Bìoball air-loidhne

'Yii Ghlä‑wälɩ 18 - GOD - u2

Babilɔɔ‑duu yä bhlü

¹ ‑Nɩnɩ 'fɩɩn plöö‑ ylä nä, n nii‑ bʋkʋ ‑Laagɔzuzu 'yi 'nɩ ʋ ‑bha ‑laagɔɔ' 'nɩ ʋ kwlii‑. Ʋ ‑kä bhä 'sää 'päwä kpänyɩ. 'Nɩ ʋʋ 'klʋagba yi ‑dʋdʋʋ 'fɩɩn 'kʋ ŋänɩä.

² 'Nɩ ʋ yi wälɩ 'pä, ʋʋ' nuwälɩɩ ‑kä bhä 'sää 'tɛtɩ kpänyɩ. Ʋ lä, Ʋ yä bhlü! 'Du 'kädʋʋ wa laa lä Babilɔɔ nä, Ʋ yä bhlü! Ʋ ‑glö yɩ ‑zizinyenyii' kʋdä. Ʋ ‑glö yɩ ‑zizinyenyii 'fɩɩn ziziodä. Nümnüü 'fɩɩn ‑ɩɩ ‑wʋ lä ‑kplɔɔ 'Nɩ ɩ ‑kä lä sɩsɩ 'kʋ nä, Lɔɔ‑ plöö‑ ylä ɩɩ' kʋdä!

³ 'Ylʋzɔkʋnyʋä yä ɔɔ' wlu‑ylälɩɩ ‑yä ŋnʋ‑ylälɩɩ' gbʋgblɛ‑nʋʋ 'mnä. 'Ylʋzɔɔ' 'loyua 'fɩɩn wa ‑yɔsɔ yä goo. 'Nɩ gbʋnɔɔ' leylüü ɔ ‑kä lä nä, ‑Mää 'ylʋzɔɔ' ‑lɛɛ‑kpäŋʋnyʋa, Wa 'ninɩɩ leylü 'mnö.

⁴ 'Nɩ n yi bʋkʋ nuwälɩɩ' 'yigädalɩɩ 'nu. Ɩ ‑ghlää ‑laagɔɔ' 'nɩ ɩ cii‑, ɩ lä 'naa nyʋänyɩ‑, a ‑bha Babilɔɔ‑duu 'mnö ‑mä waa' ka'anyɩ mʋ ‑kä 'cäkä ʋʋ' nyenyii' ‑za. 'Kwlɩkaabhɩa‑ 'gʋ lä ŋëë nä, aa' ka'anyɩ ‑kä 'sɩɩ ŋëë mʋ.

⁵ 'Dunʋʋ' nyenyii paa‑ 'sää 'gbʋ ‑aaa, 'nɩ ʋ 'taa‑ Laagɔduu'. Ʋʋ' nyenyii Laagɔɔ 'nɩ ‑wʋ 'kʋ ‑bë.

⁶ Sʋ ‑klä lä ʋ ‑liesɩɩ nä, anyɩ ‑mä a klʋ sɔɔ. Sä ʋ ‑nʋ lä nä, a plʋnʋ sɔɔ 'ci 'sɔɔ 'kʋ. Sä ʋ nyɛ bhlä ʋ ‑liesɩ 'bhläbhlä nʋ nä, nʋʋ' lʋʋ‑ ‑ʋnö 'bhlälɩ‑ zi lä ʋʋ' ‑lʋʋ 'ci 'sɔ 'kʋ nä, a jɛɛnʋ ʋʋ' pliie 'mnö.

⁷ A gbä ‑yä ʋ 'ni nyäkälɩ ‑yä mielɩ 'kädɩ ‑mä ʋ yä bhɛ 'klʋagbaa ‑yä 'nää 'kädä 'sɔ 'ni. Kʋ soo lä ʋ yëku nynä ‑mä, ʋmʋ nä, 'kʋ 'kämä lä nynä 'leyiŋnɔ. 'Nɩ ʋ ci lä nynä ‑mä ʋʋ' ‑wʋ 'kuzëlüŋnɔ plöö‑, 'nɩ 'kwiee ‑lä 'kɔɔn ʋʋ' nyɔ 'bhlä.

⁸ ‑Nɩnɩ 'mɩɩ‑ ‑kä lä 'ŋnö 'nɩ mielɩɩ 'fɩɩn Laagɔ ŋʋʋ‑ lä nynä ‑mä ʋ yi 'ni nä, ylʋʋ ‑bhloo' zëlüü ɩ yiu ‑zɔɔ 'vu. 'Kwie yiu 'bhlä, 'nɩ ɛ yi ʋʋ' nyʋä 'bhlä. 'Nɩ ‑gbugbe yiu 'bhlä. 'Nɩ ‑kosu yiu sie 'fɩɩn. Ɔnöza bhä? Kwlienyɔɔ, 'tɛtɩ ‑kää Laagɔɔ, ɔmɔɔ‑ ŋʋʋ‑ lä ‑lɔɔ' 'titee.

⁹ 'Ylʋzɔɔ' 'loyua 'fɩɩn ‑wa ‑yɔsɔ ‑nʋ bhlä ‑lɔɔ' 'kʋtɛtʋgbɩɩ, 'nɩ ‑wa ‑kʋ bhlä 'nää nëëdë nä, 'tänyɩɩ wa 'kä lä 'duu sidaa' gboyloo 'yi 'ni nä, wa yi 'tu 'nɩ wa yi bhʋtʋ ʋʋ' ‑za.

¹⁰ Wa yi gwë zie, nynä ‑mä ʋʋ' 'kplëa kwa ‑kä 'kʋ ŋëë. 'Nɩ wa yi ci nynä ‑mä, 'kplë yä‑ä slää! 'Kplë yä‑ä slää! 'Oo, ‑mɔɔ Babilɔɔ, ‑mɔɔ plöö‑ bhlä 'du 'kädʋ 'nɩ ɔ ‑kä bhlä 'tɛtɩɩ nä, 'gliye ‑bhlo 'coo 'mnö, Laagɔ ‑yi 'nɩ ʋ yä‑ä gbʋ klaa.

¹¹ 'Nɩ 'ylʋzɔɔ' ‑lɛɛ‑kpäŋʋnyʋa ‑mä 'sɩɩ, wa 'tumʋ 'nɩ wa bhʋtʋ bhä 'sɩɩ 'duu ‑za, ‑ɔnöza bhä? Waa' ‑lɩɩ wa ŋʋ lä 'kpä nä, nyɩkpɔɔ' zɔmʋɩ yɩɔ.

¹² ‑Sikaa, monii, 'ŋnumʋ‑cɛkwɩɩ, lɔlɔgbälɩɩ, ‑lapeli ‑yä lokwüü' nü nü nü. Pipi‑lokwüü zälö, 'wɛtɛ 'wɛtɛ ‑lokwüü, 'ŋwänɩpä‑sii' kpʋkpɔɔ, 'ŋʋʋ yɩ lɔglaa wa ‑tɛɛ lä nä. Ɩyä 'kläpʋsii ‑ɩ mʋ lä 'ŋnu nä. Ɩyä ‑sikaa ‑zlä, ɩyä lätö, ɩyä 'ŋnumʋ‑simitii' cɛkwɩ.

¹³ Waa' 'ŋwänɩ‑nyakpɩɩ ‑ɩ zäka lä 'nyoonyuu nä, 'ŋʋʋ yɩ ‑kätawlɛ ‑yä ‑daŋwɩɩ' nü nü nü. 'Ŋʋʋ yɩ 'kpüü, ɩyä 'flɔɔ‑bhʋbhʋʋ, ɩyä ‑nyʋʋ 'kädʋʋ. Waa' ‑dodobhlüü ‑yä, 'bhabhlöö ɩyä waa' ‑kpängwɩɩ ‑yä waa' ‑kpängwɩ‑jlütomobüü, waa' geyua ‑yä waa' ‑jɩɩnyʋa.

¹⁴ ‑Mä 'kpä‑ŋʋnyʋänä ci bhä, wlä 'nää 'fɩɩn ‑naa 'wugɔɔ tään bhlä nä, a yä mnɔ 'fɩɩn. A yä‑ä yɩ gwë ‑sä fɛɛn fɛɛn! ‑Naa leylüü, ‑yä ‑naa 'nää 'fɩɩn ‑n ‑kʋ bhlä 'mnö nä, ɩ yä yɩ too! ‑N 'nɩɩ ‑läyɩ 'kɔɔn 'ni!

¹⁵ Nyɩkpaa‑ ŋʋ bhlä ‑naa ‑adäbhlaa 'kʋ 'kpä 'nɩ ‑wa ‑lü bhlä leylüü nä, wa yi 'duu 'mnö ‑bha 'nɩ wa yi gwë zie 'nɩ nyäkälɩɩ‑ 'gä lä 'duu ŋëë nä, ɩ yiwa ‑ŋänö plaa. 'Nɩ wa yi 'tu 'nɩ wa yi bhʋtʋ.

¹⁶ Wa yi ci nynä ‑mä, 'kplë yʋ slää! 'Kplë yʋ slää! 'Duu‑ plöö‑ bhlä 'du 'kädʋʋ nä, ʋmʋʋ‑ ‑kʋ yɩ lä ‑a! 'Duu ‑ʋ gbëbie bhlä ‑lapeli ‑lokwüü nä, 'nɩ ‑ʋ gbëbie bhlä pipi‑lokwü ‑zälöö nä, 'dunʋ ‑ʋnö gbëbie‑lokwüü 'wɛtɛ bhlä nä, 'nɩ ‑ʋ gbëbie bhlä ‑sikaa 'nɩ ‑ʋ yloo bhlä 'ŋnumʋ‑semedi ‑yä 'ŋnumʋ‑bɔlöyʋʋ nä, ʋmʋʋ‑ ‑kʋ yɩ ‑lää ‑a!

¹⁷ Ʋ bhlüü‑ 'gliye ‑bhlo 'coo 'kʋ 'nɩ ʋʋ' leylüü 'fɩɩn yi nuë! ‑Maa, jie 'klʋʋ 'mɩɩ 'tienyʋa 'fɩɩn, wa ‑yä nyɩkpa 'fɩɩn‑ ghlää lä jie 'klʋ nä, ɩyä ‑lʋa 'fɩɩn‑ nʋ lä jie 'klʋ lebhe, 'nɩ ‑wa sä lä jie 'klʋ 'nɩ ‑wa lü lä nä, waa' ‑lefɩɩn, wa ‑zie bhɛ gwë fɛɛn 'nɩ wa wloo bhä 'duu.

¹⁸ ‑Mä 'duu si 'nɩ gboylo 'mɩä 'kʋ, 'nɩ nyɩkpa 'saglö gbä. Wlä ‑maa, 'duu' ‑wʋ 'kʋ 'nɩ wa 'kʋ 'dunʋ 'kʋ pään 'ghlünɔɔ ‑zaa!

¹⁹ 'Nɩ wa kplää bhä ‑bhabhuu 'wlu, 'nɩ wa tu 'nɩ wa bhʋtʋ bhä. Wa woo bhä 'nɩ wa ci bhä nynä ‑maa, ‑a ‑yä ‑kä mie ɛɛ! ‑A yä ‑kä mie ɛɛ! 'Du 'kädʋnʋ ‑ʋ ‑kä leylüü 'fɩɩn 'nɩ ‑ʋ nyɛ bhlä 'mɩɩ käänyʋa leylüü nä, ʋ bhlüü‑ 'gliye bhlo 'coo 'kʋ 'nɩ ʋ ‑lefɩɩn yi nuë!

²⁰ Laagɔduu' kʋnyʋa nä, wa nʋ ‑jäkä ‑mä 'duu yä bhlü! Anyɩ kplɔɔkplɔɔnyʋa, anyɩ Kwlienyɔɔ' lobho lobhonyʋa, anyɩ Laagɔɔ' 'plɔfɛtɩnyʋa, a nʋ ‑jäkä! Gbenyenyii ʋ ‑nʋ'anyɩ lä nä, ɩɩ' ‑za, Laagɔ yä lä anyɩa 'wlu ci.

²¹ 'Nɩ ‑Laagɔzuzuu' lʋʋ‑ ‑kä lä sää 'tɛtɩ nä, ʋ bhlüü‑ cɛkʋbhü 'kädä 'kʋ, a ‑kʋ bhä nynä 'tiiyoo wa bhlü lä 'kʋ 'nɩ wa susuë lä ‑nyʋʋ 'kädʋʋ nä. 'Nɩ ʋ yia jiee' pään. Ʋ pänöa‑ lä ‑mɔɔ nä, ʋ lä 'du 'kädʋnʋ ‑ʋ plöö‑ lä Babilɔɔ nä, sää ‑säkä ‑säkä ʋ 'kä lä bhlü ‑yä nyɩkpɔɔ' kʋ yɩ 'kɔɔn 'yi 'ni.

²² ‑Mɔɔ, Babilɔɔ‑dunʋ nä, ‑dʋnplɩ klänyʋä 'nö‑ö ‑läyɩɔ 'kɔɔn ‑dʋnplʋ 'mnö klä! Laa‑bhlɩnyʋä, ‑yä ‑soklokobhü klänyʋä, ‑yä läglö‑klänyʋä, wa 'nöö ‑läyɩɔ yɩɔ 'kɔɔn 'lʋʋ 'mnö nʋʋ. 'Nɩ ‑gbli‑bhlänyɔ ‑bhlo 'coo ‑läyɩɔ nio. Nyɩkpɔɔ' ‑läyɩɔ ‑gwëdë ‑zɔɔ' bhlü‑wälɩ 'nu.

²³ ‑Naa zëkpëa 'mnö 'näpɛɛ ‑läyɩ 'kɔɔn ‑mɔɔ lie. Wlunöölɩ ‑yä ŋnʋnöölɩ yä yɩ bhɩä. Nyɩkpaa‑ ŋʋ bhlä ‑naa 'mnö ‑lɩɩ 'kpä nä, wa 'plöö bhä 'kʋ 'nɩ wa zi bhä 'ylʋzɔɔ' nyɩkpa 'fɩɩn. 'Nɩ ‑n bhlüü‑ lä ‑naa guu 'kʋ 'nɩ ‑n ‑gbä 'nɩ 'ylʋzɔkʋnyʋä 'fɩɩn yi too.

²⁴ ‑Ɛɛɛ, ‑mää Babilɔɔ‑dunʋ 'mnö, ‑mɔɔ 'plɔfɛtɩnyʋa ‑yä kplɔɔkplɔɔnyʋa' doluu ‑jɛɛ lä sä. Nyɩkpa 'fɩɩn nyɩkpa ‑nʋ ‑lä nyenyi ‑mää 'ylʋzɔɔ nä, ‑mää Babilɔɔduu' waa' doluu ‑jɛɛ lä sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan