Bìoball air-loidhne

Zakö 4 - GOD - u2

Waa' gbenyenyi plüënʋwa‑ Laagɔɔ' ‑zɔbhlɛgbänyʋä

¹ Dä ‑sä 'kʋ bhläälɩɩ ‑yä cicee 'sɔ bha bhä 'nɩ ɩ ‑kʋ'anyɩ bhä pää? Anyɩa' gbenyenyii ‑kʋ'anyɩ lä pleyi 'nɩ ‑ɩ vë lä ‑mɔɔ 'kʋ nä, ɩmɩɩ‑ gbä lä 'nɩ ɩ ‑kʋ lä sɔɔ.

² ‑Nʋnʋ ‑kʋ ‑lɔɔ 'nɩ, a ‑tään nynä ‑mä a 'kʋʋ kään, 'nɩ a 'nʋ ‑wʋ ‑kä. Ɩ ‑kä 'ŋnö 'nɩ a bhlä nyɩkpa. Anyɩa 'yi bhlä bhɛ lʋʋ' 'cënänä 'nɩ a tään nynä ‑mä a 'kʋ kään ‑mä aa mii‑ ‑wʋ 'nɩ a 'kʋʋ 'ni. Ɩmɩɩ‑ ‑kä 'ŋnö 'nɩ cicee ‑yä 'kʋ bhläälɩ ‑kʋ'anyɩ lä pää'. ‑Lʋʋ a ylä lä nä, aa' 'niu ‑wʋ. ‑Ɔnöza bhää? Aa' zlaanʋ bhibhielɩɩ 'mnö.

³ 'Nɩ a kä 'sɩɩ zlaa nä, aa' 'ni ‑wʋ. ‑Ɔnöza bhää? Aa ‑wʋ zlaasä ‑yi. A kä zlaa nä, a yëkuu' gbʋʋ‑ bhla'anyɩ.

⁴ A ‑yä Laagɔ 'sɔɔ ‑wʋ lä 'jɛnyɩ‑. Nyɩkpɔɔ' lɔɔ ‑ɔ ‑waa lä ‑mää 'ylʋzɔɔ' kääkäälɩɩ gbʋʋsä nä, aa' bhä sɔɔ ‑yi nynä ‑mä, ɔ ‑glö Laagɔɔ' ‑zɔbhlɛgbänyɔ ‑a? Nyɩkpɔɔ' lɔɔ‑ ci lä nynä ‑mä, ɔ yi 'ylʋzɔɔ' kʋkʋlɩɩ 'kʋ 'gë nä, lɔɔ' nyɩkpɔɔ kɔ plö Laagɔɔ' ‑zɔbhlɛgbänyɔ.

⁵ A 'nä bhobho lä nynä ‑mä, wälɩɩ Laagɔ‑bɔɔgʋʋ ci lä nä, ɩ ‑glö 'flɛ. Ɩ ‑jɩjlɔ nynä ‑mä, Kwlienyɔ Laagɔ nä, 'Wugɔɔ ɔ kwlienö‑anyɩ lä 'kʋ nä, kɔ ‑wʋʋ kpänyɩ. Ɔ ‑wʋʋ 'sää luëzüsä.

⁶ 'Nɩ ‑jlɔɔ Laagɔ nyɩ‑anyɩ lä nä, ʋ ‑zi ‑lɩɩ 'fɩɩn 'kʋ. Laagɔ‑bɔɔgʋʋ nä, ʋ ci nynä ‑mä, Nyɩkpaa' ‑lʋa ‑wa täkpɔ lä nä Laagɔɔ' ‑tanʋwa ‑wʋ 'yi 'nɩ wa 'kä 'kʋ 'plöö. ‑Mä nyɩkpaa' ‑lʋa ‑wa lä lä wa yëku ‑dʋdʋkʋ nä, Kä Laagɔ nyɩwa 'nää.

⁷ Nä, a ‑lä a yëku ‑dʋdʋkʋ Laagɔ dëlü. ‑Mä 'Dëvlo nä, a ‑yʋsɔ bhlää 'kʋ ‑mä ʋ yi'anyɩ ‑guu 'nɩ, ʋ yi yi'anyɩ gwë ‑sä fɛɛn.

⁸ A 'jloo ‑Laagɔ yëku ‑mä ʋ yi'anyɩ yëku 'jloo. Anyɩ gbenyenyinyʋa a gbɔtɔ yɩ nyenyii' wlɩ! Anyɩmɔ plɛɛ' bhlü ‑wʋ nä, a kpɔlʋä anyɩa' pɔlöö 'yii!

⁹ A yëkuu' wälɩ kamänö'anyɩ ŋäzö 'kʋ! A 'tu ‑yä a bhʋtʋ! Anyɩa' glänyɩä jɩjlää 'nʋgbʋʋ'! Ɩyä anyɩa ‑jäkä jɩjlää bhʋtʋlɩɩ'!

¹⁰ Kwlienyɔɔ dëlüü nä, a ‑lä a yëku ‑dʋdʋkʋ ‑mä, ʋ yi'anyɩ 'kʋ bhɛlɩä.

Nyɩkpɔɔ' ci ‑lä ɔ ‑liee' nyenyi

¹¹ Bhelie ‑yä bhɛŋwnɩänyɩ‑, aa' ci lä a ‑liesɩɩ' nyenyi. Bheli ‑o, bhɛŋnɔ ‑o, nyɩkpɔɔ' lɔɔ‑ gä waa' nyenyi ci nä, 'nɩ ‑ɔ gwa kpʋkpɔ nä, ‑lɔɔ' nyɩkpɔɔ yä Laagɔ ‑Jlämaa' ‑gesi tʋ. 'Nɩ ‑Jlämaa 'mä ɔ 'wɛɛ lä lä 'sɩɩ. ‑Bhlɛ, ‑n gä ‑Jlämaa 'wɛɛ nä, kä ‑nn nää ‑wʋ lä aa saa ‑mä aa 'wɛɛnyɔ ‑n plöö‑ lä.

¹² Laagɔ ‑bhlo 'coo 'mʋʋ‑ wlʋa‑ lä ‑Jlämaa. Ʋmʋ ‑bhlo yi lä nyɩkpɔ 'tite 'ŋʋ 'nɩ ʋmʋʋ‑ yi lä 'sɩɩ nyɩkpɔ puë. Ʋmʋʋ‑ yi lä 'sɩɩ mii 'nɩ ʋ yi lä nyɩkpɔ nuë. Nä, ‑mɔɔ mɔɔ‑ kpʋkpɔ lä ‑n ‑lie nä, ‑naa gba bhää?

Aa' täkpɔɔ ‑lä leylüü'

¹³ A poo'o yɩ 'nyuklwi! Anyɩmɔɔ‑ ci lä nynä ‑mä, ‑zɩkä ‑o, ‑zëkü ‑o, ‑a yi 'dunʋ 'kʋ mʋ nä! ‑A yi ‑mɔɔ kʋ 'nɩ 'ylʋbä yi 'klʋ glää. ‑A yi ‑mɔɔ kʋ 'nɩ ‑a yi 'kwäsɛ 'pä 'nɩ ‑a yi monii ‑bhutukpä 'ni.

¹⁴ A ci sɔɔ 'flɛ, ‑bhlɛ anyɩa zëkpëa' sa 'kä lä ‑zekü kʋmɔ ‑kʋmɔ nä, aa' ‑wʋ sɔɔ ‑yi. ‑Anyɩa' zëkpëa nä, zëplüü' jluu ‑ʋ kwli lä nä, ʋmʋ 'bhisäkʋ a ‑kʋ lä. Jlu nä, ʋ ghlä 'kʋ ‑vaaa, 'nɩ ʋʋ' gwlɛɛ ‑wʋ 'nɩ ʋ 'mʋmnɔ.

¹⁵ Ka 'kä bhlä ci nynä ‑mä, Kwlienyɔ kä ŋoo‑ nä, ‑a yi ‑lätee zëkpë 'kʋ kʋ 'nɩ ‑a yi ‑nʋnʋ nʋ 'nɩ ‑a yi 'sɩɩ ‑lɔɔ ‑lʋyɩ nʋ.

¹⁶ Aa' nʋ ‑wʋ sɔɔ ‑mä, ka pä ‑bli 'nɩ a täkpɔ. Nä, a yibhë sɔɔ nynä ‑mä, sɔɔ täkpɔlɩɩ' ‑wʋ nää‑.

¹⁷ Nyɩkpɔɔ' lɔɔ‑ ‑yi lä sä wa nʋ lä 'nää, 'nɩ ‑ɔɔ nʋa ‑wʋ lä nä, ‑lɔɔ' nyɩkpɔɔ nä, nyenyi‑ ɔ nʋ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan