Bìoball air-loidhne

Zakö 1 - GOD - u2

Zakö bhää 'cɔcɩnyʋa

¹ ‑Amʋ Laagɔɔ' lebhe‑nʋnyɔ ɩyä Kwlienyɔ Zozi Klisöö' ‑gänʋnyɔ Zakö nä, Laagɔɔ' bʋbɔnyʋa‑ ‑jɛjɛ lä 'ylʋzɔɔ' dää 'fɩɩn nä, n bhänʋwa.

Nyäkälɩɩ ‑yä ‑zɔɔpälɩɩ 'mnö a kään pɔlötɛtɛ

² Bhelie ‑yä bhɛŋwnɩänyɩ‑, a kä 'kwlɩkabhɩää' ‑kʋ nä, a nämnö ‑lɔɔ 'kwlɩkabhɩa mnö ‑pʋpɛsä.

³ A ‑yibhë sɔɔ nynä ‑mä, anyɩa pɔlötɛtɛɛ gbɩɩ' ylalɩ kɛ ŋëë nä, kɩ gbä 'nɩ a yibhë plɛkʋ 'tɛmä sä.

⁴ Nä ‑lɔɔ' plɛkʋ 'tɛnɔɔ nä, a nʋ saa 'fɩɩn ‑yä a känʋ ‑kaaa ‑yä a 'kä ʋʋ' 'wlu koodä ŋëë! ‑Lɔɔ' plɛkʋ 'tɛnɔɔ yi gbä 'nɩ a yi nyɩkpa 'plö. ‑Lɔɔ aa ‑lä 'foclo bhlü, 'nɩ lʋʋ nö'anyɩ ‑lä lä 'sɩɩ bɔɔ.

⁵ ‑Ɔ 'nö dɩgälɩ ‑kä anyɩ nëëdë nä, ɔ zlaa Laagɔ ‑mä ʋ yio dɩgälɩɩ 'nyɛ. ‑Ɔnöza bhää? Laagɔɔ' plɛkʋnanɔɔ 'mnö kʋ nyɛ nyɩkpaa 'fɩɩn 'flɛ, ‑mä ʋʋ' gbäzö ‑wʋ nyɩkpaa'.

⁶ Nyɩkpɔɔ' lɔɔ‑ zla lä Laagɔ dɩgälɩ nä, ɩ ‑ŋwa 'kʋ nynä ‑mä ‑lɔɔ' nyɩkpɔɔ 'bhlü pɔlötɛtɛ 'kʋ. Ɔ känö Laagɔ plɛkʋ ‑yä ɔ zlaa. ‑Ɔɔ ‑wʋ lä pɔlötɛtɛ ‑kä nä, kɔ ‑kʋ lä nynä jinyiee' 'lakɔ 'mʋ ‑vʋvɔlʋ bhɛlɩä 'kʋ 'nɩ ʋ gbisie.

⁷ ‑Ɔ ‑kʋ lä sɔɔ nä, ɔɔ' bhobho ‑lä nynä ‑mä, Kwlienyɔɔ yio lʋʋ 'nyɛ.

⁸ ‑Lɔɔ' nyɩkpɔɔ nä, ‑blɔɔ ɔ bhlü lä nä kɔ 'nʋʋ ‑wʋ lä ‑yi. 'Nɩ saa 'fɩɩn ɔ bhɔ lä nä, ɔɔ' bhɩä ‑wʋ sɔɔ ‑zɔɔ.

Ŋäzö ‑yä leylü

⁹ Bhelii' lɔɔ‑ ‑kʋ lä ŋäzöö' nä, ɔ nʋ ‑jäkä ‑mä Laagɔ yɔɔ gblaa.

¹⁰ 'Nɩ bhelii' lɔɔ ‑ɔ plöö‑ lä lɛkäänyɔ, ɔ nʋ 'sɩɩ ‑jäkä sä Laagɔ yɔ lä ‑dʋdʋkʋ ‑lä nä. A ni lɛkäänyɔ nä, ɔɔ' zëkpëa ka 'plö 'fäfä nynä ‑pitii' 'jaa.

¹¹ ‑Pitivä kä 'jaa ‑nʋ nä, sä 'ylʋ ghlä lä 'kʋ nä, kä ʋʋ' sloo bhla 'nɩ aa 'jaa gboto, 'nɩ aa' nanɔɔ bhɩä 'kʋ. Nä, lɛkäänyɔ, sɔɔ ‑säkä ‑säkä ɔ 'kä lä 'sɩɩ 'kʋ bhɩä, ɔ ‑yä ɔɔ' kääkäälɩɩ 'sɔ.

Zëkpëkʋ ‑kʋ ‑zɔɔpälɩ

¹² Nyɩkpɔɔ' ‑lɔmɔ ‑zɔɔpälɩ kä ‑ŋëë 'nɩ ‑ɔ 'tɛmä lä plɛkʋ nä, ɔ yä 'pʋ! ‑Ɔnöza bhää? ‑Zɔɔpälɩɩ kä yɩ plöö‑ nä, bɔɔ‑pälɩ ‑kʋ ‑mɔɔ klë nä, ɔ yii 'ni. 'Nɩ bɔɔ‑palɩɩ' ‑ajɛɛkpaa ‑a nyɛ lä 'pʋpʋɛɛ 'nɩ Laagɔ 'kä lä ʋʋ' ‑wanyʋa 'nyɛ nä, ‑lɔɔ' nyɩkpɔɔ yia 'nimʋ.

¹³ Nyɩkpɔ kä ‑zɔɔpälɩɩ' ‑kʋ nä, ɔɔ' ci lä nynä ‑mä, Laagɔ nyɛɛ'ɛ lä ‑zɔɔpälɩ. ‑Ɔnöza bhää? Laagɔ nä, gbenyenyi 'nʋʋ ‑lä ‑zɔɔpälɩ 'nyɛ. Bʋkʋ 'nɩ Laagɔɔ' ‑lä 'sɩɩ nyɩkpɔ ‑zɔɔpälɩ 'nyɛ.

¹⁴ ‑Mä nyɩkpɔ nä, ‑lʋʋ ɔɔ' 'yi bhlä lä nä, ʋmʋʋ‑ jlüo 'nɩ ʋ 'nyigënöɔ.

¹⁵ ‑Lʋʋ ɔɔ' 'yi bhlä lä nä, ʋ kɔ yɩ ‑jlü nä, ɩmɩɩ‑ gää lä nyenyi. 'Nɩ nyenyinɩɩ' ‑glɛɛlɩɩ 'mnö, ɩ gään lä 'kwie.

¹⁶ ‑Anyɩa ‑wawa‑bhelie ‑yä bhɛŋwnɩänyɩ‑! Aa' 'nyigë ‑lä a yëku!

¹⁷ Saa 'fɩɩn‑ nää‑ lä kpänyɩ nä, ɩyä bɔɔ ‑pälɩɩ 'fɩɩn ‑ɩ ‑kplɔɔ 'nɩ nyɩkpɔ ni lä nä, Laagɔduu' ɩ bha lä. Laagɔɔ, ‑ʋ ‑nʋ lä zëlüü 'fɩɩn nä, ʋmʋʋ‑ nyɩ‑anyɩmɩ lä. 'Nɩ Laagɔ nä, ʋʋ' 'cɩcɩ ‑wʋ, 'nɩ ʋʋ' ‑bha ‑wʋ 'sɩɩ bhlëë' 'kʋ nynä pʋpʋylʋʋ' ‑zuzu.

¹⁸ Kä Laagɔ ‑waa lä nä, 'ɩzä ʋ ‑nʋ‑anyɩ. Ʋʋ' ciciwälɩɩ 'mnö ʋ ‑ghlää 'nɩ ʋ ‑nʋ‑anyɩ lä. 'Nɩ ʋʋ' ciciwälɩnɩ 'mɩɩ‑ plöö‑ lä ‑nʋawlɛɛ. Ʋʋ' nʋnʋlɩɩ 'fɩɩn ʋ ‑nʋ lä, kʋ ‑gbä 'nɩ ‑anyɩ‑ ‑kʋ 'yikʋ.

A poo Laagɔwälɩɩ 'nyukwli ‑yä a nää ɩɩ' saa

¹⁹ 'Naa ‑wawa‑bhelie ‑yä bhɛŋwnɩänyɩ‑, ɩ ‑ŋwa 'kʋ nynä a yibhë wälɩklënä. Nyɩkpɔ nyɩkpɔ nä, ɔ ‑ghlɩlɩ ‑yä ɔ 'kä 'nyukwli poo! Nëë' lü lä nyɩkpɔ ŋɔnyɔ 'mʋsäälɩɩ' ‑za. Plɛkʋʋ' si lä 'sɩɩ nyɩkpɔ sisio!

²⁰ Nyɩkpɔɔ' gbʋgblɛ, ɛɛ' nʋ ‑wʋ Laagɔɔ' dëlü 'yigëgbɩ.

²¹ Ɩ ‑kʋ ylä sää nä, saa 'fɩɩn‑ yi lä nyɩkpɔ ‑gesii' 'ŋʋ, 'nɩ saa 'fɩɩn‑ yi lä 'sɩɩ gbä 'nɩ, nyɩkpɔ yi lä kpänyɩ 'mnö nyumä nä, a ‑sä yɩ sɔɔ a yëku gwë! Ɩyä Laagɔwälɩɩ wa ‑sonö'anyɩ 'nɩ a bhɛnö lä pleyi nä, a bhɛnönɩ pɔlöwätɛɛ' ‑mä ɩ yi'anyɩ ‑lɔɔ nëë' ‑sä.

²² Aa' poo lä 'flɛ 'sää Laagɔwälɩɩ 'nyukwli ‑mä, a nää 'sɩɩ sä ɩ ylä lä nä. A 'nö sɔɔ nää nä, a yëku a 'nyigë lä.

²³ A ni 'yi ‑a! Nyɩkpɔ kä Laagɔwälɩ 'nyukwli ‑poo 'nɩ ɔ 'nö sä ɩ ylä lä nä nʋ nä, kɔ ‑kʋ lä nynä ‑mä nyɩkpɔɔ' lɔɔ ‑ɔ ‑wloo lä ɔ yëku kawloo' 'nɩ ‑ɔ nii‑ lä 'fɩa ɔ yëku 'yi wɩa nä.

²⁴ ‑Mä sä ɔ bhɩä lä 'gää ɔ yëku wloolɩ, 'nɩ ɔ bha lä kawloo yëku nä, ɔ yä bë. Sä ɔ ‑kʋ bhlä ‑mɔɔ kawloo 'mnö nä, ɔ yä sɔɔ 'kʋ bë.

²⁵ ‑Mä ‑Jlämaa‑ ‑a ‑kplɔɔ 'nɩ ‑a sä lä nyɩkpa ‑säklöö' nä, nyɩkpɔ ‑ya 'sɔ kä 'jɛnyɩ‑ nä, ɔɔ' poo ‑wʋ 'nyukwli 'nɩ ɔ 'kä bë. 'Nɩ sä ‑jlämaa ylä lä nä, ‑lɔɔ' nyɩkpɔɔ nää 'sɩɩ sɔɔ. 'Nɩ ‑lɔɔ' nyɩkpɔɔ' sä ɔ nää lä nä, 'sɔɔ nʋ ɔɔ' 'nyupälɩ.

²⁶ Nyɩkpɔ kä ci nynä ‑mä Laagɔ ɔ bʋbɔ 'nɩ ɔ 'nö nëkʋ bhlüsä ‑yi nä, ‑lɔɔ' nyɩkpɔɔ ɔ yëku ɔ 'nyigë lä. Ɔɔ' Laagɔɔ' bʋbɔlɩɩ' ‑wʋ gba ‑kä.

²⁷ Bʋbɔlɩɩ ‑ɩ ‑kplɔɔ lä 'nɩ ‑ɩɩ ‑wʋ lä ‑A 'Bä Laagɔ dëlü 'kpɔ 'mnö ‑kä nä, ɩmɩɩ‑ plöö‑ lä nynä ‑mä Laagɔɔ' bʋbɔnyɔ nä, ɩ ‑ŋwa 'kʋ nynä ‑mä kuyua ‑yä 'kuzëlüŋwnɩa 'sɔ, ɔ klänʋwa waa' mielɩɩ 'mnö. Ɩyä ‑mää 'ylʋzɔɔ' ‑lɩɩ 'fɩɩn‑ ‑ɩ ŋʋ lä nyɩkpa ‑gesi yëku nä, ‑lɔɔ' nyɩkpɔɔ ‑sɩɩ gwë.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan