Bìoball air-loidhne

'Yii Ghlä‑wälɩ 11 - GOD - u2

‑Dläfʋɛ‑lünyʋä 'sɔ

¹ 'Nɩ wa yi'i ‑yukwe 'nyɛ. ‑Yukwee' lɛɛ wa yi lä 'kʋ 'bhlü 'nɩ wa yi lä lʋʋ nyäka nä. 'Nɩ wa yi'i soo, wlä ‑n mʋ ‑yä ‑n 'gä Laagɔ‑bhutu 'kädʋʋ nyäka! ‑N nyäka 'sɩɩ 'cibhisäda. Ɩyä nyɩkpa ‑wa bʋbɔ lä ‑mɔɔ Laagɔ‑bhutuu 'mnö nä, ‑n zɛnʋwa.

² ‑Mä ‑naa nyäka ‑lä ‑kä jluu! ‑Ɔnöza bhää? Jluu nä, ‑mɔɔ' 'yigäda‑bhlɩɩ 'mnö nyɩkpaa' ‑lʋa ‑wʋ lä Laagɔ ‑yi nä, wamä wa ‑cienʋ lä. Wamä nä, wa yi 'sää 'titi kplɔɔkplɔɔ‑duu cɔ. Wa yiu cɔdä kʋ ‑aaa, 'nɩ 'cii gwlɩ 'sɔ ‑yä 'sɔ yi 'klʋ glää.

³ 'Nɩ n yi 'naa ‑dläfʋɛ‑lünyʋa 'sɔ lobho. Wa yi ‑bhɛgö ylo 'nɩ wa yi Laagɔɔ' nüdö ‑sää. Wa yii ‑säädä kʋ ‑aaa, 'nɩ ylɩɩ' ‑bhɛgɛ ‑yä ylɩɩ gwlɩ ‑ngbüü' 'ci 'sɔɔ ‑yä ylɩɩ gwlɩ taa (1.260) yi glää.

⁴ ‑Dläfʋɛ‑lünyʋa 'sɔ nä, wamää‑ plöö‑ lä Oliviesii 'sɔ ‑yä 'näpöö 'sɔ. Ɩmɩɩ‑ ‑kʋ lä ‑dʋdʋʋ 'fɩɩn Kwlienyɔɔ dëlü.

⁵ ‑Dläfʋɛ‑lünyʋa 'sɔ nä, nyɩkpɔ kä cii‑ nynä ‑mä ɔ 'kwa wälɩ ‑nyenyi nʋ nä, kä ‑kosu ghlänʋwa nëë' 'nɩ ʋ sie ‑lɔɔ' ‑zɔbhlɛgbänyʋa. Nä, ‑ɔ yi lä ci nynä ‑mä ɔ 'kwa nyenyi nʋ nä, sää' 'kwie ɔ 'kä lä 'ku.

⁶ Wa ‑kä 'päwä ‑yä wa 'kä ‑laagɔɔ ‑gbaa ‑yä 'nyuu kä yɩ bhlä. 'Nɩ 'tänyɩɛ 'fɩɩn wa 'kä lä 'kʋ 'bhlü ‑yä wa 'kä Laagɔɔ' nüdöö ‑sää nä, 'nyuu ‑lä bhlä. Wa ‑kä 'sɩɩ 'päwä ‑yä wa 'kä gbä ‑yä 'nyu 'kä doluu' jɩjlää. 'Nɩ wa ‑kä 'sɩɩ 'päwa 'nɩ, 'tänyɩɩ 'fɩɩn 'mnö wa ‑waa lä nä, wa yi gbä 'nɩ ‑mää 'ylʋzɔɔ, nyäkälɩɩ' nü nü nü yi ‑mɔɔ yi.

⁷ 'Döö wa bhɛɛ‑ la nä, wa kɩ yɩ ‑säälɩ ‑bhɩä nä, mnɛɛ ‑ɛ bha lä nyäkälɩɩ' ‑gbazlʋʋ 'kädʋʋ 'mnö nä, ɛ yiwa tʋ ‑lä 'nɩ ɛ yiwa ‑sɩä, 'nɩ ɛ yiwa 'bhlä.

⁸ 'Nɩ waa' ‑gäzöö yi 'du 'kädʋʋ 'clɩkpa 'mnö too. ‑Lɔɔ' 'clɩkpa 'mnö, ‑lɔɔ wa ‑bhoo lä 'sɩɩ waa' Kwlienyɔɔ 'kusu 'yi. 'Du 'kädʋnʋʋ' panalɩɩ nä, kɩ ‑kʋ lä nynä ‑mä Sodɔmʋ‑duu' wälɩɩ, ɩyä Ejipitibhlɩ 'kʋʋ wälɩɩ.

⁹ 'Ylʋzɔɔ' nyɩkpaa 'fɩɩn, ‑mɔɔ 'lɔlʋkpɔɔ 'fɩɩn nä, ‑mɔɔ' dää 'fɩɩn nyɩkpa ‑kʋ 'nɩ wa ‑kä lä 'bhuwälɩ nä, ɩyä 'ylʋzɔɔ' 'bhlɩɩ 'fɩɩn yi yi 'nɩ ɩ yi waa' ‑gäzöö wloo. Wa yii wloodä kʋ ‑aaa, 'nɩ ylɩɩ taa ‑yä 'klë yi 'plö. Waa' ‑lä ŋoo nynä ‑mä wa 'kɩɩ zizie.

¹⁰ 'Nɩ 'ylʋzɔkʋnyʋa ‑pʋpɛɛ yiwa 'bhlä waa' 'kwiee ‑za. Wa yi ‑lɔɔ' ‑jäkaa nʋ 'nɩ wa yi bɔɔ 'pää ‑pää. ‑Ɔnöza bhää? Kä 'plɔfɛtɩ‑nyʋänä 'sɔ ‑gbä 'nɩ 'ylʋzɔkʋnyʋä 'kwlɩ ‑bhɩänʋwa kpänyɩ.

¹¹ ‑Mä ylɩɩ taa ‑yä 'klë plöö‑ ylä nä, nyämʋ lʋʋ‑ yi lä nyɩkpɔ 'kuëë gälɩä nä, ʋ ‑bha Laagɔ yëku 'nɩ ʋ ‑plʋwa 'mnö, 'nɩ wa yi 'kʋ ‑bha. ‑Mä nyɩkpa 'fɩɩn ‑wa niwa‑ lä 'yi nä, kä ‑ŋänö 'kädö ‑plʋwa.

¹² 'Nɩ nuwälɩ lɩɩ‑ ‑kä lä sää 'tɛtɩ nä, ɩ ‑ghlää ‑laagɔɔ' 'nɩ 'plɔfɛtɩnyʋa nui‑, ɩ sonʋwa bhä nynä ‑mä, a ‑gblää ‑yä a yi ‑mää! 'Nɩ waa' ‑zɔbhlɛgbänyʋa 'fɩɩn 'klʋ, 'nyukpɔ yi yi 'nɩ, ʋ yiwa Laagɔduu' gblaa.

¹³ ‑Lɔɔ' 'tänyɩɛ ‑bhlobhlo 'mnö, ‑dʋdʋ ‑tɩtɛ. Ʋ ‑tɩtɛ 'sää kpänyɩ 'nɩ 'du 'kädʋʋ ‑dënöɔ 'ci 'kʋgbä 'kʋ 'nɩ, 'kʋgbäna‑klëa yi bhlü ‑vluu! ‑Lɔɔ' ‑dʋdʋʋ ‑ʋ ‑tɩtɛ lä nä, ʋ bhlää‑ nyɩkpaa' ‑bhɛgö ‑ngbɔɔsɔ (7.000) 'kpobhu ‑bhlo 'kʋ. 'Nɩ nyɩkpaa' ‑lʋa ‑wʋ lä kuu‑ nä, ‑ŋänö plʋwa kpänyɩ, ɩ ‑kä bhɛ 'ŋnö 'nɩ, Laagɔɔ ‑ɔ ‑nʋ lä ŋɔkʋʋ' ‑lɩɩ 'fɩɩn nä, wa fänʋ bhä 'ŋnu.

¹⁴ 'Sɔna ‑muzue ‑yä 'plö. ‑Mä ‑zee nä, tana ‑muzʋe yi ‑kä yi!

‑Ngbɔɔsɔna ‑läglɛɛ 'mɛɛ‑ gbä ylä

¹⁵ 'Nɩ ‑ngbɔɔsɔna ‑Laagɔzuzu yi ʋʋ' läglɛɛ nyämʋʋ' 'pä. 'Nɩ nuwälɩ lɩɩ‑ ‑kä lä 'sää 'tɛtɩ kpänyɩ nä, ɩ ‑ghlää ‑Laagɔduu' 'nɩ ɩ cii‑, ɩ lä 'ylʋzɔɔ 'leyibhlɩɩ 'fɩɩn 'päwaa nä, ‑anyɩa Kwlienyɔɔ Laagɔ ɔ ‑yä ɔɔ' lobho lobhonyɔ Klisö, wamää‑ ‑kaa ylä 'kɔɔkɔɔ ‑za.

¹⁶ 'Nɩ 'kɔgwlɛnyʋa' glʋ 'nɩ ‑mɔɔnä ‑wa ‑kʋ lä ‑mɔɔ Laagɔ dëlüu' 'leyi‑këkpüü 'kʋ nä, 'nɩ wa yi wlu sä ‑glaa 'nɩ wa yi Laagɔ bʋbɔ.

¹⁷ Wlä Kwlienyɔ Laagɔ‑, ‑Mɔɔ ‑zii lä 'tɛtɩɩ 'fɩɩn 'wlu, 'Nɩ ‑mɔɔ ‑kʋ lä 'nɩ ‑ɔ ‑kʋ bhlä nä, ‑A fänö‑ö 'ŋnu! ‑Naa 'tɛtɩ 'kädɩɩ, ‑n ‑ghlänɩ 'mnö 'Nɩ ‑n kwlie‑ ‑naa 'kämälɩɩ.

¹⁸ 'Bhlɩɩ 'fɩɩn ‑yä zɔgblö 'sɔ ‑yi, ‑Mä ‑mɔɔ nä, ‑naa ‑gbʋgblɛ 'kädɛɛ' 'tänyɩɛ 'mɛɛ‑ ‑kʋ ylä ‑lää. 'Kudukua 'titee ‑n 'gwa lä 'ŋʋ nä, Ɛɛ' 'tänyɩɛ yä ŋëë. ‑Naa ‑gänʋnyʋa, 'plɔfɛtɩnyʋa, Ɩyä nyɩkpaa 'fɩɩn ‑wa plöö‑ lä ‑naa lʋä 'Nɩ ‑wa ŋʋʋ‑ lä 'klʋkpää nä, Nyɩkpa 'tɩkɩɩlɩa ‑yä nyɩkpa 'kädʋa, 'Tänyɩɛ 'mnö ‑n 'gwa lä bɔɔ 'pää nä, ‑Lɔɔ yä ŋëë. 'Ylʋzɔɔ' ‑lɩɩ' nuënyʋa, Waa' 'tänyɩɛ yä ŋëë ‑yä ‑n 'gwa yɩ nuë.

¹⁹ ‑Nɩnɩ plöö‑ ylä nä, 'nɩ ‑mɔɔ Laagɔduu' Laagɔ‑bhutu 'kädʋʋ yi känöɔ. 'Nɩ mɛnʋ ‑gboluu' 'lokwlee yi 'kʋ ghlä. 'Nɩ ‑laagɔɔ' yi ‑ŋnäzälö nʋ, 'nɩ nuwälɩ yi ‑mɔɔ ghlää. 'Nɩ zädlɛ yi ‑gaa, 'nɩ ‑dʋdʋ yi tɩtɛ. 'Nɩ wätlɩ‑nyuu ‑nʋ ‑zälö 'kädö 'nɩ ɩ bhlü bhä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan