Bìoball air-loidhne

Zään 11 - GOD - u2

Zozii ɔ 'nagɔ Lazaa kuu‑

¹ Nyɩkpɔ ‑bhlo ‑kʋ bhä ‑lɔɔ, 'nɩ ɔɔ' bhɔɔ ‑yä. Ɔmɔ wa laa bhä Lazaa, ɔ ‑glö bhä Betaniiduu' nyɩkpɔ. Betaniiduu' plöö‑ bhä 'sɩɩ Malii ‑yä ɔ bhɛŋnɔ Matö 'sɔ wa 'bhlɩ.

² Maliinɔ 'mɔɔ‑ ‑jɛɛ bhlä ‑daŋwɩɛ Kwlienyɔɔ' ‑kokokpü 'kʋ, 'nɩ ‑ɔ bhlüü‑ bhlä ɔɔ' 'wluu nyɩɩ 'kʋ 'nɩ ‑ɔ yie bhlä sɩɔ. Nä, ɔ bheli Lazaa 'mɔɔ‑ bhɔɔ lä ‑yä.

³ 'Nɩ bhɛŋwnɩa 'sɔ yi nyɩkpa Zozii 'kʋ lobho, wlä a mʋ ‑yä a sonöɔ nynä ‑mä ɔ 'nagɔɔ' ‑wʋ ‑yä.

⁴ Nyɩkpaa ‑mʋ 'nɩ wa ‑soo lä Zozii nä, kɔ cii‑, ɔ lä guu ‑ʋ bhlä lä Lazaa nä, ʋ 'nöɔ ‑lä 'kwie 'kʋ fä. ‑Mä kʋ 'kä gbä ‑yä nyɩkpa 'kä Laagɔɔ' 'klʋagbaa 'yi 'ni ‑yä wa 'kä 'sɩɩ Laagɔ ‑Yowlii' 'klʋagbaa 'yi 'ni.

⁵ Zozii nä, kɔ ‑waa bhä Matö, ‑yä ɔ bhɛŋnɔ Malii, ‑yä Lazaa.

⁶ ‑Mä ɔ nuu‑ lä nynä Lazaa bhɔɔ ‑yä nä, ‑gbäsɩɩ ɔ ‑kʋ bhlä nä, ɔ ‑sä 'fɩa ‑mɔɔ ylɩɩ 'sɔ.

⁷ 'Nɩ ɔ yi ɔɔ' 'kʋgënyʋa soo, ɔ lä a ‑ya 'ylɩbhɔ Zudee'!

⁸ Ɔɔ' 'kʋgënyʋa lä Cɩanyɔ‑, 'Zufʋnyʋa tänö‑ö bhä 'ylönö nynä wa 'kä‑ä bhä ‑mɔɔ cɛkwɩɩ' 'bhlä, 'nɩ ‑n 'ylɩbhɔɔ ‑mɔɔ bʋkʋ ‑a?

⁹ Ɔ lä ‑gägäzëlü ‑kʋ 'gliyi 'kʋgbä 'sɔ 'mnö. ‑Ɛɛ ‑wʋ sɔɔ ‑a? A ni nyɩkpɔ nä, ɔ kä ‑gägäzëlüü' nämnö nä, ɔ ni lä zëkpëa' zëlüü 'yi nä, ɔɔ' gozo ‑wʋ.

¹⁰ ‑Mä ɔ kä 'cucukpää' nämnö nä, sä ɔɔ' ‑wʋ lä zëlüü' ‑kʋ nä, kɔ gozo.

¹¹ Ɔ cii‑ ylä sɔɔ nä, 'nɩ ɔ yiwa soo, ɔ lä ‑a 'nagɔ Lazaa yä ŋɔɔ. Nä n 'kä mʋ ‑yä n 'kɔ gälɩä.

¹² Zozii' 'kʋgënyʋa lä Kwlienyɔ‑, kɔ kä 'zaazɩ ŋɔɔ nä, ɔ yi ‑lɔɔ nëë' ‑bha.

¹³ Lazaa' 'kwiee wälɩ ɔ sonʋwa bhlä ‑mä wamä nä, kwa bhobho bhä nynä ŋɔŋɔ‑ylaa ɔ sä bhä.

¹⁴ 'Nɩ ɔ yi wälɩɩ në wla, ɔ lä Lazaa yä 'ku!

¹⁵ Sä nn' ‑wʋ lä ‑lɔɔ ‑kʋ 'nɩ ɔ kuu‑ lä nä, kɩ nʋ'ʋ ‑pʋpɛ anyɩa' ‑za. Ɩ 'kä gbä ‑yä a 'kä 'naa pɔlötɛtɛ kään. Nä a yi ‑a 'gä ‑mɔɔ mʋ!

¹⁶ Ɔ cii‑ lä sɔɔ nä, Tomaa, wa laa bhlä Poyuo nä, kɔ ‑soo ‑mɔɔ' 'kʋgënyʋa, ɔ lä a ‑ya mʋ ‑yä ‑a ‑yä Cɩanyɔɔ 'sɔ 'kä däbhlöö' 'kuu!

Zozii 'mɔɔ plöö‑ lä 'kuëë glɔɔlɩ ‑yä zëkpë

¹⁷ Zozii ‑yi ylä Betanii' nä, ɔ lɔ yi nä, Lazaa yä wɛzä 'ku. Wa ‑zizio lä nä, ɩ nʋ bhɛ ylɩɩ ‑mɔɔnä.

¹⁸ Betanii‑duu ‑yä Zolizalɛmʋ‑duu 'sɔ ‑glö dikakpü. Kilooyuë taa 'bhisäkʋʋ' ‑blɔ klë ‑kʋɩ lä pää.

¹⁹ ‑Nä, 'Zufʋnyʋä ‑bhutukpä ‑yi bhä Matö ‑yä Malii 'sɔ yëku ‑yä, wa 'kwa bhä wa bhelii' 'nʋgbʋ ‑ya bhänö.

²⁰ Matö nuu‑ lä nynä Zozii yi nä, kɔ ‑mʋɔ ‑blɔ 'kʋ. ‑Mä Malii nä, ɔ ‑kʋ bhä ‑mɔɔ ‑bhutuu' sä.

²¹ Matö nii‑ lä Zozii 'yi nä, kɔ sonöɔ, ɔ lä Kwlienyɔ‑, ‑n gä bhlä ‑lää ‑kʋ nä, n bhelii' bhɔɔ lä kuu‑!

²² ‑Mä n ‑yi sɔɔ nynä ‑pɛpɛɛ 'titi, ‑n gä lʋʋ Laagɔ 'ylää nä, ʋ yi‑i mʋ 'nyɛ.

²³ 'Nɩ Zozii yi Matö soo, ɔ lä ‑n bheli yi 'kuëë glɔɔ!

²⁴ Matö lä ‑ɛɛɛ, n ‑yi sɔɔ nynä ‑mä bhɩäylʋʋ 'kʋ ɔ yi 'kuëë glɔɔ.

²⁵ 'Nɩ Zozii yio soo, ɔ lä ‑amʋʋ‑ plöö‑ lä 'kuëë glɔɔlɩ ‑yä 'pʋpʋɛɛ. ‑Ɔ gä 'naa pɔlötɛtɛ ‑kä nä, ɔ 'nä kuu‑ ‑zi ‑o, ɔ yi 'kuëë glɔɔ.

²⁶ 'Nɩ nyɩkpɔɔ' lɔɔ‑ ‑kʋ lä zëkpë 'kʋ 'nɩ ‑ɔ ‑kä lä 'naa pɔlötɛtɛ nä, ɔɔ' ‑lä 'kɔɔn 'ku. ‑N lɩɩ nyaasäsä ‑a?

²⁷ Matö lä ‑ɛɛɛ! Kwlienyɔ‑, n ‑yi sɔɔ nynä ‑mä ‑mɔɔ plöö‑ lä Klisöɔ, Laagɔ ‑Yowli ‑ɔ 'gä bhlä ‑mää 'ylʋzɔɔ yi nä.

Zozii tu Lazaa' 'kwiee ‑za

²⁸ Ɔ cii‑ lä sɔɔ nä, kɔ ‑mʋ 'nɩ ɔ 'ŋuŋʋë‑ ɔ bhɛŋnɔ Malii ɔ lä Cɩanyɔɔ yä yi ‑mä, ɔ lä ‑n yi.

²⁹ Sä Malii nuu‑ lä 'gää nä, kɔ ‑bha 'kʋ 'vlikiti! 'Nɩ ɔ yi Kwlienyɔɔ yëku yi.

³⁰ Zozii' ‑lätee bhä duu' ‑plä. Dä ɔ ‑kʋ 'nɩ Matö ‑mʋɔ lä ‑blɔkʋ nä, ‑lɔɔ ɔ ‑kʋ bhlä ‑lätee.

³¹ 'Zufʋnyʋa‑ ‑yi bhlä ‑yä wa 'kä Malii 'nʋgbʋ ‑ya bhänö nä, wa ‑yä Malii 'sɔɔ‑ ‑kʋ bhlä ‑mɔɔ ‑bhutuu'. Wa nio‑ lä 'yi 'nɩ ɔ ‑bha lä 'kʋ 'fäfä nä, kwa güo‑ 'kʋ. Wa ‑luë bhä nynä ‑mä lesigwlëë' ɔ mʋ 'tu kää.

³² Malii ‑ŋëë lä Zozii yëku, 'nɩ ɔ nio lä 'yi nä, kɔ pɔɔ‑ ‑kokoowli dëlü glu 'nɩ ɔ yio soo, ɔ lä Kwlienyɔ‑, ‑n gä bhlä ‑lää ‑kʋ nä, n bhelii' bhɔɔ lä kuu‑!

³³ ‑Mä Zozii nii‑ lä Malii 'yi 'nɩ ɔ tu bhlä, 'nɩ 'Zufʋnyʋa‑ ‑yɔsɔ nää‑ bhlä nä, wa tu bhlä 'sɩɩ nä, kä ŋäzö ‑jɛnöɔ 'kʋ, 'nɩ wälɩɩ ‑kamänöɔ yëkuu'.

³⁴ Ɔ lä dä ‑sä a ‑zizio bhää? Wlä Kwlienyɔ‑, ‑n yi ‑yä ‑n 'gä 'ni.

³⁵ ‑Maa, Zozii tuu‑!

³⁶ 'Zufʋnyʋa lä a wloo sä ɔ ‑wɔɔ bhlä nä!

³⁷ ‑Mä ‑nänʋä ci bhä nynä ɔmɔ ‑lɔɔ ‑ɔ welie‑ lä 'yikpüü' kʋnyɔɔ 'yii nä, ɔɔ' gbä bhɛ 'sɩɩ 'nɩ nyɩkpɔnɔ 'kä 'kwie nëë' ‑bha ‑a?

Lazaa ‑yä 'kuëë glɔɔ

³⁸ ‑Mä Zozii ŋäzö ‑jɛnöɔ bʋkʋ 'kʋ 'nɩ ɔ yi lesi 'kʋ mʋ. Lesie nä, cɛkʋ ‑kpʋkplää' wa bhlie‑ bhlä, 'nɩ wa 'sunɩɛ‑ bhä cɛkʋ 'kädʋ në.

³⁹ Ɔ lä a sä ‑lɔɔ cɛkʋʋ! Lazaa, ‑ɔ kuu‑ lä nä, ɔ bhɛŋnɔ Matö, ɔ lä Kwlienyɔ‑, ɔɔ' ŋnɛ yi wɛzä! Wa ‑zizio lä nä, ɩ nʋ yɩ ylɩɩ ‑mɔɔnä.

⁴⁰ Zozii lä Matö‑, n 'nö‑ö bhɔɔ ‑soo nynä ‑mä, ‑n gä 'naa pɔlötɛtɛ ‑kä nä, ‑n yi Laagɔɔ' 'klʋagbaa 'yi 'ni ‑a?

⁴¹ Ɔ cii ‑lä sɔɔ nä, 'nɩ wa yi ‑lɔɔ cɛkʋʋ ‑sä. 'Nɩ Zozii yi ŋɔkʋ wloo, 'nɩ ɔ yi ci, ɔ lä 'Bä, n bhänö‑ö sä ‑n ŋoo lä 'naa bhibhie 'kʋ nä!

⁴² N ‑yi sɔɔ nynä ‑mä kä n ŋoo 'kɔɔkɔ 'naa bhibhie 'kʋ. ‑Mä, nyɩkpanää‑ ‑kʋ lä ‑lää nä, waa' ‑zä n ci lä ‑yä wa 'kä sɔɔ yibhë nynä ‑mä ‑mɔɔ ‑lobho'o.

⁴³ Ɔ cii‑ lä sɔɔ nä, kɔ gaa‑ 'mʋ, ɔ lä Lazaa, ‑n 'wlʋ ‑zɔɔ!

⁴⁴ ‑Maa, Lazaa ‑ɔ yä bhɛ lä 'ku nä, ɔ ‑bha lesie 'mnö. Wa ‑kpäpɩɔ bhä lokupɛlɩ bhɩ yëku ‑yä ‑klɔgbö yëku. 'Nɩ wa ‑kpäpɩɔ bhä 'sɩɩ lokupɛlɩ 'wlu yëku. 'Nɩ Zozii yi nyɩkpaa soo, ɔ lä a blisio ‑yä a ‑tanöɔ 'yi ɔ 'kä mʋ!

'Zufʋnyʋaa' ‑jɛnyɩɛ ŋoo‑ nynä wa 'bhlä Zozii
( Matie 26.1‑5 ; Makö 14.1‑2 ; Lukö 22.1‑2 )

⁴⁵ 'Zufʋnyʋa ‑wa ‑yi bhlä Malii yëku nä, wa nii‑ lä sä Zozii ‑nʋ bhlä nä 'yi nä, waa' bhutukpä ‑kä bhɛ ɔɔ' pɔlötɛtɛ.

⁴⁶ ‑Mä bhloobhlolʋä ‑kʋwa bhä nëëdë, 'nɩ wa ‑mʋ, 'nɩ sä Zozii ‑nʋ bhlä nä, wa yi sɔɔ Falizɩɛnyʋa soo.

⁴⁷ 'Nɩ 'Cibhisänyʋaa' 'cifinyʋa, wa ‑yä Falizɩɛnyʋa 'sɔ yi 'Zufʋnyʋaa' 'Tütüplä‑jɛnyɩɛ laa. 'Nɩ wa yiwa soo, wlä sä ‑a yi bhä nʋʋ? Nyɩkpɔɔ nʋ kpänyɩ 'yiziziogbɩ!

⁴⁸ ‑A 'nöɔ në ‑slä nä, nyɩkpaa' ‑lefɩɩn yi ɔɔ' pɔlötɛtɛ kään. 'Nɩ Wlomɛɛnyʋaa' 'cifinyʋa yi 'sɩɩ yi, 'nɩ wa yi ‑anyɩa bʋbɔdaa wlä, 'nɩ wa yi‑anyɩ ‑anyɩa 'bhlɩɛ ‑sä.

⁴⁹ 'Cibhisänyʋa nëëdëë' lɔɔ ‑bhlo, wa lɔ bhä Kayifʋ. ‑Lɔɔ' lioyɩ 'mnö nä, ɔmɔɔ‑ plöö‑ bhlä 'cibhisänyɔ 'kädɔ. Ɔmɔɔ‑ cii‑ bhlä, ɔ lä wälɩɩ ‑ɩ nʋɔ lä nä, aa ‑lätee ɩɩ' gba ‑yibhë.

⁵⁰ Aa ‑wʋ sɔɔ ‑yi nynä ‑mä ɩ ‑ŋwa 'kʋ nynä nyɩkpɔ ‑bhlo 'coo 'ku nyɩkpa 'fɩɩn 'wlu ‑yä 'bhlɩɛɛ kä ‑kä nuë ‑a?

⁵¹ Kayifʋ nä, ɔmɔ 'titii‑ ci bhɔɔ sɔɔ ‑mä, sä ɔmɔɔ‑ plöö‑ bhlä ‑lɔɔ lio 'mnö 'cibhisänyɔ 'kädɔ nä, Laagɔ‑ cinöɔ bhlä nëë' nynä Zozii yi 'bhlɩɛɛ 'wlu 'ku.

⁵² 'Nɩ 'bhlɩɛɛ ‑bhlogbee' 'wlu ɔɔ' ‑lä bhɔɔ 'sɩɩ 'ku ‑mä, Laagɔɔ' 'yua 'fɩɩn ‑wa ‑jɛjɛ lä 'ylʋzɔɔ sä nä, ɔɔ 'kwiee 'kwa 'wlu 'wlää ‑yä wa 'kä ‑bhlo 'plö.

⁵³ 'Bhää bhɛ ‑lɔɔ' ylʋʋyɩ 'kʋ nä, kä 'Zufʋnyʋaa' 'cifinyʋa ŋʋʋ‑ bhɛ 'sää 'titi nynä wa 'kä Zozii 'bhlä.

⁵⁴ Ɩ ‑kä 'ŋnö nä, ɔɔ' ŋoo bhɛ 'nɩ ɔ 'kä 'Zufʋnyʋaa' ‑jlë 'yi ghlä. Kɔ ‑bha 'kʋ 'nɩ ɔ ‑mʋ 'popie yëkuu' 'duu wa laa bhlä Eflayimʋ nä 'mnö. ‑Mɔɔ ɔ ‑yä ɔɔ' 'kʋgënyʋa 'sɔ ‑kʋ bhɛ.

⁵⁵ 'Zufʋnyʋaa' Pakö‑glɩsɩɩsɩɛ yä bhɛ 'mɛmɛ nä, kä 'bhlɩɛ 'mnö nyɩkpa ‑bhutukpä ‑mʋ Zolizalɛmʋduu', ɩyä sä Laagɔ‑Jlämaa ylä bhlä nä, wa 'kä sɔɔ budo, ‑yä wa 'kä Laagɔ dëlü kplɔɔ 'fɩa ‑yä wa 'kä Pakö‑glɩsɩɩsɩɛ 'ni.

⁵⁶ Nyɩkpanä ‑kʋ bhä Laagɔ‑bhutu 'kädʋʋ' jluu 'kʋ, 'nɩ wa tään bhä Zozii. Wa 'ylä ylä bhä, wlä ‑mä, ɔ yi bhä ‑glɩsɩɩsɩɛ 'kʋ yi ‑a, ‑mä ɔɔ' ‑lä bhä yi ‑a? Sa nii bhä 'yii?

⁵⁷ Sɩ ‑kʋ bhlä naa, 'Cibhisänyʋaa' 'cifinyʋa ‑yä Falizɩɛnyʋa 'sɔ, kwa cii‑ bhä nynä nyɩkpɔ kä Zozii dä ‑yi nä, ɔ plʋwa ‑jlo ‑yä wa 'kɔ 'kʋ bhlü.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan