Bìoball air-loidhne

'Yii Ghlä‑wälɩ 7 - GOD - u2

Laagɔɔ' ‑gänʋnyʋa ʋ yiwa 'ylö ‑sä

¹ ‑Nɩnɩ 'fɩɩn plöö‑ ylä nä, n nii‑ ‑Laagɔzizi ‑mɔɔnä 'yi. Ɩ 'nynigo‑ bhä 'ylʋzɔɔ' 'kwëtüü ‑mɔɔnä 'mnö 'nɩ ɩ ‑klä 'ylʋzɔɔ' ‑vʋvɔlʋʋ 'fɩɩn sä ‑yä ‑vʋvɔlʋʋ' kä yɩ 'ylʋzɔɔ yi. ‑Vʋvɔlʋʋ' kä yɩ jie 'klʋ yi ‑yä ʋʋ' kä yɩ si 'pʋpɔ.

² N nä n wloo nä, ‑Laagɔzuzuu' 'yigädalʋʋ, ʋ ‑kʋ bhä 'ylʋkwädlaa' ghlää ‑gbäsɩɩ. Ʋ bhɛɛ‑ bhä ‑lʋʋ wa bhlü lä 'kʋ 'nɩ wa sä lä ‑Yäyä Laagɔɔ' 'ylöö nä. 'Nɩ ʋ yi wälɩ 'pä. Ʋ ‑soo ‑Laagɔzizii ‑mɔɔnä ‑ɩ ‑kä lä ‑dʋdʋ ‑yä jie 'sɔ nyimalɩɩ' 'päwa nä.

³ Ʋ lä a fä plɛ! Aa' nuë ‑lä ‑bhlɛ ‑dʋdʋʋ, ‑yä jiee, ‑yä sii ‑mä, ‑anyɩa Laagɔɔ' ‑gänʋnyʋa ‑a 'gwa 'fɩa 'ylö ‑sä.

⁴ 'Nɩ nyɩkpaa wa yä lä ‑bhlɛ 'ylö ‑sɔɔ nä, wa yi'i waa' ‑zunɔ paa. Wlä wa ‑bhlü nyɩkpaa' bhɛgöö' gwlɩ ‑ngbɔɔsɔ ‑yä ‑bhɛgö ‑mɔɔnä (144.000). 'Yizlɛnyʋää' 'lɔlʋkpɔɔ 'fɩɩn 'mnö wa bha bhlä.

⁵ Zudaa' 'lɔlʋkpaa 'kʋʋ nyɩkpaa' ‑bhɛgö kʋgbä 'sɔ (12.000) wa ‑sä 'ylö. Wlubɛɛn' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Gadöö' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö.

⁶ Asɛɛ' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Nɛfötalii' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Manasee' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö.

⁷ Simeyɔɔ' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Levii' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Yisakaa' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö.

⁸ Zabulɔɔ' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. Zozɛfʋʋ' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö. 'Nɩ Bɛzamɛɛ' 'lɔlʋkpaa 'kʋʋ nyɩkpaa' ‑bhɛgö 'kʋgbä 'sɔ (12.000) ‑sä 'ylö.

'Cɔcɩnyʋaa' ‑wʋ ‑zunɔɔ' 'bɛ

⁹ ‑Nɩnɩ 'fɩɩn plöö‑ ylä naa, n nii‑ 'sää nyɩkpaa ‑gbʋgbʋzɛ 'yi. Nyɩkpɔɔ' ‑lä 'kɔɔn waa' në yibhë. Wa ‑bha 'bhlɩɩ 'fɩɩn 'mnö, ɩyä 'lɔlʋkpɔɔ 'fɩɩn 'kʋ. 'Ylʋzɔɔ' dää 'fɩɩn nyɩkpa ‑kʋ 'nɩ wa ‑kä lä 'bhuwälɩ, wa ‑bha ‑mɔɔ 'nɩ wa 'nynigo‑ 'leyi‑këkpëa ‑yä 'Bhabhlöyuo dëlü. Wa ‑plä bhä ‑bänö 'päpö 'nɩ wa bhɛɛ‑ bhä ‑gaa ‑gbadi wlɩɩ'.

¹⁰ Wa woo bhä 'nɩ wa ci bhä nynä ‑mä, ‑anyɩa Laagɔɔ, ʋmʋʋ‑ ‑kʋ lä 'leyi‑këkpëa 'kʋ 'nɩ ‑ʋ sä lä ‑lɔɔ nëë', ʋ ‑yä 'Bhabhlöyuo 'sɔ.

¹¹ ‑Mä ‑Laagɔzizi 'fɩɩn‑ ‑glää bhlä 'leyi‑këkpëa 'klʋ nä, ɩyä 'kɔgwlɛnyʋa, ‑yä mnaa' 'wlʋʋ ‑zizii ‑mɔɔnä, ɩ ‑gla 'leyi‑këkpëa dëlü 'wlu sä 'nɩ ɩ bʋbɔ bhä Laagɔ.

¹² Ɩ ci bhä, ɩ lä ɩ kʋ sɔɔ! 'Ŋnufäälɩ, ɩyä 'klʋagba, ɩyä dɩgälɩ, ɩyä 'nää nʋlɩ, ɩyä 'klʋkpää, ɩyä 'päwä, ɩyä 'tɛtɩ, ɩ 'plö ‑anyɩa Laagɔɔ' dä 'kɔɔkɔɔ ‑za. Ɩ kʋ sɔɔ!

¹³ 'Nɩ 'kɔgwlɛnyʋa nëëdëë' lɔɔ ‑bhlo yi nuwälɩ 'kʋ 'bhlü 'nɩ ɔ yi'i ylä, ɔ lä nyɩkpanää‑ ‑plä lä ‑bänö 'päpöö nä, wa 'ŋnö bhää? 'nɩ mä ‑sä wa bha bhää?

¹⁴ 'Nɩ n yio soo, n nä, Kwlienyɔ‑, ‑mɔɔ ‑yi lä sɔɔ! 'Nɩ ɔ yi'i soo, ɔ lä nyäkälɩ 'kädɩɩ 'mnö wa bha lä. ‑Mä waa' 'kwëtii nä, 'Bhabhlöyuoo' doluu 'mnö wa ‑wɔnönɩ lä nä, 'ɩzä ɩ pɔɔ‑ lä 'sɔɔyɩ.

¹⁵ Ɩmɩɩ‑ ‑kä lä 'ŋnö 'nɩ wa 'nynigo‑ lä Laagɔɔ' 'leyi‑këkpëa dëlü 'nɩ wa bʋbɔnʋ lä ‑mɔɔ ʋʋ' ‑bhutuu 'mnö, ‑gägä‑zëlü ‑yä 'sabo. Nä, ‑ɔ ‑kʋ lä 'leyi‑këkpëa 'kʋ nä, ɔ yiwa 'kʋ wloo.

¹⁶ ‑Gbugbe 'nʋwa ‑läyɩɔ 'kɔɔn 'bhlä, 'nɩ 'mnätʋ 'nʋwa ‑läyɩɔ 'kɔɔn 'bhlä, 'nɩ 'ylʋ ‑yä slo 'nʋwa ‑läyɩɔ 'kɔɔn 'bhlä.

¹⁷ ‑Ɔnöza bhää? 'Bhabhlöyuo ‑ɔ ‑kʋ lä ‑mɔɔyɩ 'leyi‑këkpëa' nëëdü‑daa sä nä, ɔmɔɔ‑ 'gwa lä kpaa. Ɩyä 'nyie glu ‑bhäändaa' 'nyuu ‑ʋ nyɛ lä 'pʋpʋɛ nä, ɔ 'kwa ʋʋ' ‑gbäsɩɩ fämʋ. Ɩyä Laagɔ 'kä waa' 'yii 'mɩɔ 'fɩɩn sɩɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan