ‑mɔɔ kʋ ‑aaa 'nɩ Laagɔɔ' 'tite 'kädɛɛ' pläylʋʋ yi ŋëë 'nɩ ʋ yii 'tite 'ŋʋ.

⁷ Sodɔmʋduu' ɩyä Gomɔɔduu' wälɩɩ ‑ɩ plöö‑ lä ‑mɔɔ 'kʋ nä, 'nɩ ‑ɩ ‑ŋëë lä 'sɩɩ ɩɩ' kpëkpë 'kʋ 'dii nä, ‑lɔɔ' wälɩɩ a luë 'sɩɩ ɩɩ' dä 'kʋ. 'Diyɩ 'mnö nyɩkpaa nä, ‑zizinyenyii Laagɔ ŋʋʋ‑ lä gluu' 'cucukpaa 'mnö nä, ɩmɩ 'bhisäkʋ wa nʋ bhlä. Gbenyenyii 'mnö wa nämnö bhlä 'sɩɩ kpänyɩ. Ŋwadie ‑yä ɔ wa lü‑ŋwadie 'sɔ mʋʋ bhä yëkuu', 'nɩ 'ŋwnɩä ‑yä 'ŋwnɩä 'sɔ mʋʋ bhä yëkuu'. ‑Mä waa' nʋnʋgbɩɩ ‑kä lä 'ŋnö nä, kä Laagɔ ‑gbä 'nɩ ‑kosu ‑yi, 'nɩ ʋ yiwa sie. 'Nɩ ‑lɔɔ' ‑kosuu' nä, ʋʋ' ‑lä 'kɔɔkɔ ŋomo.

⁸ 'Nɩ anyɩ nëëdë nä, sɔɔ nyɩkpa ‑nyonyuë ‑kʋ 'sɩɩ ‑mɔɔ. Wälɩɩ' lɩɩ‑ ‑ɩɩ ‑wʋ lä nyaasäsä plöo‑ nä, ɩmɩ wa bhobho. Wa plaa wa yëkuu' 'yɛkɛ ‑didi nyenyii 'mnö. 'Nɩ waa' 'mänyɩnʋwa ‑wʋ Laagɔ. 'Nɩ wa 'bhɩsɛ ‑Laagɔzizii.

⁹ ‑Bhlɛ ‑Laagɔzuzu 'kädʋʋ Mikayɛɛ 'titi, 'tänyɩɩ 'Dëvlo ‑yi 'nɩ ɔ ‑yʋsɔ bhlää bhlä Moyizöö' ‑gɛzɛɛ 'kʋ nä, ʋ 'nöɔ ‑wʋ 'bhɩsɛ‑. Kʋ ‑soo 'Dëvlo, ʋ lä Laagɔ ‑lä 'gä‑ä gbäylö ‑sä!

¹⁰ ‑Mä wamä nä, wa 'bhɩsɛ nyɩkpa. ‑Lɩɩ wa nʋ lä nä kä wa 'nɩɩ ‑wʋ lä ‑yi. Kä wa bhobho lä 'sää 'titi nynä mna. Nʋnʋgbɩnɩ 'mɩɩ‑ 'gwa lä nuë.

¹¹ 'Kplë ‑yʋwa slää! Adää ‑yowli Kayɛɛn' sä ɔ nää bhlä nä, sɔɔ wa nää lä. Sä Balamʋ monii 'nyigënöɔ bhlä 'nɩ ɔ ‑bhlü lä 'foclo nä, sɔɔ ‑säka ‑säkä wa ‑bhlü lä 'sɩɩ 'foclo. ‑Mänɩ 'Yizlɛnyʋää' ‑nänʋä gëë‑ Kolee 'kʋ 'nɩ wa ‑fä Moyizö zɔgblö, 'nɩ wa 'ninɩ 'kwiee.

¹² ‑Ɛɛɛ, wa ‑kʋ'anyɩ ylä nëëdë nä, ɩ gbä 'nɩ anyɩa' ‑glügbë‑ŋënüü ‑yä bhusu. Wa lü 'sää ‑aaa 'nɩ wa loo ‑dʋfään, 'nɩ waa' ‑wʋ 'yi zoo ‑kä. Wa yëku ‑bhlo 'coo‑ känʋwa lä gbʋ. Wa ‑kʋ nynä 'nyukpɔɔ' lʋʋ ‑vʋvɔlʋ fämʋ nä. Sɔɔ' 'nyukpɔ nä, ʋʋ' bhlaa ‑wʋ 'nyu 'kɔɔn. Kä wa ‑kʋ lä 'sɩɩ nynä tlʋtlʋsii' lɩɩ ‑ɩnö tlʋdä gä ‑ŋëë 'nɩ ‑ɩɩ tlʋ ‑wʋ lä nä. 'Nɩ ʋ 'nö 'bhü tlʋ nä, kʋ ‑kʋ lä nynä lʋʋ‑ kuu‑. Kʋ ‑bha lä sikplii 'kʋ 'nɩ ʋ 'kuu‑ lä 'ci 'sɔ.

¹³ ‑Nɩnɩ 'fɩɩn 'mnö nä, zoogbɩ wa ŋʋʋ‑ lä sä. Kä wa ‑kʋ lä nynä ‑n ‑näsä jiee' lakwɩɩ vë lä 'kʋ 'nɩ ɩ jɛɛ lä ŋazɩ ‑zägbä 'kʋ nä. 'Nɩ wa ‑kʋ lä 'sɩɩ nynä ‑mä ‑laagɔzälöö' lɩɩ‑ ‑begle 'flɛ 'nɩ Laagɔ ŋʋʋ‑ 'cucukpää 'nɩ ‑ɩɩ yɩɔ 'kɔɔn mʋʋdä ‑kä.

¹⁴ ‑A 'bhää lä Adää' 'bhlɛsʋʋ ‑aaa, 'nɩ ‑a zɛɛ lä ‑a tɩtɩä nä, waa' ‑ngbɔɔsɔna‑lɔɔ wa laa bhlä Enɔkö nä, Laagɔ cinöɔ‑ nëë' nä, ɔ cii‑ wälɩklë, ɔ lä a ni kä Kwlienyɔɔ yi! Kɔ yi ɔ ‑yä ɔɔ' kplɔɔkplɔɔ‑zizii 'sɔ. Ɩɩ' ‑wʋ ‑zunɔɔ' 'bɛ!

¹⁵ Kɩ yi lä ‑yä ɩ 'kä 'ylʋzɔkʋnyʋa 'fɩɩn 'tite 'ŋʋ. Gbenyenyinyʋa, waa' gbenyenyii 'fɩɩn ‑za, Kwlienyɔ Laagɔ yiwa ‑jämɩɩ' 'ŋʋ. ‑Wa cɩcɩɔ lä 'nɩ ‑wa 'bhɩsɛ lä Laagɔ nä, ɔ yiwa ‑jämɩɩ' 'ŋʋ.

¹⁶ ‑Lɔɔ' nyɩkpa‑cëa nä, kä wa 'ŋuŋuë 'kɔɔkɔ 'nɩ waa' 'mnöö ‑wʋ 'kɔɔkɔ mɛɛ. 'Nɩ waa' zëkpëa 'mnö nä, sä waa' plɛ ‑waa lä nä, sɔɔ wa nää. Wa kä 'mʋ ‑säädä ‑kʋ nä ‑bli wa pä. 'Nɩ ‑lʋa wa yi lä ‑bʋzʋɛ 'mnö 'nii nä, wa klʋwa ‑kpacɛ 'nyigë 'nyigësä.

Wa 'pää 'cɔcɩnyʋa ‑dɔɔ

¹⁷ ‑Mä anyɩ 'naa ‑wawanyʋänyɩ‑, sä Kwlienyɔ Zozi Klisöö' lobho lobhonyʋa ‑sonö'anyɩ bhlä ‑lɔɔ' 'tanyɩɛ 'mnö nä, a luë sɔɔ dä 'kʋ.

¹⁸ Wa ‑sonö'anyɩ bhä nynä ‑mä bhɩädää' 'tanyɩɛ 'mnö nä, nyɩkpa yi'anyɩ bhä nyɩä. Wa yi bhä Laagɔ gwë ‑sä 'nɩ sä waa' pleyii ‑waa lä nä, wa yi bhä sɔɔ nää.

¹⁹ A ni yɩ wamä ‑nä! Wamää‑ ŋʋ'anyɩ lä 'mʋ‑doolɩ pää'. 'Yɛkɛɛ 'mnö wa nämnö lä ‑ma waa' ‑wʋ Laagɔɔ' 'Wugɔɔ ‑kä.

²⁰ ‑Mä anyɩ nä, 'naa ‑wawanyʋänyɩ‑, anyɩa zëkpëa, a 'slänöa anyɩa' pɔlötɛtɛɛ' kplɔɔlɩɩ 'mnö. Ɩyä a bhibhie Kplɔɔkplɔɔ‑wugɔɔ 'mnö.

²¹ A kʋ 'kɔɔkɔ Laagɔɔ' ‑wawʋʋ 'mnö ‑yä a ‑bɛɛ ‑yä ‑anyɩa Kwlienyɔ Zozi Klisö kä ‑yi nä, ɔ 'kanyɩ ŋäzö yibhë ‑yä 'pʋpʋɛɛ ‑wʋ lä bhɩäsä ‑kä nä, ɔ 'kanyɩmɛ 'nyɛ.

²² Nyɩkpaa‑ ‑wanö pɔlötɛtɛɛ ‑lä lätee ‑mɔɔ ‑see nä, a yibhënʋwa ŋäzö

²³ ɩyä a ‑sʋwa ‑kosu ‑düdëa nëë'. 'Nɩ ‑nänʋä ‑kʋ 'sɩɩ ‑lɔɔ nä, a yibhënʋwa 'sɩɩ ŋäzö ‑mä, a luë 'sɩɩ! A ‑sʋwa gwë 'sää 'kwläkwlä ‑yä aa 'taa ‑lä waa' plʋplä‑kwëtii.

A ‑ya fään Laagɔ 'ŋnu

²⁴ ‑Ɔ yi lä mii 'nɩ ‑ɔ yi'anyɩ lä 'kʋ wloo 'nɩ aa' ‑lä lä ‑zɔɔ bhlü, 'nɩ aa' ‑lä lä 'foclo yëku kään, 'nɩ ‑ɔ ‑yä anyɩ 'sɔ yi lä Laagɔ dëlü yi ‑pʋpɛ 'kädɛɛ 'mnö ‑yä 'klʋagba 'mnö nä,

²⁵ Laagɔɔ ‑ʋ ‑bhlü lä ‑bhlo 'nɩ ‑ʋ ‑ghlää lä Zozi Klisö 'kʋ 'nɩ ‑ʋ puë'anyɩ lä nä, ʋ ‑yä Zozi Klisö 'sɔ, ɔmɔ mɔɔ‑ plöö‑ lä ‑anyɩa Kwlienyɔɔ nä, 'kwlʋagba ŋënʋwa! Wa zi 'kʋ kɔɔkɔ ‑yä wa kään 'kɔɔkɔ 'päwä ‑yä wa 'kämä! Wa ‑kʋ bhä sɔɔ ‑bhɔɔdä, ‑mä wa kʋ ‑lätee 'sɔɔ ‑pɛpɛɛ, ɩyä wa kʋ 'sɩɩ sɔɔ 'kɔɔkɔɔ ‑za. Ɩ kʋ sɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan