Bìoball air-loidhne

Zään 21 - GOD - u2

Zozii ‑ghlä bʋkʋ ɔɔ' 'kʋgënyʋa 'yii
( Matie 28.16 ; Lukö 5.1‑11 )

¹ ‑Nɩnɩ 'fɩɩn plöö‑ ylä nä, Tibeliadöduu' 'nyibhlëa yëku Zozii ‑ghlä bʋkʋ ‑lɔɔ 'kʋgënyʋa 'yii. A ni sɩɩ plöö‑ lä 'kʋ nä.

² 'Tänyɩ ‑bhloo', Simɔɔ Pɩɛlö ɩyä Tomaa wa laa bhlä Poyuo nä, ɩyä Natanayɛɛ, Galilee' 'duu wa laa lä Kanaa nä, ‑mɔɔ' nyɩkpɔ, 'ŋʋʋ‑ yɩ Zebedee ‑yowlie ‑yä Zozii' 'kʋgënyʋää' 'yigädalʋä, waa' ‑lefɩɩn 'wlää‑ bhä däbhlo 'wlu.

³ 'Nɩ Simɔɔ Pɩɛlö yiwa soo, ɔ lä kä n mʋ lä fɩä ‑kää. Wamä ‑mä 'sɩɩ, wlä ‑a ‑yä ‑mɔɔ 'sɔ yi mʋ! 'Nɩ wa yi 'gokpë plä, 'nɩ wa yi mʋ. ‑Mä ‑lɔɔ' 'saboyɩ, waa' ‑wʋ zliiye bhlää‑.

⁴ Zeli cie bhɛ zelɩ 'kʋ 'nɩ Zozii ‑kʋ bhä ‑mɔɔ' 'nyiee yëku. ‑Mä ɔɔ' 'kʋgënyʋaa' bhɔɔ sɔɔ ‑yi nynä ɔmɔ bhä.

⁵ 'Nɩ ɔ yiwa 'ylä, ɔ lä 'naa 'yuënyɩ‑, a nii‑ lülüsä ‑a? Wlä ‑ɔ! ‑Aa ‑wʋ lʋʋ nii‑.

⁶ Ɔ lä ‑aa! A 'pä ‑dädaa 'gokpëa' lüüklä 'kʋ ‑mä a yi lʋʋ 'ni! ‑Mä wa paa‑ lä ‑dädaa nä, wa ‑klä zlü ‑bhutukpä. Ɩ ‑kä 'ŋnö nä, waa' mii bhɛ ‑dädaa' 'nyiee' ‑sälɩ.

⁷ 'Nɩ Zozii' 'kʋgënyɔɔ ɔ ‑waa bhlä kpänyɩ nä, ɔ yi Pɩɛlö soo, ɔ lä Kwlienyɔɔ lä! ‑Mä Simɔɔ Pɩɛlö nuu‑ lä nynä Kwlienyɔɔ lä nä, kɔ ‑plä 'kotuu', sä kɔ döö‑ bhlä wlu nä. Ɔ ‑bhlüü 'nyiee 'nɩ 'nyisɩpälɩɩ', ɔ yi ‑kpʋkpʋ 'kʋ yi.

⁸ ‑Mɔɔ' ‑lʋa nä, wamä, 'gokpëë' wa ‑yii. Wa jlü bhä ‑dädaa' ‑laa ‑a yie‑ bhlä zlüü 'kʋ nä. Waa bhɔɔ 'nyi‑kpʋkpʋʋ dä ‑tlʋ. 'Bhää dä wa ‑kʋ bhlä nä ɩyä ‑n yi ‑kpʋkpʋ 'kʋ nä, ɩ yi bhä 'mɛtlɩɩ' gwlɩ ‑ngbü nʋ.

⁹ Wa ‑bha lä 'gää 'gokpëa 'mnö, 'nɩ wa kwlii‑ lä nä, wa lä wa wloo nä, ‑kosu. Zlü ‑kʋʋ bhä 'klʋ. 'Nɩ 'flɔɔ ‑kʋ bhä 'sɩɩ ‑lɔɔ.

¹⁰ Zozii lä Zlüü a bhlää‑ lä nä, a ‑lä'ä lɩɩ zio!

¹¹ 'Nɩ Simɔɔ Pɩɛlö yi 'gokpëa' ‑gblää, 'nɩ ɔ yi ‑dädaa 'klä 'wlu jlüü. A yie‑ bhä zlü 'kädö 'kʋ. Ɩ ‑bhlü bhä zliiyii' gwlɩ ‑ngbɔɔsɔ 'nɩ 'kʋgbä taa (153). ‑Mä zlüü ‑zu bhä 'flɛ sɔɔ oo, ‑mä ‑dädaa' ‑wʋ 'ŋätlönöɔ.

¹² 'Nɩ Zozii yiwa soo, ɔ lä a yi ‑yä a 'kä lü! ‑Mä waa' nëëdëë' nyɩkpɔɔ' ‑wʋ mii‑ 'nɩ ɔ 'kɔ ylää‑ nynä ‑mä, ‑naa 'ŋnö bhää? Wa ‑yi bhä sɔɔ nynä Kwlienyɔɔ lä.

¹³ 'Nɩ ɔ yi 'flɔɔbhëa 'kʋ 'bhlü 'nɩ ɔ yiwa dëë, a ‑yä ŋuŋu‑zlüü 'sɔ.

¹⁴ Zozii ‑glɔɔ lä 'kuëë nä, ɔɔ' 'ci taanadä ɔ ghlä bhɛ lä ɔɔ' 'kʋgënyʋa 'yii.

Zozii ‑yä Pɩɛlö 'sɔ ci

¹⁵ Wa ‑bhɩä ylä lülɩ nä, kɔ ‑soo Simɔɔ Pɩɛlö, ɔ lä Simɔɔ! Zonasö ‑yowli‑, ‑n ‑wää'ä 'nɩ ‑n ‑zi ‑nänʋää' ‑wawʋʋ 'kʋ ‑a? Pɩɛlö lä ‑ɛɛɛ! Kwlienyɔ‑, ‑n ‑yi sɔɔ nynä ‑mä, kä n ‑wää‑ä. Ɔ cii‑ lä sɔɔ nä, Zozii lä ‑n wloo 'naa 'bhabhlöö 'kʋ!

¹⁶ 'Nɩ Zozii yio bʋkʋ 'ylä, ɔ lä Simɔɔ! Zonasö ‑yowli‑, ‑n ‑wää'ä bhä ‑a? Pɩɛlö lä ‑ɛɛɛ! Kwlienyɔ‑, ‑n ‑yi sɔɔ nynä kä n ‑wää‑ä. Zozii lä ‑n 'plö 'naa 'bhabhlöö' kpanyɔ!

¹⁷ 'Nɩ Zozii yi Pɩɛlö taanadä 'ylää, ɔ lä Simɔɔ! Zonasö ‑yowli‑, ‑n ‑wää'ä laa? ‑Mä Zozii cii‑ lä taanadä nynä ‑mä ‑n ‑wää'ä ‑a? nä, kɩ ‑kamää Pɩɛlö yëkuu'. Ɔ lä Kwlienyɔ‑, ‑mɔɔ, kä ‑n ‑yi wälɩɩ 'fɩɩn. 'Nɩ ‑n yi sɔɔ nynä n ‑wää‑ä! Ɔ cii‑ lä sɔɔ nä, Zozii lä ‑n wloo 'naa 'bhabhlöö 'kʋ!

¹⁸ ‑Nʋawlɛɛ 'mnö, n sonö‑ö nynä dä ‑n plöö‑ bhlä nyëblu nä, ‑mɔɔ 'titii‑ gʋä bhä ‑naa wluu, 'nɩ ‑n mʋ bhä ‑gbäsɩɩ ‑n ‑waa lä nä, ‑mä ‑n gä yɩ 'kɔgwlɛ ‑plä nä, kä ‑n 'gä wlɩ gäta ‑yä 'yigädalɔɔ 'kä yi ɔ 'kä ‑naa wluu gʋä. Ɩyä ‑gbäsɩɩ ‑nn ‑wʋ lä ‑waa nä, ɔ 'kä‑ä ‑mɔɔ fään.

¹⁹ Zozii ci bhlä sɔɔ nä, Pɩɛlöö' 'kwiee wälɩɩ, sɩ 'kä bhlä 'kʋ 'plö ‑yä ɛ 'kä bhlä Laagɔ 'ŋnu fään nä, sɔɔ ɔ pana bhlä. 'Nɩ Zozii yio bʋkʋ soo, ɔ lä Pɩɛlö‑, ‑n gëë'ë 'kʋ!

Zozii ‑yä 'kʋgënyɔɔ ɔ ‑waa bhlä kpänyɩ nä

²⁰ ‑Mä Pɩɛlö 'ylɩbha‑ 'wlu, 'nɩ 'kʋgënyɔɔ Zozii ‑waa bhlä kpänyɩ nä, ɔ nio‑ 'yi. 'Kʋgënyɔyɩ, dä wa lü bhlä Pakö‑glɩsɩɩsɩɛ' lülülɩɩ nä, ɔmɔɔ‑ ‑fä bhlä Zozii 'wlu yëku, 'nɩ ‑ɔ ylɔɔ‑ bhlä nynä ‑mä Kwlienyɔ‑, lɔɔ ‑sä 'gä‑ä bhä pëë?

²¹ Pɩɛlö nio‑ lä 'yi nä, kɔ ylää‑ Zozii, ɔ lä 'nɩ ‑nɔnɔ Kwlienyɔ‑, wälɩ‑ ‑sä 'gɔ bhä ŋëë?

²² Zozii lä 'nɩ n kä ‑waa nynä ‑mä ɔ kʋ zëkpë 'kʋ ‑kaaa ‑yä n mʋ ‑yä n yi bʋkʋ nä, ‑naa wälɩ ‑a? N nä ‑mɔɔ, ‑n gëë'ë 'kʋ!

²³ Wälɩɩ Zozii ‑soo lä Pɩɛlö nä, ɩ ‑mʋ 'nɩ ɩ ‑bhlü lä nyɩkpa 'nyukwli nä, kä bhelia nui‑ nynä Zozii lä ‑lɔɔ' 'kʋgënyɔɔ' ‑lä 'ku. ‑Bhlɛ Zozii' bhɔɔ cii‑ nynä ‑mä ɔɔ' ‑lä 'ku. Kɔ cii‑ bhlä, ɔ lä n kä ‑waa nynä ‑mä ɔ kʋ zëkpë 'kʋ ‑kaaa ‑yä n mʋ ‑yä n yi bʋkʋ nä, ‑naa wälɩ ‑a?

Bhlüüdä

²⁴ Zozii' ‑lɔɔ' 'kʋgënyɔnɔ, ɔmɔ 'titi 'nii‑ wälɩnɩɩ' dä. Nä, ɔmɔɔ‑ ‑jɩjlä lä ɩɩ' ‑dläfʋɛɛ 'bɔɔgʋnʋ 'mnö. 'Nɩ ‑anyɩ, ‑a ‑yi sɔɔ nynä ‑mä, sä ɔ cii‑ lä nä, sɔɔ plöö‑ nyaasäsä.

²⁵ Zozii ‑nʋ bʋkʋ wälɩɩ' ‑lɛɛ bhutukpä. ‑Mä nyɩkpa kä bhä cii‑ nynä ‑mä, wa 'kɩ ‑lefɩɩn 'bɔɔgʋʋ' 'ŋʋ nä, ‑amʋ, n bhobho nynä 'bɔɔgwɩɩ ‑ɩ 'gä bhlä jɩjlɔ nä, ɩɩ' 'ŋʋdää' ‑lä bhɔɔ ‑mää 'ylʋzɔɔ nio.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan