Bìoball air-loidhne

Zään 10 - GOD - u2

'Bhabhlö ‑gbugbëa' ‑nyädlaa

¹ Zozii cii‑ bʋkʋ, ɔ lä ‑nʋawlɛɛ 'mnö, n sonö'anyɩ nynä 'bhabhlö ‑gbugbëa 'mnö ‑ɔ gä ‑mɔɔ plä, 'nɩ ‑ɔ 'nö aa ‑glënëa nëë' ‑ghlää, 'nɩ ‑ɔ gä aa 'yigädadä ‑ghlää nä, ɔ ‑glö 'ghüghünyɔ, 'nɩ ɔ ‑glö nyɩkpa‑bhlänyɔ.

² 'Ɩzä nyɩkpɔɔ ‑ɔ ghlää lä ‑glënëa nëë' nä, ɔmɔɔ‑ plöö‑ lä 'bhabhlöö' kpanyɔɔ.

³ Ɔ kä ‑yi nä, kä ‑glënëa' 'klʋbɛnyɔɔ känöɔ 'gbë. 'Nɩ 'bhabhlöö nu 'sɩɩ ɔɔ' nuwälɩɩ. 'Bhabhlöö‑ plöö‑ lä ɔɔ' ‑lɩɩ nä, kɔ zɛnɩ 'ŋnö 'nɩ ɔ ‑yɩ 'sɔ wlʋ ‑zɔɔ.

⁴ Ɔ ‑yɩ 'sɔ kä yɩ ‑zɔɔ wlʋʋ‑ 'nɩ ɔ 'plöö 'yikʋ. 'Nɩ sä 'bhabhlöö ‑yi lä ɔɔ' nuwälɩɩ nä, ɩ güo 'kʋ.

⁵ ‑Mä lowuyuo nä, ɩɩ' ‑wʋ lä ɔɔ' nuwälɩ ‑yi nä, ɩɩ' 'güo ‑wʋ 'kʋ ‑mä, kɩ sɔɔ gwë.

⁶ Nä, Zozii ‑soo lä nyɩkpaa ‑nyädlaa nä, wa 'nöa ‑wʋ 'mʋ nuu‑.

⁷ 'Nɩ ɔ yiwa bʋkʋ soo, ɔ lä ‑nʋawlɛɛ 'mnö, n sonö'anyɩ nynä ‑mä ‑amʋ, ‑amʋʋ‑ plöö‑ lä 'bhabhlö ‑gbugbëa' ‑glënëa.

⁸ Nyɩkpaa 'fɩɩn ‑wa ‑yi lä tɛɛ 'nɩ n ‑yi lä nä, wa ‑glö 'ghüghünyʋä ‑yä nyɩkpa‑bhlänyʋä nä, 'bhabhlöö 'nʋwa ‑wʋ 'nyukwli ‑poo.

⁹ 'Gbëa' ‑glënëa ‑amʋʋ‑ plöa‑ lä. Nyɩkpɔ kä'ä nëë' blüë nä, ɔ yä ‑lɔɔ nëë' ‑bha. Ɔ yi plä, 'nɩ ɔ yi 'sɩɩ ‑zɔɔ 'wlʋ sɔ ‑waa lä nä. 'Nɩ ɔ yi 'sɩɩ lülülɩɩ 'ni.

¹⁰ 'Ghüghünyɔ nä, kɔ yi lä ‑yä ɔ 'kä ghlü, ‑yä ɔ 'kä 'bhlä ‑yä ɔ 'kä nuë. ‑Mä ‑amʋ nä, kä n ‑yi lä ‑yä 'naa 'bhabhlöö 'kä 'pʋpʋɛ 'ni. 'Pʋpʋɛɛ' lɛɛ‑ ‑wʋ lä nyäkasä ‑kä nä, ɩ 'kɛ 'ni.

Zozii lä ɔmɔɔ‑ plöö‑ mnäkpänyɔɔ 'titi

¹¹ ‑Amʋʋ‑ plöö‑ lä mnäkpänyɔɔ 'titi. Mnäkpänyɔɔ 'titi nä, ɔɔ' zëkpëa, kɔ saa ɔɔ' 'bhabhlöö' ‑za.

¹² Lowuyuo wa lobho lä 'nɩ ‑ɔ bɛɛ lä 'bhabhlöö 'klʋ nä, ɔmɔɔ‑ ‑wʋ ɩɩ' kpanyɔ 'titi plöö‑, 'nɩ ɔmɔɔ‑ 'nɩɩ ‑wʋ 'sɩɩ ‑kä. Ɩ ‑kä 'ŋnö nä, ɔ kä vëvëmnɛ 'yi 'nii‑ 'nɩ ɛ kä yi nä, kɔ bhlü sämɩ 'kʋ 'nɩ ɔ të ‑lɔɔ 'bhabhlöö. 'Nɩ vëvëmnɛɛ blüënɩ nëëdë 'nɩ ɛ ‑klä ‑nɩnɩ, 'nɩ ‑nɩnɩ dloo.

¹³ Lowuyuo nä, 'bhabhlöö' wälɩ 'nöɔ ‑wʋ yëkuu' kään.

¹⁴ ‑Amʋ nä, ‑amʋʋ‑ plöö‑ lä 'bhabhlöö' kpanyɔɔ 'titi. N ‑yi 'naa 'bhabhlöö, 'nɩ 'naa 'bhabhlöö ‑yi'i

¹⁵ ‑n ‑näsä 'Bäɔ ‑yi'i lä 'nɩ n ‑yi lä 'sɩɩ 'Bäɔ nä. Kä n ‑sä 'naa zëkpëa 'naa 'bhabhlöö' ‑za.

¹⁶ N ‑kä ‑lätee bʋkʋ 'bhabhlöö' 'sɔnalɩɩ, ‑mä ɩɩ' ‑wʋ ‑mää ‑gbugbënä 'mnö ‑kʋmʋ. ‑Lɔɔ' 'bhabhlöö nä, ɩ ‑ŋwa 'kʋ nynä ‑mä n ‑lɩɩ 'sɩɩ ‑mää. Ɩ yi 'naa nuwälɩɩ 'nu 'nɩ, ɩmɩ 'fɩɩn yi mnäkpä ‑bhlo 'plö, 'nɩ mnäkpänyɔ ‑bhlo 'coo yii 'tie.

¹⁷ Kä n ‑sä lä 'naa zëkpëa ‑yä n 'ka bʋkʋ 'ni, ɩ gbä 'nɩ n 'Bä ‑waa 'naa wälɩ.

¹⁸ Nyɩkpɔ nö'ö ‑lä 'naa zëkpëa ‑sä, ‑mä ‑amʋ 'titii‑ ‑lä 'ga 'nyɛ. N ‑kä 'päwä ‑yä n 'ka 'nyɛ, 'nɩ n ‑kä 'sɩɩ 'päwä ‑yä n 'ka bʋkʋ 'kʋ 'bhlü. Sɔɔ n 'Bä ‑sonö'ö lä nynä ‑mä n nʋ.

¹⁹ Zozii ci bhɛ lä sɔɔ nä, kä 'Zufʋnyʋa doo‑ 'mʋ bʋkʋ.

²⁰ Bhutukpä ci bhä nynä ‑mä 'Dëvloo' ‑zuzu ‑kʋɔ lä kätää'! 'Nɩ wa ci bhä 'sɩɩ nynä ‑mä plɛɛ‑ bhlɔɔ lä nä, ka puo 'nyukwli ‑a?

²¹ 'Nɩ ‑nänʋä ci bhä, wlä nyɩkpɔnɔɔ' ciciwälɩɩ ɔ ci lä nä, ‑ɛɛ ‑wʋ 'dëvlo‑nyɩkpɔɔ' ciciwälɩ. 'Dëvlo‑zuzu yi bhä 'yikpüü' kʋnyɔɔ' 'yi welie ‑a?

Zozii ‑yä Laagɔ 'sɔ plöö‑ ‑bhlo

²² ‑Nɩnɩ 'fɩɩn plöö‑ ylä nä, 'nyugozo‑tänyɩɛ 'mnö, wa ni bhä Laagɔ‑bhutu 'kädʋʋ' ‑glɩsɩɩsɩɛ ‑mɔɔ Zolizalɛmʋduu'.

²³ ‑Mɔɔ Laagɔ‑bhutuu' ‑gbäsɩɩ wa laa lä Salomɔɔ' ‑tutumëa nä, Zozii bi bhä ‑mɔɔ

²⁴ 'nɩ 'Zufʋnyʋa yio yëku yi 'nɩ wa yio 'klʋ glää, 'nɩ wa yio 'ylä, wlä ‑mä, ‑n 'ga‑anyɩ bhä 'sää plɛkʋ biebie ‑kaaa ‑yä ‑n 'nö‑anyɩ ‑lä bhä soo ‑a? ‑Mɔɔ gä 'zaazɩ Klisöɔ plöö‑ nä, ‑n sonö‑anyɩ wɩa.

²⁵ Zozii lä n ya'anyɩ wɛzä soo, 'nɩ a 'nɩɩ ‑wʋ nyaasäsä laa‑. Nʋnʋgbɩɩ' ‑lɩɩ n nʋ lä n 'Bää 'ŋnöö 'mnö nä, ɩ lü 'naa ‑dläfʋɛ.

²⁶ ‑Mä anyɩ nä, sä aa' ‑wʋ lä 'naa 'bhabhlöö nëëdëë' 'bhabhlö plöö‑ nä, aa' ‑wʋ 'naa pɔlötɛtɛ ‑kä.

²⁷ 'Naa 'bhabhlöö nä, kɩ nu 'naa ciciwälɩ. 'Nɩ n ‑yii, 'nɩ ɩ gë'ë 'sɩɩ 'kʋ.

²⁸ 'Nɩ 'pʋpʋɛ ‑kʋ lä 'kɔɔkɔɔ ‑za nä, n nyɩwa 'nyɛ. Ɩɩ' ‑lä 'kɔɔn 'ku 'nɩ nyɩkpɔ nö'ö 'mɩɩ ‑lä 'sɩɩ wlɩɩ ‑sälɩ mii.

²⁹ N 'Bäɔɔ‑ nyɛɛ'ɛ 'mɩɩ lä nä, 'kɔ 'ghlü 'nɩ ɔ ‑zi ‑lɩɩ 'fɩɩn. Nä nyɩkpɔɔ' ‑lä mii 'nɩ ɔ 'kɔnyɩ wlɩɩ' ‑sä.

³⁰ 'Nɩ 'Bäɔ ‑yä ‑amʋ 'sɔ nä, ‑a ‑glö ‑bhlo.

³¹ Ɔ cii‑ ylä sɔɔ nä, kä 'Zufʋnyʋa bhlüü‑ bʋkʋ cɛkwɩ 'kʋ ‑yä wa 'kɔnyɩ 'mʋ 'bhlä.

³² 'Nɩ ɔ yiwa soo, ɔ lä n ‑gbä 'nɩ 'nägägbɩ ‑bhutukpä ‑bha 'Bäɔ yëku, 'nɩ a nii‑ 'yi. Nä, 'klë ‑sä 'titii‑ ‑kä bhä 'ŋnö, 'nɩ a tään bhä nynä a kä'ä cɛkwɩɩ' 'bhlä?

³³ Wlä 'nn! ‑Ɔɔ ‑wʋ sä ‑n ‑nʋ 'nägä‑lebhe nä, 'ɩzä ‑a 'gä‑ä 'bhlä ‑mä kä ‑n 'bhɩsɛ‑ Laagɔ nä, 'ɩzä ‑a 'gä‑ä lä 'bhlä. ‑Mɔɔ, ‑n ‑glö ‑anyɩ 'bhisäkʋ nyɩkpɔ, 'nɩ ‑n laa ‑n yëku Laagɔ.

³⁴ 'Nɩ Zozii yiwa 'ylä, wlä ‑mä, anyɩa' Laagɔ‑Jlämaa 'mnö nä, ɩɩ' bhä ‑mɔɔ ‑jɩjlɔ nynä ‑mä ‑Amʋ Kwlienyɔ Laagɔ, kä n ci lä nynä ‑mä, anyɩ, a ‑glö ‑laagwɩ ‑a?

³⁵ Nyɩkpaa ‑wa ‑nözä Laagɔwälɩɩ ‑jɩjlɔ lä nä, waa' ‑säkä ‑säkä, Laagɔ lʋwa ‑kä bhlɛ ‑laagwɩ! 'Nɩ, Laagɔ‑bɔɔgʋʋ 'mnö wälɩɩ, ‑a ‑yi sɔɔ nynä nyɩkpɔ 'nɩɩ ‑lä 'kɔɔn ‑lɔɔ ‑sä.

³⁶ Nä nyɩkpɔɔ' ‑lɔɔ Laagɔ ‑sä, 'nɩ ʋ ‑lobho lä ‑mää 'ylʋzɔɔ nä, ɔ ci ylä nynä ‑mä, ɔ ‑glö Laagɔ ‑Yowli nä, ɔmɔ a soo lä nynä ‑mä ‑n yä Laagɔ 'bhɩsɛ?

³⁷ N 'nö n 'Bää lebhee nʋ nä, aa' 'nä kään ‑lä 'naa pɔlötɛtɛ!

³⁸ 'Nɩ n kä n 'sɩɩ n 'Bää lebhee nʋ, 'nɩ a 'nö ‑zi 'naa pɔlötɛtɛ ‑kä ‑o, lebhee n yä lä nʋ nä, a kään ɛɛ' pɔlötɛtɛ. ‑Lɔɔ a yi lä sɔɔ yibhë nynä ‑mä n ‑yä n 'Bä 'sɔ kä ‑a 'jɛnyɩ‑.

³⁹ Ɔ cii‑ bhɛ lä sɔɔ nä, wa ‑tään bʋkʋ nynä wa 'kɔ 'kʋ bhlü ‑mä kɔ ‑bhʋwa nëë'

⁴⁰ 'nɩ ɔ yi bʋkʋ ‑mɔɔ Zludɛɛ‑nyie klë mʋ. ‑Mɔɔ ‑gbäsɩɩ Zään 'ŋʋʋ bhlä tɛɛ nyɩkpaa 'nyuu 'wlu nä, ɔ ‑mʋ 'nɩ ɔ ‑kʋ ‑mɔɔ.

⁴¹ ‑Mä nyɩkpa ‑bhutukpä yi bhä, 'nɩ wa ci bhä wlä Zään' ‑wʋ 'yiziziogbɩ ‑bhlo 'coo ‑nʋ, ‑mä wälɩɩ 'fɩɩn ɔ cii‑ lä nyɩkpɔnɔɔ' ‑za nä, ɩ ‑glö nyaasäsä.

⁴² ‑Nɩnɩ gbä bhɛ lä nä, nyɩkpa ‑bhutukpä ‑kä bhɛ Zozii' pɔlötɛtɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan