Bìoball air-loidhne

Zakö 5 - GOD - u2

Lɛkäänyʋa yä mie

¹ ‑Pɛpɛɛ nä, anyɩ 'loyua, a poo'o yɩ 'nyukwli! Kä n sonö'anyɩ lä nynä ‑mä, a 'tu yɩ ‑yä a bhʋtʋ yɩ 'kwlɩkabhɩa‑ 'ganyɩ lä ŋëë nä, aa' ‑za.

² Anyɩa leylüü yä 'zɛ. 'Nɩ anyɩa' gbëbielɩɩ 'fɩɩn ŋnɔ yɩ mɛɛ.

³ Anyɩa ‑sikaa ‑yä anyɩa monie yä gʋgwlɩzälɩ klä. Gʋgwlɩzälɩnɩ yi'anyɩ gbʋ klaa. Gʋgwlɩzälɩnɩ yi anyɩa 'yɛkɛɛ lü nynä ‑kosu. A ‑yi ‑kä sɔɔ nynä ‑mä 'kɔɔnʋ bhɩä‑tänyɩɩ' ‑a ‑kʋ ylä 'nɩ a ‑guguë ʋʋ' 'mnö leylüü!

⁴ A ni yi ‑a! nyɩkpaa‑ nʋ lä anyɩa' 'kälöö 'mnö lebhe nä, aa 'pɛnʋwa ‑wʋ. Nä, Tëvë‑Laagɔɔ, ‑anyɩa Kwlienyɔɔ, waa' woolɩɩ, ɩyä waa' bhʋtʋlɩɩ yɔ 'nyukwlii' bhlüü.

⁵ A nii‑ mɛnɔ ‑mää 'ylʋzɔɔ, 'nɩ 'klüü 'fɩɩn a ‑waa lä nä, a ‑nʋɩ. A lü 'nɩ a nää‑ 'kʋ ‑bhʋkʋ ‑bhʋkʋ nynä mnɛɛ' lɛɛ wa ‑kwlie ‑yä wa 'kä ‑zee 'bhlä.

⁶ 'Nɩ nyɩkpaa' ‑lʋa ‑wanö gbɩɩ‑ gëë‑ lä 'yi nä, a pʋwa ‑jɩɩ', 'nɩ a bhlʋwa. 'Nɩ waa' minö'anyɩ ‑wʋ.

A yibhë ‑bɛɛsä

⁷ Bhelie ‑yä bhɛŋwnɩänyɩ‑, a 'tɛmä plɛkʋ ‑aaa, ‑yä Kwlienyɔɔ' yi‑tänyɩɛ 'kä ŋëë. A ni 'yi ‑a! ‑lɛɛgonyɔ nä, kɔ yibhë plɛkʋ 'tɛmä sä. Ɔ kä ‑goo nä, kɔ 'tɛmä plɛkʋ 'nɩ ‑lɩɩ ɔ ‑goo lä nä, ‑dʋdʋ gbä 'nɩ ɩ tlʋ 'nägäsä. Ɔ bɛɛ, 'nɩ tɛɛtɛɛ‑nyuu bhlä 'fɩa, 'nɩ gbäbhɩä‑nyuu yi 'sɩɩ 'nɩ ʋ bhlä.

⁸ A 'tɛmä 'plɛkʋ anyɩmä 'sɩɩ ɩyä plɛɛ' 'kpɔsʋ'anyɩ ‑lä ‑mä, Kwlienyɔɔ' yi‑tänyɩɛ yä yëku 'mɛ.

⁹ Bhelie ‑yä bhɛŋwnɩänyɩ‑, a ‑liesɩɩ' wälɩ 'nä sie'anyɩ ‑lä plɛkʋ ‑mä, Laagɔɔ' ka'anyɩ ‑kä 'tite 'ŋʋ. 'Titee' plänyɔɔ nä, ɔ ‑kʋ kpëkpë 'kʋ ‑mä ɔɔ' yɩɔ dä tlʋ.

¹⁰ Bhelie ‑yä bhɛŋwnɩänyɩ‑, 'plɔfɛtɩnyʋa Laagɔ ŋʋʋ‑ lä wälɩɩ nëë' 'nɩ, ‑wa cii‑ lä Kwlienyɔɔ' 'ŋnöö 'mnö nä, a luë waa' dä 'kʋ! Ɩyä 'tänyɩɩ' wa ‑kʋ bhlä 'kwlɩkabhɩa 'mnö nä, ɩɩ' plɛkʋ 'tɛnɔɔ wa ‑kä bhlä nä, a 'bhlünʋ 'sëploo' 'kʋ!

¹¹ A ni 'yi ‑a! Nyɩkpaa' ‑lʋämä 'kwlɩkabhɩä kä lä ‑ŋëë 'nɩ ‑wa 'tɛmä lä plɛkʋ nä, wa yä 'pʋ. A nuu‑ nyɩkpɔɔ wa laa bhlä Zɔbʋ nä, ɔɔ' yëkuu' wälɩ. Zɔbʋ nä, ɔ ‑glö bhä plɛkʋtɛnɔnyɔ. 'Nɩ ɔɔ' plɛkʋtɛnɔɔ' ‑za nä, a ‑yi sä Kwlienyɔ Laagɔ nyɩɔ‑ lä bhɩädä nä. Nä, Kwlienyɔɔ kɔ ‑kä plɛkʋmɛɛnɔ, 'nɩ ɔ yibhë 'sɩɩ nyɩkpa ŋäzö.

A mʋ anyɩa' ciciwälɩ 'kʋ

¹² ‑Maa, bhelie ‑yä bhɛŋwnɩänyɩ‑, 'titi 'clöö ‑za nä, aa' zlügo lä 'kɔɔn! Aa' zlügo ‑lä ‑laagɔɔ', 'nɩ aa' zlügo ‑lä gbämnä ‑dʋdʋʋ'! Aa' zlügo ‑lä 'sɩɩ 'yigädalʋʋ' 'ŋnö 'mnö! Sɩ yi gää kʋmɔ ‑kʋmɔ ‑kaaa nä, anyɩa' ‑Ɛɛɛ! Ɔ 'plö anyɩa' ‑Ɛɛɛ. Ɩyä anyɩa' Yio! Ɔ 'plö anyɩa' yio ‑mä, Laagɔɔ' ka'anyɩ ‑kä 'tite 'ŋʋ.

A bhibhie ‑bhibhie 'wlu

¹³ Anyɩa' nëëdë nyɩkpɔ 'kwlɩ kɔ bhɩä nä, ɔ bhibhie Laagɔ. Nyɩkpɔ ka'anyɩ 'sɩɩ nëëdë ‑kʋ 'nɩ ‑pʋpɛ kɔ 'bhlä lä nä, ɔ bhlɩ ‑yä ɔ fään Laagɔ 'ŋnu!

¹⁴ Anyɩa' pää nyɩkpɔ 'nö ‑yä nä, ɔ 'pä 'cɔcɩɛɛ' nëkʋʋ' kʋnyʋa wälɩ, ɩyä wa bhibhie ɔɔ' 'wlu. Wa jɛnöɔ 'kpü 'wlu Kwlienyɔɔ' 'ŋnöö 'mnö, ‑yä wa bhibhie ɔɔ' 'wlu.

¹⁵ Wa kä ɔɔ' 'wlu ‑bhibhie pɔlötɛtɛɛ 'mnö nä, ɔ yi ‑lɔɔ nëë ‑bha. Kwlienyɔ yi gbä 'nɩ, ɔ yi 'kʋ ‑bha, 'nɩ nyenyii' lɩɩ ɔ kä bhä ‑nʋ nä, Kwlienyɔ yionyɩ cie.

¹⁶ Nä, nyɩkpɔ nyɩkpɔ zɛnöyɩ ɔɔ' nyenyii ɔ ‑liesɩ dëlüü', ɩyä a bhibhie ‑bhibhie 'wlu. Ɩmɩɩ‑ yi lä gbä 'nɩ, a yi ‑kä yamä. Nyɩkpɔɔ' lɔɔ ‑ɔnö nʋnʋgbɩ‑ gëë‑ lä 'yi Laagɔ dëlü nä, kä ɔɔ' bhibhie ‑kä 'tɛtɩ 'kädɩ.

¹⁷ A ni 'yi ‑a! 'Plɔfɛtɩ Elii nä, ɔ ‑glö bhä ‑anyɩ 'bhisäkʋʋ' nyɩkpɔ. ‑Mä 'tänyɩ ‑kʋ ‑lɔɔ 'nɩ, ɔ ‑bhibhie 'sää 'titi nynä 'nyuu' bhlä ‑lä. Ɔ ‑bhibhie ylä nä, 'nyuu ‑wʋ 'zaazɩ ‑bhlä 'nɩ, ɩ ‑nʋ 'ylʋbɔ taa ‑yä 'cɩ ‑ngboplo.

¹⁸ 'Nɩ ɔ yi bʋkʋ bhibhie, 'nɩ 'nyu yi ‑laagɔɔ' ‑bha 'nɩ ʋ yi bhlä. ‑Mä sä 'nyunʋ ‑bhlä bhɛ lä nä, kä ‑dʋdʋ namä‑ lülülɩɩ.

A gbä ‑yä ‑wa too lä nä, wa yi ‑blɔɔ 'kʋ

¹⁹ Bhelie ‑yä bhɛŋwnɩänyɩ‑, anyɩa' nëëdëë' lɔɔ‑ gä bhɛ ‑nʋawlɛɛ' ‑blɔɔ 'kʋ ‑bha nä, 'nɩ ɔ ‑lie kɔ klää nynä ɔ 'kɔ bʋkʋ ‑blɔkʋ slüa nä,

²⁰ ɩ ‑ŋwa 'kʋ nynä ‑mä wälɩklënä a yibhënöa. Nyenyinyɔ nä, nyɩkpɔɔ' lɔɔ‑ sɔɔ lä nyenyii' ‑blɔɔ 'kʋ nä, kɔ ‑sä lä ‑lɔɔ' nyɩkpɔɔ 'kwie nëë'. Kɔ gbä lä 'sɩɩ 'nɩ, nyenyi‑ ‑bhutukpä 'tütlüo‑ lä 'kʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan