Bìoball air-loidhne

'Yii Ghlä‑wälɩ 12 - GOD - u2

'Ŋnɔ ‑yä ‑gbagbamnɛ

¹ 'Nɩ panalɩ 'kädɩ yi ‑laagɔɔ 'mnö ghlää. 'Ŋnɔ, ɔ ‑plä 'ylʋkwädlaa 'mʋ nynä 'kotu, 'nɩ 'cʋʋ ‑kʋɔ ‑kokokpü ‑zɔɔ, 'nɩ ɔ ŋʋʋ‑ bhä 'leyi‑wugblë 'wlu. 'Leyi‑wugblëa nä, wa ‑bhlänöa bhä ‑laagɔzäloyi 'kʋgbä 'sɔ.

² ‑Mä 'ŋnɔɔ ‑kä bhä 'gʋ 'nɩ 'mnö cɩcɩɔ bhɛ lä ‑yä ɔ 'kä gään nä, ɔɔ' 'sʋʋ 'sʋʋ‑lɔɔ, ɔ woo bhɛ.

³ 'Nɩ panalɩ yi bʋkʋ ‑laagɔɔ' ghlää. 'Sää ‑gbagbamnɛ 'kädɛ. Ɛɛ' ‑lɛɛ ‑zlɛɛ. Ɛ ‑kä bhä 'wli ‑ngbɔɔsɔ ‑yä 'vü 'kʋgbä. 'Nɩ 'wlu 'wlu nä, ʋ ŋʋʋ‑ bhä 'leyi‑wugblë.

⁴ ‑Gbagbamnɛnɛ ‑kä bhä ɛɛ' goo 'nɩ ɛ nynipë bhä ‑laagɔzälöö. ‑Laagɔzälöö ‑kʋ bhä 'kpö taa 'kʋ 'nɩ ɛ ‑nynipë 'kpä ‑bhlo 'nɩ ɛ yia 'ylʋzɔɔ 'pä. 'Nɩ 'ŋnɔɔ 'gä bhɛ lä gään nä, ɛ yio 'yikʋ 'nynigo ‑yä ɔ kä bhɛ ‑gään nä, ɛ 'kä 'yuo lü.

⁵ ‑Mä 'ŋnɔɔ ‑gään 'yuŋwadi. 'Yunɔ nä, ɔ yi 'bhlɩɩ 'fɩɩn kpaanyɔ 'plö 'nɩ ɔ yii lätö‑kpämää' 'tie. 'Nɩ 'kpobhu ‑bhlo 'kʋ wa yi 'yuo Laagɔ yëku fä, ‑mɔɔ ʋʋ' 'leyi‑këkpëa yëku.

⁶ 'Nɩ 'ŋnɔɔ yi ‑guu 'nɩ ɔ yi 'popie 'mnö mʋ. ‑Mɔɔ Laagɔ ŋʋʋ‑ lä ɔɔ' kʋdä ‑yä ɔ 'kä ‑mɔɔ kʋ wa 'kɔ loo ‑aaa, ylɩɩ ‑bhɛgɛ ‑yä gwlɩ ‑ngbüü 'ci 'sɔ ‑yä ylɩɩ gwlɩ taa (1.260).

⁷ ‑Mä tʋʋ‑ ‑bhlü lä ‑laagɔɔ' naa! ‑Laagɔzuzu 'kädʋʋ wa laa lä Mikayɛɛ nä, ʋ ‑yä ‑Laagɔzizi 'sɔ, wa ‑yä ‑gbagbamnɛɛ 'sɔ 'nii‑ tʋ 'kʋ. ‑Gbagbamnɛɛ ‑yä ɛɛ' ‑zizii ‑yʋwa 'sɔ ‑vë.

⁸ ‑Mä tʋʋ ‑sɩä ‑gbagbamnɛɛ ‑yä ɛɛ' ‑zizii 'sɔ 'nɩ ɩɩ' bhɛ ‑mɔɔ Laagɔɔ' kʋdä ‑kä.

⁹ 'Nɩ ‑gbagbamnɛ 'kädɛnɛ wa yie Laagɔɔ' 'tlü, 'nɩ wa yie ‑dʋdʋkʋ pään. ‑Gbagbamnɛɛ, ɛmɛ wa laa lä ‑gɔgɔbhlää' ‑leeboluu. Ɛmɛ wa laa lä 'Dëvlo ‑zuzuu, ɩyä Satään. Ɛmɛɛ‑ 'nyigë lä 'ylʋzɔɔ nyɩkpaa 'fɩɩn. Wa tlie‑ ‑mɔɔ Laagɔduu' ɛ ‑yä ‑zizii‑ ‑yɛsɔ plöö‑ bhlä nä, 'nɩ wa yie ‑mää ‑dʋdʋkʋ pään.

¹⁰ 'Nɩ nuwälɩɩ' lɩɩ‑ ‑kä lä sää 'tɛtɩ nä, n yii 'nu, ɩ ‑ghlää Laagɔduu'. Ɩ lä ‑pɛpɛɛ nä, ‑lɔɔ nëë‑bhalɩɩ' 'tänyɩɛ yä ŋëë! ‑Pɛpɛɛ nä, ‑anyɩa Laagɔ yä ʋʋ' 'tɛtɩɩ ‑yä ʋʋ' 'kämälɩɩ 'sɔ pana! ‑Pɛpɛɛ nä, 'päwaa 'fɩɩn, ɔɔ' lobho lobhonyɔɔ Klisö wlɩɩ ‑a ‑kʋ ylä. ‑Ɔnöza bhä? ‑ɔ 'nyɛɛ bhlä ‑a bhelie gbʋ ‑anyɩa Laagɔɔ dëlü, ‑gägäzëlu ‑yä 'sabo nä, ɔ yä ‑zɔɔ bhlü.

¹¹ ‑A bhelie ‑yɔ sɩä. 'Bhabhlöyuo doluu ‑yä waa' ‑dläfʋɛɛ' lülɩɩ 'mnö wa ‑sɩänöɔ lä. Wa ‑wʋ ŋoo‑, wa ‑sä wa yëkuu' zëkpë 'nɩ wa ‑vë.

¹² Ɩ ‑kä ylä 'ŋnö nä, Laagɔduu, ɩyä anyɩmɔɔ‑ ‑kʋ lä ‑mɔɔ Laagɔduu' nä, a ‑nʋ ‑jäkä! ‑Mä anyɩmɔɔ‑ ‑kʋ lä ‑dʋdʋkʋ nä, ɩyä anyɩmɔɔ‑ ‑kʋ lä yä jiee 'klʋ nä, a yä mie! ‑Ɔnöza bhää? 'Dëvloo ‑yi lä sɔɔ nynä ‑mä ʋʋ' 'tänyɩɛ yɩɔ 'mʋ ‑tlʋ nä, ʋʋ' lʋʋ ‑gbʋgblɛ 'kädɛ bhlä lä nä, ʋ ‑yä kwli, ʋ ya'anyɩ ‑mɔɔ yëku yi.

¹³ ‑Mä 'tänyɩɩ ‑gbagbamnɛɛ ‑yibhë lä sɔɔ nynä ‑mä ‑dʋdʋkʋ ɛ ‑bhlüü nä, 'ŋnɔɔ‑ ‑gään bhlä 'yuŋwadio nä, kɛ cio‑ 'tlülɩ 'kʋ.

¹⁴ ‑Mä 'ŋnɔnɔ wa nyɩɔ‑ mnɛgwli‑bhlä‑cɩcɛɛ' ‑papü 'sɔ, 'nɩ ɔ bluu‑, 'nɩ ‑mɔɔ 'popie 'mnö, ‑gbäsɩɩ Laagɔ ŋʋʋ‑ bhlä ɔɔ' kʋda nä, ɔ ‑mʋ ‑mɔɔ ‑yä ɔ 'kä ‑leeboluu 'yii zizio. Ɩyä ɔ 'kä ‑mɔɔ kʋ ‑yä wa 'kɔ loo 'ylʋbɔ taa ‑yä 'klëë 'tänyɩɩ.

¹⁵ ‑Mä ‑leeboluu nëë' 'nyu ‑bha ‑mɔɔ, 'nɩ ʋ pʋʋ‑ 'ŋnɔɔ bʋkʋ. Ʋ ‑nʋ sää 'plöplönyiee' ‑lɛ 'kädɛ ‑yä ɛ 'kɔ gbisie ɛ 'kɔ fämʋ.

¹⁶ ‑Mä gbämnä ‑dʋdʋʋ ‑yi 'ŋnɔɔ 'kʋ. Ʋ ‑känöɔ 'klʋ 'nɩ 'nyuu 'fɩɩn ‑gbagbamnɛɛ paa‑ lä nä, ‑dʋdʋʋ ‑mnʋʋ.

¹⁷ ‑Mä 'ŋnɔɔ ‑yä 'lɔlʋʋ 'fɩɩn‑ ‑ghlänöɔ lä 'mnö 'nɩ ‑ʋ ŋʋ lä Laagɔɔ' ‑Jläma 'klʋkpää nä, 'nɩ ʋ lü lä 'kɔɔkɔɔ Zozii' ‑dläfʋɛ nä, waa' plɛkʋ si bhä ‑gbagbamnɛɛ, ɩ ‑kä 'ŋnö 'nɩ ɛ yiwa tʋ ‑lä.

¹⁸ 'Nɩ ɛ yi ji‑zägbö ‑gɔga 'mnö 'nynigo ‑kää mʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan