Bìoball air-loidhne

Zään 7 - GOD - u2

Zozii cii‑ nynä ɔɔ' mʋ ‑wʋ 'Zufʋnyʋa ‑glɩsɩɩsɩɛ 'kʋ

¹ ‑Nɩnɩ 'fɩɩn plöö‑ ylä nä, Zozii bhlü bhɛ Galilee‑bhlɩɛ. 'Zufʋnyʋaa' 'cifinyʋa tään bhlä nynä wa 'kɔ 'bhlä nä, ɔɔ' 'ylä bhɔɔ nynä ɔ 'kä Zudee‑bhlɩɛ bhlü.

² ‑Lɔɔ' 'tänyɩɛɛ' nä, 'Zufʋnyʋaa' ‑papöslä‑glɩsɩɩsɩɛ yä bhɛ 'mɛmɛ.

³ 'Nɩ Zozii ɔ bhelie yio soo, wlä ‑n ‑bha ‑mää ‑yä mʋ Zudee' ɩyä nyɩkpaa ‑wa gë‑ë lä 'kʋ nä, ‑wa 'kä ‑naa nʋnʋ‑lebhee 'yi 'ni.

⁴ Nyɩkpɔ kä cii‑ nynä wa 'kɔ nʋnʋ‑lebhe 'yikʋ 'ŋʋʋ nä, ɔɔ' nʋnɩɛ ‑wʋ ziziodä. Nä ‑n gbä ‑yä nyɩkpa 'kä‑ä 'yi 'ni.

⁵ Sɩ ‑kʋ bhlä naa, ɔ bheliee' bhɔɔ ɔɔ' pɔlötɛtɛ ‑kä nä, 'ɩzä wa ci bhlä sɔɔ.

⁶ 'Nɩ Zozii yiwa soo, ɔ lä 'naa 'tänyɩɛɛ' ‑lätee ‑ŋëë, ‑mä anyɩ nä, kä 'tänyɩɩ 'fɩɩn nää‑ anyɩa ‑za.

⁷ Nyɩkpaa' ‑lä mii 'nɩ wa 'kanyɩ zɔbhlɛmä, ‑mä ‑amʋ, kä wa ‑kä 'naa ‑zɔbhlɛzʋ. Kä n sonʋwa nynä waa' nʋnʋgbɩɩ kɩ ‑nyu nä, kɩ ‑gbä 'nɩ wa ‑zɔɔ'ɔ.

⁸ Nä anyɩ, a mʋ ‑glɩsɩɩsɩɛ 'kʋ ‑mä, ‑amʋ 'naa 'tänyɩɛɛ' ‑lätee ‑ŋëë, nä nn' ‑lätee ‑mʋ.

⁹ Ɔ ‑sonʋwa lä sɔɔ nä, kɔ ‑too Galilee'.

'Zufʋnyʋaa' ‑Papöslä‑glɩsɩɩsɩɛ 'kʋ Zozii cɩa‑ nyɩkpa

¹⁰ Maa, ɔ bhelie ‑mʋ ylä ‑glɩsɩɩsɩɛ 'kʋ nä, ɔmɔ ‑mä 'sɩɩ kɔ ‑bha 'kʋ 'nɩ ɔ yi ‑mɔɔ mʋ. Ɔɔ' ‑wʋ ‑jlë 'yi ‑ghlä ‑mä ziziolɩɩ' ɔ ‑mʋʋ ‑mɔɔ yiosä.

¹¹ ‑Glɩsɩɩsɩɛ 'kʋ nä, 'Zufʋnyʋaa' 'cifinyʋa tänöɔ bhä, 'nɩ wa ci bhä, wlä 'nɩ ‑a sɔɔ bhä?

¹² 'Nɩ ‑jlëa 'mnö nyɩkpa bhlää bhä kpänyɩ ɔɔ' wälɩɩ 'kʋ. ‑Nänʋä ci bhä wlä, ɔ ‑glö 'nägä‑nyɩkpɔ. 'Nɩ ‑nänʋä ci bhä nynä yio, ‑mä kɔ gbä 'nɩ nyɩkpaa mnɔ lä.

¹³ ‑Mä, sä wa ‑guu bhlä 'Zufʋnyʋaa' 'cifinyʋa nä, waa' wla bhɔɔ sää 'titiclö ɔɔ' wälɩ në.

¹⁴ Wa yä bhɛ ‑glɩsɩɩsɩɛɛ' nëëdë ‑nëëdë ŋëë. 'Nɩ Zozii yi ‑mɔɔ Laagɔ‑bhutu 'kädʋʋ 'mnö plä, 'nɩ ɔ yi cɩalɩ 'kʋ cie.

¹⁵ ‑Mä 'Zufʋnyʋa kä plɛkʋ 'niniwa‑, 'nɩ wa ci bhä, wlä sɩ ‑kʋ bhä 'nɩ ɔ ‑yi bhä Laagɔ‑bɔɔgʋʋ 'mnö wälɩ ‑bhutukpää? ‑Bhlɛ ɔɔ' ‑kä ‑Jlämaa' ‑sukluu' ‑mʋ!

¹⁶ 'Nɩ Zozii yiwa soo, ɔ lä 'naa cɩalɩɩ n cɩa lä nä, 'naa 'wluu ɩɩ' ‑bha ‑wʋ, ‑mä ‑ɔ ‑lobho'o lä nä, ɔmɔɔ‑ panö'ö lä.

¹⁷ Nyɩkpɔ kä cii‑ nynä ɔ yi Laagɔɔ' pɔlösaa nää nä, wälɩɩ n cɩa lä nä, ɔ yi ɩɩ' nyaasäsä yibhë. Laagɔ‑ gä'ä ‑lobho nä, ɔ yi sɔɔ yibhë, 'ɩzä ‑amʋ 'titi, 'naa 'wlu n kä ‑sä 'nɩ n kä ci nä, ɔ yi 'sɩɩ sɔɔ yibhë.

¹⁸ Nyɩkpɔ kä ɔ yëku 'wluu ‑sä 'nɩ ɔ kä ci nä, ɔ yëkuu' 'ŋnu fäälɩ ɔ tään. 'Ɩzä nyɩkpɔ kä ‑ɔ ‑lobhuo lä nä ɔɔ' 'ŋnumʋlɩ tään nä, ɔ ‑glö ‑nʋawlɛɛ‑cinyɔ. Ɔɔ' ‑wʋ ‑kpläkplä ‑kä.

¹⁹ Moyizö ‑tü'anyɩ ‑kä ‑Jlämaa 'nɩ anyɩa' 'kʋʋ nyɩkpɔɔ' 'ŋʋa ‑wʋ 'klʋkpää'. Nä, ‑ɔnözä 'nɩ a tänö'ö bhä nynä a kä'ä 'bhlä?

²⁰ ‑Jlëa 'mnö nyɩkpaa lä ‑mä, lɔɔ ‑sä tänö‑ö bhä nynä ‑ɔ 'gä‑ä 'bhlä? ‑Zuzunyënyu ‑kʋ‑ʋ lä kätää'!

²¹ Zozii lä wälɩklülɩɔ ‑bhlo n ‑nʋ lä nä, ɔmɔɔ‑ 'ninie'anyɩ lä plɛkʋ!

²² Kä Moyizö cii‑ nynä ‑ɔ gä 'yuŋwadi ‑gään nä, ɔ ‑döɔ 'kʋ. 'Nɩ ɩ ‑kʋ 'flɛ sɔɔ ‑mä, Moyizö‑ 'nɩɩ ‑wʋ wlaa‑, ‑mä a tɩtɩä ‑tɩtɩä wamää‑ wlɩɩ‑. 'Nɩ anyɩ, Sabaa‑gwlɛylʋ 'kʋ a dö ŋwadie 'kʋ.

²³ A kä sɔɔ nʋ nä, aa ‑sä ‑wʋ Moyizöö' ‑Jläma 'klʋkpää'. Nä, sɩ ‑kʋ bhä 'nɩ Sabaa‑gwlɛylʋ 'kʋ, n ‑yamä bhä nyɩkpɔ wɩa, 'nɩ a lä'ä bhä zɔgblöö?

²⁴ A plä anyɩa 'tite ‑nʋawlɛɛsä, ‑mä a 'nä wloo ‑lä 'flɛ sää nyɩkpɔ 'nɩ a 'kɔ gbʋ 'nyɛɛ!

‑Ɔ ‑lobho lä Zozii nä

²⁵ Zolizalɛmʋduu' nyɩkpaa' ‑nänʋä ci bhä, wlä ‑mä, nyɩkpɔnɔ 'mɔ waa' tään ‑wʋ nynä wa 'kä 'bhlä ‑a?

²⁶ Ɔmɔɔ‑ ‑kʋ lä ‑lää 'nɩ, nyɩkpaa 'fɩɩn 'klʋ ɔ sää lä 'mʋ, 'nɩ waa' slɔ ‑wʋ në! Kä 'cifinyʋa ‑yibhë bhä ‑pɛɛ sɔɔ nynä ‑mä ɔmɔɔ‑ plöö‑ Klisöɔ ‑a?

²⁷ ‑Nɔnɔ, ‑a ‑yi dä ɔ bha lä nä, ‑ma Klisöɔ kä ‑yi nä, nyɩkpɔɔ' ‑lä ɔɔ' bhäädä yibhë.

²⁸ Ɩ ‑kä 'ŋnö nä, Zozii ‑kʋ cɩadä 'nɩ ɔ bhɛlɩä‑ nuwälɩ 'kʋ, 'nɩ ɔ cii‑, ɔ lä ‑ɛɛ! A ‑yi'i, 'nɩ a ‑yi 'sɩɩ dä n bha lä nä, ‑mä ‑amʋ 'titii‑ ‑wʋ n yëku ‑lobho. ‑Ɔ ‑lobho'o lä nä, ɔ ‑kä dë 'tɛɛ sä ‑mä, a 'nöɔ ‑wʋ ‑yi.

²⁹ ‑Amʋ, ɔmɔ yëku n bha lä nä, n ‑yio, 'nɩ ɔmɔɔ‑ ‑lobho'o lä 'sɩɩ.

³⁰ Zozii cii‑ lä sɔɔ nä, wa tää bhɛ nynä wa 'kɔ 'kʋ bhlü, ‑mä ɔɔ' 'tänyɩɛɛ' ‑lä bhlä tee ‑ŋëë nä, waa' ‑wʋ mii‑.

³¹ ‑Mä ‑jlëa 'mnö nyɩkpa ‑bhutukpä ‑kä bhä ɔɔ' pɔlötɛtɛ, 'nɩ wa ci bhä nynä Klisöɔ 'kä ‑yi nä, kɔ 'kä bhä kpänyɩ 'yiziziogbɩ nʋ ‑yä ɔ 'kä ‑nɔnɔ zi ‑a?

³² Falizɩɛnyʋa ‑wa ‑kʋ bhlä ‑lɔɔ nä, wälɩɩ ‑jlëa 'ŋuŋuë bhlä nä, wa nui‑. 'Nɩ wa ‑yä 'Cibhisänyʋaa' 'cifinyʋa 'sɔ yi waa' 'sʋjaa lobho nynä wa yi ‑yä wa klä Zozii.

Zozii lä kɔ 'kä ylä mʋ

³³ 'Nɩ Zozii yi ci, ɔ lä n ‑yä anyɩ 'sɔ yi ‑lätee 'pɛpɛlɩä ‑lää kʋ ‑yä 'tänyɩɛ kä ‑ŋëë nä, ‑ɔ ‑lobho'o lä nä, n 'kɔ yëku mʋ.

³⁴ A yi'i tään 'nɩ a nö'ö ‑läyɩɔ 'ni. 'Nɩ ‑gbäsɩɩ n 'kä lä mʋ nä, aa ‑lä 'sɩɩ mii 'nɩ a 'kä ‑mɔɔ yi.

³⁵ Ɔ cii‑ lä sɔɔ nä, 'Zufʋnyʋa 'ylä ylä bhɛ, wlä 'nɩ dä ‑sä ɔ 'kä bhä mʋ ‑yä ‑a 'nöɔ ‑lä bhä 'nii? 'Glɛköbhlɩ 'kʋʋ 'Zufʋnyʋa nëëdë‑ ɔ 'kä bhä mʋ ‑a? ‑Mɔɔ ɔ 'kä bhä mʋ ‑yä ɔ 'kä bhä 'sɩɩ 'Glɛkönyʋa cɩa ‑a?

³⁶ Ɔ lä ‑a yio tään 'nɩ ‑a nöɔ ‑lä 'ni. 'Nɩ ‑gbäsɩɩ ɔ mʋ lä nä, ‑aa ‑lä 'sɩɩ mii 'nɩ ‑a 'gä ‑mɔɔ mʋ. Nä, wälɩ‑ ‑saa 'titi ɔ ylä bhä nynä ɔ 'kä cii?

Lɔɔ 'mnätʋ kä 'bhlä nä, ɔ yi Zozii yëku

³⁷ ‑Glɩsɩɩsɩɛɛ' gbäbhɩäylʋʋ, ‑ʋ plöö bhlä ylʋʋ 'kädʋʋ nä, ʋmʋ 'kʋ, Zozii ‑bha 'kʋ 'nɩ ɔ bhɛlɩä‑ nuwälɩ 'kʋ 'nɩ ɔ cii‑, ɔ lä nyɩkpɔɔ' lɔɔ 'mnätʋ kä 'bhlä nä, ɔ yi'i yëku ‑yä ɔ 'kä 'mnä!

³⁸ ‑Ɔ gä'ä plɛkʋ 'tɛɛ nä, sɩɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, 'nyiee' lɛɛ ‑ɛ zelio lä nä, ɛ yio 'mnö 'plö.

³⁹ Zozii ci bhlä sɔɔ nä, nyɩkpaa' ‑lʋa ‑wa ‑kä lä ɔɔ' pɔlötɛtɛ nä, Kplɔɔkplɔɔ‑wugɔɔ wa kä bhlä ‑zee 'ni nä, ʋmʋ ɔ sä bhlä. Ɔɔ' ‑lä bhlä tee ɔɔ' 'klʋagbaa 'mnö ‑plä nä, Kplɔɔkplɔɔ‑wugɔɔ' ‑lä bhä tee ‑yi.

Nyɩkpaa doo‑ 'mʋ 'nɩ wa bhlää Zozii' ‑za 'kʋ

⁴⁰ ‑Mä nyɩkpa ‑wa ‑kʋ bhlä ‑jlëa 'mnö nä, wa nuu‑ lä ɔɔ' ciciwälɩɩ nä, wa ci bhä, wlä nyɩkpɔnɔ 'mɔɔ‑ plöö‑ lä 'zaazɩ 'Plɔfɛtɩɔ!

⁴¹ ‑Nänʋä lä ɔmɔɔ‑ plöö‑ lä Klisöɔ. ‑Mä 'yigädalʋä ci bhä, wlä nä, Klisöɔ Galileeyu ɔ 'kä bhä 'plö ‑a?

⁴² ‑Mɔɔ Laagɔ‑bɔɔgʋʋ 'mnö, kɩ ‑wʋ ‑jɩjlɔ nynä ‑mä Klisöɔ, ‑a tötɔ Davidöö' 'lɔlʋʋ 'mnö ɔ 'kä ghlää ‑a? ‑Mɔɔ Bɛtlɛmʋduu', ‑mɔɔ Davidö ɔ 'bhlɩɩ, ‑mɔɔ Klisöɔ 'kä lä ghlää. Yio ‑a?

⁴³ ‑Mä ‑nɩnɩ ‑gbä nä, kä ‑jlëa 'mnö nyɩkpaa doo‑ 'mʋ Zozii' ‑za.

⁴⁴ Bhloobhlolʋä ‑kʋ ‑mɔɔ 'nɩ wa ylä bhä nynä wa 'kɔ 'kʋ bhlü, ‑mä waa' ‑wʋ mii‑.

'Zufʋnyʋaa' 'cifinyʋa 'tɛ 'nyukwli kpänyɩ

⁴⁵ 'Nɩ 'sʋjaa wa ‑lobho bhlä nä, wa yi 'ylɩbhɔ. Wa ‑yi lä 'nɩ 'Cibhisänyʋaa' 'cifinyʋa ‑yä Falizɩɛnyʋa 'sɔ yiwa 'ylä nynä ‑mä, ‑ɔnözä 'nɩ waa' bhä Zozii ‑lää?

⁴⁶ 'Sʋjaa lä ‑aa ‑läzä sää nyɩkpɔ 'ni! Ciciwälɩ‑ ɔ ‑yi ‑lä nä, ɔmɔ 'bhisäkʋʋ' nyɩkpɔɔ' ‑wʋ ‑kʋ!

⁴⁷ Falizɩɛnyʋa lä anyɩ ‑mä 'sɩɩ ɔ ya'anyɩ yɩ 'nyigë ‑a?

⁴⁸ Nä, a yä bhä tɛɛ 'cifinyʋa ‑yä Falizɩɛnyʋa 'sɔ 'yi 'ni, 'nɩ waa' nëëdëë' nyɩkpɔ yä bhä ɔɔ' wälɩɩ nyaasäsä laa ‑a?

⁴⁹ Nyɩkpayɩ 'fɩɩn ‑wa ‑kä lä ɔɔ' pɔlötɛtɛ nä, waa' ‑wʋ Laagɔɔ' ‑Jlämaa ‑yi. Wa ‑glö 'kplünyʋä!

⁵⁰ ‑Mä 'tänyɩɩ' wa ci bhlä sɔɔ nä, nyɩkpɔɔ ‑ɔ yi bhlä 'tänyɩ ‑bhloo' Zozii yëku 'nɩ wa laa bhlä Nikodɛmʋ nä, ɔ ‑kʋmʋ bhä ‑lɔɔ wamä nëëdë.

⁵¹ 'Nɩ ɔ yiwa 'ylä, ɔ lä nä, ‑a 'bhunyʋänyɩ‑, ‑anyɩa ‑Jlämaa 'mnö, gbʋ kä cii‑ ʋ 'kä nyɩkpɔ klä nä, waa' 'nu bhä 'fɩa ɔɔ' nëë' ‑a? Wälɩklëa' ‑laa ɔ ‑nʋ lä nä, waa' 'nia bhä 'yi 'nɩ gbʋ klɔ bhä ‑a?

⁵² 'Nɩ wa yio soo, wlä Nikodɛmʋ‑, ‑mɔɔ ‑mä 'sɩɩ Galileeyu ‑n plöö‑ yɩ ‑a? ‑N tään 'nägäsä ‑mɔɔ ‑Jlämaa' 'bɔɔgʋʋ 'mnö, ‑mä ‑n yi 'ni nynä 'plɔfɛtɩɩ' ‑lä 'kɔɔn Galilee' 'wlʋ! [

Wa 'kä wluyläŋnɔ cɛkwɩɩ' 'bhlä

⁵³ ‑Nɩnɩ 'fɩɩn ‑bhɩä ylä 'nɩ nyɩkpɔ nyɩkpɔ yi ɔɔ' ‑bhäändä mʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan