Bìoball air-loidhne

'Yii Ghlä‑wälɩ 3 - GOD - u2

Sadöduu' 'cɔcɩgbëa' 'bɔɔgʋ

¹ ‑N fä Sadöduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlʋ nynä ‑mä, ‑ɔ bhɛɛ‑ lä Laagɔɔ' 'wugöö ‑ngbɔɔsɔ nä, 'nɩ ɔ bhɛɛ‑ lä ‑laagɔzäloyii ‑ngbɔɔsɔ nä, ‑n ni wälɩklëa ɔ cii‑ lä nä, ɔ laa, n ‑yi lebhee ‑n nʋ lä nä. Wa bhobho nynä ‑mä ‑n ‑yä, ‑mä kä ‑n kuu‑ lä!

² Nä ‑n gblɩmä yɩ! ‑Naa nyɩkpaa' ‑lʋa ‑wa ‑kʋ lä 'kwiee numnu 'kʋ nä, ‑n 'ŋʋwa 'tɛtɩɩ. ‑Maa, n bɩä lä ‑naa nʋnʋgbɩɩ nä, ɩɩ' ‑wʋ 'naa Laagɔɔ 'yikʋ ‑kplɔɔ.

³ Laagɔwälɩɩ ‑n nuu‑ lä 'nɩ wa cɩä‑ä lä nä, ‑n luë yɩ ɩɩ' dä 'kʋ. ‑N klä ‑lɔɔ' cɩalɩɩ sä ‑yä ‑n ‑bha nyenyi ‑blɔɔ 'kʋ. ‑N 'nö ‑kä ‑gblɩmä nä, n yi ‑kä yi nynä 'ghüghünyɔ 'nɩ n yi‑i ‑zɔɔ 'vu. 'Gliyee 'mnö n 'kä‑ä lä ‑zɔɔ 'vu nä, ‑n 'nɩɛ ‑lä 'kɔɔn yibhë.

⁴ ‑Mä ‑mɔɔ Sadöduu' 'cɔcɩnyʋa nëëdë nyɩkpa zio ‑kʋ ‑mɔɔ 'nɩ waa' ‑wʋ waa' 'kwëtii pee ‑plaa. Wamä nä, wa yi 'kwëti 'päpɩ plä 'nɩ wa ‑ya ‑amʋ 'sɔ yi 'kʋ nämnö. Wa ‑ŋwa sɔɔ 'kʋ.

⁵ Nyɩkpɔɔ' ‑lɔmɔɔ ‑ɔnö sɔɔ‑ yi lä 'kʋ zi nä, ɔ yi 'kwëti 'päpɩɩ plä. 'Nɩ ɔɔ' 'ŋnöö nä, n 'nɩɩ ‑lä 'kɔɔn 'pʋpʋɛɛ 'bɔɔgʋʋ 'mnö ‑sä. N yi n 'Bä ‑yä ɔɔ' ‑zizii 'sɔ dëlü ci nynä ‑mä, nyɩkpɔnɔ ‑glö 'naa lɔɔ.

⁶ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli!

Filadɛfiiduu' 'cɔcɩgbëa' 'bɔɔgʋ

⁷ ‑N fä Filadɛfiiduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlʋ nynä ‑mä, Kplɔɔkplɔɔnyɔɔ, ɩyä ‑Nʋawlɛɛnyɔɔ, ɔmɔ mɔ ‑ɔ ‑kä lä 'loyo Davidöö' 'gbëa 'säfɛɛ nä, 'nɩ ‑ɔ gä ylä ‑kään 'nɩ nyɩkpɔɔ' ‑läyɩɔ lä tʋlɩ mii nä, 'nɩ ‑ɔ gä ylä gbaa‑ 'nɩ nyɩkpɔɔ' ‑lä lä käälɩ mii nä, ‑n ni wälɩklëa ɔ cii‑ lä nä,

⁸ ɔ laa nʋnʋgbɩɩ 'fɩɩn ‑n ‑nʋ lä nä, n ‑yii. Wloo ‑naa 'yikʋ ‑mä, n yä ‑mɔɔ kplu kään. ‑Ʋ ‑glö kpluu' lʋʋ nyɩkpɔɔ' ‑lä lä 'kɔɔn ‑gbaalɩ mii nä. 'Tɛtɩɩ ‑n ‑kä lä nä, ɩɩ' ‑wʋ ‑zu ‑mä, ɩ ‑kʋ sɔɔ 'nɩ ‑n bhɛnö 'naa ciciwälɩɩ pleyii 'nɩ ‑nn ‑wʋ 'naa 'ŋnöö cɛɛ‑.

⁹ ‑N ni 'Dëvloo' bʋbɔdaa' nyɩkpaa, n yä‑ä mʋwa 'nyɛ. Wlä 'Zufʋnyʋä wa plöö‑ ‑mä waa' ‑wʋ 'Zufʋnyʋä plöö‑. Wa ‑glö ‑kpläkplönyʋä nä, ‑n ni kä n 'kwa lä nyepi nyepi klä. Wa yi yi 'nɩ wa yi‑i ‑kokoowli dëlü glu 'pä. ‑Lɔɔ wa yi lä sɔɔ yibhë nynä ‑mä, ‑amʋ, kä n ‑wää.

¹⁰ Sä ‑n nämnö lä 'naa ciciwälɩɩ 'mnö nä, ɩ ‑kä yɩ 'ŋnö 'nɩ ‑amʋ ‑mä 'sɩɩ, n yi‑i 'kʋ wloo, 'nɩ mielɩɩ‑ 'gä lä ‑mää 'ylʋnʋzɔɔ' dää 'fɩɩn yi ‑yä ɩ 'gä lä 'ylʋzɔkʋnyʋä gbɩɩ' ylaa nä, ɩ 'nö‑ö ‑lä 'kʋ ŋëë.

¹¹ ‑Ɔ ‑too ‑kɛ 'pɛpɛ ‑yä n 'kä yi. Nä ‑naa dä ‑n ‑klä lä sä nä, ‑n klä ‑lɔɔ sä 'nägäsä ‑yä nyɩkpɔɔ' kä‑ä ‑kä ‑naa ‑ajɛɛkpaa ‑sä.

¹² Nyɩkpɔɔ' ‑lɔmɔɔ ‑ɔnö sɔɔ‑ yi lä 'kʋ zi nä, n yi gbä 'nɩ ɔ yi n 'Bä Laagɔɔ' ‑bhutu 'kädʋʋ 'mnö sii nëëdëë' kwë 'plö 'nɩ ɔɔ' ‑läyɩ 'kɔɔn ‑mɔɔ ‑bha. ‑Lɔɔ' nyɩkpɔɔ nä, n yio 'naa Laagɔɔ' 'ŋnöö yëku jɩjlä, 'nɩ n yio 'naa Laagɔɔ' 'duu 'ŋnö yëku jɩjlä. ‑Lɔɔ 'duu 'mʋʋ‑ plöö‑ lä Zolizalɛmʋdu‑ ‑loluu. Ʋmʋʋ‑ ‑bha lä ‑mɔɔ 'naa Laagɔɔ yëku 'nɩ ‑ʋ kwli lä. 'Nɩ n yio 'sɩɩ 'naa 'ŋnö lëlii yëku jɩjlä.

¹³ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli!

Lawodiseeduu' 'cɔcɩgbëa' 'bɔɔgʋ

¹⁴ ‑N fä Lawodiseeduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlʋ nynä ‑mä, wa laa lä Laagɔɔ' ‑Ɛɛɛ nä, ɔmɔ mɔɔ‑ lü lä ‑dläfʋɛ kɔɔkɔ, 'nɩ ɔ plöö‑ lä nyaasäsä, 'nɩ ‑ɔ ‑gbä 'nɩ Laagɔ ‑nʋ lä ‑lɩɩ 'fɩɩn nä, ‑n ni wälɩklëa ɔ cii‑ lä nä,

¹⁵ ɔ laa, nʋnʋgbɩɩ 'fɩɩn ‑n nʋ lä nä, n ‑yii. ‑Nn ‑wʋ ‑wɔtɔ, 'nɩ ‑nn ‑wʋ ‑su. ‑N gä bhä ‑wɔtɔ nä, ɩ nää bhɛɛ! 'Nɩ kä ‑n gä bhä 'sɩɩ ‑su nä, ɩ nää bhɛɛ!

¹⁶ ‑Mä kä ‑n ‑kʋ lä 'kpëë 'kpëë. Nä, sä ‑nn ‑wʋ lä ‑wɔtɔ, 'nɩ ‑nn ‑wʋ lä 'sɩɩ ‑su nä, kä n 'kä‑ä lä gwäsɛ.

¹⁷ Kä ‑n ci lä nynä ‑mä kä ‑n ‑kä lɩ. ‑N ‑nä n ‑kä lɩ 'nɩ n yä n yëku leylü kʋ kwliee nä, nn' bɔɔ yɩɔ lʋʋ. Kä ‑n ‑kä lä ŋäzö 'kʋ. ‑Muzuee' ‑n ‑kʋ lä ‑mä ‑nn ‑wʋ sɔɔ ‑yi. Ŋäzö bhlä‑ä lä, 'nɩ ‑n doo‑ wlu, 'nɩ ‑n ‑kʋ lä 'yikpüü.

¹⁸ Ɩ ‑kä ylä 'ŋnö nä, n 'kä‑ä yɩ dɩgälɩ 'pää. ‑N yi ‑yä ‑n zɔɔ 'naa duu' ‑sikaa ‑mä, amä ‑kosuu ‑ŋu lä 'nägäsä, 'nɩ amää‑ ‑kplɔɔ lä. ‑Lɔɔ ‑tɛɛ ‑n yi lä lɩ kään. ‑N yi ‑yä ‑n zɔɔ 'naa duu 'kwëti 'päpɩ ‑yä ‑n 'gä yloo ‑yä ‑naa 'mëklëa' zoo 'kä ‑lɔɔ ‑bha. ‑N yi 'naa duu' ‑yä ‑n zɔɔ 'yii gwäzö ‑yä ‑n 'gä 'yii pään, ‑yä ‑n 'gä sä 'ni wɩa.

¹⁹ ‑Amʋ nä, nyɩkpa 'fɩɩn n ‑waa lä nä, kä n bhuwa ‑kɔkwɩ, 'nɩ n sʋwa 'sɩɩ gbäylö. Nä, ‑n 'ylɩbhɔ ‑yä ‑n ‑bha ‑naa nyenyii 'mnö ‑yä ‑n sumë 'kʋ!

²⁰ ‑N ni 'yi ‑a, n 'nynigo‑ ‑glënë 'kʋ 'nɩ n bhütë. Nyɩkpɔ kä 'naa nuwälɩɩ nuu‑ 'nɩ ɔ kä'ä gbë ‑kään nä, n yi ɔɔ' daa plä. N ‑yɔsɔ yi 'kʋ lüü, 'nɩ ɔ ‑yä ‑amʋ 'sɔ yi 'kʋ lüü.

²¹ Sä 'naa sɔɔ ‑zi lä 'kʋ, 'nɩ n ‑yä n 'Bä 'sɔ ‑kʋ lä ɔɔ' 'leyi‑këpëa 'kʋ sä nä, sɔɔ ‑säkä ‑säkä, nyɩkpɔɔ' ‑lɔmɔ ‑ɔnö sɔɔ‑ yi lä 'kʋ zi nä, n ‑yɔsɔ yi 'naa 'leyi‑këkpëa 'kʋ sä kʋ.

²² ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan