Bìoball air-loidhne

Zään 14 - GOD - u2

Zozii lä ɔ 'kä ɔɔ' 'kʋgënyʋaa' kʋdä göglä

¹ 'Nɩ Zozii yi ɔɔ' 'kʋgënyʋa soo, ɔ lä plɛɛ 'na belio'anyɩ ‑lä 'mʋ! A kää Laagɔɔ' pɔlötɛtɛ, ɩyä a kää 'sɩɩ 'naa pɔlötɛtɛ!

² N 'Bää 'gbëa 'mnö nä, kʋdö‑ ‑bhutukpä ‑kʋ ‑mɔɔ. Ɩ 'nö bhä sɔɔ ‑kʋ nä, n nö'anyɩ lä bhɔɔ soo. Nä, n 'kä mʋ ‑yä n 'kä anyɩa' kʋdä göglä.

³ N kä yɩ ‑mʋ, 'nɩ n kä yɩ anyɩa kʋdä ‑göglä nä, n yi'anyɩ ‑gʋʋ yi ‑yä, dä n ‑kʋ lä nä, a 'kä 'sɩɩ ‑lɔɔ kʋmʋ.

⁴ 'Nɩ ‑gbäsɩɩ n mʋ lä nä, a ‑yi 'sɩɩ ‑mɔɔ' ‑blɔɔ.

Zozii 'mɔɔ‑ plöö‑ lä 'Bäɔ yëkuu' ‑blɔɔ

⁵ Ɔ cii‑ lä sɔɔ nä, ɔɔ' 'kʋgënyɔ Tomaa lä Kwlienyɔ‑, ‑gbäsɩɩ ‑n mʋ lä nä, ‑aa ‑kä ‑mɔɔ dä ‑yi, nä sä ‑a yi bhä ‑mɔɔ' ‑blɔɔ yibhëë?

⁶ Zozii lä ‑amʋʋ‑ plöö‑ lä ‑blɔɔ. ‑Amʋʋ‑ plöö‑ lä ‑nʋawlɛɛ. 'Nɩ ‑amʋʋ‑ plöö‑ lä 'pʋpʋɛɛ. Nyɩkpɔ nö'ö 'kʋ ‑ghlää nä, ɔɔ' ‑lä mii‑ 'nɩ ɔ 'kä 'Bäɔ yëku yi.

⁷ A kä'ä ‑yi nä, a ‑yi 'sɩɩ n 'Bä. 'Nɩ ‑a 'bhää‑ ylä ‑lää 'kʋ nä, a yɔ 'yi 'ni, 'nɩ a yɔ 'sɩɩ yibhë.

⁸ Ɔ cii‑ lä sɔɔ nä, ɔɔ' 'kʋgënyɔ Filipʋ lä Kwlienyɔ‑, ‑n panö‑anyɩ 'Bäɔ ɩyä ‑anyɩa plɛ 'kä bhlü!

⁹ 'Nɩ Zozii yio soo, ɔ lä Filipʋ‑, n ‑yä anyɩ 'sɔ ‑kʋʋ lä 'kʋ nä, ‑lɔɔ yä 'mʋ gwlɛɛ, 'nɩ ‑n nö'ö ‑lätee ‑yibhë ‑a? ‑Ɔ gä'ä 'yi nii‑ nä, ɔ yä 'Bäɔ 'yi 'ni. Nä, sɩ ‑kʋ bhä 'nɩ ‑n ci bhä nynä ‑n panö‑anyɩ 'Bäɔɔ?

¹⁰ ‑N 'nɩɩ ‑wʋ plɛkʋ 'tɛɛ nynä n ‑yä 'Bäɔ 'sɔ, kä ‑a 'jɛnyɩ‑ ‑a? Wälɩɩ 'fɩɩn n sonö'anyɩ lä nä, 'naa 'wluu nn' ‑sɩɩ ‑wʋ, ‑mä 'Bäɔ n ‑yɔsɔ ‑kʋʋ lä 'kʋ nä, ɔɔ' nʋnʋgbɩ lä.

¹¹ Nä, a kään 'naa pɔlötɛtɛ nynä n ‑yä 'Bäɔ 'sɔ kä ‑a 'jɛnyɩ‑. 'Nɩ a 'nö bhɛ ‑zi 'naa pɔlötɛtɛ ‑kä ‑kaa nä, nʋnʋgbɩɩ 'fɩɩn n yä lä nʋ nä, ɩɩ' ‑za, a kään 'naa pɔlötɛtɛ!

¹² ‑Nʋawlɛɛ 'mnö, n sonö'anyɩ nynä nyɩkpɔɔ' lɔɔ ‑ɔ gä 'naa pɔlötɛtɛ ‑kä nä, nʋnʋgbɩɩ n nʋ lä nä, ɔmɔ ‑mä 'sɩɩ ɔ yii nʋ. Kä n mʋ ylä 'Bäɔ yëku nä, nʋnʋgbɩɩ' lɩɩ‑ ‑zi lä 'naa ‑lɩɩ 'kʋ nä, ‑lɔɔ' nyɩkpɔɔ yii nʋ.

¹³ 'Nɩ, sää 'fɩɩn a yi lä 'naa 'ŋnöö 'mnö ‑zlaa nä, n yi'anyɩ sɔɔ 'nyɛ, ɩyä 'Bäɔ 'klʋagba nä, 'Bäɔ ‑Yowli 'kä gbä ‑yä a 'kä 'yi nio.

¹⁴ Nä, a kä'ä lʋʋ 'ylää nä, 'naa 'ŋnöö ‑za, sä a 'ylänö'ö lä nä, n yi sɔɔ nʋ.

'Bäɔ yi Kplɔɔkplɔɔ‑wugɔɔ lobho
( 1 Zään 5.3 ; 2.3‑5 ; Zään 16.5‑15 , 33 )

¹⁵ A kä'ä ‑waa nä, a yi 'naa ciciwälɩ 'klʋkpää' 'ŋʋ.

¹⁶ N yi 'Bäɔ bhibhie 'nɩ ɔ yi'anyɩ Plɛɛ' Bhlüënyɔɔ' 'yigädalɔɔ ‑lä, ɩyä ɔ ‑yä anyɩ 'sɔ 'kä 'kɔɔkɔɔ' ‑za 'kʋ kʋʋ.

¹⁷ Ɔmɔɔ‑ plöö‑ lä ‑Nʋawlɛɛ' 'Wugɔɔ. 'Ylʋzɔkʋnyʋää' 'niu ‑wʋ 'yi, 'nɩ wa 'nʋʋ ‑wʋ 'sɩɩ ‑yi. Nä, waa' ‑lä mii‑ 'nɩ wa 'kʋʋ 'ni. ‑Mä anyɩ, a yiu. Ʋ ‑kʋ'anyɩ yëku, 'nɩ ʋ yi'anyɩ 'sɩɩ 'mnö kʋ.

¹⁸ N kä ‑mʋ nä, n nö'anyɩ ‑lä të nynä kuyuë. N yi'anyɩ bʋkʋ yëku yi.

¹⁹ ‑Ɔ ‑too yɩ 'pɛpɛ ‑yä 'ylʋzɔkʋnyʋä nö'ö ‑läyɩɔ 'ni. ‑Mä anyɩ, a yi'i 'ni. ‑Ɔnöza bhä? ‑Amʋ n ‑kä lä 'pʋpʋɛ nä, anyɩ ‑mä 'sɩɩ a yi 'pʋpʋɛ kään.

²⁰ ‑Lɔɔ' 'ylʋʋ 'kʋ a 'kä lä sɔɔ yibhë nynä kä 'Bäɔ ‑yä ‑amʋ 'sɔ 'jɛnyɩ‑, 'nɩ anyɩ ‑mä 'sɩɩ, a ‑yä ‑amʋ 'sɔ 'jɛnyɩ‑.

²¹ ‑Ɔ gä 'naa ciciwälɩɩ pleyi bhɛnö‑, 'nɩ ‑ɔ gɩ 'klʋkpää' 'ŋʋ nä, ‑lɔɔ' nyɩkpɔɔ 'mɔɔ‑ ‑wää'ä lä. Nyɩkpɔ kä'ä ‑waa nä, n 'Bä yio 'sɩɩ wamä. 'Nɩ ‑amʋ ‑mä 'sɩɩ, n yio wamä, 'nɩ n yio n yëku paa.

²² 'Kʋgënyɔ Zudö lä ‑mä, Kwlienyɔ‑, sɩ ‑kʋ bhä 'nɩ ‑nn ‑lä bhä ‑n yëku nyɩkpaa 'fɩɩn paa, 'nɩ ‑anyɩ ‑bhlogbe ‑n 'gä bhä ‑n yëku paa? Zudönɔ nä, ‑ɔɔ ‑wʋ Zuda Sikalɩɔtö.

²³ 'Nɩ Zozii yio soo, ɔ lä ‑ɔ gä'ä ‑waa nä, 'naa ciciwälɩɩ, ɔ yii 'klʋkpää' 'ŋʋ. N 'Bä yio 'sɩɩ wamä, 'nɩ ‑a yio yëku yi. 'Nɩ ɔɔ' kʋdaa, ‑a yi ‑lɔɔ ‑anyɩa kʋdä nʋ.

²⁴ ‑Ɔ nö'ö ‑waa nä, ɔɔ' ‑lä 'naa ciciwälɩɩ 'klʋkpää' 'ŋʋ. Wälɩɩ' ‑lɩɩ a nu, 'nɩ n ci lä nä, 'naa nëë' ɩɩ' ‑bha ‑wʋ. 'Bäɔ ‑ɔ ‑lobho'o lä nä, ɔɔ' nëë' ɩ bha lä.

²⁵ 'Tänyɩɩ' n ‑yä anyɩ 'sɔ ‑kʋ lä ‑lätee ‑lää nä, ‑lɔɔ n sonö'anyɩ lä ‑bhlɛ wälɩnɩ.

²⁶ Plɛɛ' Bhlüënyɔɔ, Kplɔɔkplɔɔ‑wugɔɔ, 'Bäɔ 'kä lä 'naa 'ŋnöö 'mnö ‑lä nä, ʋmʋʋ‑ 'gä'anyɩ lä wälɩɩ 'fɩɩn cɩa. Ɩyä ʋ 'kanyɩ 'sɩɩ luë 'naa ciciwälɩɩ 'fɩɩn ‑za.

²⁷ N tü'anyɩ 'kʋ wɔtɔlɩ. 'Naa 'kʋ wɔtɔlɩɩ, ɩmɩ n nyɩ'anyɩ lä. Sä 'ylʋzɔɔ' 'kʋ wɔtɔlɩɩ ‑kʋ lä nä, sɔɔ 'naa ‑lɩɩ' ‑wʋ ‑kʋ. Plɛ 'nä belio'anyɩ ‑lä 'mʋ, ɩyä ‑ŋänö 'nä 'bhlä'anyɩ ‑lä 'sɩɩ!

²⁸ N cii‑ lä nynä kä n mʋ lä ‑mä n yi'anyɩ bʋkʋ yëku yi nä, a nuu‑ sɔɔ nä? A kä'ä ‑waa nä, ‑pʋpɛ ga'anyɩ lä 'bhlä! ‑Ɔnöza bhää? 'Bäɔ ‑ɔ 'ghlü 'nɩ ‑ɔ ‑zi'i lä nä, kä n mʋɔ ylä yëku.

²⁹ Nä, kä n sonö'anyɩ lä ‑bhlɛ wälɩnɩ 'fɩɩn ‑yä ɩ kä ‑ŋëë nä, a 'kä pɔlötɛtɛ kään.

³⁰ 'Dëvlo ‑ʋ pɩä lä 'kɔɔnʋ 'kʋ nä, kʋ yi ylä nä n ‑yä anyɩ 'sɔɔ ‑läyɩɔ kpänyɩ 'dö 'ŋʋ. Ʋ nö'ö ‑wʋ nëë' ‑bhɩä

³¹ ‑mä, ɩ ‑ŋwa 'kʋ nynä 'ylʋzɔkʋnyʋä yibhë sɔɔ nynä kä n ‑waa 'Bäɔ, 'nɩ sä ɔ 'ylänö'ö lä nä, n nʋ sɔɔ. Nä, a ‑bha 'kʋ ‑ya 'gä mʋ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan