Bìoball air-loidhne

Zakö 3 - GOD - u2

A fä anyɩa' 'mʋ ‑sääsa plɛkʋ
( Matie 12.33‑37 )

¹ Bhelienyɩ‑ ‑yä bhɛŋwnɩä, anyɩ 'fɩɩn 'plö ‑lä cɩanyʋä! A yibhë sɔɔ nynä ‑mä, ‑anyɩmɔɔ‑ cɩa lä nä, 'titee' ‑lɛɛ Laagɔ 'ka‑anyɩ lä 'ŋʋ nä, ɛ yi kpänyɩ 'fɩ kään.

² ‑Anyɩ 'fɩɩn kä ‑a bhlü 'focloo' 'cënänä. Nyɩkpɔ kä 'mʋ ‑sää 'nɩ ɔ 'nö 'foclo bhlü nä, ‑lɔɔ' nyɩkpɔɔ kɔ ‑kplɔɔ lä. Ɔ yi mii 'nɩ ɔ yi ɔ yëkuu' 'tiesä yibhë.

³ Sä ‑a klä lä ‑kpängɔ nä, a 'pä ‑wʋ saa sɔɔ plɛ 'kʋ! ‑A gʋä ‑kpängɔ në 'klʋ nynä ʋ 'kä‑anyɩ 'klʋkpää' 'ŋʋ. 'Nɩ ‑a mii yɩ 'nɩ ‑a 'tie ʋʋ' 'bhëbhëë‑bhëa.

⁴ A 'pä 'sɩɩ 'mɩɛɛ 'lusaa plɛkʋ! 'Mɩɩ ‑wʋ 'ghlünɔɔ' 'bɛ. ‑Mä sɔɔ ɛ ‑kʋ 'nɩ, ‑vʋvɔlʋ 'kädʋʋ kɛ 'su nä, 'cɩɔ 'tɩkɩɩlɛɛ ‑kʋɛ klë nä, gbäsɩɩ‑ ‑ŋwa lä 'kʋ nynä ‑mä ɛ mʋʋ nä, ‑mɔɔ ʋ fänɩɛ.

⁵ A 'pä 'sɩɩ mɩɔɔ' kʋkʋsaa plɛkʋ! Mɩɔ nä, nyɩkpɔɔ' yɛkɛɛ' 'pɛlʋ 'tɩkɩɩlɛɛ lä. ‑Mä sɔɔ ʋ ‑kʋ 'nɩ, ʋ wla wälɩbhü. Sä ‑kapee 'tɩkɩɩlɛɛ mii 'nɩ ɛ sie lä 'kläpʋ nä,

⁶ sɔɔ mɩɔ ‑kʋ 'nɩ ʋ plöö‑ lä nyɩkpɔɔ' 'yɛkɛɛ' 'pɛlʋ. Mɩɔ 'mʋʋ‑ ŋʋ lä nyɩkpɔ gbenyenyi yëku. Kʋ ‑kʋ lä nynä ‑kapee 'nɩ ʋ ‑kʋ lä nyɩkpɔ 'yɛkɛɛ' 'nɩ ʋ dö lä ɔɔ' zëkpë ‑lefɩɩn 'yi 'nɩ a ŋnä lä. Mɩɔɔ' ‑kosuu nä, ŋnäŋnä ‑kosuu 'kädʋʋ' ‑zëbhuu' 'mnö, ‑mɔɔ ʋ bha lä.

⁷ Nyɩkpɔ nä, ɔ mii 'nɩ ɔ 'kämä 'klää' mnaa 'fɩɩn. Ɔ mii 'nɩ ɔ 'kämä 'ylʋzɔɔ' nümnüü 'fɩɩn. Ɔ mii 'nɩ ɔ 'kämä 'ylʋzɔɔ' bɩbɛ bɩbɛlɩɩ 'fɩɩn. 'Nɩ ɔ mii 'nɩ ɔ 'kämä lä 'nyiee zlüü 'fɩɩn.

⁸ ‑Mä mɩɔ nä, nyɩkpɔɔ' ‑lä ʋʋ' 'kämälɩ mii. Mɩɔ nä, kʋ ‑nyu lä. Nyɩkpɔɔ' ‑lä mii 'nɩ ɔ 'kʋ ‑plɩɩ 'ŋʋ. 'Nɩ ʋ ‑yi 'sɩɩ 'nɩ ʋ ‑kä glʋʋ' lʋʋ‑ bhlä lä nä.

⁹ ‑Bhlɛ mɩɔnʋ, ʋmʋ ‑a bhlü lä 'kʋ 'nɩ, Kwlienyɔɔ, ‑a 'Bä Laagɔ, ‑a yi 'nɩ ‑a jäkanöɔ 'nyʋ lä 'mʋ. 'Nɩ mɩɔɔ' ‑säkä ‑säkä, ‑a bhlu lä 'sɩɩ 'kʋ, 'nɩ nyɩkpɔɔ' ‑lɔɔ Laagɔ ‑nʋ lä ʋ yëku 'kʋ nä, ‑a gbütüo lä.

¹⁰ Laagɔɔ' jäkalɩ ghläno‑anyɩ nëë', 'nɩ nyɩkpaa' gbütëlɩ ghläno‑anyɩ 'sɩɩ nëë'. Nä, bhelie ‑yä bhɛŋwnɩänyɩ‑, ɩɩ' ‑wʋ 'kʋ ‑ŋwa nynä ɩ kʋ sɔɔ.

¹¹ 'Nyiee' glu ‑bhäändä, ‑lɔɔ' ‑lä mɛnɔ mɛnɔnyu wlʋa, 'nɩ ‑lɔɔ 'kä 'nyukälʋ wlʋa.

¹² Bhelie ‑yä bhɛŋwnɩänyɩ‑, ‑tɩtɩɔsu yi bhä wle tlʋ ‑a? 'Nɩ ‑gälösu yi bhä ‑tɩtɩɔ tlʋ ‑a? 'Nɩ glünyuu' glu ‑bhäändä, ‑lɔɔ ‑lä 'kɔɔn mɛnɔ mɛnɔnyu zelio.

'Fikee‑ bha lä Laagɔduu' nä

¹³ Bhelie ‑yä bhɛŋwnɩänyɩ‑, anyɩa nëëdëë' lɔɔ ‑sä bhobho bhä nynä ‑mä, kɔ 'fika, 'nɩ ɔ ‑yi dɩgälɩɩ? ‑Ɔ gä 'fika 'nɩ ‑ɔ gä dɩgälɩ ‑yi nä, ɔɔ' nää nääsa pana sɔɔ. Ɔ kään pɔlöwätɛ ‑yä ɔ kään dɩgälɩ ɔɔ' nʋnʋgbɩɩ mnö.

¹⁴ Anyɩa pleyii ‑nyunɔ kä ‑mɔɔ ‑kʋ nä, 'nɩ luëzü kä ‑mɔɔ ‑kʋ, 'nɩ 'kʋ bhläälɩ kä ‑mɔɔ ‑kʋ nä, aa' täkpɔ ‑lä, 'nɩ aa gbä ‑lä 'sɩɩ 'nɩ ‑nʋawlɛɛ 'kä 'kpläkplä 'plöö.

¹⁵ Nyɩkpɔɔ' lɔɔ‑ nää lä sɔɔ nä, Laagɔ yëku‑ ɔɔ' dɩgälɩɩ' ‑bha ‑wʋ. 'Ylʋzɔɔ' dɩgälɩ ɔ ‑kä lä. Ɩ plöö‑ 'yɛkɛɛ' dɩgälɩ, 'nɩ ɩ plöö‑ 'sɩɩ 'Dëvloo' dɩgälɩ.

¹⁶ Dä luëzü ‑kʋ lä nä, 'nɩ 'kʋ bhläälɩ ‑kʋ lä nä, ‑lɔɔ' bhlü ‑wʋ 'kɔɔkɔ në. Kä gbenyenyi ‑bhutukpä kʋ ‑lɔɔ.

¹⁷ ‑Mä nyɩkpɔɔ' dɩgälɩ kä Laagɔ yëku bha nä, kɩ ‑kplɔɔ. 'Fɩa 'nɩ, ɩ bhɛɛ‑ 'kʋ wɔtɔlɩ ‑yä pɔlöwätɛ. Dɩgälɩɩ‑ bha lä Laagɔ yëku nä, kɩ glää nyɩkpa, 'nɩ ɩ ‑kä 'sɩɩ nyɩkpaa' ŋäzö‑ yibhëlɩ. Kɩ ‑yä 'nägägbɩ 'sɔ nää 'kɔɔkɔ. 'Nɩ ɩɩ' gbäzö ‑wʋ 'sɩɩ nyɩkpaa'. 'Nɩ ɩɩ' 'nyigë ‑wʋ nyɩkpɔ.

¹⁸ Nyɩkpaa' ‑lʋa ‑wa ‑wɔtɔ lä plɛ nä, kwa gbä 'nɩ 'kʋ wɔtɔlɩ yi. 'Nɩ waa' kʋkʋsa gbä 'nɩ sää‑ gëë‑ lä 'yii nä, wa ni sɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan