Bìoball air-loidhne

'Yii Ghlä‑wälɩ 5 - GOD - u2

'Bɔɔgʋ ŋʋɔ‑ ‑abhluëkö ‑ngbɔɔsɔ

¹ N nä n ‑wloo 'leyi‑këkpëa 'kʋ nyɩkpɔɔ' lüüklä ‑kɔlʋgba 'mnö nä, 'bɔɔgʋ ‑kʋ ‑mɔɔ 'nɩ wa ‑gügënʋ. 'Nɩ wa ‑jɩjlʋ mnö ‑yä kätää. 'Nɩ wa ‑tʋnʋ ‑abhluëkö ‑ngbɔɔsɔ.

² N nä n wloo nä, ‑Laagɔzuzuu' lʋʋ ‑kä lä 'sää 'tɛtɩ kpänyɩ nä, ʋʋ' nuwälɩɩ ‑kä bhä 'sää 'tɛtɩ 'titi, ʋ lä, ‑abhluëkönö, lɔɔ ‑sä ‑ŋwa bhä ɩɩ 'wätalɩ 'kʋ, 'nɩ ‑ɔ yi bhä 'bɔɔgʋnʋ 'klʋ kään?

³ ‑Maa, ‑mɔɔ Laagɔduu', ɩyä ‑mää ‑dʋdʋkʋ, ɩyä glu, nyɩkpɔɔ' ‑wʋ nio. 'Nɩ nyɩkpɔɔ' mii bhɔɔ 'sɩɩ ʋʋ' 'yikʋ 'pälɩ.

⁴ Nä, sä nyɩkpɔɔ' nio bhɛ lä ‑yä ɔ 'kä 'bɔɔgʋʋ welie ‑yä ɔ kʋ 'mnö yi pä nä, n tu bhɛ. N tuu‑ 'sää 'titi kpänyɩ.

⁵ 'Nɩ 'kɔgwlɛnyʋaa' lɔɔ ‑bhlo yi'i ‑soo, ɔ lä ‑naa 'tu ‑lä ‑mä ‑n wloo, nyɩkpɔ ‑bhlo ‑kʋ ‑lɔɔ. Ɔmɔɔ‑ plöö‑ lä Zudaa' 'lɔlʋkpaa 'kʋʋ jiee. Davidöö' lɔlʋʋ 'mnö ɔ ‑ghlää lä. Ɔmɔɔ‑ ‑sɩä lä tʋʋ. Nä, ɔmɔ, ɔ yi mii 'nɩ ɔ yi 'bɔɔgʋʋ' ‑abhluëköö ‑ngbɔɔsɔ wäta 'nɩ ɔ yiu welie.

⁶ ‑Mä n nä n wloo 'leyi‑këkpëa ‑yä mnaa' 'wlʋʋ ‑zizii ‑mɔɔnä ɩyä 'kɔgwlɛnyʋa nëëdë nä, 'bhabhlöyu 'nynigo‑ ‑mɔɔ 'nɩ ɔ ‑kʋ bhä nynä ‑lɔɔ wa ‑sää 'cibhi 'kʋ. Ɔ ‑kä bhä 'vü ‑ngbɔɔsɔ, 'nɩ ɔ ‑kä bhä 'yi ‑ngbɔɔsɔ. Ɩmɩɩ‑ plöö‑ lä Laagɔɔ' 'wugöö ‑ngbɔɔsɔ ʋ lobho lä 'ylʋzɔɔ' dää 'fɩɩn nä.

⁷ 'Nɩ ɔ yi 'yikʋ 'jloo. 'Nɩ nyɩkpɔɔ‑ ‑kʋ lä 'leyi‑këkpëa 'kʋ nä, ɔɔ' 'bɔɔgʋʋ ɔ bhɛɛ‑ bhlä lüüklää nä, ɔ yionyʋ 'nyɛ.

⁸ Ɔ bhlüü‑ ylä 'bɔɔgʋʋ 'kʋ nä, kä mnaa' 'wlʋʋ ‑zizii ‑mɔɔnä ‑yä 'kɔgwlɛnyʋaa' glʋ 'nɩ ‑mɔɔnä ‑gla 'wlu sä ‑lɔɔ 'Bhabhlöyuo dëlü. Waa' nyɩkpɔ nyɩkpɔ bhɛɛ‑ bhä ‑dʋnplʋ ‑yä ‑sikaa ‑dɔkɔɔ' lʋʋ‑ ‑kʋ lä ‑daŋwɩɩ nä. Kplɔɔkplɔɔnyʋa 'fɩɩn waa' bhibhie, ɛmɛɛ‑ ‑kʋɩ bhlä 'mnö.

⁹ Wa bhlɩ bhä ‑laagɔlʋ. ‑Laagɔlʋʋ' ‑lɛɛ lolu wa döö‑ bhlä. Wa bhlɩ bhä wlä, ‑Mɔɔ nä, ‑mɔɔ ‑ŋwa lä 'zaazɩ 'kʋ nynä ‑mä, Wa 'nyɛɛ 'bɔɔgʋʋ ‑yä ‑n 'gʋʋ ‑abhluëköö 'wäta. ‑Ɔnöza bhää? ‑Mɔɔ wa ‑sää lä 'cibhi 'kʋ. ‑Naa doluu 'mʋʋ‑ kplɩɩ‑ lä 'ylʋzɔɔ' nyɩkpaa 'fɩɩn 'mʋ Laagɔɔ' ‑za. ‑Mɔɔ' 'gbüü ‑yä ‑mɔɔ' nuwälɩɩ 'fɩɩn, ‑Mɔɔ 'lɔlʋkpɔɔ ‑yä 'ylʋzɔkʋnyʋa 'fɩɩn, ‑Naa doluu 'mʋʋ‑ kplɩwa lä 'mʋ.

¹⁰ ‑Mɔɔ ‑gbä lä 'nɩ wa plöö‑ ylä Laagɔɔ' 'Leyiduu 'mnö nyɩkpa 'Nɩ wa plöö‑ ylä Laagɔɔ' 'Cibhisänyʋä. 'Nɩ ‑dʋdʋʋ 'fɩɩn nä, wamää‑ 'gʋ ylä 'kämä.

¹¹ ‑Mä n ‑kʋ wloodä, 'nɩ n nuu‑ ‑Laagɔzizi ‑bhutukpä nuwälɩ. 'Leyi‑këkpëa, ‑yä mnaa' 'wlʋʋ ‑zizii, ‑yä 'kɔgwlɛnyʋa, ɩ ‑glänʋwa bhä 'klʋ. Ɩɩ' bhɔɔ ‑zunɔɔ 'bɛ. Ɩɩ' 'sää ‑lɛɛ ‑gbʋgbʋzɛɛ 'titi.

¹² ‑Mä ‑Laagɔzizinɩ bhlɩ bhä 'nɩ ɩ ci bhä nynä ‑mä, ‑Ɛɛɛ, 'Bhabhlöyuo wa ‑sää lä 'cibhie 'kʋ nä, Ɔmɔɔ‑ ‑ŋwa lä 'kʋ nynä ‑mä, ɔ kään 'päwaa 'fɩɩn, ‑Ɛɛɛ, ɔ kään leylüü 'fɩɩn, ‑yä ɔ bhɛɛ dɩgälɩɩ 'fɩɩn. ‑Ɛɛɛ, ɔ kään 'tɛtɩɩ 'fɩɩn, ‑yä 'klʋkpaa 'fɩɩn. Ɩyä 'klʋagbaa ‑yä 'ŋnumʋlɩ plöö‑ ɔɔ' dä!

¹³ 'Nɩ nʋnʋlɩɩ 'fɩɩn‑ ‑kʋ lä Laagɔduu' nä, 'nɩ ‑ɩ ‑kʋ lä 'sɩɩ ‑dʋdʋkʋ nä, 'nɩ ɩ ‑kʋ lä ‑mɔɔ glu nä, 'nɩ ‑ɩ ‑kʋ lä jiee' nä, ɩyä kʋkʋlɩɩ 'fɩɩn‑ ‑kʋ lä nä, n nuu‑ 'nɩ ɩ bhlɩ bhä nynä ‑mä, ‑Mɔɔ mɔ ‑ɔ ‑kʋ lä 'leyi‑këkpëa 'kʋ nä, ‑Mɔɔ ‑yä 'Bhabhlöyuo nä, ‑A fänö'anyɩ 'ŋnu! Ka ‑kʋ 'klʋkpää, 'Nɩ 'klʋagbaa plöö‑ anyɩa' dä, 'Nɩ a ‑kä 'päwä 'tänyɩ 'fɩɩn 'mnö ‑yä 'kɔɔkɔɔ' ‑za.

¹⁴ 'Nɩ ‑zizii ‑mɔɔnä ci bhä nynä ɩ kʋ sɔɔ! 'Nɩ 'kɔgwlɛnyʋa yi ‑kokoowli glu 'pä 'nɩ wa yi bʋbɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan