Bìoball air-loidhne

'Yii Ghlä‑wälɩ 4 - GOD - u2

Laagɔɔ' 'leyi‑këkpëa daa' bʋbɔɔlɩɩ

¹ ‑Nɩnɩ plöö‑ ylä nä, n nä n wloo nä, kplu känöɔ ‑mɔɔ ‑laagɔɔ'. 'Nɩ nuwälɩɩ n nuu‑ bhlä tɛɛ 'nɩ ɩ gbä bhlä nynä lɛglɛɛ nä, ɩ ‑sonö'ö, ɩ laa ‑n ‑gblää ‑mää ‑yä wälɩɩ‑ yi lä ‑mɔɔ 'yikʋ nä, n 'kä‑ä mɩɩ paa.

² ‑Mä 'kpobhu ‑bhlobhlo 'kʋ, Kplɔɔkplɔɔ‑wugɔɔ welie‑ 'naa 'wugɔɔ. N nä n wloo ‑laagɔɔ' nä, 'leyi‑këkpë. Nyɩkpɔ ‑kʋa bhä 'kʋ.

³ ‑Mä ‑ɔ ‑kʋa lä 'kʋ nä, ɔ lie bhä nynä ‑sikaa. ‑Lɔɔ' ‑sikaa‑cëa, wa laa ‑näna 'zapö 'nɩ wa laa ‑näna sadʋwanö. 'Nɩ 'leyi‑këkpëa ‑laagɔ 'bläbhli ‑binöa 'kʋ 'nɩ ɛ lie bhä nynä ‑sikaa wa laa lä emelodö nä.

⁴ ‑Maa, 'leyi‑këkpëa n nii‑ lä 'yi nä, 'leyi‑këkpüü' glʋ 'nɩ ‑mɔɔnä ‑glänöa bhä 'klʋ. 'Nɩ 'kɔgwlɛnyʋää' glʋ 'nɩ ‑mɔɔnä, wa ‑plä bhä 'kwëti 'päpɩ 'nɩ wa ‑kʋ bhä 'leyi‑këkpüü 'kʋ sä 'nɩ wa ŋʋʋ‑ 'leyi‑sikaa‑wugblü.

⁵ ‑Mä 'leyi‑këkpëa n nii‑ lä tɛɛ 'yi nä, ‑ŋnäzälö bha bhä 'mnö. 'Nɩ nuwälɩ ghlää bhä ‑mɔɔ, 'nɩ ‑laagɔ‑zädlɛ gaa bhä. Aa' dëlü 'näpö ‑ngbɔɔsɔ ŋnä bhä ‑lɔɔ. 'Näpönö ‑ngbɔɔsɔ, ɩmɩɩ‑ plöö‑ lä Laagɔɔ' 'wugöö ‑ngbɔɔsɔ.

⁶ 'Leyi‑këkpëa' ‑säkä ‑säkä dëlü, ‑n ‑näsä jie‑ ‑kʋ bhlä ‑lɔɔ nä. Ɛ 'lele bhä 'mʋ nynä kawlo. ‑Bʋkʋ 'nɩ 'leyi‑këkpënä aa' nëëdë ɩyä aa' yëku ‑mä 'sɩɩ, ‑mnaa' 'wlʋʋ ‑zizi ‑mɔɔnä ‑kʋmɔ ‑kʋmɔ bhä sɔɔ, 'nɩ ɩɩ' ‑lefɩɩn ‑kä bhä 'yi bhutukpä yëku. 'Yi ‑kʋɩ bhä 'klʋ, 'nɩ ‑nɩnɩ ‑kʋɩ bhä ‑gwë 'kʋ.

⁷ Tɛɛtɛɛ‑zuzu 'wlʋʋ‑ bhä ji. 'Sɔna‑lʋʋ 'wlʋʋ bhä ‑bhlüüyu. Tana‑lʋʋ ‑kä nyɩkpa klʋ. 'Nɩ ‑mɔɔnäna‑lʋʋ ‑kʋ bhä nynä mnɛgwli‑bhlä‑cɩcɛɛ' lɛɛ‑ bluu nä.

⁸ ‑Mä mnaa' 'wlʋʋ ‑zizi ‑mɔɔnä, ɩ ‑kä bhä ‑papü ‑ngboplo ‑ngboplo. 'Nɩ ‑papüü ‑ngboplo nä, ɩɩ' daa 'fɩɩn plöö‑ bhä 'yi. 'Yi ‑glänɩ 'klʋ, 'nɩ 'yi ‑kʋɩ bhä 'sɩɩ ‑zɔɔ. 'Nɩ ɩ ci bhä ylɩɩ 'fɩɩn 'kʋʋ ‑gägä‑zëlü ‑yä 'sabo nynä, Kä ‑n ‑kplɔɔ! Kä ‑n ‑kplɔɔ! Kä ‑n kplɔɔ! Kwlienyɔ Laagɔ‑! ‑Mɔɔ ‑zii lä 'tɛtɩɩ 'fɩɩn 'wlu. ‑Mɔɔ ‑kʋ bhlä, 'Nɩ ‑mɔɔ ‑kʋ lä, 'Nɩ ‑mɔɔ yi lä!

⁹ ‑Mä nyɩkpɔɔ‑ ‑kʋ bhlä 'leyi‑këkpëa 'mnö sä nä, 'nɩ ‑ɔ ‑yä lä 'kɔɔkɔɔ ‑za nä, 'tänyɩɩ 'fɩɩn 'mnö ‑mnaa' 'wlʋʋ ‑zizinɩ ‑mɔɔnä fänöɔ lä 'ŋnu, 'nɩ ɩ jäköɔ 'nɩ ɩ bhänöɔ lä nä,

¹⁰ kä 'kɔgwlɛnyʋaa' glʋ 'nɩ ‑mɔɔnä glɔɔ bhä dëlü 'wlu sä. Wa sä waa' 'leyi‑wugblüü 'wlu, 'nɩ wa pänɩ 'leyi‑këkpëa dëlü sä 'nɩ wa bʋbɔnöɔ. Wa ci bhä wlä,

¹¹ ‑Mɔɔ, ‑anyɩa Kwlienyɔɔ ‑yä ‑anyɩa Laagɔɔ, ‑n ‑ŋwa 'klʋagba 'kʋ! ‑Mɔɔ mʋ lä 'ŋnu 'nɩ ‑mɔɔ ‑kä lä 'päwaa. ‑Ɔnöza bhää? ‑mɔɔ ‑nʋ lä ‑lɩɩ 'fɩɩn‑ ‑kʋ lä 'ylʋzɔɔ nä. ‑Mɔɔ ‑waa lä nynä ‑mä ɩ kʋ nä, ɩɩ' ‑zä ɩ ‑kʋ lä. ‑Mɔɔ ‑nʋɩ lä ɩmɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan