Bìoball air-loidhne

Zään 12 - GOD - u2

Malii ‑jɛɛ Zozii ‑daŋwänɩ ‑kokokpü 'kʋ
( Matie 26.6‑13 ; Makö 14.3‑9 ; Lukö 7.36‑50 )

¹ ‑Ɔ ‑too bhɛ ‑mɔɔ ylɩɩ ‑ngboplo ‑yä wa 'kä 'Zufʋnyʋaa' Pakö‑glɩsɩɩsɩɛ 'ni, 'nɩ Zozii ‑mʋ Betaniiduu'. Nyɩkpɔɔ wa laa bhlä Lazaa 'nɩ ɔ ‑gälɩä bhlä 'kuëë nä, Betaniiduu' ɔ ‑kʋ bhlä.

² Zozii ‑mʋ lä ‑mɔɔ nä, wa ‑pio lülülɩɩ ‑gä. Matö 'mɔɔ‑ dënɩ bhä, 'nɩ Lazaa ‑kʋ bhä ‑lɔɔ lüdaa.

³ Wa ‑kʋ bhɛ lä lüdä nä, Malii ‑yi 'nɩ ‑daŋwɩɛ ‑ɛnö 'kpaa ‑a 'tɛ lä 'nɩ wa laa lä 'nalö nä, ɔ bhlie‑ 'kʋ, ɛɛ' 'yɛkɛ 'yɛkɛ, 'nɩ ɔ ‑jɛnɩɛ Zozii ‑kokokpü 'kʋ. 'Nɩ ɔ bhlüü‑ ɔ yëkuu' 'wluu nyɩɩ 'kʋ, 'nɩ ɔ yio ‑kokokpü sɩɔ. ‑Mä 'gää ‑daŋwɩɛɛ' 'ŋwänɩɩ bhlüü‑ ‑bhutuu 'fɩɩn 'kʋ.

⁴ Nä, Zozii' 'kʋgënyʋa nëëdëë' ‑lɔɔ wa laa bhlä Zuda Sikalɩɔtö 'nɩ ‑ɔ 'gä bhlä Zozii pëë nä, ɔ lä

⁵ ‑mä ‑daŋwɩɩnɛ ‑a yie bhɛlä 'kpä 'ŋʋʋ! Ɛ yi‑anyɩ bhä ‑flëëgiyii' gwlɩ ‑ngbüü' ci taa ‑lää, 'nɩ moniinɛ ‑a yie bhä ŋäzönyʋa 'nyɛ nä!

⁶ Ɔ ci bhlä sɔɔ nä, ŋäzönyʋaa' wälɩɩ 'bhlɔ bhɔɔ ‑mä ɔ ‑glö bhä 'ghüghünyɔ. Ɔmɔɔ‑ klä bhlä moniee 'nää nä kɔ ghlie bhä, ɩɩ' ‑zä ɔ ci bhlä sɔɔ.

⁷ 'Nɩ Zozii yi ci, ɔ lä ‑n ‑taa 'ŋnɔɔ 'yi ‑mä, n kä kuu‑ nä, 'naa ‑gɛzɛɛ' yëkuu' lebhee nyɩkpaa 'kä bhlä nʋ nä, ɛmɛ ɔ ‑nʋ lä.

⁸ Ŋäzönyʋa nä, ‑lää wa ‑yä anyɩ 'sɔ ‑kʋ lä 'kɔɔkɔ, ‑mä ‑amʋ, n ‑yä anyɩ 'sɔɔ ‑wʋ 'kɔɔkɔɔ' ‑za ‑lää ‑kʋ.

'Zufʋnyʋa lä wa 'kä Lazaa 'bhlämʋ

⁹ 'Zufʋnyʋaa' bhutukpä nuu‑ lä nynä Zozii ‑kʋ bhä Betanii' nä, kwa ‑yi ‑mɔɔ. Wa ‑yi bhä Zozii' ‑za, ‑mä wa ylä bhä 'sɩɩ nynä Lazaa Zozii ‑gälɩä bhlä 'kuëë nä, wa 'kɔ bhä 'yi 'ni.

¹⁰ ‑Mä 'Cibhisänyʋaa' 'cifinyʋa 'ŋʋʋ‑ 'kʋ nynä wa 'kä Lazaa 'bhlämʋ.

¹¹ ‑Ɔnöza bhä? Kä 'Zufʋnyʋaa' ‑bhutukpä ‑sä bhɛ waa' 'cifinyʋa gwë, 'nɩ wa ‑kä bhɛ Zozii' pɔlötɛtɛ.

Zozii ‑plä Zolizalɛmʋ‑duu' nynä 'loyo
( Matie 21.1‑11 ; Makö 11.1‑11 ; Lukö 19.28‑40 )

¹² Zeli ‑ze bhɛ lä nä, nyɩkpa gbʋʋ 'fɩɩn‑ ‑yi bhlä Pakö‑glɩsɩɩsɩɛ 'kʋ nä, wa nuu‑ lä nynä kä Zozii yi Zolizalɛmʋduu' nä,

¹³ kwa döö‑ ‑gbadi, 'nɩ wa yio 'kʋ gboo ‑kää mʋ. Wa woo bhä, wlä Ozana! ‑Mɔɔ mɔ ‑ɔ yi lä Kwlienyɔ Laagɔɔ' 'ŋnöö 'mnö nä, 'Nyupälɩ ŋënö‑ö 'kʋ! 'Yizlɛnyʋää' 'loyoo, 'Nyupälɩ ŋënöɔ 'kʋ!

¹⁴ ‑Mä Zozii nii‑ jakasöyu 'nɩ ɔ yio kätää' ‑gblää. Sɩ ‑jɩjlɔ lä Laagɔ‑bɔɔgʋʋ 'mnö nä, sɔɔ‑ ‑yä bhɛ glää. Kɩ ‑jɩjlɔ lä nynä ‑mä

¹⁵ Siyɔɔduu' nyɩkpanyɩ‑! ‑Ŋänö 'nä 'bhlanyɩ ‑lä ‑mä, Anyɩa' 'loyoo 'mɔɔ‑ yi lä! Ɔ ‑kʋ jakasöyu kätää'!

¹⁶ Wälɩɩ 'fɩɩn ‑ɩ plöö‑ lä 'kʋ nä, Zozii' 'kʋgënyʋa 'nɩɩ ‑wʋ 'fɩa 'mʋ nuu‑. ‑Mä dä ɔ ‑plä ylä Laagɔɔ' 'klʋagbaa 'mnö nä, ‑lɔɔ ‑tɛɛ wa ‑luë lä nynä 'zaazɩ, sɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, sɔɔ ‑säkä ‑säkä nyɩkpaa ‑nʋ lä Zozii' ‑za.

¹⁷ Dä Lazaa ‑kʋ bhlä lesie 'mnö, 'nɩ Zozii lɔɔ‑, 'nɩ ɔ ‑glɔɔ lä 'kuëë nä, nyɩkpaa 'fɩɩn ‑wa 'nii‑ bhlä ‑lɔɔ nä, wa lü bhä wälɩɩ' ‑dläfʋɛ.

¹⁸ Nä nyɩkpaa ‑bhutukpä nuu‑ ylä ‑lɔɔ' 'yiziziogbɩɩ' wälɩɩ nä, 'ɩzä wa ‑yio bhlä 'kʋ gboo ‑kää.

¹⁹ Ɩ ‑kä 'ŋnö nä, Falizɩɛnyʋa ‑sonö ‑sonö, wlä a wloo yɩ ‑zɩkä! Kä ‑aa ‑lä lä mii. Nyɩkpaa 'fɩɩn, a ni 'yi, ɔmɔ wa gëë ylä 'kʋ!

'Glɛkönyʋä ‑yi Zozii 'yi 'ni kää

²⁰ Nyɩkpaa ‑wa ‑mʋ bhlä ‑glɩsɩɩsɩɛ 'kʋ Laagɔ bʋbɔ ‑kää nä, 'Glɛkönyʋä ‑kʋmʋwa bhä pää'.

²¹ 'Nɩ wa yi Filipʋ yëku yi. Filipʋ ‑glö bhä Galilee' 'duu wa laa lä Bɛsayida nä, ‑mɔɔ' nyɩkpɔ. 'Nɩ wa yio 'ylä, wlä 'kɔgwlɛnyɔ, ‑a ylä bhä nynä ‑a 'gä Zozii 'yi 'ni.

²² Wa cii‑ lä sɔɔ nä, 'nɩ Filipʋ yi mʋ 'nɩ ɔ yi Adlee soo, 'nɩ Adlee ‑yä Filipʋ 'sɔ yi mʋ 'nɩ wa yi Zozii soo.

²³ 'Nɩ Zozii ‑mä ɔ yiwa soo, ɔ lä dä Nyɩkpɔɔ ‑Yowli 'kä lä Laagɔɔ' 'klʋagbaa 'mnö plä nä, ‑lɔɔ' 'tänyɩɛ yä ŋëë.

²⁴ ‑Nʋawlɛɛ 'mnö, n sonö'anyɩ nynä wa 'nö ‑nyʋʋye glu ŋʋʋ‑, 'nɩ ɛ 'nö kuu‑ nä, ɛɛ' zumë ‑wʋ. Kɛ kä kuu‑ nä, ‑lɔɔ ɛ tlʋ lä 'yʋʋ. 'Nɩ 'yʋʋ ‑lɛɛ bhutukpä.

²⁵ ‑Ɔ gä ɔɔ' zëkpë plɛ bʋkʋ ŋʋʋ‑ nä, ɔ yia të. 'Ɩzä, ‑ɔ gä ‑mää 'ylʋzɔɔ ɔɔ' zëkpë plɛ bʋkʋ ‑sä nä, ɔ yia kää 'kɔɔkɔɔ' ‑za.

²⁶ Nyɩkpɔ kä cii‑ nynä ɔ yi'i ‑gä nʋ nä, ɔ gë'ë 'kʋ! Dä n ‑kʋ lä nä, ‑lɔɔ 'naa ‑gänʋnyɔ 'kä lä 'sɩɩ kʋ. 'Nɩ nyɩkpɔ kä'ä ‑gä nʋ nä, n 'Bä yi gbä 'nɩ ‑lɔɔ' nyɩkpɔɔ yi 'klʋkpää' kʋ.

Zozii ci ɔ yëkuu' 'kwiee wälɩ

²⁷ Plɛ belio'o yɩ 'mʋ kpänyɩ! Sä n yi bhä ‑pɛɛ ci 'naa? Kä n 'kä bhä ci nynä ‑mä, 'Bä, ‑n ‑sä'ä 'tänyɩnɛ ‑väkö ‑a? ‑Ɔ! ‑Mänɩ 'tänyɩnɛɛ' ‑zä n ‑yi lä!

²⁸ Ɔ cii‑ lä sɔɔ nä, 'nɩ ɔ yi bhibhie, ɔ lä 'Bä, ‑n gbä ‑yä ‑naa 'ŋnöö mʋ 'ŋnu! 'Nɩ nuwälɩ yi ‑laagɔɔ' ghlää, ɩ lä n yɩ wɛzä 'ŋnu fään, 'nɩ n yii ‑lätee 'ŋnu fään!

²⁹ Nyɩkpa‑gbʋʋ ‑ʋ ‑kʋ bhlä ‑lɔɔ nä, wa nuu‑ lä nuwälɩɩ nä, wlä ‑Laagɔ‑ guglu lä! ‑Nänʋä lä ‑Laagɔzuzu‑ ‑sonöɔ lä wälɩ!

³⁰ 'Nɩ Zozii yiwa soo, ɔ lä nuwälɩnɩ nä, 'naa ‑zä ɩɩ' ‑wʋ cio‑, ‑mä anyɩa' ‑za lä.

³¹ ‑Pɛpɛɛ nä, 'tänyɩɛ yä ŋëë ‑yä Laagɔ 'kä yɩ 'ylʋzɔkʋnyʋä 'tite 'ŋʋ. 'Nɩ 'Dëvlo, ‑ʋ pɩä lä 'kɔɔnʋ 'kʋ nä, kʋ 'kä lä ‑pɛpɛɛ tlüo.

³² ‑Amʋ nä, wa kä'ä yɩ gblaa‑ nä, ‑lɔɔ n 'kä ylä nyɩkpaa 'fɩɩn n yëku yëku jlüü.

³³ Ɔ ci bhlä sɔɔ nä, ɔɔ' 'kwiee wälɩɩ, sɩ 'kä lä 'kʋ 'plö nä, sɔɔ ɔ panʋwa bhlä.

³⁴ 'Nɩ nyɩkpaa yio soo, wlä kä Laagɔɔ' ‑Jlämaa sonö‑anyɩ nynä Klisöɔ, kɔ 'kä 'kɔɔkɔ kʋ. Nä, sɩ ‑kʋ bhä 'nɩ ‑n ci bhä nynä ɩ ‑ŋwa 'kʋ nynä Nyɩkpɔɔ ‑Yowli, wa bhuo 'kusuu 'yii? ‑Ɔ plöö‑ bhä ‑lɔɔ' Nyɩkpɔɔ ‑Yowlioo?

³⁵ 'Nɩ Zozii yiwa soo, ɔ lä Zëlüü ‑kʋ'anyɩ ‑lätee nëëdë ‑mä ɩɩ' yɩɔ 'mʋ ‑tlʋ. Dä a ‑kʋ lä ‑lätee zëlüü 'mnö nä, a nää ‑yä 'cucukpaa' ka'anyɩ ‑kä ‑zɔɔ 'vu! ‑Mä nyɩkpɔ kä 'cucukpää' nämnö nä, ‑gbäsɩɩ ɔ mʋ lä nä, ɔɔ' ‑wʋ ‑mɔɔ dä ‑yi.

³⁶ Dä zëlü ‑kʋ'anyɩ lä ‑lätee nëëdë nä, a känɩ plɛkʋ ‑yä a 'kä zëlüü' 'yuë 'plö. Zozii cii‑ lä sɔɔ nä, kɔ ‑bha nyɩkpaa nëëdë 'nɩ, ɔ yi zizio ‑kää mʋ.

'Zufʋnyʋaa' bhɔɔ Zozii' pɔlötɛtɛ ‑kä

³⁷ Zozii ‑nʋ bhɛ 'yiziziogbɩ 'nɩ wa nii‑ bhɛ 'flɛ 'yi, ‑mä waa' bhɔɔ ɔɔ' pɔlötɛtɛ ‑kä.

³⁸ Kɩ plöö‑ lä sɔɔ 'kʋ ‑yä wälɩɩ 'plɔfɛtɩ Ezayii cii‑ bhlä nä, ɩ 'kä glää. Kɔ cii‑ bhlä nynä Kwlienyɔ, 'döö ‑a ‑yɩ 'sɔ ‑yi lä nä, Nyɩkpɔ ‑sä lɩɩ‑ bhä nyaasäsä? ‑Naa sɔɔ' 'päwa nä, Nyɩkpɔ ‑sä ‑n panöa bhä?

³⁹ 'Klüü‑ ‑kä lä 'ŋnö 'nɩ, waa' bhɔɔ ‑lä pɔlötɛtɛ ‑kä nä, Ezayii cii‑ 'sɩɩ, ɔ lä

⁴⁰ Laagɔ ‑wlä nyɩkpanää' 'yii 'kʋ, 'Nɩ ʋ 'tɛmänʋwa‑ 'nyukwli. ‑Ɔnöza bhää? Waa kä ‑kä sä 'ni Ɩyä waa' kä ‑kä 'nu. Waa' pɔlöö' kä ‑kä 'klʋ känöɔ Ɩyä waa' kä ‑kä 'ylɩbhɔ. Waa' kä'ä ‑kä yii, Ɩyä nn' kwa ‑kä yamä.

⁴¹ 'Plɔfɛtɩ Ezayii ci bhlä sɔɔ nä, Zozii' 'klʋagba 'mä ɔ nii‑ bhlä 'yi. Nä Zozii' yëkuu wälɩ‑ ɔ ci bhlä.

Zozii lä wa kää ɔɔ' pɔlötɛtɛ

⁴² Ɩ ‑kʋ bhä sɔɔ 'nɩ 'Zufʋnyʋaa' 'cifinyʋa pää' bhutukpä ‑kä bhä Zozii' pɔlötɛtɛ. ‑Mä wa gu bhä 'nɩ waa' wlaa bhɔɔ wälɩ në. Wlä Falizɩɛnyʋa yiwa ‑kä Laagɔ‑bhutuu 'mnö 'tlü.

⁴³ Nyɩkpaa' 'ŋnu fäälɩ wa ‑waa bhä 'nɩ, wa zi bhä Laagɔɔ' 'ŋnu fäälɩɩ 'kʋ.

Zozii 'mɔɔ‑ plöö‑ lä zëlü

⁴⁴ 'Nɩ Zozii yi nuwälɩ 'kʋ bhɛlɩä, ɔ lä ‑ɔ gä 'naa pɔlötɛtɛ ‑kä nä, 'naa pɔlötɛtɛ ‑bhlogbe ɔɔ' ‑wʋ ‑kä. Ɔ ‑lobho'o lä nä, ɔɔ' pɔlötɛtɛ‑ ɔ ‑kä lä 'sɩɩ!

⁴⁵ Nyɩkpɔ kä'ä 'yi nii‑ nä, ‑ɔ ‑lobho'o lä nä, ɔmɔ ɔ nii‑ lä 'yi.

⁴⁶ ‑Amʋ nä, n ‑glö zëlü. N ‑yi lä 'ylʋzɔɔ nä, ‑ɔ gä 'naa pɔlötɛtɛ ‑kä nä, ɔɔ' ‑läyɩɔ 'cucuu 'mnö kʋ.

⁴⁷ Nyɩkpɔ kä 'naa ciciwälɩɩ nuu‑, 'nɩ ɔ 'nö ɩɩ' saa nää nä, ‑amʋʋ‑ ‑klɔɔ ‑wʋ gbʋ. Nn' ‑wʋ 'ylʋzɔɔ ‑yi ‑yä n 'kä nyɩkpa gbʋ klaa. Kä n ‑yi lä ‑yä n 'kä ‑lɔɔ nyɩkpaa nëë' ‑sä.

⁴⁸ Nyɩkpɔ kä'ä cɛɛ‑, 'nɩ ɔ kä 'naa ciciwälɩɩ 'klä paa‑ nä, wälɩɩ n cii‑ 'nɩ ɔ nuu‑ lä nä, ɩmɩɩ‑ ‑lä 'gɔ gbʋ klaa bhɩäylʋʋ 'kʋ.

⁴⁹ Wälɩɩ n cii‑ lä nä, 'naa 'wluu n 'nɩɩ ‑wʋ ‑sä. ‑Mä n 'Bä, ‑ɔ ‑lobho'o lä nä, sä n ci lä, 'nɩ sä n cɩa lä nä, ɔmɔɔ‑ panö'ö lä sɔɔ.

⁵⁰ 'Nɩ n ‑yi sɔɔ nynä ‑mä, sä ɔ ylä lä nä, kä sɔɔ nyɛ 'pʋpʋɛ 'kɔɔkɔɔ ‑za nä. Nä, wälɩɩ n ci lä nä, sä 'Bäɔ ‑sonö'ö lä nä, sɔɔ n ci lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan