Bìoball air-loidhne

'Yii Ghlä‑wälɩ 2 - GOD - u2

Efɛzɩduu' 'cɔcɩgbëa' 'bɔɔgʋ

¹ ‑N fä Efɛzɩduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlʋ nynä ‑mä, ‑ɔ bhɛɛ‑ lä ‑laagɔzälöyii ‑ngbɔɔsɔ lüüklää' 'nɩ ‑ɔ nämnö lä ‑sikaa' 'näpöö ‑ngbɔɔsɔ nëëdë nä, ‑n ni wälɩklëa ɔ cii‑ lä nä.

² Ɔ laa, 'klüü 'fɩɩn ‑n nʋ lä nä, n ‑yii. 'Nɩ n ni 'sɩɩ ‑naa nyäkälɩɩ 'yi, 'nɩ n ‑yi sɔɔ nynä ‑mä kä ‑n 'tɛ plɛkʋ. N ‑yi 'sɩɩ sɔɔ nynä ‑mä ‑abhlɛɛnyʋa nä, ‑nn ‑wʋ waa' wälɩ 'kʋ mɛɛ. ‑Nänʋä ci nynä ‑mä wa ‑glö Laagɔɔ' lobho lobhonyʋä, ‑mä Laagɔ 'nʋwa ‑wʋ ‑lobho. ‑N nii‑ waa' kʋkʋsaa 'yi, 'nɩ ‑n ‑yibhë 'sɔɔ nynä ‑mä wa ‑glö ‑kpläkplönyʋä.

³ ‑Ɛɛɛ, ‑n ‑yi 'zaazɩ ‑bɛɛsä. ‑N nii‑ nyäkälɩ ‑bhutukpä 'naa ‑za, ‑mä plɛ 'nö‑ö ‑wʋ 'kpɔsɔ‑.

⁴ ‑Maa, ‑n ‑kä 'cë ‑bhlo nä, ‑aa ‑kɔkwɩ n 'kä‑ä lä bhoo. Amää‑ plöö‑ lä nynä ‑mä, n cie bhlä 'kʋ nä, ɩɩ' sä ‑n ‑wää'ä bhlä nä, ‑n nö'ö yɩɔ sɔɔ ‑waa.

⁵ Nä, ‑n 'pä plɛ ‑yä dä ‑n 'bhää‑ 'nɩ ‑n ‑bhlü lä ‑zɔɔ nä, ‑n 'gä ‑lɔɔ' dä 'kʋ luë. Ɩyä ‑n 'ylɩbhɔ ‑yä sä ‑n nʋ bhlä ‑bhɔɔdää 'naa ‑za nä, ‑n nʋ yɩ bʋkʋ sɔɔ. ‑N 'nö ‑kä 'ylɩbhɔ‑ nä, n yii yëku yi 'nɩ ‑naa 'näpɛɛ n yi‑i mɛ yëku ‑sä!

⁶ ‑Mä, ‑n ni 'yi ‑a, ‑n ‑kä 'cë ‑bhlo 'nɩ a nää‑. Amää‑ plöö‑ lä nynä ‑mä, Nikolayitö‑jɛnyɩɛɛ' nʋnʋgbɩɩ, sä ‑n ‑zʋɩ lä nä, sɔɔ ‑amʋ ‑mä 'sɩɩ kä n ‑zʋɩ.

⁷ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli! Nyɩkpɔɔ' ‑lɔmɔɔ ‑ɔnö sɔɔ‑ yi lä 'kʋ zi nä, 'pʋpʋɛɛ suu‑ ‑kʋ Laagɔɔ' ‑gboo 'mnö nä, n yio ʋʋ' 'bhë 'nyɛ 'nɩ ɔ yia lü.

Siminöduu' 'cɔcɩgbëa' 'bɔɔgʋ

⁸ ‑N fä Siminöduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlä nynä ‑mä, ‑ɔ ‑kʋ lä Ciedää, 'nɩ ɔ ‑kʋ lä Bhɩädää nä, ɔmɔ mɔ ‑ɔ kuu‑ bhlä 'nɩ ɔ ‑glɔɔ ylä 'kuëë nä, ‑n ni wälɩklëa ɔ cii‑ lä nä.

⁹ Ɔ laa, n ‑yi sä ‑n ‑kʋ lä 'kwlɩkabhɩä ‑yä ŋäzöö' nä. ‑Ɛɛɛ, ɩ ‑kʋ 'zaazɩ sɔɔ ‑mä, kä ‑n ‑kä leylü! N ‑yi sɔɔ nynä ‑mä nyɩkpaa' ‑wʋ ‑naa wälɩ 'kʋ mɛɛ, 'nɩ wa 'luglu‑u, ‑bhlɛ wlä 'Zufʋnyʋä‑ wa plöö‑. Waa' ‑wʋ 'Zufʋnyʋä plöö‑, ‑mä wa ‑glö 'Dëvloo' bʋbɔdaa' nyɩkpaa.

¹⁰ ‑N ni 'yi naa, 'kwlɩ yi‑i bhɩä ‑mä, ‑naa ‑guu ‑lä ‑kä. Wloo, 'Dëvlo yi anyɩa' nëëdëë bhloobhlolʋä ‑jɩɩ' 'pä nynä a 'kä 'kwlɩkabhɩä 'ni. A yi ylɩɩ 'kʋgbä 'mnö nyäkälɩ 'kädɩ 'nii. ‑Mä ‑naa dä ‑n ‑klä lä sä nä, ‑naa ‑sä lä ‑lɔɔ wlɩ! ‑N klä sɔɔ sä ‑aaa ‑yä ‑naa 'kwiee 'tänyɩɩ 'kä ŋëë ‑mä, n yii 'pʋpʋɛɛ' ‑ajɛɛkpa 'nyɛ.

¹¹ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli! Nyɩkpɔɔ' ‑lɔmɔ ‑ɔnö sɔɔ‑ yi lä 'kʋ zi nä, 'sɔnadaa' 'kwiee ɔ 'nɩɛ ‑lä 'kumʋ.

Pɛgamöduu' 'cɔcɩgbëa' 'bɔɔgʋ

¹² ‑N fä Pɛgamöduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlä nynä ‑mä, ‑ɔ bhɛɛ‑ lä ‑jlɛɛ pɔɔ‑ lä 'mɛnʋ 'nɩ ‑ɛ 'nɛnöɔ‑ lä 'pɛlɩɩ 'sɔ 'kʋ nä,

¹³ ɔ laa n yi dä ‑n goo lä nä. Dä ‑n goo lä nä, ‑lɔɔ 'Dëvloo' ‑jɛnyɩɛɛ' 'wlu kwätaa ‑kʋ lä. 'Nɩ 'naa 'kɔɔkɔɔ ‑dläfʋɛlünyɔ Atipasö nä, ‑lɔɔ anyɩa' dää, ‑lɔɔ dä 'Dëvloo ‑kʋ lä nä, ‑lɔɔ wa 'bhlänöɔ lä. ‑Mä, ɩ ‑kʋ sɔɔ 'nɩ ‑nn ‑wʋ 'naa 'ŋnöö cɛɛ‑ 'nɩ ‑n ‑kä 'kɔɔkɔ 'naa pɔlötɛtɛ.

¹⁴ ‑Mä, ‑n ‑kä 'cë ‑bhlo nä, aa' ‑zä n 'kä‑ä lä ‑kɔkwɩ bhoo. Amää‑ plöö‑ lä nynä ‑mä, nyɩkpa ‑kʋʋ ‑mɔɔ yëku 'nɩ wa gëë‑ Balamʋʋ' ‑dɔɔ 'kʋ. Kä Balamʋ ‑soo bhlä Balakö nynä ‑mä ɔ tlaa 'Yizlɛnyʋä ‑gbosu. Ɔ ‑sonöɔ nynä ‑mä ɔ nʋ saa 'fɩɩn ‑yä wa 'kä ‑zlüü ‑kʋkɔɔ 'mnö 'cicibhisä‑mna lü ‑kää mʋ ‑yä wa kä 'sɩɩ ‑käpä ‑käpä nää.

¹⁵ Bʋkʋ 'nɩ, nyɩkpa ‑kʋ‑ʋ 'sɩɩ ‑mɔɔ yëku, 'nɩ wa gëë‑ Nikolayitö‑jɛnyɩɛ mnö nyɩkpaa' cɩalɩɩ 'kʋ.

¹⁶ Nä, ‑n 'ylɩbhɔ! ‑N 'nö ‑kä 'ylɩbhɔ‑ nä, ‑ɔ ‑too 'pɛpɛ ‑yä n 'kä ‑naa daa yi, ɩyä ‑jlɛɛ ‑ɛ ghlänö'ö lä nëë' nä, n 'kɛ 'kʋ 'bhlü ‑yä n kwa tʋ lä.

¹⁷ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli! Nyɩkpɔɔ' ‑lɔmɔ ‑ɔnö sɔɔ‑ yi lä 'kʋ zi nä, Laagɔduu' 'flɔɔ ‑ʋ ‑zizio lä ‑mɔɔ nä, n yionyʋ 'nyɛ. N yio cɛkʋyu 'pɔpɔ 'nyɛ. Cɛkʋyu 'pɔpɔnɔ 'klʋ 'ŋnö ‑jɩjlɔ ‑lɔɔ, ɩɩ' ‑lɛɛ leli. ‑Lɔɔ' 'ŋnöö nä, ‑ɔ 'gä lä cɛkʋyuo kään nä, ɔmɔ ‑bhlo coo‑ 'gɩ lä yibhë ‑mä 'yigäda‑nyɩkpɔ 'nɩ ‑lä yibhë.

Tɩatiiduu' 'cɔcɩgbëa' 'bɔɔgʋ

¹⁸ ‑N fä Tɩatiiduu' 'cɔcɩgbëa' ‑Laagɔzuzuu 'bɔɔgʋ! ‑N jɩjlä nynä ‑mä, ‑n ni Laagɔ ‑Yowli, ‑ɔnö 'yii‑ ŋnä lä nynä ‑kosuu nä, 'nɩ ‑ɔnö ‑kokokpüü‑ lie lä nynä lätöyi ‑slo wa ‑kplä ‑kosuu' nä, ɔ cii‑,

¹⁹ ɔ laa, sa 'fɩɩn ‑n nʋ lä nä, n ‑yi sɔɔ. ‑Naa ‑wawʋʋ, ‑yä ‑naa pɔlötɛtɛɛ, ‑yä ‑naa lobholɩɩ, n nii 'yi. 'Nɩ n ‑yi sɔɔ nynä ‑mä ‑n ‑yi ‑bɛɛsä. Bʋkʋ 'nɩ, ‑naa bhɩädänää' 'nägägbɩɩ ‑n nʋ lä nä, ɩ yä zumë kpänyɩ 'nɩ ɩ yä ‑naa tɛɛtɛɛlɩɩ 'kʋ zi.

²⁰ ‑Mä ‑n ‑kä 'cë ‑bhlo nä, aa' ‑zä n 'kä‑ä lä ‑kɔkwɩ bhoo. 'Ŋnɔɔ wa laa lä Zezabɛlö 'nɩ ‑ɔ ci lä nynä ‑mä Laagɔ cinöɔ nëë' nä, kä ‑n tanöɔ 'yi 'nɩ ɔ cɩa, 'nɩ ɔ 'nyigë 'naa ‑gänʋnyʋa. Ɔ cɩa nynä ‑mä wa nää ‑käpä ‑käpä ‑ɩyä wa mʋ ‑zlüü ‑kʋkɔɔ 'mnö 'cibhisä‑mna lü ‑kää.

²¹ N nyɩɔ‑ 'tänyɩ ‑yä ɔ 'kä 'ylɩbhɔ ‑yä ɔ 'kä ‑käpä ‑käpaa 'mnö ‑bha, ‑mä ɔɔ' ‑wʋ ŋoo‑.

²² Ɩ ‑kä ylä 'ŋnö nä, kä n 'kɔ lä 'kwlɩkabhɩä kädaa' ‑gbëtü 'kʋ puë. 'Nɩ ‑lʋa ɔ ‑yʋwa 'sɔ goo lä nä, wa 'nö gbenyenyii 'mnö ‑bha nä, wa ‑yɔsɔ yi nyäkälɩ 'ni.

²³ N yi gbä 'nɩ ɔɔ' 'yua yi 'ku. 'Nɩ 'cɔcɩgbüü 'fɩɩn yi sɔɔ yibhë nynä ‑mä, ‑amʋ nä, kä n ‑yi nyɩkpɔɔ' pleyii wälɩ. Sä nyɩkpɔ bhobho lä nä, n ‑yi sɔɔ. Ɩ ‑kä ylä 'ŋnö nä, sä nyɩkpɔ nyɩkpɔ ‑ŋwa lä 'kʋ nä, n yio sɔɔ plʋʋ.

²⁴ ‑Mä anyɩ Tɩatiiduu' 'cɔcɩnyʋa‑ ‑too ylä ‑mɔɔ nä, aa' ‑wʋ ɔɔ' cɩalɩɩ 'kʋ ŋoo‑. 'Dëvloo' cɩalɩɩ wa ci lä nynä ‑mä kɩ ‑tlʋ 'mʋ nä, a 'nɩɩ ‑wʋ 'mänyɩ‑ nä, anyɩ, n nö'anyɩ lä ‑gbaakʋʋ' 'yigädalʋ sluë.

²⁵ Nä, daa ‑klä lä sä nä, a klä ‑lɔɔ sä klɩ klɩ klɩ ‑aaa ‑yä 'naa yi‑tänyɩɛ 'kä ŋëë.

²⁶ Nyɩkpɔɔ' ‑lɔmɔ ‑ɔnö sɔɔ‑ yi lä 'kʋ zi nä, 'nɩ ‑ɔ yi lä 'naa lebhee nʋdä kʋ ‑aaa 'nɩ bhɩäylʋʋ yi lä ŋëë nä, n yio 'päwä 'nyɛ 'nɩ ɔ yi 'ylʋnʋzɔɔ' 'bhlɩɩ 'kämä.

²⁷ Ɔ yi lätö ‑gblɩye bhɛɛ 'nɩ ɔ yi 'bhlɩɩ 'tie 'nɩ ɔ yii 'kämä nyëpi nyëpi ‑aaa, 'nɩ ɩ yio wlɩɩ' wʋwɔɔ nynä maa‑nyidë wa wlä. ‑Lɔɔ' 'päwaa 'mä n 'Bä nyɛɛ'ɛ lä.

²⁸ ‑Lɔɔ nyɩkpɔɔ nä, zözädaa' 'cʋŋnɔ‑gbäka ‑a lie lä nä, n yionya 'nyɛ.

²⁹ ‑Ɔ gä 'nyukwli ‑kä nä, Kplɔɔkplɔɔ‑wugɔɔ kä 'cɔcɩgbüü soo nä, ɔ poo 'nyukwli!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan