Bìoball air-loidhne

Zään 1 - GOD - u2

Zozi Klisö 'mɔɔ‑ plöö‑ lä Ciciwälɩ

¹ ‑Bhɔɔdää, 'fɩa ‑yä 'kɔɔn kä 'wlʋ nä, ‑ɔ plöö‑ lä Ciciwälɩɩ nä, ɔ ‑kʋ bhä. Kä Ciciwälɩ ‑yä Laagɔ 'sɔ ‑kʋʋ bhä 'kʋ, 'nɩ Ciciwälɩ plöö‑ bhä Laagɔ.

² Kɔ ‑yä Laagɔ 'sɔ ‑kʋʋ bhä 'kʋ ciedää.

³ Ɔmɔ 'kʋ Laagɔ ‑ghlää 'nɩ ʋ ‑nʋ ‑lɩɩ 'fɩɩn. 'Nɩ ‑lɩɩ 'fɩɩn‑ ‑kʋ lä 'ylʋzɔɔ nä, lʋʋ' ‑lʋʋ Ciciwälɩɩ' ‑wʋ lä ‑nʋ nä, ʋʋ' ‑wʋ ‑kʋ.

⁴ Ciciwälɩ 'mnö ‑mɔɔ 'pʋpʋɛ ‑kʋ, 'nɩ 'pʋpʋɛ ‑yi 'nɩ a plöö‑ 'ylʋzɔkʋnyʋää' zëlü.

⁵ Zëlüü ‑ŋänɩä 'cucuu 'mnö ‑mä, 'cucuu 'nɩɩ ‑wʋ 'casɩ nyɛɛ‑.

⁶ Nyɩkpɔ ‑bhlo Laagɔ ‑lobhuo. Ɔmɔ wa laa bhä Zään.

⁷ Zään nä, kɔ ‑yi bhä ‑yä ɔ 'kä ‑dläfʋɛ lü. Ɔɔ' ‑dläfʋɛɛ ɔ lü bhlä nä, zëlüü' ‑dläfʋɛɛ bhlä nä, kɔ ci bhlä ‑yä nyɩkpaa' 'fɩɩn 'kä zëlüü' wälɩɩ nyaasäsä laa.

⁸ Ɔmɔɔ‑ bhɔɔ zëlüü plöö‑ ‑mä, kɔ ‑yi bhä ‑yä ɔ 'kä zëlüü' ‑dläfʋɛ lü.

⁹ Zëlüyɩ nä, ɩmɩɩ‑ plöö‑ bhlä zëlüü 'titi. Kɩ ‑yi ‑mää 'ylʋzɔɔ 'nɩ ɩ ŋänɩä lä nyɩkpaa 'fɩɩn 'kʋ.

¹⁰ ‑Ɔ plöö‑ lä Ciciwälɩɩ nä, kɔ ‑kʋ 'kɔɔkɔ 'ylʋzɔɔ. Ɔmɔ 'kʋ Laagɔ ‑ghlää 'nɩ ʋ ‑nʋ 'kɔɔn, ‑mä 'ylʋzɔkʋnyʋä nä, wa 'nöɔ ‑wʋ ‑yibhë.

¹¹ Ɔ ‑yi ɔmɔ 'titii' dää 'nɩ ‑lɔɔ' nyɩkpaa 'nöɔ ‑wʋ 'mänyɩ‑.

¹² ‑Maa, ‑nänʋä ‑wa 'mänyɩnöɔ‑ lä nä, 'nɩ ‑wa ‑kä lä ɔɔ' pɔlötɛtɛ nä, ɔ ‑gbä 'nɩ wa 'plöö‑ Laagɔɔ' 'yuëë'.

¹³ 'Yuënä nä, 'yɛkɛ ‑yä dolu 'sɔɔ‑ ‑wʋ ‑gbä 'nɩ wa 'kä ‑gänʋɔ. Nyɩkpɔ‑ 'nʋwa ‑wʋ ‑gään ‑mä Laagɔ‑ ‑gänʋwa.

¹⁴ Ciciwälɩ ‑jɩjlää nyɩkpɔɔ', 'nɩ ɔ ‑yi 'nɩ ɔ ‑kʋ‑anyɩ nëëdë 'nɩ ‑a nii‑ ɔɔ' 'klʋagbaa 'yi. Laagɔ ‑Yowlio ‑bhlo 'coo ‑ɔ ‑bha lä 'Bäɔ yëku nä, ɔɔ' 'klʋagbaa, ‑a nia‑ 'yi. Ɔ ‑glö bhä 'zaazɩ plɛkʋmɛnɔnyɔ ‑yä ‑nʋawlɛɛcinyɔ.

¹⁵ Zään lü bhlä ɔɔ' ‑dläfʋɛ nä, ɔ paa‑ wälɩ, ɔ lä nyɩkpɔnɔ 'mɔ n sä bhlä. Kä n cii‑ bhlä nynä nyɩkpɔ yi'i klë ‑mä, ɔmɔɔ‑ ‑kʋ 'yikʋ. Kɔ ‑kʋ 'fɩa 'nɩ n wlʋʋ‑.

¹⁶ Ɔɔ' 'nyupälɩɩ 'mɩɩ‑ ‑ŋënö‑anyɩ lä 'kʋ, 'nɩ ɔɔ' plɛkʋmɛnɔɔ 'mnö ɔ nyɩ‑anyɩ 'nɩ ɔ 'tɔtɔ lä nëkʋ.

¹⁷ ‑Jlämaa nä, Moyizö 'kʋ Laagɔ ghlää‑ 'nɩ ʋ ‑laa, ‑mä plɛkʋmɛnɔ ‑yä ‑nʋawlɛ nä, Zozi Klisö 'kʋ Laagɔ ghlää‑ 'nɩ ʋ panö‑anyɩmɩ.

¹⁸ Nyɩkpɔɔ' ‑läzä Laagɔ 'yi 'ni, ‑mä Laagɔ ‑Yowlio ‑bhlo 'coo, ‑ɔ ‑bha lä 'Bäɔ yëku nä, ɔmɔɔ‑ ‑gbä 'nɩ nyɩkpaa ‑yibhë Laagɔ.

Zään Badisö ‑lü Zozii' ‑dläfʋɛ
( Matie 3.1‑12 ; Makö 1.2‑8 ; Lukö 3.1‑6 , 15‑18 )

¹⁹ 'Tänyɩ ‑bhloo', 'Zufʋnyʋaa' 'cifinyʋa, wa ‑lobho 'Cibhisänyʋä ‑yä 'Cibhisänyʋaa' kläänyʋä Zään yëku. Wa ‑bha Zolizalɛmʋduu' 'nɩ wa ‑yio 'ylä kää. Wlä ‑mä ‑mɔɔ, ‑n plöö‑ bhä 'titii?

²⁰ Zään ‑wʋ 'wlu ‑bi ‑mä kɔ cii‑ 'kpätaa, ɔ lä Klisöɔ, ‑amʋʋ‑ 'nöɔ ‑wʋ plöö‑.

²¹ 'Nɩ wa yio 'ylä, wlä 'nɩ ‑n plöö‑ bhää? ‑Mɔɔ plöö‑ bhä 'plɔfɛtɩ Elii ‑a? Ɔ lä nn' ‑wʋ Elii plöö‑. Wlä ‑aa, nä ‑mɔɔ plöö‑ 'Plɔfɛtɩɔ ‑ɔ 'gä bhlä yi nä ‑a? Ɔ lä ‑ɔ! ‑Amʋʋ‑ 'nöɔ ‑kä plöö‑!

²² Wlä ‑mänɩ ‑n plöö‑ bhä 'titii? Sä ‑n laa bhä ‑n yëkuu, ‑mä ‑wa ‑lobhu‑anyɩ lä nä ‑a 'gwa 'dö fä.

²³ Zään lä n ‑glö nuwälɩɩ' ‑lɩɩ ‑ɩ ghlää lä 'popie 'mnö 'nɩ ‑ɩ woo lä nä. Ɩ ci nynä ‑mä, a gëë Kwlienyɔɔ' ‑blɔɔ 'yii! ‑mä sɔɔ 'plɔfɛtɩ Ezayii cii‑ bhlä.

²⁴ Nyɩkpanä wa ‑lobho 'nɩ ‑wa ‑yi bhlä Zään yëku nä, Falizɩɛnyʋaa' ‑jɛnyɩɛ 'mnöö nyɩkpa ‑kʋmʋwa bhä pää'.

²⁵ 'Nɩ wa yio 'ylä, wlä nä ‑n 'nö yɩ Klisöɔ plöö‑, 'nɩ ‑n 'nö yɩ Elii plöö‑, 'nɩ ‑n 'nö 'sɩɩ 'Plɔfɛtɩɔ plöö‑ nä, ‑ɔnözä 'nɩ ‑n ŋʋ bhä nyɩkpa 'nyu 'wluu?

²⁶ Zään lä ‑amʋ nä, n ŋʋ'anyɩ 'nyu 'wlu, ‑mä anyɩ nëëdë, nyɩkpɔ ‑kʋ ‑mɔɔ 'nɩ a 'nöɔ ‑wʋ ‑yi. Ɔ ‑kʋ klë ‑mä kɔ yi.

²⁷ Nn' ‑wʋ 'kʋ ‑ŋwa nynä n 'tɔsɔ 'sää 'titi ɔɔ' 'süü ‑kokokpëë' 'bhliye.

²⁸ ‑Gbäsɩɩ Zään ŋʋ bhlä nyɩkpaa 'nyuu 'wlu ‑mɔɔ Betanii‑duu' Zludɛɛ‑nyie klë nä, ‑mɔɔ ‑nɩnɩ 'fɩɩn 'plöö‑ lä 'kʋ.

Zozii 'mɔɔ‑ plöö‑ lä Laagɔɔ' 'bhabhlö‑yuo

²⁹ Zeli ‑ze ylä nä, Zään nii‑ Zozii 'yi 'nɩ ɔ yinöɔ bhä. 'Nɩ Zään yi ci, ɔ lä a ni Laagɔɔ' 'bhabhlö‑yuo! Ɔmɔɔ‑ sä lä 'ylʋzɔkʋnyʋää' nyenyii yëku.

³⁰ Ɔmɔ n sä bhlä nynä ‑mä nyɩkpɔ yi'i klë. ‑Mä kɔ ‑kʋ 'fɩa 'nɩ n wlʋʋ‑ nä, ɔmɔɔ‑ ‑kʋ 'yikʋ.

³¹ N 'nöɔ bhɔɔ ‑yi ‑mä, 'Yizlɛnyʋä 'kɔ yibhë nä, 'ɩzä n ‑yi lä 'nɩ n ŋʋ lä nyɩkpa 'nyu 'wlu.

³² Zään ‑lü bʋkʋ ‑dläfʋɛ, ɔ lä n nii‑ Laagɔɔ' 'Wugɔɔ 'yi 'nɩ ʋ kwlinöɔ‑ 'kʋ nynä 'kpaakpu, 'nɩ ʋ yio 'kʋ gɔɔ.

³³ ‑Amʋ nä, n 'nöɔ bhɔɔ ‑yi, ‑mä ‑ɔ ‑lobho'o lä nynä n 'ŋʋ nyɩkpa 'nyu 'wlu nä, ɔmɔɔ‑ ‑sonö'ö, ɔ lä nyɩkpɔɔ ‑n 'gä lä 'yi 'ni ‑yä Kplɔɔkplɔɔ‑wugɔɔ 'kä lä 'kʋ kwlii ‑yä ʋ 'kä lä yëku kʋ nä, ɔmɔɔ‑ ŋʋ lä nyɩkpa Kplɔɔkplɔɔ‑wugɔɔ 'wlu.

³⁴ ‑Amʋ nä, kä n nio‑ 'yi, 'nɩ n ‑lü ylä ‑dläfʋɛ nynä ‑mä ɔmɔɔ‑ plöö‑ Laagɔ ‑Yowli.

Zozii laa‑ ɔɔ' tɛɛtɛɛ‑kʋgënyʋä
( Matie 4.18‑22 ; Makö 1.16‑20 ; Lukö 5.1‑11 )

³⁵ Zeli ‑ze ylä nä, Zään ‑yä ɔɔ' 'kʋgënyʋaa' nëëdëë' lʋä 'sɔ ‑yi bʋkʋ ‑lɔɔ

³⁶ 'nɩ ɔ nii‑ Zozii 'plödä. Ɔ lä a ni Laagɔɔ' 'bhabhlö‑yuo!

³⁷ Ɔɔ' 'kʋgënyʋa 'sɔ nuu‑ lä wälɩɩ nä, kä wa gëë‑ Zozii 'kʋ.

³⁸ Zozii lä ɔ wloo klë nä, wa güo‑ 'kʋ. 'Nɩ ɔ yiwa 'ylä, ɔ lä a tään bhää? Wlä Labii‑! ‑a sä bhä ‑naa ‑gbäsɩɩ? Labii‑ŋnöö nä, kɩ sä lä ‑zɔɔ nynä ‑mä Cɩanyɔ‑.

³⁹ 'Nɩ ɔ yiwa soo‑, ɔ lä a yi a 'kä ‑lɔɔ 'yi 'ni! 'Nɩ wa yi mʋ 'nɩ wa yi ɔɔ' kʋdaa 'yi 'ni. Wälɩnɩ nä, ‑kugbë‑gliyi ‑mɔɔnää' 'tänyɩɩ' ɩ plöö‑ lä 'kʋ. ‑Lɔɔ' ylʋʋyɩ 'kʋ wa ‑kʋ Zozii yëku ‑aaa 'nɩ 'ylʋ ‑bhlü.

⁴⁰ Nyɩkpaa 'sɔ ‑wa nuu‑ lä Zään' ciciwälɩɩ 'nɩ ‑wa gëë‑ bhlä Zozii 'kʋ nä, waa' lɔɔ ‑bhlo plöö‑ bhä Adlee. Adlee nä, ɔ ‑glö bhä Simɔɔ Pɩɛlö ɔ bheli.

⁴¹ Adlee ‑mʋ lä nä, ɔ bheli Simɔɔ 'mɔ ɔ nii‑ tɛɛ, 'nɩ ɔ yio soo, ɔ lä ‑a yä Mesio 'ni! Mesii‑ŋnöö, kɩ sä lä ‑zɔɔ nynä ‑mä Puënyɔnɔ 'mɔ Laagɔ ‑lobho lä 'nɩ ‑ɔ plöö‑ lä Klisöɔ.

⁴² 'Nɩ Adlee yi ɔ bheli Zozii yëku ‑lä. ‑Mä Zozii ‑wluo ‑plɩɩ, ɔ lä ‑mɔɔ‑ plöö‑ lä Zonasö ‑yowli Simɔɔ, ‑mä ‑mɔɔ wa 'kä ylä Sefasö laa. Sefasö‑ŋnöö 'mɩɩ‑ plöö‑ lä 'sɩɩ Pɩɛlö. Kɩ sä lä ‑zɔɔ nynä ‑mä cɛkʋ‑.

Filipʋ ‑yä Natanayɛɛ

⁴³ Zeli ‑ze ylä nä, Zozii ylä bhɛ nynä ɔ 'kä Galilee' mʋ, 'nɩ ɔ ‑yä Filipʋ 'sɔ yi sloo. 'Nɩ ɔ yio soo, ɔ lä Filipʋ‑, ‑n gë'ë 'kʋ!

⁴⁴ Filipʋ nä, ɔ ‑glö bhä Bɛsayidaduu' nyɩkpɔ, Adlee ‑yä Pɩɛlö 'bhisäkʋ.

⁴⁵ Filipʋ ‑mä 'sɩɩ ɔ nii‑ Natanayɛɛ 'nɩ ɔ yio soo, ɔ lä nyɩkpɔɔ ‑ɔnö wälɩɩ‑ ‑kʋ lä Moyizöö' ‑Jlämaa 'mnö, 'nɩ ‑ɔnö yëkuu' wälɩ 'Plɔfɛtɩnyʋaa' 'bɔɔgwɩɩ ci lä nä, ‑a yɔ 'ni. Ɔ ‑glö Zozɛfʋʋ' 'yu, ‑mɔɔ Nazalɛtöduu' ‑mä ɔmɔ wa laa Zozii.

⁴⁶ 'Nɩ Natanayɛɛ yio 'ylä, ɔ lä ‑mä ‑lɛ 'nänʋ yi bhä Nazalɛtöö' ghlää ‑a?

⁴⁷ Filipʋ lä ‑n yi ‑yä ‑n 'gä 'ni. 'Tänyɩɩ Natanayɛɛ ‑kʋ lä yidä 'nɩ Zozii nio‑ lä 'yi nä, Zozii lä a ni 'Yizlɛ‑bhlɩnɛ 'mnö nyɩkpɔ 'titii‑ ‑kʋ lä ‑lää! ‑Kpläkplä 'nöɔ ‑wʋ pleyii ‑kʋ.

⁴⁸ Natanayɛɛ lä ‑maa, dä ‑n 'ninö'ö bhɛ tɛɛ 'nɩ ‑n yi'i bhää? Zozii lä dä ‑n ‑kʋ bhlä 'fige‑suu ‑zɔɔ nä, n nii‑i 'fɩa 'yi 'nɩ Filipʋ lä‑ä lä.

⁴⁹ Natanayɛɛ lä Labii‑, ‑mɔɔ plöö‑ lä 'zaazɩ Laagɔ ‑Yowli! 'Yizlɛnyʋää' 'loyoo, ‑mɔɔ plöɔ lä!

⁵⁰ Zozii lä nä n cii‑ lä nynä ‑mä, 'tänyɩ ‑n ‑kʋ bhlä 'fige‑suu ‑zɔɔ nä, n nii‑ bhä 'yi nä, ɩmɩɩ‑ ‑gbä 'nɩ ‑n ‑kä lä 'naa pɔlötɛtɛ ‑a? ‑N kʋ ‑lɔɔ ‑mä nʋnʋgbɩ 'kädɩɩ lɩɩ‑ zi lä ‑nɩnɩ 'kʋ nä, ‑n yii 'yi 'ni.

⁵¹ N sonö'anyɩ ‑nʋawlɛɛ' nynä ‑mä, 'tänyɩ yi ŋëë 'nɩ a yi ‑laagɔɔ' 'yi 'ni, 'nɩ ‑mɔɔ yi 'klʋ känöɔ 'nɩ ‑Laagɔzizii yi Nyɩkpɔɔ ‑Yowli 'kʋ kwlii, 'nɩ ɩ yi bʋkʋ ‑laagɔɔ' ‑gblää.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan