Bìoball air-loidhne

Zään 8 - GOD - u2

¹ 'Nɩ Zozii yi Olivie‑kükëa 'wlu mʋ.

² ‑Mä zeli ‑ze lä 'gää ‑jaa nä, kä Zozii ‑yi bʋkʋ 'nɩ ɔ yi Laagɔ‑bhutu 'kädʋʋ 'mnö plä. Ɔ ‑kʋ bhä ‑mɔɔ sä, 'nɩ nyɩkpaa yinöɔ bhä, 'nɩ ɔ cɩwa bhä.

³ ‑Lɔɔ' 'tänyɩɛ ‑bhlobhlo 'mnö, ‑Jlämöcɩanyʋa ‑yä Falizɩɛnyʋa, 'ŋnɔɔ' lɔɔ wa ‑klää lä wlu‑ylädä nä, wa ‑yɔsɔ ‑yi 'nɩ wa ŋʋɔ‑ ‑jlëa nëëdë.

⁴ 'Nɩ wa yi Zozii soo, wlä Cɩanyɔ‑, 'ŋnɔnɔ ‑kʋ wlu‑ylädä 'nɩ ‑a 'wlʋnöɔ‑ lä 'kʋ.

⁵ Kä Moyizöö' ‑Jlämaa sonö‑anyɩ nynä ‑mä, 'sää 'ŋwnɩa nä, ‑a 'bhlʋwa cɛkwɩɩ' ‑yä wa 'ku. Nä, ‑mɔɔ sä ‑n ci bhä?

⁶ Wa ci bhlä sɔɔ nä, kä wa pä bhlä Zozii ‑zɔɔ ‑yä ɔ kä wälɩ nëë' pään, wa 'kɔ gbʋ 'nyɛɛ. ‑Mä ‑lɔɔ' 'tänyɩɩ nä, Zozii ‑lä 'wlu ‑dʋdʋkʋ, 'nɩ ɔ ‑kä ɔɔ' wliiyee, 'nɩ ɔ jɩjlä bhä ‑dʋdʋkʋ.

⁷ ‑Mä sä nyɩkpaa 'yläylänöɔ bhɛ lä 'kʋ nä, kɔ bhɛlɩä 'wlu 'kʋ 'nɩ ɔ yiwa soo, ɔ lä anyɩa' nëëdë' nyɩkpɔɔ' lɔɔ‑ ‑läzä lä nyenyi nʋ nä, ɔmɔɔ‑ ‑lä 'pä tɛɛtɛɛ‑cɛkʋbhëa!

⁸ Ɔ cii‑ lä sɔɔ nä, 'nɩ ɔ yi bʋkʋ 'wlu ‑dʋdʋkʋ ‑lä 'nɩ ɔ yi jɩjlälɩ 'kʋ cie.

⁹ Wa nuu‑ bhɛlä sä Zozii cii‑ lä nä, kwa ‑bha ‑lɔɔ bhlo ‑bhlo bhlo, 'nɩ wa yi mʋ. 'Bhää 'kägalʋa 'kʋ ‑aaa ‑yä ŋëë nyëblii 'kʋ, kä waa' ‑lefɩɩn ‑mʋ, 'nɩ wa ‑të ‑lɔɔ 'ŋnɔɔ. Ɔ ‑too ‑lɔɔ Zozii yëku 'nɩ wamä 'sɔ 'cɩɩn ‑kʋ bhɛ ‑lɔɔ.

¹⁰ 'Nɩ Zozii yi 'wlu 'kʋ bhɛlɩä, 'nɩ ɔ yi 'ŋnɔɔ soo, ɔ lä 'ŋnɔɔ‑, ‑wa ‑kunö‑ö bhlä tʋ nä, ‑a sʋwa bhä? Waa' 'kʋʋ nyɩkpɔ ‑fää‑ä wlɩ 'kʋ ‑a?

¹¹ 'Ŋnɔɔ lä 'nn, Cɩanyɔ‑, nyɩkpɔ nö'ö ‑wʋ lʋʋ ‑nʋ. 'Nɩ Zozii yio soo, ɔ lä ‑amʋ ‑mä 'sɩɩ, n 'nö‑ö ‑lä lʋʋ nʋ ‑mä ‑n mʋ! ‑Mä, ‑n gä ‑mʋ nä, ‑naa nʋ ‑läyɩ bʋkʋ nyenyi!]

Nyɩkpa 'sɔɔ ‑dläfʋɛ ‑glö nyaasäsä

¹² 'Tänyɩ ‑kʋ bʋkʋ ‑lɔɔ 'nɩ Zozii ‑soo nyɩkpaa, ɔ lä ‑amʋ plöö‑ lä 'kɔɔnʋ 'mnöö zëlüü. Nyɩkpɔ kä'ä 'kʋ gëë‑ nä, zëlüü ‑ɩ nyɛ lä zëkpëa nä, ɔ yii 'mnö kʋ. 'Nɩ ɔɔ' ‑lä 'kɔɔkɔ 'cucuu' nämnö.

¹³ Falizɩɛnyʋa lä ‑mä ‑n yëkuu' ‑dläfʋɛ ‑n lü lä nä, kä ‑naa ‑dläfʋɛɛ' ‑wʋ lä nyaasäsä plöö‑.

¹⁴ 'Nɩ ɔ yiwa soo, ɔ lä n yi n yëkuu' ‑dläfʋɛ lü ‑o, 'naa ‑dläfʋɛɛ ‑glö nyaasäsä. ‑Ɔnöza bhää? Dä n bha lä nä, n ‑yi ‑lɔɔ dä. 'Nɩ ‑gbäsɩɩ n mʋ lä nä, n ‑yi 'sɩɩ ‑mɔɔ dä. ‑Mä anyɩ nä, aa' ‑wʋ dä n bha lä nä ‑yi, 'nɩ ‑gbäsɩɩ n mʋ lä nä, aa' ‑wʋ 'sɩɩ ‑mɔɔ dä ‑yi.

¹⁵ Anyɩ nä, nyɩkpɔ ɔɔ' kʋkʋsä a wloo 'nɩ a ŋʋɔ gbëgëdü yëku. ‑Amʋ, nn' 'wɛɛ ‑wʋ nyɩkpɔ.

¹⁶ N kä bhä cii‑ nynä ‑mä n 'kä nyɩkpɔ 'wɛɛ nä, ɩɩ' 'titee n 'kɔ bhlä 'ŋʋ nä, ɛ ‑glö 'tite 'titi. ‑Amʋ ‑bhloo plɛɛ ‑wʋ ‑lɔɔ' 'titee, ‑mä 'Bäɔ ‑ɔ ‑lobho'o lä nä, ɔ ‑kʋmʋ 'nɩ ‑a plɛɛ lä.

¹⁷ Anyɩa' ‑jlämaa 'mnö nä, ɩ ‑jɩjlɔ nynä ‑mä Nyɩkpa 'sɔɔ ‑dläfʋɛ ‑glö nyaasäsä.

¹⁸ Nä, ‑amʋ 'titi, n lü n yëkuu' ‑dläfʋɛ, 'nɩ 'Bäɔ ‑ɔ ‑lobho'o lä nä, ɔ lü 'sɩɩ 'naa ‑dläfʋɛ.

¹⁹ 'Nɩ nyɩkpaa yio 'ylä, wlä ‑mä ‑a sä bhä ‑n 'bä? Zozii lä a nö'ö ‑wʋ ‑yi, 'nɩ aa ‑wʋ 'sɩɩ n 'Bä ‑yi. A kä'ä bhlä ‑yi nä, a yi bhä 'sɩɩ n 'Bä yibhë.

²⁰ ‑Mɔɔ Laagɔ‑bhutu 'kädʋʋ 'mnö, ‑gbäsɩɩ wa ŋʋʋ‑ bhlä kwänɩsɩɛɛ' 'bhɔklɔɔ nä, ‑mɔɔ Zozii ‑kʋ 'nɩ ɔ cɩa‑ lä wälɩnɩ 'fɩɩn. ‑Maa, sä ɔɔ' 'tänyɩ ‑lä bhlä tee ‑ŋëë nä, wa 'nöɔ ‑wʋ ‑lɔɔ 'kʋ ‑bhlü.

Zozii lä ɔ ‑glö Laagɔduu' nyɩkpɔ

²¹ 'Nɩ Zozii yi bʋkʋ ci, ɔ lä kä n mʋ ylä, ‑mä a yi'i täändä kʋ 'nɩ a yi anyɩa nyenyii 'mnö 'kuu. 'Nɩ ‑gbäsɩɩ n mʋ lä nä, aa' ‑lä ‑mɔɔ' yilɩ mii.

²² 'Zufʋnyʋa lä ‑mä ɔ ci lä nynä ‑gbäsɩɩ ɔ mʋ lä nä, ‑aa ‑lä ‑mɔɔ' yilɩ mii nä, kɔ 'kä bhä ɔ yëku 'bhlä ‑a?

²³ 'Nɩ Zozii yiwa soo, ɔ lä anyɩ nä, a ‑glö ‑mää ‑dʋdʋkʋʋ' nyɩkpa, ‑mä ‑amʋ, n ‑glö ŋɔkʋʋ' nyɩkpɔ. Anyɩ, a ‑glö 'ylʋzɔɔ' nyɩkpa, ‑mä ‑amʋ, nn' ‑wʋ 'ylʋnʋzɔɔ' nyɩkpɔ plöö‑.

²⁴ 'Ɩzä n ‑sonö'anyɩ lä nynä ‑mä a yi anyɩa' nyenyii 'mnö 'kuu. A 'nɩɩ nyaasäsä laa nynä ‑mä, ‑amʋ, n ‑kʋ nä, a yi anyɩa' nyenyii 'mnö 'kuu.

²⁵ Wlä ‑mä ‑mɔɔ ‑n plöö‑ bhää? Ɔ lä sä n nö'anyɩ bhlä 'kɔɔkɔ soo nä, sɔɔ n ‑kʋ lä.

²⁶ Anyɩa' ‑za nä, n ‑kä bhä wälɩ ‑bhutukpä ‑yä n 'kä ci ‑yä n 'kä 'sɩɩ 'wɛɛ. ‑Mä ‑ɔ ‑lobho'o lä nä, wälɩɩ ɔ ‑sonö'ö lä nä, ɩmɩ n soo lä 'ylʋzɔkʋnyʋä. 'Nɩ ɔ ‑kʋ 'zaazɩ.

²⁷ ‑Mä Zozii ci bhlä nä, waa' ‑wʋ sɔɔ ‑yibhë nynä ‑mä 'Bäɔ 'mɔ ɔ sä bhä.

²⁸ 'Nɩ ɔ yiwa bʋkʋ soo, ɔ lä 'tänyɩɩ a 'kä lä Nyɩkpɔɔ ‑Yowli 'kusuu 'yii bhoo nä, ‑lɔɔ a 'kä lä sɔɔ yibhë nynä ‑mä sä n cii‑ lä nä, sɔɔ n ‑kʋ. ‑Lɔɔ a 'kä lä 'sɩɩ sɔɔ yibhë nynä ‑mä ‑lɩɩ n nʋ lä nä, 'naa 'wlu nn' ‑sɩɩ ‑wʋ 'nɩ n 'kɩ nʋ. ‑Mä sä n cɩä‑ lä 'Bäɔ yëku nä, sɔɔ n ci.

²⁹ Ɔmɔɔ‑ ‑lobho'o lä nä, ɔ ‑kʋ'ʋ yëku. Sä ɔ ‑waa lä nä, sɔɔ n nʋ lä 'kɔɔkɔ. Ɩ ‑kä 'ŋnö 'nɩ ɔɔ' ‑tanö'ö ‑wʋ 'yi 'nɩ ‑amʋ ‑bhlo 'kä nää.

³⁰ ‑Mä Zozii ci bhɛlä sɔɔ nä, nyɩkpaa ‑bhutukpä ‑kä bhɛ ɔɔ' pɔlötɛtɛ.

Laagɔ ‑Yowli kɔ sä nyɩkpa geylüü'

³¹ Ɩ ‑kʋ bhɛ lä sɔɔ nä, kä Zozii ‑soo 'Zufʋnyʋa ‑wa ‑kä bhlä ɔɔ' pɔlötɛtɛ nä, ɔ lä a kä 'kɔɔkɔ 'naa ciciwälɩɩ saa nää nä, a plöö‑ 'zaazɩ 'naa 'kʋgënyʋä.

³² A yi ‑nʋawlɛ yibhë, 'nɩ ‑nʋawlɛ yi'anyɩ geylüü' ‑sä.

³³ Wlä ‑a ‑glö Ablaamʋʋ' 'lɔlʋnyʋä, 'nɩ ‑aa ‑läzä 'sɩɩ nyɩkpɔɔ' geyulɛ nʋ. Nä, sɩ ‑kʋ bhä 'nɩ ‑n sonö‑anyɩ bhä nynä ‑mä ‑a yi geylüü' ‑bhaa?

³⁴ Ɔ lä ‑nʋawlɛɛ 'mnö, n sonö'anyɩ nynä ‑mä, gbenyenyinyɔ ‑glö nyenyii' geyu.

³⁵ 'Nɩ geyuu' kʋ ‑wʋ 'sɩɩ 'kɔɔkɔɔ' ‑za 'lɔlʋkpä 'kʋ ‑mä, gbëë' 'yu ɔmɔɔ‑ kʋ lä 'lɔlʋkpä 'kʋ 'kɔɔkɔɔ' ‑za.

³⁶ Nä, 'Bäɔ ‑Yowli ka'anyɩ geylüü' ‑sä nä, a yä sää 'titiclöö geylüü' ‑bha.

³⁷ 'Nɩ n ‑yi 'sɩɩ sɔɔ nynä ‑mä a ‑glö Ablaamʋʋ' 'lɔlʋnyʋä. ‑Mä aa' 'ylä ‑wʋ nynä a 'kä 'naa ciciwälɩɩ 'kʋ ŋoo nä, 'ɩzä a tään lä nynä ‑mä a kä'ä 'bhlä.

³⁸ Sä n nii‑ lä ‑mɔɔ n 'Bä yëku 'yi nä, sɔɔ n ci lä. 'Ɩzä anyɩ, sä a nuu‑ lä a 'bää nëë' nä, sɔɔ a nʋ lä.

³⁹ Nyɩkpaa lä ‑anyɩ, ‑a 'bää‑ plöö‑ lä Ablaamʋ! Zozii lä a kä bhä 'zaazɩ Ablaamʋʋ' 'yuë plöö‑ nä, Ablaamʋ 'bhisäkʋ a 'kä bhlä nʋ!

⁴⁰ ‑Amʋ, ‑nʋawlɛɛ' ‑lɛɛ n 'nuu‑ lä Laagɔ yëku nä, ɛmɛ n sonö'anyɩ lä, 'nɩ a tänö'ö nynä a kä'ä 'bhlä. ‑Lɔɔ ‑lɩyɩ a nʋ lä nä, Ablaamʋ 'nɩɩ ‑wʋ 'kɔɔn ‑nʋ.

⁴¹ Anyɩ nä, a 'bää lebhee 'mɛ a nʋ lä. 'Nɩ wa yio soo, wlä ‑aa ‑wʋ 'läbhʋyuë plöö‑ ‑mä ‑a ‑kä 'Bä, ɔ ‑bhlü ‑bhlo. Ɔmɔɔ‑ plöö‑ lä Laagɔ.

⁴² Zozii lä sä Laagɔ yëku n bha 'nɩ n ‑yi lä nä, Laagɔ kä bhä 'zaazɩ a 'Bä plöö‑ nä, a yi'i bhä wamä. Laagɔ‑ ‑lobho'o lä ‑mä nn' ‑wʋ n yekuu' ‑bëë' ‑za ‑yi.

⁴³ ‑Ɔnöza bhä 'nɩ aa' 'nu bhä 'naa ciciwälɩɩ? Aa' mii ‑wʋ 'nɩ a kä'ä 'nyukwli poo nä, ɩɩ' ‑za lä.

⁴⁴ Anyɩ, a 'bää plöö‑ lä 'Dëvlo nä, 'dëvlogbɩ‑ a tään nynä a 'kä nʋ. ‑Bhɔɔdää nä, 'Dëvlo ‑glö 'kɔɔkɔ nyɩkpa‑bhlänyɔ. Sä ‑nʋawlɛ 'nʋʋ ‑wʋ lä 'mnö ‑kʋ nä, ʋʋ' ‑läzä ‑nʋawlɛɛ' nämnö. Ʋʋ' kʋkʋsä plöö‑ lä ‑kpläkplä nä, ʋʋ' ci ‑wʋ 'kɔɔn ‑nʋawlɛ ‑mä ‑kpläkplä ‑tɛɛ ‑kʋʋ lä 'mnö. 'Dëvlo ‑glö ‑kpläkplönyɔ, 'nɩ ʋ ‑yi 'nɩ ʋ plöö‑ 'sɩɩ ‑kpläkplaa 'fɩɩn a 'bä.

⁴⁵ Nä sä n ci lä ‑nʋawlɛ nä, ɩɩ ‑zä aa' ‑wʋ lä 'naa pɔlötɛtɛ ‑kä!

⁴⁶ Anyɩa nëëdëë' lɔɔ ‑sä yi'i bhä nyenyi 'kʋ 'nii? 'Nɩ, sɩ ‑kʋ bhä 'nɩ n ka'anyɩ bhä ‑nʋawlɛ soo 'nɩ aa' bhä 'naa pɔlötɛtɛ ‑kää?

⁴⁷ Nyɩkpɔɔ' lɔɔ ‑ɔ plöö‑ lä Laagɔɔ' lɔɔ nä, kɔ poo Laagɔɔ' ciciwälɩ 'nyukwli. ‑Mä sä aa' ‑wʋ lä Laagɔɔ' lʋä plöö‑ nä, ɩɩ' ‑zä aa' poo ‑wʋ lä ʋʋ' ciciwälɩɩ 'nyukwli.

Zozii lä ɔ ‑kʋ 'fɩa 'nɩ Ablaamʋ wlʋʋ‑

⁴⁸ 'Nɩ 'Zufʋnyʋa yio soo, wlä ‑a gä ci nynä ‑mä ‑n ‑glö Samaliiyu 'nɩ ‑zuzunyënyu ‑kʋ‑ʋ 'sɩɩ kätää' nä, ‑anyɩa wälɩ mɛɛ‑ 'zaazɩ.

⁴⁹ Zozii lä 'Dëvloo' ‑zuzu nö'ö ‑wʋ kätää' ‑kʋ, ‑mä n 'Bä 'mɔ n ŋʋ lä 'klʋkpää' 'nɩ anyɩ, aa' ŋʋ'ʋ ‑wʋ lä 'klʋkpää.

⁵⁰ Nn' tään ‑wʋ n yëkuu' 'ŋnu fäälɩ ‑mä, ‑ɔ tään lä 'naa 'ŋnu fäälɩ, 'nɩ ‑ɔ plä lä 'naa 'wluu 'titee nä, ɔ ‑kʋ.

⁵¹ ‑Nʋawlɛɛ 'mnö, n sonö'anyɩ nynä ‑mä, nyɩkpɔ kä 'naa ciciwälɩɩ pleyii bhɛnö nä, ɔɔ' ‑lä 'kɔɔn 'ku.

⁵² Ɔ cii‑ lä sɔɔ nä, 'Zufʋnyʋa lä ‑pɛpɛɛ' nä, ‑a ‑yi yɩ 'titi sɔɔ nynä ‑mä ‑zuzunyënyu ‑kʋ‑ʋ lä kätää'! ‑A tötɔ Ablaamʋ yä ‑kä 'ku, 'nɩ Laagɔɔ' 'plɔfɛtɩnyʋa ‑mä 'sɩɩ wa yä ‑kä 'ku. 'Nɩ ‑mɔɔ, ‑n ci lä nynä ‑mä nyɩkpɔ kä ‑naa ciciwälɩɩ pleyii bhɛnö nä, ɔɔ' ‑lä 'kɔɔn 'ku.

⁵³ ‑A tötɔ Ablaamʋ‑ yä lä 'ku nä, ‑mɔɔ plöö‑ nyɩkpɔ 'nɩ ‑ɔ ‑zio ‑a? 'Nɩ 'plɔfɛtɩnyʋa ‑mä 'sɩɩ wa kuu‑! Nä ‑mɔɔ, säsä ‑n bhobhoo bhä ‑n yëkuu?

⁵⁴ Zozii lä n kä n yëku 'ŋnu fään nä, 'naa 'ŋnufäälɩɩ' ‑wʋ gba ‑kä. ‑Mä n 'Bä 'mɔɔ‑ fänö'ö lä 'ŋnu. Ɔmɔ a zɛɛ lä 'ŋnö 'nɩ a ci lä nynä ‑mä anyɩa' Laagɔ‑!

⁵⁵ ‑Bhlɛ sɔɔ ɩ ‑kʋ 'nɩ a 'nöɔ ‑wʋ ‑yi. ‑Mä ‑amʋ, n ‑yio. N kä bhä cii‑ nynä n 'nöɔ ‑wʋ ‑yi nä, anyɩ 'bhisäkʋ n 'kä bhlä ‑kpläkplönyɔ 'plö. ‑Mä n ‑yio. 'Nɩ wälɩɩ 'fɩɩn ɔ ‑sonö'ö lä nä, n bhɛnönɩ‑ pleyii.

⁵⁶ A tötɔ Ablaamʋ nä, ɔ pä bhlä 'naa yi‑tänyɩɛ plɛkʋ nä, kä ‑pʋpɛ 'kädɛ 'bhlänöɔ bhä pleyii'. Ɔ nii‑ ‑lɔɔ' ylʋʋ 'yi 'nɩ ɔ ‑nʋ ʋʋ' ‑pʋpɛ.

⁵⁷ 'Zufʋnyʋa lä ‑n ‑nä sa bhää? ‑Nn ‑lätee 'ylʋbɔɔ' gwlɩ 'sɔ 'nɩ 'kʋgbä ‑kä 'nɩ ‑n nii‑ Ablaamʋ 'yi ‑a?

⁵⁸ Zozii lä ‑nʋawlɛɛ', n sonö'anyɩ nynä ‑amʋ, kä n ‑kʋ 'kɔɔkɔ, 'fɩa 'nɩ Ablaamʋ wlʋʋ‑.

⁵⁹ Ɔ cii‑ lä sɔɔ nä, kä wa ‑tëpë cɛkʋbhü ‑yä wa 'kɔnyɩ 'mʋ 'bhlä. ‑Mä ɔ ‑zizio, 'nɩ ɔ yi Laagɔ‑bhutuu 'mnö ‑bha.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan