Bìoball air-loidhne

Zakö 2 - GOD - u2

A 'ŋʋmʋ ŋäzönyʋa 'klʋkpää

¹ Bhelie ‑yä bhɛŋwnɩänyɩ‑, 'klʋagbaa' käänyɔɔ, ‑anyɩa Kwlienyɔɔ Zozi Klisö, anyɩmɔɔ‑ ‑kä lä ɔɔ' pɔlötɛtɛ nä, a 'nä gbäzö ‑lä nyɩkpaa'!

² A ni a 'wlää ‑pɛpɛɛ 'wlu 'nɩ nyɩkpɔ yi'anyɩ nëëdë, 'nɩ ɔ ‑kä lɩ. Ɔ ŋʋʋ‑ ‑sikaa ‑kpätlʋwee, 'nɩ ɔ ‑plä 'sɩɩ 'ŋnumʋ‑kwëti. 'Nɩ nyɩkpɔɔ' 'yigädalɔɔ yi'anyɩ 'sɩɩ nëëdë 'nɩ, ɔ ‑plä 'kwëtizɩ.

³ 'Nɩ a yi 'nɩ nyɩkpɔɔ' ‑lɔɔ ‑ɔ ‑plä lä 'nää 'mʋ nä, a ŋʋɔ 'nägäsä 'klʋkpää'. A sonöɔ nynä ‑mä ‑aawli, ‑n 'plöö ‑mää 'klʋkpää' kʋ këkpënä 'mnö ‑yä, n kʋ sä! 'Nɩ a yi 'nɩ a soo ŋäzönyɔ nynä ‑mɔɔ nä, n 'nynigo ‑lää 'kʋ! ‑Ɔ! ‑N yi ‑yä ‑n 'kplɩfɔ ‑lää!

⁴ A kä sɔɔ nʋ nä, ka gbäzö lä nyɩkpaa'. A kä sɔɔ nʋ nä nyenyisä‑ aa bhobho ‑wʋ lä a ‑liesɩɩ' ‑za ‑a?

⁵ Bhelie ‑yä bhɛŋwnɩänyɩ‑, anyɩmɔ ‑ɔ känö'ö lä gbʋ nä, a poo 'nyukwli! Kä Laagɔ bhlüü‑ 'ylʋzɔɔ' ŋäzönyʋa 'kʋ ‑yä ʋ 'kä gbä wa 'kä waa' pɔlötɛtɛɛ 'mnö leylü 'nii. Ɩyä, 'Leyiduu Laagɔ ŋʋʋ‑ lä ʋʋ' ‑waanyʋa' ‑za nä, ŋäzönyʋa 'kʋ jaa 'kʋ lüü.

⁶ ‑Mä anyɩ nä, ŋäzönyʋa, ka ‑ziwa ‑dii. ‑Bhlɛ lɛkäänyʋa nä wamää‑ ŋʋ'anyɩ nyäkälɩɩ'. Wamää‑ kunö'anyɩ lä 'zuzunyʋa dëlü tʋ ylɩɩ 'fɩɩn 'kʋ. Yio ‑a?

⁷ 'Ŋnöö' ‑lɩmɩ ‑ɩ mʋ lä 'ŋnu, 'nɩ Laagɔ ‑gbä 'nɩ a bhɛɛ‑ lä nä, wamä lɛkäänyʋa wamää‑ zii lä ‑dii.

⁸ Laagɔɔ' 'Leyiduu' ‑Jlämaa, ‑a ci lä nynä ‑mä, sä ‑n ‑waa lä ‑n yëku nä, ‑n wamä sɔɔ ‑n lie nä, a ka 'klʋkpä 'ŋʋ nä, 'nägägbɩ‑ a nʋ lä.

⁹ 'Ɩzä ka kä nyɩkpa 'mʋ gbäzö nä, nyenyi lä. ‑Jlämaa 'mä a sä lä 'klʋkpä nä, a yi'anyɩ gbʋ klaa.

¹⁰ 'Nɩ nyɩkpɔ kä ‑jlämöö' nëëdëë' ‑jlämä ‑bhlo 'coo 'klʋkpä' ‑sä nä, 'nɩ ɔ kä ‑mɔɔ' ‑lɩɩ 'fɩɩn 'klʋkpää' ŋʋʋ‑ nä, ‑lɔɔ' nyɩkpɔɔ nä, ‑jlämöö 'fɩɩn ‑za nä kɔ ‑bhlü lä 'foclo.

¹¹ Laagɔ cii‑ nynä ‑mä, ‑naa 'ylä ‑lä ‑n ‑liee' 'ŋnɔ, 'nɩ ‑naa 'ylä ‑lä ‑n ‑liee' 'wli. 'Nɩ Laagɔɔ' ‑säkä ‑säkä cii‑ 'sɩɩ nynä ‑mä, ‑naa 'bhlä ‑lä ‑n ‑lie. Naa, ‑nn ‑wʋ ‑n ‑liee' 'ŋnɔ ylää‑, 'nɩ ‑nn ‑wʋ ‑n ‑liee' 'wli ylää‑. ‑Mä ‑n yi 'nɩ ‑n bhlä nyɩkpɔ 'nɩ ɔ kuu‑ nä, kä ‑n ‑bhlü lä 'kɔɔkɔ ‑Jlämaa' 'foclo.

¹² Sa ci lä nä, 'nɩ sa nʋ lä nä, sɔɔ pana nynä ‑mä a glö nyɩkpaa' lʋä Laagɔ yi lä ‑zee 'tite 'ŋʋ nä. ‑Jlämaa ‑laa ‑a dö lä nyɩkpa 'kpɔ nä, amä Laagɔ 'kä 'gë 'ŋʋʋ ‑yä ʋ 'kanyɩ 'tite 'ŋʋ.

¹³ Kä n sonö'anyɩ yɩ nynä ‑mä Laagɔɔ' 'Tite 'kädɛɛ pläylʋʋ 'kʋ nä, nyɩkpaa' ‑lʋa ‑waa ‑wʋ lä wa ‑liesɩɩ' ŋäzöplɛ ‑kä nä, Laagɔɔ' 'nʋwa ‑lä ŋäzö yibhë. Nyɩkpaa' ‑lʋa ‑kä lä wa ‑liesɩɩ' ŋäzöplɛ nä, 'Titee 'kädɛɛ pläylʋʋ 'kʋ nä, waa' wälɩɩ' ‑wʋ gbʋ 'kʋ ‑kʋ.

Pɔlötɛtɛ ‑yä ɛɛ' nʋnʋgbɩ 'sɔɔ‑ nää

¹⁴ Bhelie ‑yä bhɛŋwnɩänyɩ‑, nyɩkpɔ kä ci nynä kɔ ‑kä Laagɔɔ' pɔlötɛtɛ nä, 'nɩ ‑lɔɔ' pɔlötɛtɛɛ 'nö nʋnʋgbɩ 'kʋ gëë‑ nä, gba ‑sä ɛ ‑kä bhää? ‑Lɔɔ' pɔlötɛtɛɛ yi bhä nyɩkpɔ ‑lɔɔ nëë' ‑sä ‑a?

¹⁵ Kɩ ‑kʋ lä nynä ‑n ‑näsä bheli ‑o, bhɛŋnɔ o‑, wa ‑kʋ ‑lɔɔ 'nɩ waa' ‑wʋ 'mʋ plä‑kotu ‑kä. 'Nɩ waa' ‑wʋ 'sɩɩ lülülʋʋ ‑kä ‑yä ylʋʋ ‑za wa 'kä lü.

¹⁶ 'Nɩ anyɩa nëëdëë' nyɩkpɔ yi 'nɩ ɔ sonʋwa nynä ‑mä, bheli‑! Bhɛŋnɔ‑! A mʋʋ 'kʋ wɔtɔlɩɩ! A plä 'mʋ ‑tututu ‑yä wätlɩɩ' ka'anyɩ ‑kä 'bhlä! Ɩyä a lü 'nägäsä a 'kä loo! Nyɩkpɔɔ' ‑lɔɔ ‑ɔ 'gwa lä sɔɔ soo nä, ɔ 'nʋwa 'kwëti nyɛɛ‑, 'nɩ ɔ 'nʋwa lülülʋʋ nyɛɛ‑ nä, wälɩɩ 'fɩɩn ɔ cii‑ lä nä, gba ‑sä ɩ ‑kä bhä?

¹⁷ A ni sä pɔlötɛtɛɛ ‑kʋ lä nä. Pɔlötɛtɛ ‑yä nʋnʋgbɩ 'sɔ 'nö nää nä, ɛ ‑glö pɔlötɛtɛɛ' lɛɛ‑ kuu‑ lä nä.

¹⁸ Nyɩkpɔ yi mii‑ 'nɩ ɔ yi ɔ lie soo nynä ‑mä, ‑aawli, ‑mɔɔ nä, pɔlötɛtɛɛ' 'yɛkɛ 'yɛkɛ 'mɛ ‑n ‑kä! ‑Mä ‑amʋ nä, ɛɛ' nʋnʋgbɩɩ 'mɩ n nʋ! ‑Mä ‑ɔ ci lä sɔɔ nä, n yio soo nynä ‑mä, ‑aawli, ‑n panö'ö saa ‑naa pɔlötɛtɛɛ' 'yɛkɛ 'yɛkɛɛ ‑yä n 'kɛ 'yi 'ni. Ɩyä ‑amʋ, n 'kä nʋnʋgbɩɩ 'mnö ghlää ‑yä, n 'kä‑ä 'naa pɔlötɛtɛɛ pana.

¹⁹ ‑N ‑känɩ plɛkʋ nynä ‑mä, Laagɔ ‑bhlü ‑bhlo. 'Nɩ 'zaazɩ, ‑naa wälɩ mɛɛ‑. ‑Mä ‑zizinyenyii ‑yi 'sɩɩ sɔɔ nynä Laagɔ ‑bhlü ‑bhlo. 'Nɩ ɩ tɩtɛɛ 'sɩɩ ‑ŋänöö' ‑za.

²⁰ Dëbënyɔ‑! ‑N ‑waa bhä nynä ‑mä wa sonö‑ö 'fɩa nynä pɔlötɛtɛɛ' lɛɛ ‑ɛɛ ‑yä nʋnʋgbɩ 'sɔɔ nää ‑wʋ lä nä, ɛɛ' ‑wʋ gba ‑kä ‑a?

²¹ ‑A tötɔ Ablaamʋʋ' pɔlötɛtɛɛ' nʋnʋgbɩɩ 'mɩ Laagɔ 'nii‑ lä 'yi 'nɩ, ʋ cii‑ lä nynä ‑mä, kä Ablaamʋʋ' nʋnʋgbɩ‑ gëë‑ 'yi. Ablaamʋ nä, ɔ ‑yowli Yizakö, kɔ ‑sɔɔ 'cibhi ‑za Laagɔ dëlü.

²² ‑N ni 'yi ‑a! Ablaamʋʋ' pɔlötɛtɛɛ nä, kɛ ‑yä ɔɔ' nʋnʋgbɩɩ 'sɔ mʋʋ bhä yëkuu. Nʋnʋgbɩ‑ ɛ ‑yɩ 'sɔ nää bhä nä, ɩmɩɩ‑ ‑gbä 'nɩ ɛ ‑kplɔɔ bhlä.

²³ Wälɩklëa Laagɔ‑bɔɔgʋʋ cii‑ lä nä, amää‑ ‑glää lä. Kʋ ci lä nynä Ablaamʋ ‑kä bhä Laagɔɔ' pɔlötɛtɛ nä, ɩmɩɩ‑ ‑kä 'ŋnö, 'nɩ Laagɔ cii‑ lä nynä ‑mä ɔ ‑glö 'yigënyɔ. 'Nɩ Laagɔ ‑yi 'nɩ ʋ lɔɔ‑ lä 'sɩɩ ʋ 'nagɔ.

²⁴ A ni sɩ ‑kʋ lä nä. Nyɩkpɔ nä, ɔɔ' pɔlötɛtɛɛ ‑bhlo Laagɔɔ' wloo ‑wʋ ‑mä, ɔɔ' nʋnʋgbɩɩ' ‑lɩɩ ‑ɩ ‑yɛsɔ nää lä nä, ɩmɩɩ‑ gbä 'nɩ Laagɔ lɔɔ lä 'yigënyɔ.

²⁵ Wlu‑yläŋnɔnɔ wa laa bhlä Laabʋ nä, ɔɔ' nʋnʋgbɩ‑ ‑gbä 'nɩ Laagɔ lɔɔ‑ 'yigëëŋnɔ. Ɔnöza bhä? 'Tänyɩɩ' 'Yizlɛnyʋa wa ‑lobho bhlä nä, wa ‑yi lä Zelikoo‑duu' nä, 'ŋnɔnɔ wa laa lä Laabʋ nä, ɔmɔɔ‑ ‑klänʋwa. Ɔ ‑gbä 'nɩ wa ‑bhlü 'yigäda ‑blɔ 'nɩ wa yi duu' ‑bha, 'nɩ wa yi 'ylɩbhɔ.

²⁶ Nä, sä nyɩkpɔ 'nö ylä nyämʋ ‑sä 'nɩ wa ci lä nynä ‑mä kɔ kuu‑ nä, sɔɔ ‑säka ‑säkä pɔlötɛtɛ 'nö lä nʋnʋgbɩ 'kʋ gëë 'nɩ ɛ kuu‑ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan